ਮੁਜ਼ੱਫਰਨਗਰ, ਯੂਪੀ। ਪੰਜਾਬ ਸਣੇ 5 ਸੂਬਿਆਂ ਦੀਆਂ ਵਿਧਾਨ ਸਭਾ ਚੋਣਾਂ ਨੂੰ ਮਹਿਜ਼ 5 ਮਹੀਨਿਆਂ ਦਾ ਸਮਾਂ ਬਾਕੀ ਹੈ। ਅਜਿਹੇ ਵਿੱਚ ਖੇਤੀ ਕਾਨੂੰਨ ਰੱਦ ਕਰਵਾਉਣ ਲਈ ਪਿਛਲੇ 9 ਮਹੀਨਿਆਂ ਤੋਂ ਦਿੱਲੀ ਦੀਆਂ ਬਰੂਹਾਂ ‘ਤੇ ਬੈਠੇ ਕਿਸਾਨ ਹੁਣ ਸਰਕਾਰ ਨੂੰ ‘ਵੋਟ ਦੀ ਚੋਟ’ ਕਰਨ ਦੇ ਮੂਡ ਵਿੱਚ ਹਨ। ਇਸੇ ਦੇ ਚਲਦੇ ਐਤਵਾਰ ਨੂੰ ਯੂਪੀ ਦੇ ਮੁਜੱਫਰਨਗਰ ਵਿੱਚ ਕਿਸਾਨਾਂ ਵੱਲੋਂ ਮਹਾਂਪੰਚਾਇਤ ਕੀਤੀ ਗਈ, ਜਿਸ ਵਿੱਚ ‘ਮਿਸ਼ਨ ਯੂਪੀ ਅਤੇ ਉੱਤਰਾਖੰਡ’ ਦਾ ਆਗਾਜ਼ ਕੀਤਾ ਗਿਆ।
ਵੋਟ ਦੀ ਚੋਟ ਜ਼ਰੂਰੀ- ਰਾਕੇਸ਼ ਟਿਕੈਤ
ਮਹਾਂਪੰਚਾਇਤ ਦੇ ਮੰਚ ਤੋਂ ਕਿਸਾਨਾਂ ਦੇ ਇਕੱਠ ਨੂੰ ਸੰਬੋਧਿਤ ਕਰਦੇ ਹੋਏ ਭਾਰਤੀ ਕਿਸਾਨ ਯੂਨੀਅਨ ਦੇ ਆਗੂ ਰਾਕੇਸ਼ ਟਿਕੈਤ ਨੇ ਨਾ ਸਿਰਫ਼ ਕਿਸਾਨੀ, ਬਲਕਿ ਕਈ ਹੋਰ ਮੁੱਦਿਆਂ ਨੂੰ ਲੈ ਕੇ ਕੇਂਦਰ ਸਰਕਾਰ ਖਿਲਾਫ਼ ਹਮਲਾ ਬੋਲਿਆ। ਟਿਕੈਤ ਨੇ ਕਿਹਾ, “ਅੜੀਅਲ ਸਰਕਾਰ ਨੂੰ ਝੁਕਾਉਣ ਲਈ ਵੋਟ ਦੀ ਚੋਟ ਜ਼ਰੂਰੀ ਹੈ। ਦੇਸ਼ ਬਚੇਗਾ, ਤਾਂ ਹੀ ਸੰਵਿਧਾਨ ਬਚੇਗਾ।” ਉਹਨਾਂ ਕਿਹਾ, “ਸਰਕਾਰ ਨੇ ਰੇਲ, ਤੇਲ ਅਤੇ ਹਵਾਈ ਅੱਡੇ ਵੇਚ ਦਿੱਤੇ ਹਨ। ਕਿਸਨੇ ਸਰਕਾਰ ਨੂੰ ਇਹ ਹੱਕ ਦਿੱਤਾ। ਇਹ ਬਿਜਲੀ ਵੇਚਣਗੇ ਅਤੇ ਪ੍ਰਾਈਵੇਟ ਕਰਨਗੇ। ਸੜਕ ਵੇਚਣਗੇ ਅਤੇ ਸੜਕ ‘ਤੇ ਚੱਲਣ ਲਈ ਸਾਡੇ ਤੋਂ ਟੈਕਸ ਵੀ ਵਸੂਲਣਗੇ।”
Rakesh Tikait just arrived at Kisan Mahapanchayat.#मुजफ्फरनगर_किसान_महापंचायत pic.twitter.com/naT98n1xkX
— Kisan Ekta Morcha (@Kisanektamorcha) September 5, 2021
ਕਾਨੂੰਨ ਵਾਪਸੀ ਤੱਕ ਘਰ ਵਾਪਸੀ ਨਹੀਂ- ਟਿਕੈਤ
ਰਾਕੇਸ਼ ਟਿਕੈਤ ਨੇ ਕਿਹਾ ਕਿ ਜਦੋਂ ਤੱਕ ਕਾਨੂੰਨ ਵਾਪਸ ਨਹੀਂ ਹੋਣਗੇ, ਉਹ ਦਿੱਲੀ ਦੇ ਬਾਰਡਰ ਤੋਂ ਨਹੀਂ ਹਟਣਗੇ। ਚਾਹੇ ਸਾਡੀਆਂ ਕਬਰਾਂ ਬਾਰਡਰ ‘ਤੇ ਹੀ ਕਿਉਂ ਨਾ ਬਣਾਉਣੀਆਂ ਪੈਣ। ਉਹਨਾਂ ਕਿਹਾ ਕਿ ਲੜਾਈ ਕਿਸਾਨਾਂ ਸਣੇ ਸਾਰੇ ਵਰਗਾਂ ਦੇ ਦਮ ‘ਤੇ ਲੜੀ ਜਾਵੇਗੀ।
ਟਿਕੈਤ ਨੇ ਕਿਹਾ ਕਿ ਇਹ ਸਰਕਾਰ ਤੋੜਨ ਦਾ ਕੰਮ ਕਰਦੀ ਹੈ ਅਤੇ ਅਸੀਂ ਜੋੜਨ ਦਾ ਕੰਮ ਕਰਦੇ ਹਾਂ। ਇਸ ਤਰ੍ਹਾਂ ਦੀ ਸਰਕਾਰ ਜੇਕਰ ਦੇਸ਼ ਵਿੱਚ ਹੋਵੇਗੀ, ਤਾਂ ਇਹ ਦੰਗਾ ਕਰਵਾਉਣ ਦਾ ਕੰਮ ਕਰੇਗੀ।
2024 ਤੱਕ ਵੀ ਅੰਦੋਲਨ ਲਈ ਤਿਆਰ- ਰਾਜੇਵਾਲ
ਮਹਾਂਪੰਚਾਇਤ ਵਿੱਚ ਕਿਸਾਨ ਆਗੂ ਬਲਬੀਰ ਸਿੰਘ ਰਾਜੇਵਾਲ ਵੀ ਮੋਦੀ ਸਰਕਾਰ ‘ਤੇ ਜੰਮ ਕੇ ਵਰ੍ਹੇ। ਉਹਨਾਂ ਕਿਹਾ ਕਿ ਇਹ ਸਰਕਾਰ ਵੱਡੇ ਉਦਯੋਗਪਤੀਆਂ ਨੂੰ ਫਾਇਦਾ ਪਹੁੰਚਾਉਣ ਵਿੱਚ ਜੁਟੀ ਹੈ। ਟਿਕੈਤ ਨੇ ਕਿਹਾ, “ਕਿਸਾਨ ਕਿਸੇ ਵੀ ਕੀਮਤ ‘ਤੇ ਪਿੱਛੇ ਨਹੀਂ ਹਟਣਗੇ, ਫਿਰ ਚਾਹੇ ਲੜਾਈ 2024 ਤੱਕ ਹੀ ਕਿਉਂ ਨਾ ਲੜਨੀ ਪਵੇ।”
10 ਲੱਖ ਤੋਂ ਵੱਧ ਲੋਕਾਂ ਦੇ ਸ਼ਾਮਲ ਹੋਣ ਦਾ ਦਾਅਵਾ
ਮਹਾਂਪੰਚਾਇਤ ਵਿੱਚ ਕਿਸਾਨਾਂ ਦੀ ਜ਼ਬਰਦਸਤ ਭੀੜ ਨਜ਼ਰ ਆਈ। ਨਾ ਸਿਰਫ ਪੰਡਾਲ, ਬਲਕਿ ਨੇੜਲਾ ਪੂਰਾ ਇਲਾਕਾ ਕਿਸਾਨਾਂ ਨਾਲ ਭਰਿਆ ਨਜ਼ਰ ਆਇਆ। ਸੰਯੁਕਤ ਕਿਸਾਨ ਮੋਰਚੇ ਨੇ ਮਹਾਂਪੰਚਾਇਤ ਨੂੰ ਇਤਿਹਾਸਕ ਦੱਸਦੇ ਹੋਏ ਇਸ ਵਿੱਚ 10 ਲੱਖ ਤੋਂ ਵੱਧ ਲੋਕਾਂ ਦੇ ਸ਼ਾਮਲ ਹੋਣ ਦਾ ਦਾਅਵਾ ਕੀਤਾ।
27 ਸਤੰਬਰ ਨੂੰ ਭਾਰਤ ਬੰਦ ਦਾ ਐਲਾਨ
ਮਹਾਂਪੰਚਾਇਤ ਵਿੱਚ ਕਿਸਾਨ ਮੋਰਚੇ ਵੱਲੋਂ 27 ਸਤੰਬਰ ਨੂੰ ਭਾਰਤ ਬੰਦ ਦਾ ਐਲਾਨ ਵੀ ਕੀਤਾ ਗਿਆ। ਪਹਿਲਾਂ 25 ਸਤੰਬਰ ਨੂੰ ਬੰਦ ਦਾ ਸੱਦਾ ਦਿੱਤਾ ਗਿਆ ਸੀ, ਪਰ ਹੁਣ ਇਸ ਨੂੰ ਬਦਲ ਕੇ 27 ਸਤੰਬਰ ਕਰ ਦਿੱਤਾ ਗਿਆ ਹੈ।
