ਚੰਡੀਗੜ੍ਹ। ਨਵਜੋਤ ਸਿੰਘ ਸਿੱਧੂ ਨੇ ਬੇਸ਼ੱਕ ਕੈਪਟਨ ਅਮਰਿੰਦਰ ਸਿੰਘ ਨੂੰ ਕਲੀਨ ਬੋਲਡ ਕਰ ਦਿੱਤਾ ਹੈ, ਪਰ ਕੈਪਟਨ ਸਟਰਾਈਕ ਛੱਡਣ ਦੇ ਮੂਡ ਵਿੱਚ ਨਹੀਂ। ਸੀਐੱਮ ਅਹੁਦੇ ਤੋਂ ਅਸਤੀਫਾ ਦੇਣ ਮਗਰੋਂ ਕੈਪਟਨ ਨੇ ਸਿੱਧੂ ‘ਤੇ ਤਿੱਖੇ ਹਮਲੇ ਬੋਲੇ। ਮੀਡੀਆ ਨੂੰ ਦਿੱਤੇ ਇੰਟਰਵਿਊ ਵਿੱਚ ਕੈਪਟਨ ਨੇ ਸਖਤ ਲਹਿਜੇ ਵਿੱਚ ਕਿਹਾ ਕਿ ਉਹਨਾਂ ਦੀ ਸਿਆਸੀ ਪਾਰੀ ਹਾਲੇ ਖਤਮ ਨਹੀਂ ਹੋਈ ਹੈ। ਉਹਨਾਂ ਕਿਹਾ ਕਿ ਮੇਰੇ ਵਿੱਚ ਹਾਲੇ ਵੀ ਦਮ ਬਾਕੀ ਹੈ।
ਬਤੌਰ ਸੀਐੱਮ ਸਿੱਧੂ ਮਨਜੂਰ ਨਹੀਂ- ਕੈਪਟਨ
ਕੈਪਟਨ ਅਮਰਿੰਦਰ ਸਿੰਘ ਨੇ ਸਾਫ ਸ਼ਬਦਾਂ ਵਿੱਚ ਕਿਹਾ ਕਿ ਉਹਨਾਂ ਨੂੰ ਨਵਜੋਤ ਸਿੰਘ ਸਿੱਧੂ ਬਤੌਰ ਮੁੱਖ ਮੰਤਰੀ ਬਿਲਕੁੱਲ ਮਨਜੂਰ ਨਹੀਂ। ਉਹਨਾਂ ਕਿਹਾ, “ਸਿੱਧੂ ਇੱਕ ਆਫਤ ਹਨ। ਉਹ ਪੰਜਾਬ ਲਈ ਬਿਲਕੁੱਲ ਸਹੀ ਨਹੀਂ। ਕੈਬਨਿਟ ਮੰਤਰੀ ਰਹਿੰਦਿਆਂ ਉਹਨਾਂ ਕੋਲ 7 ਮਹੀਨੇ ਦੀਆਂ ਫਾਈਲਾਂ ਪੈਂਡਿੰਗ ਪਈਆਂ ਸਨ, ਜਿਸ ਕਾਰਨ ਮੈਨੂੰ ਉਹਨਾਂ ਦਾ ਮਹਿਕਮਾ ਵਾਪਸ ਲੈਣਾ ਪਿਆ। ਜਿਹੜਾ ਸ਼ਖਸ ਬਤੌਰ ਕੈਬਨਿਟ ਮੰਤਰੀ ਸਹੀ ਕੰਮ ਨਹੀਂ ਕਰ ਸਕਿਆ, ਅਜਿਹਾ ਸ਼ਖਸ ਪੂਰਾ ਪੰਜਾਬ ਕਿਵੇਂ ਸੰਭਾਲ ਸਕਦਾ ਹੈ।” ਹਾਲਾਂਕਿ ਉਹਨਾਂ ਦਾਅਵਾ ਕੀਤਾ ਕਿ ਸਿੱਧੂ ਸਿਰਫ਼ ਪ੍ਰਧਾਨਗੀ ਦੇ ਅਹੁਦੇ ਤੱਕ ਹੀ ਨਹੀਂ ਸੀਮਤ ਰਹਿਣਾ ਚਾਹੁੰਦੇ, ਉਹ ਸੀਐੱਮ ਬਣਨ ਦੀ ਚਾਹ ਰਖਦੇ ਹਨ।
ਕੈਪਟਨ ਨੇ ਇਹ ਵੀ ਕਿਹਾ ਕਿ ਉਹਨਾਂ ਨੇ 4 ਹਫਤੇ ਪਹਿਲਾਂ ਹੀ ਸੋਨੀਆ ਗਾਂਧੀ ਨਾਲ ਮੁਲਾਕਾਤ ਕਰਕੇ ਸਾਫ ਕਰ ਦਿੱਤਾ ਸੀ ਕਿ ਉਹ ਸਿੱਧੂ ਨਾਲ ਕੰਮ ਨਹੀਂ ਕਰ ਸਕਦੇ। ਉਹਨਾਂ ਕਿਹਾ, “ਕਿਉਂਕਿ ਮੈਂ ਸਿੱਧੂ ਨੂੰ ਚੰਗੀ ਤਰ੍ਹਾਂ ਜਾਣਦਾ ਹਾਂ, ਇਸ ਲਈ ਮੈਨੂੰ ਪਤਾ ਸੀ ਕਿ ਮੈਂ ਲੈਫਟ ਚੱਲਾਂਗਾ ਤੇ ਉਹ ਰਾਈਟ, ਜੋ ਮੁਮਕਿਨ ਨਹੀਂ ਸੀ।”
ਸਿੱਧੂ ਨੂੰ ਪਾਕਿਸਤਾਨ ਤੋਂ ਸਮਰਥਨ- ਕੈਪਟਨ
ਪੰਜਾਬ ਕਾਂਗਰਸ ਪ੍ਰਧਾਨ ‘ਤੇ ਹਮਲਾ ਬੋਲਦਿਆਂ ਕੈਪਟਨ ਨੇ ਅਗਲੀਆਂ-ਪਿਛਲੀਆਂ ਸਾਰੀਆਂ ਪਰਤਾਂ ਖੋਲ੍ਹ ਦਿੱਤੀਆਂ। ਉਹਨਾਂ ਕਿਹਾ, “ਸਿੱਧੂ ਦੇਸ਼ ਦੀ ਸੁਰੱਖਿਆ ਲਈ ਖਤਰਾ ਹਨ, ਕਿਉਂਕਿ ਉਹਨਾਂ ਦੇ ਪਾਕਿਸਤਾਨ ਨਾਲ ਗੂੜੇ ਸਬੰਧ ਹਨ।” ਕੈਪਟਨ ਨੇ ਕਿਹਾ ਕਿ ਉਹਨਾਂ ਨੇ ਸਿੱਧੂ ਨੂੰ ਇਮਰਾਨ ਖਾਨ ਦੇ ਸਹੁੰ-ਚੁੱਕ ਸਮਾਗਮ ਲਈ ਪਾਕਿਸਤਾਨ ਜਾਣ ਨੂੰ ਮਨ੍ਹਾਂ ਕੀਤਾ ਸੀ, ਬਲਕਿ ਪਾਕਿ ਆਰਮੀ ਚੀਫ ਨੂੰ ਜੱਫੀ ਪਾਉਣ ਲਈ ਉਹਨਾਂ ਨੂੰ ਲਤਾੜਿਆ ਵੀ ਸੀ। ਪਰ ਸਿੱਧੂ ਨੇ ਇੱਕ ਨਹੀਂ ਸੁਣੀ। ਉਹਨਾਂ ਸਾਫ ਸ਼ਬਦਾਂ ਵਿੱਚ ਕਿਹਾ ਕਿ ਸਿੱਧੂ ਨੂੰ ਪਾਕਿਸਤਾਨ ਦਾ ਸਮਰਥਨ ਹਾਸਲ ਹੈ।
CLP ਦੀ ਮੀਟਿੰਗ ਮੈਨੂੰ ਹਟਾਉਣ ਲਈ ਸੀ- ਕੈਪਟਨ
ਕੈਪਟਨ ਅਮਰਿੰਦਰ ਸਿੰਘ ਨੇ ਇਹ ਵੀ ਕਿਹਾ ਕਿ ਹਾਈਕਮਾਂਡ ਵੱਲੋਂ ਉਹਨਾਂ ਨੂੰ ਬਿਨ੍ਹਾਂ ਦੱਸੇ ਵਿਧਾਇਕ ਦਲ ਦੀ ਬੈਠਕ ਸੱਦੀ ਗਈ ਸੀ। ਨਰਾਜ਼ਗੀ ਜਾਹਿਰ ਕਰਦਿਆਂ ਉਹਨਾਂ ਕਿਹਾ, “ਮੈਂ CLP ਦਾ ਆਗੂ ਸੀ, ਇਸ ਲਈ ਮੀਟਿੰਗ ਸੱਦੇ ਜਾਣ ਦਾ ਹੱਕ ਵੀ ਮੇਰਾ ਸੀ। ਪਰ ਮੈਨੂੰ ਹੀ ਮੀਟਿੰਗ ਬਾਰੇ ਸੱਦਿਆ ਨਹੀਂ ਗਿਆ। ਜਾਹਿਰ ਹੈ ਮੀਟਿੰਗ ਮੈਨੂੰ ਹਟਾਉਣ ਲਈ ਸੱਦੀ ਗਈ ਸੀ।“
‘ਸਿੱਧੂ ਨੇ ਸ਼ੁਰੂ ਕੀਤੀ ਗੇਮ, ਖਤਮ ਮੈਂ ਕਰਾਂਗਾ’
ਕੈਪਟਨ ਨੇ ਸਖਤ ਲਹਿਜੇ ਵਿੱਚ ਕਿਹਾ ਕਿ ਸਿੱਧੂ ਜੇਕਰ ਕ੍ਰਿਕਟ ਚੰਗਾ ਖੇਡਦੇ ਹਨ, ਤਾਂ ਇਸਦਾ ਮਤਲਬ ਇਹ ਨਹੀਂ ਕਿ ਉਹ ਸਿਆਸੀ ਪਾਰੀ ਵਿੱਚ ਵੀ ਮਾਹਿਰ ਹਨ। ਕੈਪਟਨ ਨੇ ਜਤਾਇਆ ਕਿ ਉਹ ਸਿਆਸਤ ਦੇ ਮਾਂਝੇ ਹੋਏ ਖਿਡਾਰੀ ਹਨ। ਲਿਹਾਜਾ ਜੋ ਗੇਮ ਸਿੱਧੂ ਨੇ ਸ਼ੁਰੂ ਕੀਤੀ ਹੈ, ਉਸਦਾ ਅੰਜਾਮ ਲਿਖਣ ਲਈ ਯਾਨੀ ਨਵੇਂ ਸਿਰੇ ਤੋਂ ਜੰਗ ਲਈ ਉਹ ਪੂਰੀ ਤਰ੍ਹਾਂ ਤਿਆਰ ਹਨ।
