ਚੰਡੀਗੜ੍ਹ। ਪੰਜਾਬ ਵਿੱਚ ਜਿਹਨਾਂ ਬਾਗੀ ਸੁਰਾਂ ਨੂੰ ਸ਼ਾਂਤ ਕਰਨ ਲਈ ਪੂਰੀ ਸਰਕਾਰ ਦੀ ਤਸਵੀਰ ਹੀ ਬਦਲ ਦਿੱਤੀ ਗਈ, ਉਹ ਬਗਾਵਤ ਸ਼ਾਂਤ ਹੁੰਦੀ ਨਜ਼ਰ ਨਹੀਂ ਆ ਰਹੀ ਹੈ। ਹਾਲਾਂਕਿ ਇਹ ਪੂਰੀ ਬਗਾਵਤੀ ਪਿਕਚਰ ਦੇ ਕਿਰਦਾਰ ਜ਼ਰੂਰ ਬਦਲ ਗਏ ਹਨ। ਪਹਿਲਾਂ ਸਿੱਧੂ ਧੜਾ ਕੈਪਟਨ ਅਮਰਿੰਦਰ ਸਿੰਘ ਦੇ ਖਿਲਾਫ਼ ਖੜ੍ਹਿਆ ਸੀ, ਤਾਂ ਹੁਣ ਕੈਪਟਨ ਧੜਾ ਖੁੱਲ੍ਹ ਕੇ ਸਿੱਧੂ ਸਮਰਥਿਤ ਨਵੀਂ ਸਰਕਾਰ ਦੇ ਖਿਲਾਫ਼ ਖੁੱਲ੍ਹ ਕੇ ਬੋਲ ਰਿਹਾ ਹੈ।
ਪੰਜਾਬ ਮੰਤਰੀਮੰਡਲ ਦੇ ਨਵੇਂ ਚਿਹਰਿਆਂ ਦੀ ਸੂਚੀ ਜਦੋਂ ਸਾਹਮਣੇ ਆਈ, ਤਾਂ ਇਸ ਵਿੱਚੋਂ ਜਿਹੜੇ ਪੁਰਾਣੇ ਚਿਹਰੇ ਗਾਇਬ ਸਨ, ਉਹ ਸਾਰੇ ਹੀ ਕੈਪਟਨ ਅਮਰਿੰਦਰ ਸਿੰਘ ਦੇ ਕਰੀਬੀ ਮੰਨੇ ਜਾਂਦੇ ਸਨ। ਹਾਲਾਂਕਿ ਉਹਨਾਂ ‘ਚੋਂ ਤਿੰਨ ਮੰਤਰੀ ਕਿਸੇ ਨਾ ਕਿਸੇ ਇਲਜਾਮ ਹੇਠ ਘਿਰੇ ਹੋਏ ਹਨ, ਪਰ ਬਲਬੀਰ ਸਿੱਧੂ ਅਤੇ ਗੁਰਪ੍ਰੀਤ ਕਾਂਗੜ 2 ਅਜਿਹੇ ਨਾਂਅ ਹਨ, ਜਿਹਨਾਂ ‘ਤੇ ਕਿਸੇ ਤਰ੍ਹਾਂ ਦੇ ਇਲਜਾਮ ਨਹੀਂ ਹਨ।
‘ਕੁਰਸੀ’ ਜਾਣ ਤੋਂ ਬਾਅਦ ਬਲਬੀਰ ਸਿੱਧੂ ਤੇ ਗੁਰਪ੍ਰੀਤ ਕਾਂਗੜ ਮੀਡੀਆ ਵਿੱਚ ਆਏ ਅਤੇ ਹਾਈਕਮਾਂਡ ਪ੍ਰਤੀ ਆਪਣੀ ਨਰਾਜ਼ਗੀ ਖੁੱਲ੍ਹ ਕੇ ਜਾਹਿਰ ਕੀਤੀ। ਸਾਬਕਾ ਸਿਹਤ ਮੰਤਰੀ ਬਲਬੀਰ ਸਿੱਧੂ ਨੇ ਕਿਹਾ, “ਫਾਂਸੀ ‘ਤੇ ਚੜ੍ਹਾਉਣ ਤੋਂ ਪਹਿਲਾਂ ਵੀ ਆਖਰੀ ਖੁਆਇਸ਼ ਪੁੱਛੀ ਜਾਂਦੀ ਹੈ। ਇਥੇ ਸਾਨੂੰ ਕੁਝ ਵੀ ਨਹੀਂ ਦੱਸਿਆ ਗਿਆ। ਹਾਈਕਮਾਂਡ ਦੱਸੇ ਸਾਡਾ ਕਸੂਰ ਕੀ ਸੀ?”
‘30 ਸਾਲ ਪਾਰਟੀ ਨੂੰ ਦਿੱਤੇ, ਅੱਜ ਇਹ ਦਿਨ ਵਿਖਾ ਦਿੱਤਾ’
ਬਲਬੀਰ ਸਿੱਧੂ ਨੇ ਕਿਹਾ, “ਮੈਂ 30 ਸਾਲ ਕਾਂਗਰਸ ਪਾਰਟੀ ਵਿੱਚ ਲਗਾ ਦਿੱਤੇ, ਜਿਸ ਦੌਰਾਨ CBI ਜਾਂਚ ਵੀ ਝੱਲੀ। 4 ਘੰਟੇ ਮੈਨੂੰ ਟਾਰਚਰ ਕੀਤਾ ਗਿਆ। ਇਸ ਤੋਂ ਬਾਅਦ ਵੀ ਸੋਨੀਆ ਗਾਂਧੀ ਦੇ ਨਾਲ ਰਹੇ ਅਤੇ ਪਾਰਟੀ ਦੇ ਸਿਪਾਹੀ ਬਣੇ ਰਹੇ। ਹੁਣ ਅਚਾਨਕ ਸਾਨੂੰ ਬਾਹਰ ਕੱਢ ਦਿੱਤਾ ਗਿਆ।“ ਉਹਨਾਂ ਕਿਹਾ, “ਪਾਰਟੀ ਨੂੰ ਸਾਨੂੰ ਇਸ ਤਰ੍ਹਾਂ ਜਲੀਲ ਨਹੀਂ ਕਰਨਾ ਚਾਹੀਦਾ ਸੀ। ਇੱਕ ਵਾਰ ਕਹਿ ਦਿੰਦੇ, ਤਾਂ ਹਾਈਕਮਾਂਡ ਤੋਂ ਅਸਤੀਫਾ ਵਾਰ ਦਿੰਦੇ।“
ਮੀਡੀਆ ਜ਼ਰੀਏ ਹਾਈਕਮਾਂਡ ਨੂੰ ਸੁਨੇਹਾ- ਗੁਰਪ੍ਰੀਤ ਕਾਂਗੜ
ਕਾਂਗੜ ਨੇ ਕਿਹਾ ਕਿ ਉਹ ਮੀਡੀਆ ਸਾਹਮਣੇ ਆਪਣੀ ਗੱਲ ਰੱਖ ਕੇ ਕਾਂਗਰਸ ਹਾਈਕਮਾਂਡ ਤੱਕ ਸੁਨੇਹਾ ਪਹੁੰਚਾਉਣਾ ਚਾਹੁੰਦੇ ਹਨ। ਉਹਨਾਂ ਕਿਹਾ, “ਮੰਤਰੀ ਰਹਿੰਦੇ ਉਹਨਾਂ ਨੇ ਨੌਕਰੀ ਦੀਆਂ ਅਰਜੀਆਂ ਦਾ ਨਿਪਟਾਰਾ ਕੀਤਾ। ਰੈਵਨਿਊ ਵਿੱਚ ਸਾਰੇ ਝਗੜਿਆਂ ਦਾ ਨਿਪਟਾਰਾ ਕਰਕੇ ਲੋਕਾਂ ਨੂੰ ਸਹੂਲੀਅਤ ਦਿੱਤੀ।” ਉਹਨਾਂ ਪੁੱਛਿਆ ਕਿ ਪਾਰਟੀ ਸਾਡੇ ਨਾਲ ਅਜਿਹਾ ਸਲੂਕ ਕਿਉਂ ਕਰ ਰਹੀ ਹੈ।
