ਬਿਓਰੋ। ਹਾਲ ਹੀ ਵਿੱਚ ਪੰਜਾਬ ਕਾਂਗਰਸ ਪ੍ਰਧਾਨ ਦੇ ਅਹੁਦੇ ਤੋਂ ਅਚਾਨਕ ਅਸਤੀਫਾ ਦੇ ਕੇ ਸਿਆਸੀ ਹਲਕਿਆਂ ਵਿੱਚ ਤਹਿਲਕਾ ਮਚਾਉਣ ਵਾਲੇ ਨਵਜੋਤ ਸਿੰਘ ਸਿੱਧੂ ਇੱਕ ਵਾਰ ਫਿਰ ਸੁਰਖੀਆਂ ਵਿੱਚ ਹਨ। ਇਸ ਵਾਰ ਇੱਕ ਵੀਡੀਓ ਨੂੰ ਲੈ ਕੇ ਸਿੱਧੂ ਵਿਵਾਦਾਂ ਵਿੱਚ ਹਨ। ਇਸ ਵੀਡੀਓ ਵਿੱਚ ਸਿੱਧੂ ਕਥਿਤ ਤੌਰ ‘ਤੇ ਸੀਐੱਮ ਚਰਨਜੀਤ ਸਿੰਘ ਚੰਨੀ ਨੂੰ ਅਪਸ਼ਬਦ ਕਹਿ ਰਹੇ ਹਨ। ਪੂਰੀ ਵੀਡੀਓ ਵੀਰਵਾਰ ਦੀ ਹੈ, ਜਦੋਂ ਸਿੱਧੂ ਦੀ ਅਗਵਾਈ ਵਿੱਚ ਜੀਰਕਪੁਰ ਤੋਂ ਪੰਜਾਬ ਕਾਂਗਰਸ ਦਾ ਕਾਫਲਾ ਲਖੀਮਪੁਰ ਲਈ ਰਵਾਨਾ ਹੋ ਰਿਹਾ ਸੀ..ਕਿ ਇਸੇ ਦੌਰਾਨ ਕੁਝ ਅਜਿਹਾ ਹੋਇਆ ਸਿੱਧੂ ਤੈਸ਼ ਵਿੱਚ ਆ ਗਏ ਅਤੇ ਕੁਝ ਅਜਿਹਾ ਕਹਿ ਬੈਠੇ ਕਿ ਨਵਾਂ ਬਖੇੜਾ ਸ਼ੁਰੂ ਹੋ ਗਿਆ।
ਚੰਨੀ ਦੇ ਦੇਰੀ ਨਾਲ ਆਉਣ ‘ਤੇ ਭੜਕੇ ਸਿੱਧੂ
ਲਖੀਮਪੁਰ ਕਾਂਡ ਦੇ ਵਿਰੋਧ ਵਿੱਚ ਕਾਂਗਰਸ ਨੇ ਵੀਰਵਾਰ ਨੂੰ ਜੀਰਕਪੁਰ ਤੋਂ ਯੂਪੀ ਵੱਲ ਕੂਚ ਕੀਤਾ ਸੀ। ਸਿੱਧੂ ਇਸ ਮਾਰਚ ਵਿੱਚ ਸਮੇਂ ‘ਤੇ ਪਹੁੰਚ ਗਏ, ਪਰ ਕਾਫਲੇ ਅਤੇ ਜਾਮ ਦੇ ਚਲਦੇ ਸੀਐੱਮ ਚੰਨੂੰ ਨੂੰ ਆਉਣ ਵਿੱਚ ਥੋੜ੍ਹੀ ਦੇਰ ਹੋ ਗਈ। ਇਸ ‘ਤੇ ਸਿੱਧੂ ਭੜਕ ਗਏ ਅਤੇ ਚੰਨੀ ਨੂੰ ਲੈ ਕੇ ਆਪਣੀ ਭੜਾਸ ਕੱਢ ਦਿੱਤੀ।
ਸਿੱਧੂ ਨੇ ਸੀਐੱਮ ਚੰਨੀ ਨੂੰ ਗਾਲ੍ਹ ਕੱਢੀ !
ਵੀਡੀਓ ਵਿੱਚ ਸਾਹਮਣੇ ਆਇਆ ਕਿ ਸਿੱਧੂ ਮਾਰਚ ਨੂੰ ਸ਼ੁਰੂ ਕਰਨਾ ਚਾਹੁੰਦੇ ਸਨ ਕਿ ਉਸੇ ਵੇਲੇ ਕੈਬਨਿਟ ਮੰਤਰੀ ਪਰਗਟ ਸਿੰਘ ਕਹਿੰਦੇ ਹਨ ਕਿ 2 ਮਿੰਟਾਂ ਵਿੱਚ ਸੀਐੱਮ ਚੰਨੀ ਪਹੁੰਚਣ ਵਾਲੇ ਹਨ। ਇਸ ‘ਤੇ ਸਿੱਧੂ ਖਫਾ ਹੋਏ ਕਿ ਇੰਨੀ ਦੇਰ ਤੋਂ ਅਸੀਂ ਉਹਨਾਂ ਦਾ ਇੰਤਜਾਰ ਕਰ ਰਹੇ ਹਾਂ। ਪਰਗਟ ਭੀੜ ਨੂੰ ਵੇਖ ਕੇ ਕਹਿੰਦੇ ਹਨ ਕਿ ਅੱਜ ਤਾਂ ਬੱਲੇ-ਬੱਲੇ ਹੋ ਗਈ। ਉਸੇ ਵੇਲੇ ਸਿੱਧੂ ਕੋਲ ਖੜ੍ਹੇ ਕਾਰਜਕਾਰੀ ਪ੍ਰਧਾਨ ਸੁਖਵਿੰਦਰ ਡੈਨੀ ਵੀ ਕਹਿੰਦੇ ਹਨ ਕਿ ਇਹ ਪ੍ਰੋਗਰਾਮ ਤਾਂ ਸਕਸੈਸ ਹੈ। ਇਸ ਤੋਂ ਬਾਅਦ ਭੜਕੇ ਸਿੱਧੂ ਬੋਲੇ, “ਅਜੇ ਕਿਥੇ ਸਕਸੈਸ। ਮੈਨੂੰ ਸੀਐੱਮ ਬਣਾਉਂਦੇ, ਤਾਂ ਵਿਖਾਉਂਦਾ ਸਕਸੈਸ।” ਇਸ ਤੋਂ ਬਾਅਦ ਸਿੱਧੂ ਨੇ ਗਾਲ੍ਹ ਕੱਢਦੇ ਹੋਏ ਕਿਹਾ ਕਿ 2022 ਵਿੱਚ ਇਹ ਕਾਂਗਰਸ ਨੂੰ ਹੀ ਡੋਬ ਦੇਵੇਗਾ।
ਅਕਾਲੀ ਦਲ ਨੇ ਕਸਿਆ ਤੰਜ
ਇਸ ਵੀਡੀਓ ਦੇ ਸਾਹਮਣੇ ਆਉਣ ਤੋਂ ਬਾਅਦ ਸ਼੍ਰੋਮਣੀ ਅਕਾਲੀ ਦਲ ਨੇ ਸਿੱਧੂ ‘ਤੇ ਤੰਜ ਕਸਿਆ ਹੈ। ਅਕਾਲੀ ਦਲ ਦੇ ਬੁਲਾਰੇ ਦਲਜੀਤ ਚੀਮਾ ਨੇ ਕਿਹਾ ਕਿ ਸਿੱਧੂ ਦੇ ਮਨ ਵਿੱਚ CM ਦੇ ਅਹੁਦੇ ਪ੍ਰਤੀ ਇੰਨੀ ਇੱਜ਼ਤ ਹੈ ਕਿ 2 ਮਿੰਟ ਇੰਤਜਾਰ ਨਹੀਂ ਕਰ ਸਕੇ। ਉਹਨਾਂ ਕਿਹਾ ਕਿ ਹਾਲੇ ਵੀ ਸਿੱਧੂ ਦੇ ਅੰਦਰ ਇੰਨਾ ਦੁੱਖ ਹੈ ਕਿ ਇੱਕ ਅਨੁਸੂਚਿਤ ਜਾਤੀ ਦੇ ਸ਼ਖਸ ਨੂੰ ਸੀਐੱਮ ਬਣਾ ਦਿੱਤਾ। ਚੀਮਾ ਨੇ ਕਿਹਾ ਕਿ ਸਿੱਧੂ ਦਾ ਮਾਰਚ ਕਿਸਾਨਾਂ ਲਈ ਨਹੀਂ, ਬਲਕਿ ਇੱਕ-ਦੂਜੇ ਤੋਂ ਅੱਗੇ ਨਿਕਲਣ ਲਈ ਸੀ।
ਨਵਜੋਤ ਸਿੱਧੂ ਦੀ ਵੀਡੀਓ ਵਿੱਚ ਮੁੱਖ ਮੰਤਰੀ ਪ੍ਰਤੀ ਨਫ਼ਰਤ, ਜਾਤ ਦਾ ਅਭਿਮਾਨ ਅਤੇ ਆਪ ਮੁੱਖ ਮੰਤਰੀ ਨਾ ਬਣ ਸਕਣ ਦਾ ਪਛਤਾਵਾ ਸਾਫ਼ ਝਲਕ ਰਿਹਾ ਹੈ। pic.twitter.com/4JfALibV9M
— Dr Daljit S Cheema (@drcheemasad) October 8, 2021
CM ਨਾ ਬਣ ਸਕਣ ਦਾ ਮਲਾਲ !
ਪੰਜਾਬ ਵਿੱਚ ਕੈਪਟਨ ਅਮਰਿੰਦਰ ਸਿੰਘ ਨੂੰ ਹਟਾ ਕੇ ਸਿੱਧੂ ਖੁਦ ਸੀਐੱਮ ਬਣਨਾ ਚਾਹੁੰਦੇ ਸਨ। ਕਾਂਗਰਸ ਹਾਈਕਮਾਂਡ ਸੁਨੀਲ ਜਾਖੜ ‘ਤੇ ਰਾਜੀ ਹੋ ਗਿਆ ਸੀ, ਪਰ ਪੰਜਾਬ ਦੇ ਸਿੱਖ ਸਟੇਟ ਹੋਣ ਦੀ ਗੱਲ ਕਹਿ ਕੇ ਵਿਧਾਇਕਾਂ ਨੇ ਇਸਦਾ ਵਿਰੋਧ ਕੀਤਾ, ਜਿਸ ਤੋਂ ਬਾਅਦ ਸੁਖਜਿੰਦਰ ਰੰਧਾਵਾ ਨੂੰ ਸੀਐੱਮ ਬਣਾਉਣ ਦਾ ਫੈਸਲਾ ਹੋਇਆ। ਇਸ ‘ਤੇ ਸਿੱਧੂ ਨੇ ਆਪਣਾ ਦਾਅਵਾ ਠੋਕ ਦਿੱਤਾ ਅਤੇ ਕਿਹਾ ਕਿ ਜੇਕਰ ਸਿੱਖ ਨੂੰ ਹੀ ਬਣਾਉਣਾ ਹੈ, ਤਾਂ ਮੈਨੂੰ ਮੁੱਖ ਮੰਤਰੀ ਬਣਾਓ। ਹਾਲਾਂਕਿ ਬਾਅਦ ਵਿੱਚ ਵਿਚਕਾਰ ਦਾ ਰਸਤਾ ਕੱਢ ਕੇ ਚਰਨਜੀਤ ਸਿੰਘ ਚੰਨੀ ਨੂੰ ਸੂਬੇ ਦੀ ਕਮਾਨ ਸੌਂਪ ਦਿੱਤੀ ਗਈ।
ਸਿੱਧੂ ਜੋ ਚਾਹੁੰਦੇ ਸਨ, ਉਹ ਨਹੀਂ ਹੋਇਆ
ਸ਼ੁਰੂਆਤ ਵਿੱਚ ਸਿੱਧੂ ਕਰੀਬ 2 ਦਿਨ ਤੱਕ ਹਰ ਮੌਕੇ ‘ਤੇ ਸੀਐੱਮ ਚੰਨੀ ਦੇ ਨਾਲ ਨਜ਼ਰ ਆਏ। ਸ਼ਾਇਦ ਉਹ ਪੰਜਾਬ ਵਿੱਚ ਸੁਪਰ CM ਬਣਨਾ ਚਾਹੁੰਦੇ ਸਨ, ਜਿਸ ਵਿੱਚ ਚਿਹਰਾ ਚੰਨੀ ਦਾ ਹੋਵੇ, ਪਰ ਸਾਰਾ ਕੰਮ ਉਹ ਖੁਦ ਕਰਨ। ਹਾਲਾਂਕਿ ਸਿੱਧੂ ਦੀ ਇਹ ਮੁਰਾਦ ਵੀ ਪੂਰੀ ਨਹੀਂ ਹੋਈ। ਇਸ ਤੋਂ ਬਾਅਦ ਸਿੱਧੂ ਚਾਹੁੰਦੇ ਹਨ ਕਿ ਉਹਨਾਂ ਨੂੰ ਪੰਜਾਬ ਕਾਂਗਰਸ ਦਾ ਅਗਲਾ ਸੀਐੱਮ ਚਿਹਰਾ ਐਲਾਨਿਆ ਜਾਵੇ, ਪਰ ਕਾਂਗਰਸ ਹਾਈਕਮਾਂਡ ਨੇ ਉਸ ਤੋਂ ਵੀ ਇਨਕਾਰ ਕਰ ਦਿੱਤਾ। ਇਸ ਤੋਂ ਬਾਅਦ ਸਰਕਾਰ ਵਿੱਚ AG ਅਤੇ DGP ਦੀ ਨਿਯੁਕਤੀ ਉਹਨਾਂ ਦੇ ਮਨ ਮੁਤਾਬਕ ਨਾ ਹੋਣ ‘ਤੇ ਸਿੱਧੂ ਨੇ ਪੰਜਾਬ ਕਾਂਗਰਸ ਪ੍ਰਧਾਨ ਦੇ ਅਹੁਦੇ ਤੋਂ ਅਸਤੀਫਾ ਦੇ ਦਿੱਤਾ। ਹਾਲਾਂਕਿ ਜਿਸ ਤਰ੍ਹਾਂ ਉਹ ਲਖੀਮਪੁਰ ਕਾਂਡ ਨੂੰ ਲੈ ਕੇ ਮੈਦਾਨ ਵਿੱਚ ਵਾਪਸ ਉਤਰੇ ਅਤੇ ਵੀਰਵਾਰ ਨੂੰ ਸੀਐੱਮ ਚੰਨੀ ਵੀ ਉਹਨਾਂ ਦੇ ਨਾਲ ਨਜ਼ਰ ਆਏ। ਉਸ ਤੋਂ ਲੱਗਿਆ ਕਿ ਪਾਰਟੀ ਵਿੱਚ ਸ਼ਾਇਦ ਹੁਣ ਸਭ ਠੀਕ ਹੋ ਗਿਆ ਹੈ, ਪਰ ਇਸ ਵੀਡੀਓ ਨੇ ਸਾਰੀ ਸੱਚਾਈ ਸਾਹਮਣੇ ਲਿਆ ਦਿੱਤੀ।
