ਜਦੋਂ ਸਿਆਸੀ ਸਵਾਲ ਦੇ ਜਵਾਬ ‘ਚ ਕੇਜਰੀਵਾਲ ਦੇ ਕੱਪੜਿਆਂ ‘ਤੇ ਕਮੈਂਟ ਕਰ ਬੈਠੇ ਸੀਐੱਮ ਚੰਨੀ, ਤਾਂ ‘ਆਪ’ ਕਨਵੀਨਰ ਨੇ ਇਸ ਲਹਿਜੇ ‘ਚ ਕੀਤਾ ਪਲਟਵਾਰ

ਬਿਓਰੋ। ਪੰਜਾਬ ਦੇ ਮੁੱਖ ਮੰਤਰੀ ਚਰਨਜੀਤ ਚੰਨੀ ਆਪਣੇ ‘ਆਮ ਆਦਮੀ ਸਟਾਈਲ’ ਨੂੰ ਲੈ ਕੇ ਸੂਬੇ ਭਰ ਦੇ ਲੋਕਾਂ ਦੀ ਪਸੰਦ ਬਣਦੇ ਜਾ ਰਹੇ ਹਨ, ਪਰ ਖੁਦ ਨੂੰ ਇੱਕ ਆਮ ਆਦਮੀ ਦੱਸਣ ਵਾਲੇ ਦਿੱਲੀ ਦੇ ਸੀਐੱਮ ਅਰਵਿੰਦ ਕੇਜਰੀਵਾਲ ਦੇ ਕੱਪੜਿਆਂ ‘ਤੇ ਵਿਵਾਦਤ ਟਿੱਪਣੀ ਕਰ ਬੈਠੇ। ਕੇਜਰੀਵਾਲ ਨੂੰ ਚੰਗੇ ਕੱਪੜੇ ਸਵਾਉਣ ਦੀ ਸਲਾਹ ਦੇਣ ਵਾਲੇ ਚੰਨੀ ਨੂੰ ਹੁਣ ਦਿੱਲੀ ਦੇ ਮੁੱਖ ਮੰਤਰੀ ਨੇ ਜਵਾਬ ਦਿੱਤਾ ਹੈ।

ਦਰਅਸਲ, ਏਬੀਪੀ ਨਿਊਜ਼ ਨੂੰ ਦਿੱਤੇ ਇੰਟਰਵਿਊ ਵਿੱਚ ਸੀਐੱਮ ਚੰਨੀ ਤੋਂ ਜਦੋਂ ਕੇਜਰੀਵਾਲ ਦੇ ਪੰਜਾਬ ਕਾਂਗਰਸ ਦੇ ਕਲੇਸ਼ ਬਾਰੇ ਦਿੱਤੇ ਬਿਆਨ ‘ਤੇ ਸਵਾਲ ਕੀਤਾ ਗਿਆ, ਤਾਂ ਇਸ ਸਿਆਸੀ ਸਵਾਲ ਦਾ ਚੰਨੀ ਨੇ ਨਿੱਜੀ ਜਵਾਬ ਦਿੱਤਾ। ਚੰਨੀ ਨੇ ਐਂਕਰ ਤੋਂ ਪੁੱਛਿਆ, “ਕੀ ਤੁਹਾਡੇ ਕੋਲ 5 ਹਜਾਰ ਹਨ? ਉਹਨਾਂ ਨੂੰ ਵੀ ਦੇ ਦਿਓ ਯਾਰ। ਕੱਪੜੇ ਤਾਂ ਚੰਗੇ ਸਵਾ ਲੈਣ। ਕੀ ਉਹਨਾਂ ਕੋਲ ਸੂਟ-ਬੂਟ ਨਹੀਂ ਹਨ? ਯਾਰ 2.5 ਲੱਖ ਉਸਦੀ ਤਨਖਾਹ ਹੈ, ਚੰਗੇ ਕੱਪੜੇ ਨਹੀਂ ਸਵਾ ਸਕਦਾ?”

ਸੀਐੱਮ ਚਰਨਜੀਤ ਚੰਨੀ ਦੇ ਇਸ ਬਿਆਨ ‘ਤੇ ਹੁਣ ਕੇਜਰੀਵਾਲ ਨੇ ਪਲਟਵਾਰ ਕੀਤਾ ਹੈ। ਉਹਨਾਂ ਟਵਿਟਰ ‘ਤੇ ਚੰਨੀ ਦੇ ਬਿਆਨ ਦੀ ਵੀਡੀਓ ਸ਼ੇਅਰ ਕਰਦੇ ਹੋਏ ਲਿਖਿਆ, “ਚੰਨੀ ਸਾਬ੍ਹ, ਤੁਹਾਨੂੰ ਮੇਰੇ ਕੱਪੜੇ ਪਸੰਦ ਨਹੀਂ। ਕੋਈ ਗੱਲ ਨਹੀਂ। ਜਨਤਾ ਨੂੰ ਪਸੰਦ ਹਨ। ਕੱਪੜੇ ਛੱਡੋ, ਇਹ ਵਾਅਦੇ ਕਦੋਂ ਪੂਰੇ ਕਰੋਗੇ?…”

ਕੇਜਰੀਵਾਲ ਨੇ ਚੰਨੀ ਤੋਂ ਪੁੱਛਿਆ:-

ਹਰ ਬੇਰੁਜ਼ਗਾਰ ਨੂੰ ਰੁਜ਼ਗਾਰ ਕਦੋਂ ਦਓਗੋ?

ਕਿਸਾਨਾਂ ਦੇ ਕਰਜੇ ਕਦੋਂ ਮੁਆਫ਼ ਕਰੋਗੇ?

ਬੇਅਦਬੀ ਦੇ ਦੋਸ਼ੀਆਂ ਨੂੰ ਜੇਲ੍ਹ ਕਿਉਂ ਨਹੀਂ ਭੇਜਦੇ?

ਦਾਗੀ ਮੰਤਰੀਆਂ, MLA ਅਤੇ ਅਫ਼ਸਰਾਂ ‘ਤੇ ਐਕਸ਼ਨ ਕਦੋਂ ਲਓਗੇ?

चन्नी साहिब, आपको मेरे कपड़े पसंद नहीं। कोई बात नहीं। जनता को पसंद हैं

कपड़े छोड़ो। ये वादे कब पूरे करोगे?

1. हर बेरोज़गार को रोज़गार कब दोगे

2. किसानों के क़र्ज़े कब माफ़ करोगे

3. बेअदबी के दोषियों को जेल क्यों नहीं भेजते

4. दागी मंत्रियों, MLA और अफ़सरों पर ऐक्शन कब लोगे https://t.co/EKw2rd8qdB

— Arvind Kejriwal (@ArvindKejriwal) October 6, 2021

ਕੇਜਰੀਵਾਲ ਨੇ ਕੀ ਕਿਹਾ ਸੀ?

ਦੱਸ ਦਈਏ ਕਿ ਹਾਲ ਹੀ ਵਿੱਚ ਪੰਜਾਬ ਦੌਰੇ ‘ਤੇ ਪਹੁੰਚੇ ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਸੀ ਕਿ ਕਾਂਗਰਸ ਨੇ ਸਿਆਸਤ ਨੂੰ ਤਮਾਸ਼ਾ ਬਣਾ ਕੇ ਰੱਖ ਦਿੱਤਾ ਹੈ। ਹਰ ਕੋਈ ਮੁੱਖ ਮੰਤਰੀ ਦੀ ਕੁਰਸੀ ਪਿੱਛੇ ਭੱਜ ਰਿਹਾ ਹੈ। ਕਿਸੇ ਨੂੰ ਪੰਜਾਬ ਦੇ ਮੁੱਦਿਆਂ ਦੀ ਨਹੀਂ ਪਈ। ਹਰ ਕੋਈ ਆਪਣੀ ਚਲਾ ਰਿਹਾ ਹੈ। ਅਜਿਹੇ ਵਿੱਚ ਪੰਜਾਬ ਦਾ ਵਿਕਾਸ ਕਿਵੇਂ ਹੋਵੇਗਾ? ਇਸੇ ਬਿਆਨ ‘ਤੇ ਚੰਨੀ ਨੂੰ ਸਵਾਲ ਕੀਤਾ ਗਿਆ ਸੀ।