ਬਿਓਰੋ। ਲਖੀਮਪੁਰ ਕਾਂਡ ਨੂੰ ਲੈ ਕੇ ਮਚੇ ਸਿਆਸੀ ਬਵਾਲ ਵਿਚਾਲੇ ਯੂਪੀ ਦੇ ਸੀਐੱਮ ਨੇ ਪੰਜਾਬ ਦੇ ਮੁੱਖ ਮੰਤਰੀ ਚਰਨਜੀਤ ਚੰਨੀ ‘ਤੇ ਤੰਜ ਕਸਿਆ ਹੈ। ਚੰਨੀ ਦੇ ਯੂਪੀ ਦੌਰੇ ਨੂੰ ਲੈ ਕੇ ਯੋਗੀ ਨੇ ਕਿਹਾ ਕਿ ਚੰਨੀ ਪੰਜਾਬ ਨੂੰ ਤਾਂ ਸੰਭਾਲ ਨਹੀਂ ਪਾ ਰਹੇ ਅਤੇ ਯੂਪੀ ਆ ਕੇ ਬਿਆਨਬਾਜੀ ਕਰ ਰਹੇ ਹਨ।
ਮੁੱਖ ਮੰਤਰੀ ਯੋਗੀ ਆਦਿਤਿਆਨਾਥ ਨੇ ਕਿਹਾ ਕਿ ਇੱਕ ਸੀਐੱਮ ਨੂੰ ਇਸ ਗੱਲ ਲਈ ਤਰਸਣਾ ਪੈ ਰਿਹਾ ਹੈ ਕਿ ਉਹ ਆਪਣੀ ਮਰਜੀ ਨਾਲ ਅਫਸਰਾਂ ਦੀ ਨਿਯੁਕਤੀ ਕਰਨ। ਉਹਨਾਂ ਕਿਹਾ ਕਿ ਇਹ ਸ਼ਰਮਨਾਕ ਹੈ ਕਿ ਪੰਜਾਬ ਵਿੱਚ DGP ਤੱਕ ਸੀਐੱਮ ਦੀ ਮਰਜੀ ਨਾਲ ਨਹੀਂ ਲਗਾਇਆ ਜਾ ਰਿਹਾ। ਯੋਗੀ ਨੇ ਕਿਹਾ ਕਿ ਪੰਜਾਬ ਕਾਂਗਰਸ ਅੰਦਰੂਨੀ ਝਗੜਿਆਂ ਵਿੱਚ ਉਲਝੀ ਹੋਈ ਹੈ ਤੇ ਉਸੇ ਤੋਂ ਧਿਆਨ ਭਟਕਾਉਣ ਲਈ ਲਖੀਮਪੁਰ ਖੀਰੀ ਦੇ ਮਾਮਲੇ ਦਾ ਸਿਆਸੀਕਰਨ ਕਰ ਰਹੇ ਹਨ।
ਯੋਗੀ ਨੇ ਲਖੀਮਪੁਰ ਖੀਰੀ ਦੇ ਮਾਮਲੇ ‘ਤੇ ਕਿਹਾ ਕਿ ਕਾਨੂੰਨ ਆਪਣਾ ਕੰਮ ਕਰ ਰਿਹਾ ਹੈ। ਸਰਕਾਰ ਕਿਸੇ ਦੇ ਦਬਾਅ ਹੇਠ ਕੰਮ ਨਹੀਂ ਕਰੇਗੀ ਅਤੇ ਮੁਲਜ਼ਮਾਂ ਖਿਲਾਫ਼ ਸਖਤ ਕਾਰਵਾਈ ਹੋਵੇਗੀ।
ਰਾਹੁਲ ਗਾਂਧੀ ਦੇ ਨਾਲ ਗਏ ਸਨ ਸੀਐੱਮ ਚੰਨੀ
ਪੰਜਾਬ ਦੇ ਮੁੱਖ ਮੰਤਰੀ ਚਰਨਜੀਤ ਚੰਨੀ ਬੁੱਧਵਾਰ ਨੂੰ ਰਾਹੁਲ ਗਾਂਧੀ ਦੇ ਨਾਲ ਯੂਪੀ ਗਏ ਸਨ। ਉਹਨਾਂ ਦੇ ਨਾਲ ਛੱਤੀਸਗੜ੍ਹ ਦੇ ਮੁੱਖ ਮੰਤਰੀ ਭੁਪੇਸ਼ ਬਘੇਲ ਵੀ ਸਨ। ਉਥੇ ਚੰਨੀ ਨੇ ਹਿੰਸਾ ਵਿੱਚ ਮਾਰੇ ਗਏ ਕਿਸਾਨਾਂ ਦੇ ਪਰਿਵਾਰਾਂ ਲਈ 50-50 ਲੱਖ ਰੁਪਏ ਦੀ ਆਰਥਿਕ ਮਦਦ ਦਾ ਐਲਾਨ ਕੀਤਾ ਸੀ ਜਿਸ ਤੋਂ ਯੋਗੀ ਵੱਲੋਂ ਇਹ ਪ੍ਰਤੀਕਿਰਿਆ ਦਿੱਤੀ ਗਈ।
ਸਿੱਧੂ ਦੇ ਝਗੜੇ ਕਾਰਨ ਵਿਰੋਧੀਆਂ ਨੂੰ ਮਿਲ ਰਿਹਾ ਮੌਕਾ
ਦੱਸਣਯੋਗ ਹੈ ਕਿ ਪੰਜਾਬ ਵਿੱਚ ਕਾਂਗਰਸ ਦਾ ਕਲੇਸ਼ ਸੁਲਝ ਨਹੀਂ ਰਿਹਾ ਹੈ। ਕੈਪਟਨ ਅਮਰਿੰਦਰ ਸਿੰਘ ਦੇ ਹਟਣ ਤੋਂ ਬਾਅਦ ਸਿੱਧੂ ਹੁਣ ਸੀਐੱਮ ਚੰਨੀ ਨਾਲ ਭਿੜੇ ਹੋਏ ਹਨ। ਇਹ ਵਿਵਾਦ ਹੁਣ DGP ਅਤੇ AG ਦੀ ਨਿਯੁਕਤੀ ਨੂੰ ਲੈ ਕੇ ਚੱਲ ਰਿਹਾ ਹੈ। ਸਿੱਧੂ ਇਸੇ ਗੁੱਸੇ ਵਿੱਚ ਪੰਜਾਬ ਕਾਂਗਰਸ ਪ੍ਰਧਾਨ ਦੇ ਅਹੁਦੇ ਤੋਂ ਅਸਤੀਫਾ ਵੀ ਦੇ ਚੁੱਕੇ ਹਨ। ਪਹਿਲਾਂ ਅਮਰਿੰਦਰ ਅਤੇ ਹੁਣ ਚੰਨੀ ਨਾਲ ਸਿੱਧੂ ਦੇ ਝਗੜੇ ਦੇ ਚਲਦੇ ਉਹ ਵਿਰੋਧੀਆਂ ਨੂੰ ਬੋਲਣ ਦਾ ਖੂਬ ਮੌਕਾ ਦੇ ਰਹੇ ਹਨ।
