ਬਿਓਰੋ। ਮੱਧ ਪ੍ਰਦੇਸ਼ ਵਿੱਚ ਚੋਰੀ ਦੀ ਇੱਕ ਵਾਰਦਾਤ ਨੇ ਰਾਤੋ-ਰਾਤ ਚੋਰ ਨੂੰ ਹੀਰੋ ਬਣਾ ਦਿੱਤਾ। ਸੋਸ਼ਲ ਮੀਡੀਆ ‘ਤੇ ਇਸ ਚੋਰ ਦੀ ਇੱਕ ਚਿੱਠੀ ਖੂਬ ਵਾਇਰਲ ਹੋ ਰਹੀ ਹੈ, ਜਿਸ ਵਿੱਚ ਚੋਰ ਨੇ ਲਿਖਿਆ ਹੈ, “ਜੇਕਰ ਪੈਸੇ ਨਹੀਂ ਸੀ, ਤਾਂ ਲੌਕ ਨਹੀਂ ਕਰਨਾ ਸੀ..ਕਲੈਕਟਰ।”
ਚੋਰੀ ਦੀ ਵਾਰਦਾਤ ਦੇਵਾਸ ਦੇ ਸਬ-ਡਵੀਜ਼ਨਲ ਮੈਜਿਸਟ੍ਰੇਟ ਤ੍ਰਿਲੋਚਨ ਗੌੜ ਦੇ ਘਰ ਹੋਈ। ਜਾਣਕਾਰੀ ਮੁਤਾਬਕ, ਤ੍ਰਿਲੋਚਨ ਗੌੜ ਪਿਛਲੇ ਕਰੀਬ 15 ਦਿਨਾਂ ਤੋਂ ਆਪਣੇ ਇਸ ਘਰ ਵਿੱਚ ਨਹੀਂ ਗਏ ਸਨ, ਪਰ ਬੀਤੇ ਦਿਨ ਜਦੋਂ ਉਹ ਘਰ ਆਏ ਤਾਂ ਵੇਖਿਆ ਕਿ ਸਾਰਾ ਸਾਮਾਨ ਬਿਖਰਿਆ ਹੋਇਆ ਸੀ। ਘਰ ਵਿੱਚੋਂ ਕੁਝ ਨਗਦੀ ਅਤੇ ਗਹਿਣੇ ਗਾਇਬ ਸਨ, ਜਿਸ ਬਾਰੇ ਅਧਿਕਾਰੀ ਨੇ ਪੁਲਿਸ ਨੂੰ ਸੂਚਿਤ ਕਰ ਦਿੱਤਾ ਹੈ।
ਬੇਸ਼ੱਕ ਚੋਰ ਕੁਝ ਨਗਦੀ ਤੇ ਗਹਿਣਿਆਂ ‘ਤੇ ਹੱਥ ਸਾਫ਼ ਕਰ ਗਏ ਹਨ, ਪਰ ਉਹਨਾਂ ਨੂੰ ਜਿੰਨੀ ਉਮੀਦ ਸੀ ਓਨਾ ਕੈਸ਼ ਸ਼ਾਇਦ ਨਹੀਂ ਮਿਲਿਆ। ਇਹੀ ਕਾਰਨ ਹੋ ਸਕਦਾ ਹੈ ਕਿ ਗੁੱਸਾਏ ਚੋਰਾਂ ਨੇ ਅਧਿਕਾਰੀ ਦੇ ਨਾਂਅ ਇੱਕ ਨੋਟ ਛੱਡ ਦਿੱਤਾ, ਜਿਸ ਵਿੱਚ ਲਿਖਿਆ ਸੀ, “जब पैसे नहीं थे तो लॉक नहीं करना था…कलेक्टर”
ਹਾਈ ਪ੍ਰੋਫਾਈਲ ਇਲਾਕੇ ‘ਚ ਹੋਈ ਵਾਰਦਾਤ
ਜ਼ਿਕਰਯੋਗ ਹੈ ਕਿ ਦੇਵਾਸ ਵਿੱਚ SDM ਦੀ ਜਿਸ ਰਿਹਾਇਸ਼ ‘ਤੇ ਇਹ ਵਾਰਦਾਤ ਹੋਈ, ਉਹ ਹਾਈ ਪ੍ਰੋਫਾਈਲ ਇਲਾਕੇ ਵਿੱਚ ਮੌਜੂਦ ਹੈ। ਇਸੇ ਇਲਾਕੇ ਵਿੱਚ ਜ਼ਿਲ੍ਹੇ ਦੇ ਕਈ ਉੱਚ ਪੁਲਿਸ ਅਧਿਕਾਰੀ ਵੀ ਰਹਿੰਦੇ ਹਨ। ਬਹਿਰਹਾਲ ਪੁਲਿਸ ਨੇ ਅਣਪਛਾਤੇ ਚੋਰਾਂ ਦੇ ਖਿਲਾਫ਼ ਕੇਸ ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ ਅਤੇ ਉਹਨਾਂ ਦੀ ਭਾਲ ਕੀਤੀ ਜਾ ਰਹੀ ਹੈ।
ਹਰਿਆਣਾ ਤੋਂ ਵੀ ਸਾਹਮਣੇ ਆਇਆ ਸੀ ਅਜਿਹਾ ਮਾਮਲਾ
ਦੱਸਣਯੋਗ ਹੈ ਕਿ ਇਸ ਤੋਂ ਪਹਿਲਾਂ ਹਰਿਆਣਾ ਦੇ ਜੀਂਦ ਵਿੱਚ ਸਿਵਲ ਹਸਪਤਾਲ ਤੋਂ ਕੋਰੋਨਾ ਵੈਕਸੀਨ ਦੀ ਡੋਜ਼ ਚੋਰੀ ਹੋਣ ਦਾ ਮਾਮਲਾ ਸਾਹਮਣੇ ਆਇਆ ਸੀ। ਅਜੇ ਪੁਲਿਸ ਵੈਕਸੀਨੇਸ਼ਨ ਦੀ ਤਲਾਸ਼ ‘ਚ ਹੀ ਜੁਟੀ ਸੀ ਕਿ ਸਿਵਲ ਲਾਈਨ ਥਾਣੇ ਦੇ ਸਾਹਮਣੇ ਚਾਹ ਦੀ ਦੁਕਾਨ ‘ਤੇ ਇੱਕ ਪਲਾਸਟਿਕ ਬੈਗ ‘ਚ 622 ਡੋਜ਼ ਮਿਲ ਗਈਆਂ। ਪੜਤਾਲ ਕਰਨ ‘ਤੇ ਪਤਾ ਲੱਗਿਆ ਕਿ ਇਹ ਓਹੀ ਵੈਕਸੀਨ ਹੈ, ਜੋ ਹਸਪਤਾਲ ਤੋਂ ਚੋਰੀ ਹੋਈ ਸੀ। ਚੋਰ ਨੇ ਇਸਦੇ ਨਾਲ ਇੱਕ ਨੋਟ ਵੀ ਲਿਖ ਕੇ ਰੱਖਿਆ ਸੀ, ਜਿਸ ‘ਚ ਲਿਖਿਆ ਸੀ- “ਮੈਨੂੰ ਮੁਆਫ਼ ਕਰ ਦਿਓ। ਪਤਾ ਨਹੀਂ ਸੀ ਕਿ ਇਸ ‘ਚ ਕੋਰੋਨਾ ਦੀ ਦਵਾਈ ਹੈ।” (ਪੂਰੀ ਖ਼ਬਰ ਇਥੇ ਪੜ੍ਹੋ)
