ਨਿਊਜ਼ ਡੈਸਕ। ਪੰਜਾਬ ਦੀਆਂ ਵਿਧਾਨ ਸਭਾ ਚੋਣਾਂ ਨੂੰ ਮਹਿਜ਼ 4 ਮਹੀਨਿਆਂ ਦਾ ਸਮਾਂ ਬਾਕੀ ਹੈ। ਅਜਿਹੇ ਵਿੱਚ ਸੂਬੇ ਦਾ ਸਿਆਸੀ ਪਾਰਾ High ਹੈ। ਚੋਣ ਪ੍ਰਚਾਰ ਤਾਂ ਇੱਕ ਪਾਸੇ, ਲੀਡਰ ਹੁਣੇ ਤੋਂ ਹੀ ਸੀਐੱਮ ਦੀ ਕੁਰਸੀ ‘ਤੇ ਨਜ਼ਰਾਂ ਲਗਾਈ ਬੈਠੇ ਹਨ। ਜਾਹਿਰ ਹੈ ਜਿਸ ਵੀ ਚਿਹਰੇ ‘ਤੇ ਕੋਈ ਪਾਰਟੀ ਚੋਣ ਮੈਦਾਨ ਵਿੱਚ ਉਤਰੇਗੀ, ਚੋਣਾਂ ਵਿੱਚ ਜੇਤੂ ਹੋਣ ‘ਤੇ ਓਹੀ ਚਿਹਰਾ ਸੂਬੇ ਦੇ ਮੁਖੀਆ ਦੀ ਕੁਰਸੀ ‘ਤੇ ਵਿਰਾਜਮਾਨ ਹੋਵੇਗਾ। ਕੁਝ ਇਸੇ ਤਰ੍ਹਾਂ ਦੀ ਜੱਦੋ-ਜਹਿਦ ਸੱਤਾ ਦਾ ਸੁਫਨਾ ਵੇਖ ਰਹੀ ਆਮ ਆਦਮੀ ਪਾਰਟੀ ਵਿੱਚ ਵੀ ਚੱਲ ਰਹੀ ਹੈ।
ਪਿਛਲੀਆਂ ਵਿਧਾਨ ਸਭਾ ਚੋਣਾਂ ਵਿੱਚ ਬਿਨ੍ਹਾਂ ਸੀਐੱਮ ਫੇਸ ਤਤਕਾਲੀ ਸੱਤਾ ਧਿਰ ਨੂੰ ਕਰਾਰੀ ਟੱਕਰ ਦੇਣ ਵਾਲੀ ਆਮ ਆਦਮੀ ਪਾਰਟੀ ਇਸ ਵਾਰ ਮੁੱਖ ਮੰਤਰੀ ਦੇ ਚਿਹਰੇ ਨਾਲ ਮੈਦਾਨ ਵਿੱਚ ਉਤਰਨ ਦਾ ਐਲਾਨ ਕਰ ਚੁੱਕੀ ਹੈ, ਪਰ ਮਹਿਜ਼ 4 ਮਹੀਨਿਆਂ ਦਾ ਸਮਾਂ ਬਾਕੀ ਰਹਿਣ ਦੇ ਬਾਵਜੂਦ ਸੀਐੱਮ ਫੇਸ ਦਾ ਐਲਾਨ ਨਾ ਕਰਨ ਨੂੰ ਲੈ ਕੇ ਭਗਵੰਤ ਮਾਨ ਪਾਰਟੀ ਤੋਂ ਖਫਾ ਦੱਸੇ ਜਾ ਰਹੇ ਹਨ, ਕਿਉਂਕਿ ਉਹ ਆਮ ਆਦਮੀ ਪਾਰਟੀ ਦੇ ਸੀਐੱਮ ਚਿਹਰੇ ਲਈ ਸਭ ਤੋਂ ਮਜਬੂਤ ਦਾਅਵੇਦਾਰ ਮੰਨੇ ਜਾਂਦੇ ਹਨ।
ਭਗਵੰਤ ਮਾਨ ਦੀ ਇਹ ਨਰਾਜ਼ਗੀ ਕਈ ਮਾਇਨਿਆਂ ਵਿੱਚ ਉਹਨਾਂ ਦੇ ਪੰਜਾਬ ਕਾਂਗਰਸ ਪ੍ਰਧਾਨ ਨਵਜੋਤ ਸਿੱਧੂ ਦੀ ਰਾਹ ‘ਤੇ ਤੁਰਨ ਵੱਲ ਇਸ਼ਾਰਾ ਕਰਦੀ ਹੈ। ਫਿਰ ਚਾਹੇ ਪਾਰਟੀ ਦਾ ਚਿਹਰਾ ਬਣਨ ਦੀ ਚਾਹਤ ਹੋਵੇ ਜਾਂ ਸੱਤਾ ਵਿੱਚ ਆਉਣ ‘ਤੇ ਸਰਕਾਰ ਦਾ ਚਿਹਰਾ ਬਣਨ ਦੀ ਚਾਹਤ। ਫਿਲਹਾਲ ਦੋਵੇਂ ਆਪੋ-ਆਪਣੀ ਪਾਰਟੀ ਤੋਂ ਨਰਾਜ਼ ਚੱਲ ਰਹੇ ਹਨ, ਪਰ ਜਨਤੱਕ ਪ੍ਰੋਗਰਾਮਾਂ ਵਿੱਚ ਪਾਰਟੀ ਦੇ ਮੰਚ ‘ਤੇ ਨਜ਼ਰ ਵੀ ਆਉਂਦੇ ਹਨ। ਇਸ ਰਿਪੋਰਟ ਵਿੱਚ ਅਸੀਂ ਅਜਿਹੇ ਹੀ ਕੁਝ ਪਹਿਲੂਆਂ ‘ਤੇ ਨਜ਼ਰ ਮਾਰਦੇ ਹਾਂ।
ਹਮੇਸ਼ਾ ਤੋਂ ਸੀ ਪਾਰਟੀ ਦਾ ਚਿਹਰਾ ਬਣਨ ਦੀ ਚਾਹਤ !
ਨਵਜੋਤ ਸਿੱਧੂ ਦੀ ਹੀ ਤਰ੍ਹਾਂ ਭਗਵੰਤ ਮਾਨ ਵੀ ਪੰਜਾਬ ਵਿੱਚ ਆਪਣੀ ਪਾਰਟੀ ਦਾ ਚਿਹਰਾ ਬਣਨ ਦੀ ਚਾਹਤ ਵਿੱਚ ਹੀ ਇਸ ਪਾਰਟੀ ਦਾ ਹਿੱਸਾ ਬਣੇ ਸਨ।
ਦਰਅਸਲ, ਕਾਂਗਰਸ ਨੇ ਪਿਛਲੀਆਂ ਵਿਧਾਨ ਸਭਾ ਚੋਣਾਂ ਕੈਪਟਨ ਦੇ ਚਿਹਰੇ ‘ਤੇ ਲੜੀਆਂ ਸਨ, ਪਰ ਉਸ ਦੌਰਾਨ ਕੈਪਟਨ ਅਮਰਿੰਦਰ ਸਿੰਘ ਲਗਭਗ ਹਰ ਮੰਚ ਤੋਂ ਇਹੀ ਕਹਿੰਦੇ ਰਹੇ ਕਿ ਇਹ ਉਹਨਾਂ ਦੇ ਕਰੀਅਰ ਦੀ ਆਖਰੀ ਚੋਣ ਹੈ। ਲਿਹਾਜਾ ਸਿੱਧੂ ਖੁਦ ਨੂੰ ਕੈਪਟਨ ਤੋਂ ਬਾਅਦ ਪੰਜਾਬ ਕਾਂਗਰਸ ਦੇ ਚਿਹਰੇ ਵਜੋਂ ਵੇਖਣ ਲੱਗੇ ਅਤੇ ਕਾਂਗਰਸ ਪਾਰਟੀ ਜੁਆਇਨ ਕਰ ਲਈ।
ਇਸੇ ਤਰ੍ਹਾਂ ਜਦੋਂ ਆਮ ਆਦਮੀ ਪਾਰਟੀ ਪੰਜਾਬ ਵਿੱਚ ਹੋਂਦ ‘ਚ ਆਈ, ਤਾਂ ਭਗਵੰਤ ਮਾਨ ਨੇ ਇਸ ਪਾਰਟੀ ਵਿੱਚ ਆਪਣਾ ਭਵਿੱਖ ਵੇਖਿਆ। ਭਗਵੰਤ ਮਾਨ ਸ਼ੁਰੂ ਤੋਂ ਹੀ ਖੁਦ ਨੂੰ ਪਾਰਟੀ ਦਾ ਚਿਹਰਾ ਪ੍ਰੋਜੈਕਟ ਕਰਦੇ ਰਹੇ। ਬੇਸ਼ੱਕ ਸ਼ੁਰੂਆਤੀ ਦੌਰ ਵਿੱਚ ਭਗਵੰਤ ਮਾਨ ਪਾਰਟੀ ਦੇ ਪ੍ਰਧਾਨ ਨਹੀਂ ਸਨ, ਪਰ ਪਾਰਟੀ ਦੀਆਂ ਵੱਖ-ਵੱਖ ਗਤੀਵਿਧੀਆਂ ਵਿੱਚ ਉਹਨਾਂ ਦੀ ਮੌਜੂਦਗੀ ਹੀ ਕਾਫੀ ਸੀ।
ਪ੍ਰਧਾਨ ਬਣਨ ਲਈ ਕਰਨਾ ਪਿਆ ਲੰਮਾ ਇੰਤਜਾਰ !
ਨਵਜੋਤ ਸਿੱਧੂ ਅਤੇ ਭਗਵੰਤ ਮਾਨ ਸ਼ੁਰੂ ਤੋਂ ਹੀ ਪਾਰਟੀ ਵਿੱਚ ਆਪਣਾ ਰੁਤਬਾ ਚਾਹੁੰਦੇ ਸਨ। ਲਿਹਾਜਾ ਸੀਐੱਮ ਦੀ ਕੁਰਸੀ ਦੇ ਨਾਲ-ਨਾਲ ਆਪੋ-ਆਪਣੀ ਪਾਰਟੀ ਦੀ ਪੰਜਾਬ ਇਕਾਈ ਦੇ ਪ੍ਰਧਾਨ ਦੀ ਕੁਰਸੀ ‘ਤੇ ਵੀ ਦੋਵਾਂ ਦੀ ਨਜ਼ਰ ਸੀ।
ਨਵਜੋਤ ਸਿੱਧੂ ਨੂੰ ਹਾਲਾਂਕਿ ਕੈਪਟਨ ਅਮਰਿੰਦਰ ਸਿੰਘ ਦੀ ਕੈਬਨਿਟ ‘ਚ ਮੰਤਰੀ ਬਣਾਇਆ ਗਿਆ, ਪਰ ਇਲਜਾਮ ਹੈ ਕਿ ਸਿੱਧੂ ਨੇ ਆਪਣੇ ਮਹਿਕਮੇ ਲਈ ਕਦੇ ਕੋਈ ਕੰਮ ਨਹੀਂ ਕੀਤਾ ਅਤੇ ਆਖਰ ਮਹਿਕਮਾ ਬਦਲਣ ਦੇ ਚਲਦੇ ਉਹਨਾਂ ਨੇ ਕੈਬਨਿਟ ਤੋਂ ਅਸਤੀਫਾ ਦੇ ਦਿੱਤਾ। ਲਿਹਾਜਾ ਸਿੱਧੂ ਨੇ ਪੰਜਾਬ ਕਾਂਗਰਸ ਪ੍ਰਧਾਨ ਦੀ ਕੁਰਸੀ ‘ਤੇ ਨਜ਼ਰ ਰੱਖਣੀ ਸ਼ੁਰੂ ਕੀਤੀ ਅਤੇ ਪੰਜਾਬ ਸਰਕਾਰ ਦੇ ਚੋਣ ਵਾਅਦਿਆਂ ਨੂੰ ਅਧਾਰ ਬਣਾਉਂਦਿਆਂ ਕੈਪਟਨ ਅਮਰਿੰਦਰ ਸਿੰਘ ਖਿਲਾਫ਼ ਬਗਾਵਤ ਛੇੜੀ। ਇਸੇ ਦੇ ਚਲਦੇ ਸੁਨੀਲ ਜਾਖੜ ਨੂੰ ਆਪਣੀ ਪ੍ਰਧਾਨਗੀ ਛੱਡਣੀ ਪਈ ਅਤੇ ਪ੍ਰਧਾਨਗੀ ਦਾ ਅਹੁਦਾ ਨਵਜੋਤ ਸਿੱਧੂ ਨੂੰ ਦੇ ਦਿੱਤਾ ਗਿਆ।
ਭਗਵੰਤ ਮਾਨ ਨੂੰ ਵੀ ਆਪਣੀ ਪਾਰਟੀ ਦੇ ਪ੍ਰਧਾਨ ਦੀ ਕੁਰਸੀ ਹਾਸਲ ਕਰਨ ਲਈ ਲੰਮਾ ਸਮਾਂ ਇੰਤਜਾਰ ਕਰਨਾ ਪਿਆ। ਬੇਸ਼ੱਕ ਮਾਨ ਪਹਿਲੇ ਦਿਨ ਤੋਂ ਖੁਦ ਨੂੰ ਪਾਰਟੀ ਦਾ ਫੇਸ ਪ੍ਰੋਜੈਕਟ ਕਰ ਰਹੇ ਸਨ, ਪਰ ਆਮ ਆਦਮੀ ਪਾਰਟੀ ਦੀ ਪੰਜਾਬ ਇਕਾਈ ਦਾ ਪਹਿਲਾ ਪ੍ਰਧਾਨ ਸੁੱਚਾ ਸਿੰਘ ਛੋਟੇਪੁਰ ਨੂੰ ਬਣਾ ਦਿੱਤਾ ਗਿਆ। ਛੋਟੇਪੁਰ ਨੇ ਕੁਰਸੀ ਛੱਡੀ, ਤਾਂ ਕਮਾਨ ਗੁਰਪ੍ਰੀਤ ਘੁੱਗੀ ਨੂੰ ਸੌਂਪ ਦਿੱਤੀ ਗਈ। ਪਰ ਭਗਵੰਤ ਮਾਨ ਨੂੰ ਐਡਜਸਟ ਕਰਨ ਲਈ ਘੁੱਗੀ ਵੀ ਜ਼ਿਆਦਾ ਦੇਰ ਤੱਕ ਇਸ ਅਹੁਦੇ ‘ਤੇ ਨਹੀਂ ਰਹਿ ਸਕੇ। ਭਗਵੰਤ ਮਾਨ ਨੂੰ ਪ੍ਰਧਾਨ ਬਣਾਉਣ ਦਾ ਖਾਮਿਆਜ਼ਾ ਪਾਰਟੀ ਨੂੰ ਘੁੱਗੀ ਨੂੰ ਗੁਆ ਕੇ ਵੀ ਚੁਕਾਉਣਾ ਪਿਆ, ਪਰ ਪਾਰਟੀ ਕਿਸੇ ਵੀ ਸੂਰਤ ਵਿੱਚ ਭਗਵੰਤ ਮਾਨ ਦੀ ਨਰਾਜ਼ਗੀ ਨਹੀਂ ਚਾਹੁੰਦੀ ਸੀ।
ਖੁਦ ਨੂੰ ਸੀਐੱਮ ਫੇਸ ਪ੍ਰੋਜੈਕਟ ਕਰਨ ਲਈ ਜੱਦੋ-ਜਹਿਦ !
ਨਵਜੋਤ ਸਿੱਧੂ ਤੇ ਭਗਵੰਤ ਮਾਨ ਵਿੱਟ ਇੱਕ ਸਮਾਨਤਾ ਇਹ ਵੀ ਹੈ ਕਿ ਦੋਵਾਂ ਨੇ ਹੀ ਖੁਦ ਨੂੰ ਸੀਐੱਮ ਪ੍ਰੋਜੈਕਟ ਕਰਨ ਲਈ ਕਾਫੀ ਜੱਦੋ-ਜਹਿਦ ਕੀਤੀ।
ਕੈਪਟਨ ਦੇ ਅਸਤੀਫੇ ਤੋਂ ਬਾਅਦ ਸਿੱਧੂ ਬੇਸ਼ੱਕ ਪੰਜਾਬ ਦੇ ਸੀਐੱਮ ਨਹੀਂ ਬਣ ਸਕੇ, ਪਰ ਅਗਾਮੀ ਚੋਣਾਂ ਲਈ ਖੁਦ ਨੂੰ ਸੀਐੱਮ ਫੇਸ ਪ੍ਰੋਜੈਕਟ ਕਰਨ ਲਈ ਚੰਗੀ ਵਾਹ ਲਗਾ ਰਹੇ ਹਨ। ਇਸਦੇ ਲਈ ਬਕਾਇਦਾ ਸਿੱਧੂ ਨੇ ਆਪਣਾ ਧੜਾ ਵੀ ਤਿਆਰ ਕੀਤਾ ਹੋਇਆ ਹੈ, ਜੋ ਉਹਨਾਂ ਨੂੰ ਸੀਐੱਮ ਫੇਸ ਪ੍ਰੋਜੈਕਟ ਕਰਨ ਵਿੱਚ ਕੋਈ ਅੜਚਨ ਪੈਦਾ ਨਹੀਂ ਕਰੇਗਾ। ਇਥੋਂ ਤੱਕ ਕਿ ਪੰਜਾਬ ਕਾਂਗਰਸ ਇੰਚਾਰਜ ਹਰੀਸ਼ ਰਾਵਤ ਵੀ ਬਿਆਨ ਦੇ ਚੁੱਕੇ ਹਨ ਕਿ ਅਗਲੀਆਂ ਚੋਣਾਂ ਸਿੱਧੂ ਦੀ ਅਗਵਾਈ ਵਿਚ ਲੜੀਆਂ ਜਾਣਗੀਆਂ। ਉਹ ਗੱਲ ਵੱਖਰੀ ਹੈ ਕਿ ਇਸ ਬਿਆਨ ਦੀ ਟਾਈਮਿੰਗ ‘ਤੇ ਸਵਾਲ ਉਠਣ ਦੇ ਚਲਦੇ ਹਾਈਕਮਾਂਡ ਨੂੰ ਬਿਆਨ ਜਾਰੀ ਕਰਕੇ ਚੋਣਾਂ ਚੰਨੀ ਅਤੇ ਸਿੱਧੂ ਦੋਵਾਂ ਦੀ ਅਗਵਾਈ ਵਿੱਚ ਲੜੇ ਜਾਣ ਦੀ ਗੱਲ ਕਹਿਣੀ ਪਈ। ਹਾਲ ਹੀ ਵਿੱਚ ਸਿੱਧੂ ਦਾ ਇੱਕ ਬਿਆਨ ਵੀ ਵਾਇਰਲ ਹੋਇਆ ਸੀ, ਜਿਸ ਵਿੱਚ ਉਹ ਕਹਿੰਦੇ ਨਜ਼ਰ ਆਏ ਸਨ ਕਿ ਭਗਵੰਤ ਸਿੱਧੂ ਦੇ ਪੁੱਤਰ(ਨਵਜੋਤ ਸਿੱਧੂ) ਨੂੰ ਮੁੱਖ ਮੰਤਰੀ ਬਣਾਉਣ, ਤਾਂ ਵਿਖਾਵਾਂਗਾ ਕਿ ਸਕਸੈਸ ਕਿਸ ਨੂੰ ਕਹਿੰਦੇ ਹਨ।
ਓਧਰ ਭਗਵੰਤ ਮਾਨ ਵੀ ਖੁਦ ਨੂੰ ਆਮ ਆਦਮੀ ਪਾਰਟੀ ਦੇ ਮੁੱਖ ਮੰਤਰੀ ਉਮੀਦਵਾਰ ਵਜੋਂ ਵੇਖਦੇ ਹਨ। ਲਿਹਾਜਾ ਉਹ ਆਪਣੇ ਸਮਰਥਕਾਂ ਨਾਲ ਲਗਾਤਾਰ ਮੀਟਿੰਗਾਂ ਕਰ ਰਹੇ ਹਨ। ਮਾਨ ਅਤੇ ਉਹਨਾਂ ਦੇ ਸਮਰਥਕਾਂ ਨੇ “BM for CM” ਦਾ ਨਾਅਰਾ ਵੀ ਦਿੱਤਾ ਸੀ, ਯਾਨੀ “ਸੀਐੱਮ ਅਹੁਦੇ ਲਈ ਭਗਵੰਤ ਮਾਨ” ਪਰ ਇਹਨਾਂ ਮੀਟਿੰਗਾਂ ਦਾ ਫਿਲਹਾਲ ਕੋਈ ਫਾਇਦਾ ਹੁੰਦਾ ਨਜ਼ਰ ਨਹੀਂ ਆ ਰਿਹਾ।
ਨਰਾਜ਼ਗੀ ਬਰਕਰਾਰ, ਪਰ ਅਹੁਦਿਆਂ ‘ਤੇ ਬਰਕਰਾਰ !
ਨਵਜੋਤ ਸਿੱਧੂ ਅਤੇ ਭਗਵੰਤ ਮਾਨ ਦੋਵੇਂ ਹੀ ਬੇਸ਼ੱਕ ਆਪੋ-ਆਪਣੀਆਂ ਪਾਰਟੀਆਂ ਤੋਂ ਖਫਾ ਚੱਲ ਰਹੇ ਹਨ, ਪਰ ਬਤੌਰ ਪ੍ਰਧਾਨ ਉਹ ਆਪਣੀ ਜਿੰਮੇਵਾਰੀਆਂ ਵੀ ਬਖੂਬੀ ਨਿਭਾ ਰਹੇ ਹਨ।
ਸ਼ਾਇਦ ਇਹੀ ਕਾਰਨ ਸੀ ਕਿ ਅਹੁਦੇ ਤੋਂ ਅਸਤੀਫਾ ਦੇਣ ਦੇ ਬਾਵਜੂਦ ਲਖੀਮਪੁਰ ਕਾਂਡ ਦੇ ਵਿਰੋਧ ਵਿੱਚ ਸਿੱਧੂ ਨੇ ਬਤੌਰ ਪਾਰਟੀ ਪ੍ਰਧਾਨ ਪੰਜਾਬ ਤੋਂ ਲਖੀਮਪੁਰ ਕੂਚ ਦੀ ਯੋਜਨਾ ਬਣਾਈ ਅਤੇ ਸੀਐੱਮ ਤੋਂ ਲੈ ਕੇ ਆਮ ਵਰਕਰ ਤੱਕ ਹਰ ਕਿਸੇ ਦੀ ਸ਼ਮੂਲੀਅਤ ਉਸ ਵਿੱਚ ਦਰਜ ਕਰਵਾਈ। ਇਥੋ ਤੱਕ ਕਿ ਪਿਛਲੀਆਂ ਲੋਕ ਸਭਾ ਚੋਣਾਂ ਦੌਰਾਨ ਜਦੋ ਸਿੱਧੂ ਪ੍ਰਧਾਨ ਵੀ ਨਹੀਂ ਸਨ ਅਤੇ ਉਹਨਾਂ ਦੀ ਨਰਾਜ਼ਗੀ ਦੀ ਅਜੇ ਸ਼ੁਰੂਆਤ ਹੀ ਹੋਈ ਸੀ, ਸਿੱਧੂ ਬੇਸ਼ੱਕ ਕੈਪਟਨ ਤੋਂ ਦੂਰੀ ਬਣਾ ਕੇ ਚੱਲ ਰਹੇ ਸਨ, ਪਰ ਪ੍ਰਿਅੰਕਾ ਗਾਂਧੀ ਨੂੰ ਰਿਸੀਵ ਕਰਨ ਲਈ ਬਠਿੰਡਾ ਏਅਰਪੋਰਟ ਪਹੁੰਚ ਗਏ ਸਨ।
ਗੱਲ ਭਗਵੰਤ ਮਾਨ ਦੀ ਕਰੀਏ, ਤਾਂ ਚੋਣਾਂ ਨਜ਼ਦੀਕ ਹੋਣ ਦੇ ਬਾਵਜੂਦ ਭਗਵੰਤ ਮਾਨ ‘ਆਪ’ ਦੀ ਪੰਜਾਬ ਇਕਾਈ ਦੇ ਪ੍ਰੋਗਰਾਮਾਂ ਵਿੱਚ ਸ਼ਾਮਲ ਨਹੀਂ ਹੋ ਰਹੇ। ਹਾਲਾਂਕਿ ਜਦੋਂ-ਜਦੋਂ ਅਰਵਿੰਦ ਕੇਜਰੀਵਾਲ ਪੰਜਾਬ ਦੌਰੇ ‘ਤੇ ਆਏ, ਬਤੌਰ ਪ੍ਰਧਾਨ ਭਗਵੰਤ ਮਾਨ ਉਹਨਾਂ ਨੂੰ ਏਅਰਪੋਰਟ ਰਿਸੀਵ ਕਰਨ ਵੀ ਪਹੁੰਚਦੇ ਅਤੇ ਹਰ ਜਗ੍ਹਾ ਉਹਨਾਂ ਦੇ ਨਾਲ ਨਜ਼ਰ ਵੀ ਆਉਂਦੇ ਹਨ। ਜਾਹਿਰ ਹੈ ਬਤੌਰ ਪੰਜਾਬ ਪ੍ਰਧਾਨ ਇਹ ਉਹਨਾਂ ਦੀ ਜਿੰਮੇਵਾਰੀ ਹੈ ਕਿ ਕੌਮੀ ਕਨਵੀਨਰ ਦੇ ਨਾਲ ਨਜ਼ਰ ਆਉਣ। ਹਾਲਾਂਕਿ ਇਸ ਵਿਚਾਲੇ ਕੇਜਰੀਵਾਲ ਤੋਂ ਜਦੋਂ ਮਾਨ ਦੀ ਨਰਾਜ਼ਗੀ ‘ਤੇ ਸਵਾਲ ਕੀਤਾ ਗਿਆ ਸੀ, ਤਾਂ ਉਹਨਾਂ ਨੇ ਭਗਵੰਤ ਮਾਨ ਨੂੰ ਆਪਣਾ ਛੋਟਾ ਭਰਾ ਦੱਸਦੇ ਹੋਏ ਦਾਅਵਾ ਕੀਤਾ ਸੀ ਕਿ ਉਹ ਨਰਾਜ਼ ਨਹੀਂ ਹਨ।
ਇਹਨਾਂ ਸਾਰੇ ਪਹਿਲੂਆਂ ਨੂੰ ਵੇਖਦਿਆਂ ਇਹ ਕਹਿਣਾ ਸ਼ਾਇਦ ਗਲਤ ਨਹੀਂ ਹੋਵੇਗਾ ਕਿ ਭਗਵੰਤ ਮਾਨ ਲਗਾਤਾਰ ਨਵਜੋਤ ਸਿੱਧੂ ਦੀ ਰਾਹ ‘ਤੇ ਚੱਲਦੇ ਨਜ਼ਰ ਆ ਰਹੇ ਹਨ। ਬਹਿਰਹਾਲ, ਸਿੱਧੂ ਤਾਂ ਪਾਰਟੀ ਤੋਂ ਨਰਾਜ਼ ਹੋ ਕੇ ਖੁੱਲ੍ਹੇਆਮ ਬਗਾਵਤ ਕਰਦਿਆਂ ਆਪਣੇ ਅਹੁਦੇ ਤੋਂ ਅਸਤੀਫਾ ਦੇ ਚੁੱਕੇ ਹਨ, ਬੇਸ਼ੱਕ ਉਹਨਾਂ ਦਾ ਅਸਤੀਫਾ ਫਿਲਹਾਲ ਮਨਜੂਰ ਨਹੀਂ ਹੋਇਆ ਹੈ। ਪਰ ਭਗਵੰਤ ਮਾਨ ਨੇ ਫਿਲਹਾਲ ਸਭ ਕੁਝ ਆਪਣੇ ਅੰਦਰ ਹੀ ਰੱਖਿਆ ਹੈ। ਇਹ ਵੇਖਣਾ ਦਿਲਚਸਪ ਰਹੇਗਾ ਕਿ ਜੇਕਰ ਆਮ ਆਦਮੀ ਪਾਰਟੀ ਭਗਵੰਤ ਮਾਨ ਨੂੰ ਬਤੌਰ ਸੀਐੱਮ ਫੇਸ ਪ੍ਰੋਜੈਕਟ ਨਹੀਂ ਕਰਦੀ, ਤਾਂ ਕੀ ਉਦੋਂ ਵੀ ਮਾਨ ਸਿੱਧੂ ਦੀ ਰਾਹ ਚੁਣਦਿਆਂ ਅਸਤੀਫਾ ਦੇਣ ਦਾ ਮਨ ਬਣਾਉਣਗੇ ਜਾਂ ਪਾਰਟੀ ਪ੍ਰਤੀ ਵਫਾਦਾਰੀ ਜਾਰੀ ਰੱਖਣਗੇ। ਇਸਦੇ ਲਈ ‘ਆਪ’ ਵੱਲੋਂ ਸੀਐੱਮ ਉਮੀਦਵਾਰ ਦੇ ਐਲਾਨ ਦਾ ਇੰਤਜਾਰ ਹੈ।
