ਬਿਓਰੋ। ਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਬੁੱਧਵਾਰ ਨੂੰ ਆਪਣੀ ਨਵੀਂ ਸਿਆਸੀ ਇਨਿੰਗ ਦਾ ਐਲਾਨ ਕਰ ਸਕਦੇ ਹਨ। ਕੈਪਟਨ ਵੱਲੋਂ ਅੱਜ ਸਵੇਰੇ 11 ਵਜੇ ਚੰਡੀਗੜ੍ਹ ਵਿੱਚ ਪ੍ਰੈੱਸ ਕਾਨਫ਼ਰੰਸ ਸੱਦੀ ਗਈ ਹੈ। ਚਰਚਾ ਹੈ ਕਿ ਇਸ ਦੌਰਾਨ ਕੈਪਟਨ ਆਪਣੀ ਨਵੀਂ ਪਾਰਟੀ ਦਾ ਐਲਾਨ ਕਰ ਸਕਦੇ ਹਨ।
ਕਾਂਗਰਸ ਦੇ ਸੂਤਰਾਂ ਦੀ ਮੰਨੀਏ, ਤਾਂ ਅਮਰਿੰਦਰ ਸਿੰਘ ਦੀ ਪ੍ਰੈੱਸ ਕਾਨਫ਼ਰੰਸ ਦਾ ਪਤਾ ਲਗਦੇ ਹੀ ਕਾਂਗਰਸ ਨੇ ਆਪਣੇ ਵਿਧਾਇਕਾਂ ਨਾਲ ਸੰਪਰਕ ਬਣਾਉਣਾ ਸ਼ੁਰੂ ਕਰ ਦਿੱਤਾ ਹੈ। ਖਾਸਕਰ ਵੱਡੇ ਆਗੂਆਂ ਦੀ ਮੂਵਮੈਂਟ ‘ਤੇ ਨਜ਼ਰ ਰੱਖੀ ਜਾ ਰਹੀ ਹੈ। ਚਰਚਾ ਹੈ ਕਿ ਕੈਪਟਨ ਅਮਰਿੰਦਰ ਸਿੰਘ ਨਾਲ ਕਾਂਗਰਸ ਦੇ ਉਹ ਦਿੱਗਜ ਆਗੂ ਵੀ ਪ੍ਰੈੱਸ ਕਾਨਫ਼ਰੰਸ ਵਿੱਚ ਨਜ਼ਰ ਆ ਸਕਦੇ ਹਨ, ਜਿਹਨਾਂ ਨੂੰ ਚੰਨੀ ਸਰਕਾਰ ਵਿੱਚ ਦਰਕਿਨਾਰ ਕੀਤਾ ਗਿਆ। ਇਹਨਾਂ ਵਿੱਚ ਮੰਤਰੀ ਅਹੁਦੇ ਤੋਂ ਹਟਾਏ ਗਏ ਰਾਣਾ ਗੁਰਮੀਤ ਸਿੰਘ ਸੋਢੀ, ਸਾਧੂ ਸਿੰਘ ਧਰਮਸੋਤ, ਗੁਰਪ੍ਰੀਤ ਕਾਂਗੜ, ਬਲਬੀਰ ਸਿੱਧੂ ਅਤੇ ਸ਼ਾਮ ਸੁੰਦਰ ਅਰੋੜਾ ਸ਼ਾਮਲ ਹਨ। ਇਹ ਸਾਰੇ ਹੀ ਵਿਧਾਇਕ ਕੈਪਟਨ ਦੇ ਕਰੀਬੀ ਮੰਨੇ ਜਾਂਦੇ ਹਨ।
ਵਿਰੋਧੀ ਘਟੀਆ ਸਿਆਸਤ ਖੇਡ ਰਹੇ- ਕੈਪਟਨ
ਨਵੀਂ ਪਾਰਟੀ ਦੇ ਐਲਾਨ ਦੀ ਸੰਭਾਵਨਾ ਵਿਚਾਲੇ ਕੈਪਟਨ ਅਮਰਿੰਦਰ ਸਿੰਘ ਨੇ ਆਪਣੇ ਵਿਰੋਧੀ ਕਾਂਗਰਸੀਆਂ ‘ਤੇ ਵੱਡਾ ਇਲਜਾਮ ਲਾਇਆ ਹੈ। ਕੈਪਟਨ ਨੇ ਕਿਹਾ ਕਿ ਪਟਿਆਲਾ ਅਤੇ ਹੋਰਨਾਂ ਥਾਵਾਂ ‘ਤੇ ਉਹਨਾਂ ਦੇ ਸਮਰਥਕਾਂ ਨੂੰ ਧਮਕਾਇਆ ਜਾ ਰਿਹਾ ਹੈ। ਉਹਨਾਂ ਕਿਹਾ, “ਮੈਂ ਆਪਣੇ ਵਿਰੋਧੀਆਂ ਨੂੰ ਦੱਸ ਦੇਣਾ ਚਾਹੁੰਦਾ ਹਾਂ ਕਿ ਅਜਿਹੀ ਘਟੀਆ ਸਿਆਸੀ ਖੇਡ ਨਾਲ ਉਹ ਮੈਨੂੰ ਹਰਾ ਨਹੀਂ ਸਕਦੇ। ਅਜਿਹੀਆਂ ਚਾਲਾਂ ਨਾਲ ਨਾ ਤਾਂ ਉਹ ਵੋਟਾਂ ਜਿੱਤ ਸਕਣਗੇ ਤੇ ਨਾ ਹੀ ਲੋਕਾਂ ਦੇ ਦਿਲ।”
‘From personal attacks they’ve now stooped to threats and harassment of my supporters in Patiala and elsewhere. Let me tell my rivals they can’t defeat me with such low-level political games. They will neither win votes nor people’s hearts with such tactics:’ @capt_amarinder 1/2 pic.twitter.com/zFSgQwjzmA
— Raveen Thukral (@RT_Media_Capt) October 26, 2021
ਜੋ ਮੇਰੇ ਨਾਲ ਹਨ, ਉਹ ਡਰਨ ਵਾਲੇ ਨਹੀਂ- ਕੈਪਟਨ
ਕੈਪਟਨ ਨੇ ਅੱਗੇ ਕਿਹਾ, “ਜੋ ਮੇਰੇ ਨਾਲ ਖੜ੍ਹੇ ਹਨ, ਉਹ ਇਸ ਲਈ ਕਿਉਂਕਿ ਉਹਨਾਂ ਨੂੰ ਮੇਰੇ ‘ਤੇ ਭਰੋਸਾ ਹੈ ਅਤੇ ਪੰਜਾਬ ਦੀ ਸ਼ਾਂਤੀ ਤੇ ਵਿਕਾਸ ਲਈ ਕੰਮ ਕਰਨਾ ਚਾਹੁੰਦੇ ਹਨ। ਉਹ ਡਰਾਉਣ-ਧਮਕਾਉਣ ਦੀਆਂ ਅਜਿਹੀਆਂ ਕੋਝੀਆਂ ਹਰਕਤਾਂ ਤੋਂਂ ਡਰਨਗੇ ਨਹੀਂ। ਪੰਜਾਬ ਦੇ ਭਵਿੱਖ ਲਈ ਅਸੀਂ ਜੰਗ ਜਾਰੀ ਰੱਖਾਂਗੇ।”
‘Those who have stood by me have done so because they believe in & want to continue working for Punjab’s peace and development. They will not be scared away by such petty acts of intimidation or persecution. We will continue to fight for Punjab’s future’: @capt_amarinder 2/2
— Raveen Thukral (@RT_Media_Capt) October 26, 2021
ਇਹਨਾਂ ਮੁੱਦਿਆਂ ‘ਤੇ ਵੀ ਬੋਲਣਗੇ ਕੈਪਟਨ ਅਮਰਿੰਦਰ ਸਿੰਘ !
- ਨਵੀਂ ਪਾਰਟੀ ਦੇ ਐਲਾਨ ਤੋਂ ਇਲਾਵਾ ਹੋਰ ਵੀ ਕਈ ਅਜਿਹੇ ਮੁੱਦੇ ਹਨ, ਜੋ ਅੱਜ ਦੀ ਪ੍ਰੈੱਸ ਕਾਨਫ਼ਰੰਸ ਵਿੱਚ ਅਹਿਮ ਰਹਿ ਸਕਦੇ ਹਨ। ਇਹਨਾਂ ਵਿੱਚ ਸਭ ਤੋਂ ਵੱਡਾ ਮੁੱਦਾ ਅਰੂਸਾ ਆਲਮ ਦਾ ਹੈ, ਜਿਸ ‘ਤੇ ਪੰਜਾਬ ਦੀ ਸਿਆਸਤ ਵਿੱਚ ਘਮਸਾਣ ਛਿੜਿਆ ਹੈ। ਡਿਪਟੀ ਸੀਐੱਮ ਸੁਖਜਿੰਦਰ ਰੰਧਾਵਾ ਵੱਲੋਂ ਅਰੂਸਾ ‘ਤੇ ਲਗਾਏ ISI ਨਾਲ ਕਥਿਤ ਕੁਨੈਕਸ਼ਨ ਦੇ ਇਲਜਾਮਾਂ ਨੂੰ ਲੈ ਕੇ ਕੈਪਟਨ ਪਹਿਲੀ ਵਾਰ ਖੁੱਲ੍ਹ ਕੇ ਮੀਡੀਆ ਸਾਹਮਣੇ ਬੋਲ ਸਕਦੇ ਹਨ। ਹਾਲਾਂਕਿ ਸੋਸ਼ਲ ਮੀਡੀਆ ‘ਤੇ ਉਹ ਵਿਰੋਧੀਆਂ ਨੂੰ ਜਵਾਬ ਦਿੰਦੇ ਰਹੇ ਹਨ। ਕੈਪਟਨ ਨੇ ਅਰੂਸਾ ਦੀ ਸੋਨੀਆ ਗਾਂਧੀ ਸਣੇ ਤਮਾਮ ਵੱਡੀਆਂ ਹਸਤੀਆਂ ਨਾਲ ਤਸਵੀਰਾਂ ਜਾਰੀ ਕਰਕੇ ਵੀ ਵਿਰੋਧੀਆਂ ਨੂੰ ਜਵਾਬ ਦਿੱਤਾ ਸੀ।
- ਦੂਜਾ ਮੁੱਦਾ ਕਿਸਾਨ ਅੰਦੋਲਨ ਦਾ ਹੈ, ਜਿਸਦੇ ਇਰਦ-ਗਿਰਦ ਕੈਪਟਨ ਦੀ ਨਵੀਂ ਪਾਰਟੀ ਦੀ ਸਿਆਸਤ ਘੁੰਮ ਰਹੀ ਹੈ। ਅਮਰਿੰਦਰ ਸਿੰਘ ਵੱਲੋਂ ਨਵੀਂ ਸਿਆਸੀ ਇਨਿੰਗ ਦਾ ਪੋਸਟਰ ਜਾਰੀ ਕਰਦਿਆਂ ਕਿਹਾ ਗਿਆ ਸੀ ਕਿ ਖੇਤੀ ਕਾਨੂੰਨਾਂ ‘ਤੇ ਫੈਸਲੇ ਤੋਂ ਬਾਅਦ ਹੀ BJP ਨਾਲ ਸਿਆਸੀ ਗੱਲਬਾਤ ਹੋਵੇਗੀ। ਅਜਿਹੇ ਵਿੱਚ ਕਿਸਾਨ ਅੰਦੋਲਨ ‘ਤੇ ਵੀ ਉਹਨਾਂ ਦੀ ਪ੍ਰਤੀਕਿਰਿਆ ਅਹਿਮ ਰਹੇਗੀ।
- ਤੀਜਾ ਤੇ ਅਹਿਮ ਮੁੱਦਾ BSF ਦੇ ਅਧਿਕਾਰ ਖੇਤਰ ਨੂੰ ਵਧਾਏ ਜਾਣ ਦਾ ਹੈ। ਕੇਂਦਰ ਦੇ ਇਸ ਫੈਸਲੇ ਦੇ ਪੰਜਾਬ ਵਿੱਚ ਚਹੁੰ-ਤਰਫਾ ਹੋ ਰਹੇ ਵਿਰੋਧ ਵਿਚਾਲੇ ਕੈਪਟਨ ਅਮਰਿੰਦਰ ਸਿੰਘ ਇਕੱਲੇ ਅਜਿਹੇ ਆਗੂ ਹਨ, ਜੋ ਇਸ ਫੈਸਲੇ ਦਾ ਸਵਾਗਤ ਕਰ ਰਹੇ ਹਨ। ਕੈਪਟਨ ਮੁਤਾਬਕ, ਇਸ ਨਾਲ ਦੇਸ਼ ਦੀ ਸੁਰੱਖਿਆ ਯਕੀਨੀ ਬਣਾਈ ਜਾ ਸਕੇਗੀ। ਇਸ ਮੁੱਦੇ ‘ਤੇ ਵੀ ਪੱਤਰਕਾਰਾਂ ਵੱਲੋਂ ਕੈਪਟਨ ਤੋਂ ਸਵਾਲ ਪੁੱਛੇ ਜਾਣਗੇ।
