ਬਿਓਰੋ। ਪੰਜਾਬ ਦੀ ਚੰਨੀ ਸਰਕਾਰ ਆਖਰਕਾਰ ਪੰਜਾਬ ਕਾਂਗਰਸ ਪ੍ਰਧਾਨ ਨਵਜੋਤ ਸਿੱਧੂ ਦੇ ਦਬਾਅ ਅੱਗੇ ਝੁਕ ਗਈ ਹੈ। ਪੰਜਾਬ ਦੇ ਐਡਵੋਕੇਟ ਜਨਰਲ ਏਪੀਐੱਸ ਦਿਓਲ ਦਾ ਅਸਤੀਫਾ ਮਨਜੂਰ ਕਰ ਲਿਆ ਗਿਆ ਹੈ। ਨਾਲ ਹੀ DGP ਇਕਬਾਲਪ੍ਰੀਤ ਸਹੋਤਾ ਨੂੰ ਵੀ ਹਟਾਇਆ ਜਾਵੇਗਾ। ਇਸਦੇ ਲਈ ਸਰਕਾਰ UPSC ਦੇ ਪੈਨਲ ਦਾ ਇੰਤਜਾਰ ਕਰੇਗੀ। ਕੈਬਨਿਟ ਤੋਂ ਬਾਅਦ ਖੁਦ ਸੀਐੱਮ ਚਰਨਜੀਤ ਚੰਨੀ ਨੇ ਨਵਜੋਤ ਸਿੱਧੂ ਦੀ ਮੌਜੂਦਗੀ ‘ਚ ਇਸਦਾ ਐਲਾਨ ਕੀਤਾ।
ਜਿਦ ਪੂਰੀ, ਤਾਂ ਸਿੱਧੂ ਬੋਲੇ- 110% ਸਹਿਯੋਗ ਕਰਾਂਗੇ
AG ਅਤੇ DGP ਨੂੰ ਹਟਾਉਣ ਦੀ ਜਿਦ ਪੂਰੀ ਹੋਣ ਤੋਂ ਬਾਅਦ ਪੰਜਾਬ ਪ੍ਰਦੇਸ਼ ਕਾਂਗਰਸ ਕਮੇਟੀ ਦੇ ਪ੍ਰਧਾਨ ਨਵਜੋਤ ਸਿੱਧੂ ਨੇ ਕਿਹਾ ਕਿ ਉਹਨਾਂ ਵੱਲੋਂ ਅਤੇ ਪੂਰੀ ਪਾਰਟੀ ਵੱਲੋਂ ਸੀਐੱਮ ਚੰਨੀ ਅਤੇ ਸਰਕਾਰ ਨੂੰ 110 ਫੀਸਦ ਸਹਿਯੋਗ ਦਿੱਤਾ ਜਾਵੇਗਾ। ਇਸ ਤੋਂ ਪਹਿਲਾਂ ਸੀਐੱਮ ਚੰਨੀ ਅਤੇ ਸਿੱਧੂ ਵਿਚਾਲੇ ਮੀਟਿੰਗ ਹੋਈ, ਜਿਸ ਵਿੱਚ ਸਪੱਸ਼ਟ ਹੋ ਗਿਆ ਕਿ DGP ਅਤੇ AG ਦੀ ਛੁੱਟੀ ਹੋਣੀ ਤੈਅ ਹੈ। ਇਸੇ ਲਈ ਸਿੱਧੂ ਵੀ ਪ੍ਰੈੱਸ ਕਾਨਫ਼ਰੰਸ ਵਿੱਚ ਪਹੁੰਚੇ। ਸਿੱਧੂ ਨੇ ਇੰਨਾ ਜ਼ਰੂਰ ਕਿਹਾ ਕਿ ਉਹਨਾਂ ਦੀ ਕਿਸੇ ਨਾਲ ਨਿੱਜੀ ਲੜਾਈ ਨਹੀਂ ਹੈ। ਹਾਲਾਂਕਿ ਸਿੱਧੇ ਤੌਰ ‘ਤੇ AG ਅਤੇ DGP ਬਾਰੇ ਸਿੱਧੂ ਨੇ ਕੁਝ ਨਹੀਂ ਕਿਹਾ।
AG ਨੇ ਪਿਛਲੇ ਦਿਨੀਂ ਦਿੱਤਾ ਸੀ ਅਸਤੀਫਾ
ਜਿਕਰਯੋਗ ਹੈ ਕਿ ਅਮਰਪ੍ਰੀਤ ਸਿੰਘ ਦਿਓਲ ਪਹਿਲਾਂ ਹੀ ਐਡਵੋਕੇਟ ਜਨਰਲ ਦੇ ਅਹੁਦੇ ਤੋਂ ਅਸਤੀਫਾ ਦੇ ਚੁੱਕੇ ਸਨ। ਕੈਬਨਿਟ ਦੀ ਬੈਠਕ ਵਿੱਚ ਉਹਨਾਂ ਦਾ ਅਸਤੀਫਾ ਮਨਜੂਰ ਕਰ ਲਿਆ ਗਿਆ। ਪਿਛਲੀ ਕੈਬਨਿਟ ਵਿੱਚ ਇਸ ‘ਤੇ ਚਰਚਾ ਹੀ ਨਹੀਂ ਹੋਈ, ਤਾਂ ਸਿੱਧੂ ਭੜਕ ਗਏ ਸਨ। ਉਹਨਾਂ ਨੇ ਪ੍ਰੈੱਸ ਕਾਨਫ਼ਰੰਸ ਕਰਕੇ ਸਰਕਾਰ ‘ਤੇ ਹੀ ਸਵਾਲ ਖੜ੍ਹੇ ਕਰ ਦਿੱਤੇ ਸਨ। ਸਿੱਧੂ ਦਾ ਕਹਿਣਾ ਹੈ ਕਿ APS ਦਿਓਲ ਨੇ ਬੇਅਦਬੀਆਂ ਅਤੇ ਗੋਲੀ ਕਾਂਡ ਕੇਸ ਦੇ ਮੁੱਖ ਮੁਲਜ਼ਮ ਸਾਬਕਾ DGP ਸੁਮੇਧ ਸੈਣੀ ਨੂੰ ਬਲੈਂਕੇਟ ਬੇਲ ਦਵਾਈ, ਇਸ ਲਈ ਉਹਨਾਂ ਨੂੰ ਨਿਯੁਕਤ ਕਰਨਾ ਗਲਤ ਹੈ।
ਸਿੱਧੂ ਦੇ ਮਨਚਾਹੇ ਅਫ਼ਸਰ ਵੀ ਨਹੀਂ ਲੱਗਣਗੇ
ਸੂਤਰਾਂ ਦੀ ਮੰਨੀਏ, ਤਾਂ DGP ਅਤੇ AG ਦੇ ਅਹੁਦੇ ‘ਤੇ ਸਿੱਧੂ ਦੇ ਕਹੇ ਮੁਤਾਬਕ ਵੀ ਅਫ਼ਸਰ ਨਹੀਂ ਲਾਏ ਜਾਣਗੇ। ਸਿੱਧੂ ਅਜੇ ਤੱਕ ਐਡਵੋਕੇਟ ਡੀਐੱਸ ਪਟਵਾਲੀਆ ਨੂੰ AG ਅਤੇ ਸਿਧਾਰਥ ਚਟੋਪਾਧਿਆਏ ਨੂੰ DGP ਲਗਾਉਣ ਦੀ ਗੱਲ ਕਹਿ ਰਹੇ ਸਨ। ਹਾਲਾਂਕਿ ਨਵੇਂ ਅਫ਼ਸਰਾਂ ਦੀ ਨਿਯੁਕਤੀ ਸਰਕਾਰ ਆਪਣੇ ਪੱਧਰ ‘ਤੇ ਹੀ ਕਰੇਗੀ। ਇੰਨਾ ਜ਼ਰੂਰ ਹੈ ਕਿ ਉਹਨਾਂ ਦਾ ਬੇਅਦਬੀ ਅਤੇ ਡਰੱਗਜ਼ ਕੇਸ ਨਾਲ ਕੋਈ ਵਾਸਤਾ ਨਾ ਰਿਹਾ ਹੋਵੇ, ਇਸਦਾ ਖਾਸ ਖਿਆਲ ਰੱਖਿਆ ਜਾਵੇਗਾ।
ਕਾਂਗਰਸ ਦੀ ਚੁਣਾਵੀ ਮਜਬੂਰੀ ਬਣੇ ਸਿੱਧੂ !
ਸਿੱਧੂ ਨੇ ਸੋਮਵਾਰ ਨੂੰ ਹੀ ਚੇਤਾਵਨੀ ਦਿੱਤੀ ਸੀ ਕਿ ਸਰਕਾਰ ਅਤੇ ਕਾਂਗਰਸ ਚੁਣ ਲਵੇ ਕਿ ਉਹਨਾਂ ਨੂੰ ਸਮਝੌਤੇ ਵਾਲੇ ਅਫ਼ਸਰ ਚਾਹੀਦੇ ਹਨ ਜਾਂ ਫਿਰ ਪੰਜਾਬ ਕਾਂਗਰਸ ਦਾ ਪ੍ਰਧਾਨ। ਸਾਫ਼ ਤੌਰ ‘ਤੇ ਮੰਨਿਆ ਗਿਆ ਕਿ ਸਿੱਧੂ ਮੁੜ ਅਸਤੀਫਾ ਦੇ ਸਕਦੇ ਹਨ। ਪੰਜਾਬ ਦੀਆਂ ਵਿਧਾਨ ਸਭਾ ਚੋਣਾਂ ਵਿੱਚ ਕੁਝ ਹੀ ਮਹੀਨੇ ਬਾਕੀ ਹਨ। ਅਜਿਹੇ ਵਿੱਚ ਕਾਂਗਰਸ ਨੂੰ ਸਿੱਧੂ ਦੇ ਜਾਣ ਨਾਲ ਹੋਣ ਵਾਲੇ ਨੁਕਸਾਨ ਦਾ ਡਰ ਸਤਾ ਰਿਹਾ ਹੈ, ਉਹ ਵੀ ਅਜਿਹੇ ਵਕਤ ਵਿੱਚ ਜਦੋਂ ਕੈਪਟਨ ਅਮਰਿੰਦਰ ਸਿੰਘ ਵੀ ਕਾਂਗਰਸ ਛੱਡ ਚੁੱਕੇ ਹਨ। ਇਸ ਲਈ ਪੰਜਾਬ ਕਾਂਗਰਸ ਇੰਚਾਰਜ ਹਰੀਸ਼ ਚੌਧਰੀ ਦੇ ਦਖਲ ਤੋਂ ਬਾਅਦ ਸਰਕਾਰ ਨੂੰ ਫੈਸਲਾ ਬਦਲਣਾ ਪਿਆ।
