ਬਿਓਰੋ। ਕਰੀਬ ਡੇਢ ਮਹੀਨਿਆਂ ਬਾਅਦ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਨਵਜੋਤ ਸਿੱਧੂ ਨੇ ਇੱਕ ਵਾਰ ਫਿਰ ਪਾਰਟੀ ਦੀ ਕਮਾਨ ਸਾਂਭ ਲਈ ਹੈ। ਮੰਗਲਵਾਰ ਨੂੰ ਸਿੱਧੂ ਚੰਡੀਗੜ੍ਹ ਸਥਿਤ ਕਾਂਗਰਸ ਭਵਨ ਪਹੁੰਚੇ ਅਤੇ ਸੀਐੱਮ ਚਰਨਜੀਤ ਸਿੰਘ ਚੰਨੀ ਤੇ ਕਾਂਗਰਸ ਇੰਚਾਰਜ ਹਰੀਸ਼ ਚੌਧਰੀ ਦੀ ਮੌਜੂਦਗੀ ਵਿੱਚ ਆਪਣਾ ਚਾਰਜ ਸਾਂਭ ਲਿਆ।
ਨਵਜੋਤ ਸਿੱਧੂ ਨੇ 28 ਸਤੰਬਰ ਨੂੰ ਪੰਜਾਬ ਕਾਂਗਰਸ ਪ੍ਰਧਾਨ ਦੇ ਅਹੁਦੇ ਤੋਂ ਅਸਤੀਫਾ ਦੇ ਦਿੱਤਾ ਸੀ। ਉਹ ਪੰਜਾਬ ਦੇ ਨਵੇਂ ਐਡਵੋਕੇਟ ਜਨਰਲ ਏਪੀਐੱਸ ਦਿਓਲ ਅਤੇ DGP ਇਕਬਾਲਪ੍ਰੀਤ ਸਹੋਤਾ ਦੀ ਨਿਯੁਕਤੀ ਦਾ ਵਿਰੋਧ ਕਰ ਰਹੇ ਸਨ। ਹਾਲਾਂਕਿ 5 ਨਵੰਬਰ ਨੂੰ ਉਹਨਾਂ ਨੇ ਅਸਤੀਫਾ ਵਾਪਸ ਲੈ ਲਿਆ ਸੀ।
ਹੁਣ ਕਾਂਗਰਸ ਦੀ ਤਾਕਤ ਵਿਖਾਵਾਂਗੇ- ਸਿੱਧੂ
ਸਿੱਧੂ ਨੇ ਕਿਹਾ ਕਿ ਅਗਲੇ ਇੱਕ ਹਫ਼ਤੇ ਅੰਦਰ ਸੰਗਠਨ ਦੇ ਵਿਸਥਾਰ ਦਾ ਕੰਮ ਕਰ ਲਿਆ ਜਾਵੇਗਾ। ਉਹਨਾਂ ਮੁਤਾਬਕ, ਜਿਲ੍ਹਾ ਪ੍ਰਧਾਨਾਂ ਦੀਆਂ ਲਿਸਟਾਂ ਫਾਈਨਲ ਹਨ। ਜਲਦ ਹੀ ਇਹਨਾਂ ਨੂੰ ਜਾਰੀ ਕਰ ਦਿੱਤਾ ਜਾਵੇਗਾ। ਸਿੱਧੂ ਨੇ ਕਿਹਾ ਕਿ ਪਾਰਟੀ ਵਿੱਚ ਸਾਰਿਆਂ ਨੂੰ ਉਚਿਤ ਥਾਂ ਅਤੇ ਸਨਮਾਨ ਦਿੱਤਾ ਜਾਵੇਗਾ।
CM ਅਤੇ ਮੈਂ 2 ਪਹੀਏ, ਮਿਲ ਕੇ ਕੰਮ ਕਰਾਂਗੇ- ਸਿੱਧੂ
ਸਿੱਧੂ ਨੇ ਕਿਹਾ, “ਮੇਰੇ ਕੋਲ ਸੰਗਠਨ ਦੀ ਤਾਕਤ ਹੈ, ਜਦਕਿ ਸੀਐੱਮ ਚੰਨੀ ਕੋਲ ਪ੍ਰਸ਼ਾਸਨਿਕ ਪਾਵਰ ਹੈ। ਅਸੀਂ ਦੋਵੇਂ ਹੀ ਪਹੀਏ ਹਾਂ, ਜੋ ਮਿਲ ਕੇ ਚੱਲਾਂਗੇ।” ਉਹਨਾਂ ਕਿਹਾ ਕਿ ਉਹਨਾਂ ਦੇ ਪੰਜਾਬ ਮਾਡਲ ਨੂੰ ਕਾਂਗਰਸ ਹਾਈਕਮਾਂਡ ਦੀ ਵੀ ਮਨਜੂਰੀ ਹੈ। ਉਹਨਾਂ ਨੂੰ ਖਾਲੀ ਖਜਾਨੇ ਨੂੰ ਲੈ ਕੇ ਖਜਾਨਾ ਮੰਤਰੀ ਮਨਪ੍ਰੀਤ ਬਾਦਲ ਦਾ ਵੀ ਬਚਾਅ ਕੀਤਾ ਅਤੇ ਕਿਹਾ ਕਿ ਖਜਾਨੇ ਦੀ ਜਿੰਮੇਵਾਰੀ ਹਰ ਸ਼ਖਸ਼ ਦੀ ਹੈ।
ਕਈ ਮੌਜੂਦਾ ਵਿਧਾਇਕਾਂ ਦੀ ਟਿਕਟ ਕੱਟੇਗੀ !
ਸਿੱਧੂ ਨੇ ਕਿਹਾ, “ਕਾਂਗਰਸ ਵਿੱਚ ਹਰ ਵਿਧਾਇਕ ਨੂੰ ਟਿਕਟ ਨਹੀਂ ਮਿਲੇਗੀ। ਜਿਸ ਵਿੱਚ ਜਿੱਤਣ ਦੀ ਸਮਰੱਥਾ ਹੋਵੇਗੀ, ਉਸ ਨੂੰ ਹੀ ਟਿਕਟ ਮਿਲੇਗੀ। ਇਸਦੇ ਲਈ ਪਾਰਟੀ ਸਰਵੇ ਕਰੇਗੀ।” ਸਿੱਧੂ ਦੇ ਬਿਆਨ ਤੋਂ ਸਾਫ ਹੈ ਕਿ ਇਸ ਵਾਰ ਕਈ ਕਾਂਗਰਸੀ ਵਿਧਾਇਕਾਂ ਦੀ ਟਿਕਟ ਕੱਟ ਸਕਦੀ ਹੈ।
ਸੀਐੱਮ ਫੇਸ ‘ਤੇ ਗੋਲਮੋਲ ਜਵਾਬ
ਇਸ ਦੌਰਾਨ ਸਿੱਧੂ ਦੇ ਨਾਲ ਮੌਜੂਦ ਪੰਜਾਬ ਕਾਂਗਰਸ ਇੰਚਾਰਜ ਹਰੀਸ਼ ਚੌਧਰੀ ਤੋਂ ਜਦੋਂ ਸੀਐੱਮ ਫੇਸ ਨੂੰ ਲੈ ਕੇ ਸਵਾਲ ਪੁੱਛਿਆ ਗਿਆ, ਤਾਂ ਉਹਨਾਂ ਨੇ ਕੋਈ ਸਿੱਧਾ ਜਵਾਬ ਨਹੀਂ ਦਿੱਤਾ। ਚੌਧਰੀ ਨੇ ਕਿਹਾ ਕਿ ਹਰ ਪੰਜਾਬੀ ਕਾਂਗਰਸ ਦੇ ਸੀਐੱਮ ਦਾ ਚਿਹਰਾ ਹੈ। ਸਾਫ ਹੈ ਕਿ ਕਾਂਗਰਸ ਬਿਨ੍ਹਾਂ ਸੀਐੱਮ ਉਮੀਦਵਾਰ ਦੇ ਹੀ ਮੈਦਾਨ ਵਿੱਚ ਉਤਰਨ ਦੀ ਤਿਆਰੀ ਵਿੱਚ ਹੈ।
