ਬਿਓਰੋ। ਪੰਜਾਬ ਕਾਂਗਰਸ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਵਿਰੋਧੀਆਂ ਤੋਂ ਵੱਧ ਆਪਣਿਆਂ ‘ਤੇ ਹੀ ਹਮਲਾਵਰ ਹਨ। ਸੀਐੱਮ ਚਰਨਜੀਤ ਸਿੰਘ ਚੰਨੀ ਅਤੇ ਗ੍ਰਹਿ ਮੰਤਰੀ ਸੁਖਜਿੰਦਰ ਰੰਧਾਵਾ ਤੋਂ ਬਾਅਦ ਹੁਣ ਕਾਂਗਰਸ ਦੇ ਸਾਬਕਾ ਪੰਜਾਬ ਪ੍ਰਧਾਨ ਸੁਨੀਲ ਜਾਖੜ ‘ਤੇ ਹਮਲਾ ਬੋਲਿਆ ਹੈ। ਅੰਮ੍ਰਿਤਸਰ ਪਹੁੰਚੇ ਸਿੱਧੂ ਨੇ ਕਿਹਾ, “ਜੋ ਪਹਿਲਾਂ ਪ੍ਰਧਾਨ ਸਨ, ਉਹ ਬੇਹੱਦ ਜੋਰ-ਸ਼ੋਰ ਨਾਲ ਟਵੀਟ ਕਰਦੇ ਹਨ। ਕਦੇ ਉਹਨਾਂ ਨੇ ਅਜਿਹੀ ਗੱਲ ਚੁੱਕੀ ਹੈ, ਜਿਵੇਂ ਮੈਂ ਮੁੱਦੇ ਚੁੱਕ ਰਿਹਾ ਹਾਂ?”
ਜਾਖੜ ਨੇ ਸ਼ਾਇਰਾਨਾ ਅੰਦਾਜ਼ ‘ਚ ਦਿੱਤਾ ਜਵਾਬ
ਸੁਨੀਲ ਜਾਖੜ ਨੇ ਸਿੱਧੂ ਦੇ ਬਿਆਨ ‘ਤੇ ਸ਼ਾਇਰਾਨਾ ਅੰਦਾਜ਼ ਵਿੱਚ ਪਲਟਵਾਰ ਕੀਤਾ ਹੈ। ਉਹਨਾਂ ਨੇ ਅਕਬਰ ਇਲਾਹਾਬਾਦੀ ਦੇ ਸ਼ੇਰ ‘ਬੁਤ ਹਮ ਕੋ ਕਹੇ ਕਾਫਿਰ, ਅੱਲ੍ਹਾ ਕੀ ਮਰਜੀ ਹੈ, ਸੂਰਜ ਮੇਂ ਲਗੇ ਧੱਬਾ, ਫਿਤਰਤ ਕੇ ਕਰਿਸ਼ਮੇ ਹੈਂ, ਬਰਕਤ ਜੋ ਨਹੀਂ ਹੋਤੀ, ਨੀਅਤ ਕੀ ਖਰਾਬੀ ਹੈ’ ਦੇ ਜ਼ਰੀਏ ਸਿੱਧੂ ‘ਤੇ ਹਮਲਾ ਬੋਲਿਆ। ਸਾਫ ਤੌਰ ‘ਤੇ ਜਾਖੜ ਨੇ ਸਿੱਧੂ ਨੂੰ ਕਾਫਿਰ ਕਹਿ ਦਿੱਤਾ ਅਤੇ ਉਹਨਾਂ ਦੀ ਨੀਅਤ ‘ਤੇ ਵੀ ਸਵਾਲ ਚੁੱਕੇ ਹਨ।
बुत हम को कहे काफ़िर, अल्लाह की मर्जी है
सूरज में लगे धब्बा, फ़ितरत के करिश्में हैं I
……….
बरकत जो नहीं होती, नीयत की खराबी है। pic.twitter.com/pzdVQeB9wA— Sunil Jakhar (@sunilkjakhar) November 26, 2021
ਟਵਿਟਰ ‘ਤੇ ਲਗਾਤਾਰ ਸਵਾਲ ਚੁੱਕਦੇ ਰਹੇ ਜਾਖੜ
ਪੰਜਾਬ ਕਾਂਗਰਸ ਪ੍ਰਧਾਨ ਦੇ ਅਹੁਦੇ ਤੋਂ ਹਟਾਏ ਜਾਣ ਦੇ ਬਾਅਦ ਤੋਂ ਸੁਨੀਲ ਜਾਖੜ ਆਪਣਿਆਂ ਤੋਂ ਖਫਾ ਚੱਲ ਰਹੇ ਹਨ। ਉਹ ਲਗਾਤਾਰ ਸੀਐੱਮ ਚੰਨੀ ਅਤੇ ਕਾਂਗਰਸ ਪ੍ਰਧਾਨ ਸਿੱਧੂ ‘ਤੇ ਹਮਲਾਵਰ ਹਨ। ਚੰਨੀ ਅਤੇ ਸਿੱਧੂ ਜਦੋਂ ਕੇਦਾਰਨਾਥ ਯਾਤਰਾ ‘ਤੇ ਗਏ ਸਨ, ਤਾਂ ਸਿੱਧੂ ਨੇ ਉਹਨਾਂ ਦੀ ਫੋਟੋ ਸ਼ੇਅਰ ਕਰਕੇ ਉਹਨਾਂ ਨੂੰ ਸਿਆਸੀ ਸ਼ਰਧਾਲੂ ਦੱਸ ਕੇ ਨਿਸ਼ਾਨਾ ਸਾਧਿਆ ਸੀ।
ਆਪਣੀਆਂ ਹੀ ਗੱਲਾਂ ਭੁੱਲ ਗਏ ਨਵਜੋਤ ਸਿੱਧੂ
ਨਵਜੋਤ ਸਿੰਘ ਸਿੱਧੂ ਨੂੰ ਜਦੋਂ ਪੰਜਾਬ ਕਾਂਗਰਸ ਦਾ ਪ੍ਰਧਾਨ ਬਣਾਇਆ ਜਾ ਰਿਹਾ ਸੀ, ਤਾਂ ਉਸ ਵੇਲੇ ਸਿੱਧੂ ਨੇ ਪੰਜਾਬ ਕਾਂਗਰਸ ਦੇ ਕਈ ਆਗੂਆਂ ਨਾਲ ਮੁਲਾਕਾਤ ਕੀਤੀ ਸੀ। ਇਸਦੀ ਸ਼ੁਰੂਆਤ ਉਹਨਾਂ ਨੇ ਸੁਨੀਲ ਜਾਖੜ ਤੋਂ ਹੀ ਕੀਤੀ ਸੀ। ਸਿੱਧੂ ਨੇ ਖੁਦ ਜਾਖੜ ਦੇ ਘਰ ਜਾ ਕੇ ਉਹਨਾਂ ਨਾਲ ਮੁਲਾਕਾਤ ਕੀਤੀ ਅਤੇ ਉਹਨਾਂ ਨੂੰ ਗਲੇ ਲਗਾ ਕੇ ਆਪਣਾ ਮਾਰਗਦਰਸ਼ਕ ਦੱਸਿਆ ਸੀ। ਸਿੱਧੂ ਨੇ ਇਥੋਂ ਤੱਕ ਕਿਹਾ ਸੀ ਕਿ ਉਹਨਾਂ ਦੋਵਾਂ ਦੀ ਜੋੜ ਫਿੱਟ ਵੀ ਹੈ ਤੇ ਹਿੱਟ ਵੀ, ਪਰ ਹੁਣ ਲੱਗਦਾ ਹੈ ਕਿ ਸਿੱਧੂ ਆਪਣੀਆਂ ਹੀ ਗੱਲਾਂ ਭੁੱਲ ਗਏ ਹਨ।
