ਬਿਓਰੋ। ਆਮ ਆਦਮੀ ਪਾਰਟੀ ਨਾਲ ਨਜ਼ਦੀਕੀ ਦੀਆਂ ਖ਼ਬਰਾਂ ਵਿਚਾਲੇ ਪੰਜਾਬ ਕਾਂਗਰਸ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਨੇ ਪਹਿਲੀ ਵਾਰ ਕੇਜਰੀਵਾਲ ‘ਤੇ ਸਿੱਧਾ ਹਮਲਾ ਬੋਲਿਆ ਹੈ। ਮਹਿਲਾਵਾਂ ਅਤੇ ਸਿੱਖਿਆ ਦੇ ਮੁੱਦੇ ‘ਤੇ ਕਾਂਗਰਸ ਨੂੰ ਘੇਰ ਰਹੇ ਕੇਜਰੀਵਾਲ ‘ਤੇ ਜੋਰਦਾਰ ਹਮਲਾ ਬੋਲਦੇ ਹੋਏ ਸਿੱਧੂ ਨੇ ਕਿਹਾ ਕਿ ਜੋ ਸ਼ੀਸ਼ੇ ਦੇ ਘਰਾਂ ਵਿੱਚ ਰਹਿੰਦੇ ਹਨ, ਉਹ ਦੂਜਿਆਂ ਦੇ ਘਰਾਂ ‘ਤੇ ਪੱਥਰ ਨਹੀਂ ਸੁੱਟਦੇ।
ਦਿੱਲੀ ‘ਚ ਮਹਿਲਾਵਾਂ ਦੀ ਮਦਦ ਕਿਉਂ ਨਹੀਂ ਕੀਤੀ- ਸਿੱਧੂ
ਸਿੱਧੂ ਨੇ ਅਰਵਿੰਦ ਕੇਜਰੀਵਾਲ ਨੂੰ ਕਿਹਾ, “ਤੁਸੀਂ ਨਾਰੀ ਸਸ਼ਕਤੀਕਰਨ, ਰੁਜ਼ਗਾਰ ਅਤੇ ਟੀਚਰਾਂ ਦੀ ਗੱਲ ਕਰਦੇ ਹੋ, ਪਰ ਤੁਹਾਡੀ ਸਰਕਾਰ ਵਿੱਚ ਇੱਕ ਵੀ ਮਹਿਲਾ ਮੰਤਰੀ ਨਹੀਂ ਹੈ।” ਸਿੱਧੂ ਨੇ ਪੁੱਛਿਆ ਕਿ ਦਿੱਲੀ ਦੀ ਸਾਬਕਾ ਸੀਐੱਮ ਸ਼ੀਲਾ ਦੀਕਸ਼ਿਤ ਦੇ ਸਰਪਲੱਸ ਰੈਵਨਿਊ ਛੱਡਣ ਤੋਂ ਬਾਅਦ ਕੇਜਰੀਵਾਲ ਨੇ ਕਿੰਨੀਆਂ ਮਹਿਲਾਵਾਂ ਨੂੰ ਇੱਕ-ਇੱਕ ਹਜਾਰ ਰੁਪਏ ਦਿੱਤੇ ਹਨ?
Those who live in glass houses should not throw stones at others. @ArvindKejriwal Ji you talk of women empowerment, jobs & teachers. However, you don’t have one woman minister in your Cabinet. How many women in Delhi get ₹1000 despite revenue surplus left by Sheila Dikshit Ji !!
— Navjot Singh Sidhu (@sherryontopp) November 29, 2021
ਸੱਚੇ ਲੀਡਰ ਲੌਲੀਪੌਪ ਨਹੀਂ ਦਿੰਦੇ- ਸਿੱਧੂ
ਸਿੱਧੂ ਨੇ ਕਿਹਾ, “ਨਾਰੀ ਸਸ਼ਕਤੀਕਰਨ ਦਾ ਮਤਲਬ ਮਹਿਲਾਵਾਂ ਨੂੰ ਚੋਣ ਪ੍ਰਕਿਰਿਆ ਦੇ ਹਰ ਪੜਾਅ ਵਿੱਚ ਸ਼ਾਮਲ ਕਰਨਾ ਹੈ। ਜਿਵੇਂ ਕਾਂਗਰਸ ਪੰਜਾਬ ਵਿੱਚ ਕਰ ਰਹੀ ਹੈ।” ਉਹਨਾਂ ਕਿਹਾ ਕਿ ਸੱਚੇ ਲੀਡਰ ਇੱਕ ਹਜਾਰ ਦਾ ਲੌਲੀਪੌਪ ਨਹੀਂ ਦਿੰਦੇ। ਇਸਦੀ ਬਜਾਏ ਉਹਨਾਂ ਨੂੰ ਆਤਮ-ਨਿਰਭਰ ਬਣਾਉਣ ਲਈ ਸਕਿੱਲਡ ਬਣਾਉਂਦੇ ਹਨ।
ਰੁਜ਼ਗਾਰ ਅਤੇ ਸਿੱਖਿਆ ਦੇ ਮੁੱਦੇ ‘ਤੇ ਵੀ ਘੇਰਿਆ
ਸਿੱਧੂ ਨੇ ਕਿਹਾ ਕਿ 2015 ਦੇ ਚੋਣ ਮੈਨੀਫੈਸਟੋ ਵਿੱਚ ਅਰਵਿੰਦ ਕੇਜਰੀਵਾਲ ਨੇ 8 ਲੱਖ ਨਵੀਆਂ ਨੌਕਰੀਆਂ ਅਤੇ 20 ਨਵੇਂ ਕਾਲਜਾਂ ਦਾ ਵਾਅਦਾ ਕੀਤਾ ਸੀ। ਸਿੱਧੂ ਨੇ ਪੁੱਛਿਆ, “ਇਹ ਜੌਬ ਅਤੇ ਕਾਲਜ ਕਿਥੇ ਹਨ?” ਉਹਨਾਂ ਕਿਹਾ ਕਿ ਤੁਹਾਡੀਆਂ ਫੇਲ੍ਹ ਗਾਰੰਟੀਆਂ ਨਾਲ ਦਿੱਲੀ ‘ਚ ਬੇਰੁਜ਼ਗਾਰੀ ਦਰ ਪਿਛਲੇ 5 ਸਾਲਾਂ ਵਿੱਚ 5 ਗੁਣਾ ਵੱਧ ਚੁੱਕੀ ਹੈ। ਉਹਨਾਂ ਕਿਹਾ ਕਿ 2015 ਵਿੱਚ ਦਿੱਲੀ ‘ਚ ਟੀਚਰਾਂ ਦੀਆਂ 12,515 ਵੈਂਕੇਸੀ ਸਨ। ਹੁਣ 2021 ਵਿੱਚ ਇਹ ਜੌਬ ਵੈਕੇਂਸੀ 19,907 ‘ਤੇ ਪਹੁੰਚ ਚੁੱਕੀ ਹੈ।
On teachers and jobs, in 2015 there were 12515 job vacancies of teachers in Delhi, & in 2021 there are 19907 such job vacancies of teachers in Delhi … and you are filling most of vacant posts by just guest lecturers… pic.twitter.com/L8Y595pmR4
— Navjot Singh Sidhu (@sherryontopp) November 29, 2021
ਕੇਜਰੀਵਾਲ ਦੇ ਬਹਾਨੇ ਪਰਗਟ ਸਿੰਘ ਦਾ ਬਚਾਅ
ਹਾਲ ਹੀ ਵਿੱਚ ਕੇਜਰੀਵਾਲ ਨੇ ਪੰਜਾਬ ਦੀ ਸਿੱਖਿਆ ਵਿਵਸਥਾ ‘ਤੇ ਸਵਾਲ ਚੁੱਕੇ ਸਨ ਅਤੇ ਟੀਚਰਾਂ ਨੂੰ 8 ਗਾਰੰਟੀਆਂ ਦਿੱਤੀਆਂ ਸਨ, ਜਿਸ ਤੋਂ ਬਾਅਦ ਸਿੱਖਿਆ ਮੰਤਰੀ ਪਰਗਟ ਸਿੰਘ ਨੇ ਕੇਜਰੀਵਾਲ ‘ਤੇ ਪਲਟਵਾਰ ਕਰਕੇ ਪੰਜਾਬ ਦੇ ਐਜੁਕੇਸ਼ਨ ਸਿਸਟਮ ਨੂੰ ਦਿੱਲੀ ਤੋਂ ਬਿਹਤਰ ਦੱਸਿਆ ਸੀ।
ਇਸ ਜੁਬਾਨੀ ਜੰਗ ਵਿੱਚ ਜਲਦੀ ਹੀ ਦਿੱਲੀ ਦੇ ਸਿੱਖਿਆ ਮੰਤਰੀ ਮਨੀਸ਼ ਸਿਸੋਦੀਆ ਵੀ ਕੁੱਦ ਪਏ ਅਤੇ ਪਰਗਟ ਸਿੰਘ ਨੂੰ ਪੰਜਾਬ ਦੇ 10 ਬਿਹਤਰੀਨ ਸਕੂਲਾਂ ਦੀ ਲਿਸਟ ਜਾਰੀ ਕਰਨ ਦੀ ਚੁਣੌਤੀ ਦੇ ਦਿੱਤੀ। ਪਰਗਟ ਨੇ ਕਿਹਾ ਕਿ 10 ਕਿਉਂ, ਦੋਵੇਂ ਸੂਬਿਆਂ ਨੂੰ 250-250 ਸਕੂਲਾਂ ਦੀ ਲਿਸਟ ਜਾਰੀ ਕਰਨੀ ਚਾਹੀਦੀ ਹੈ। ਪਰਗਟ ਦੀ ਚੁਣੌਤੀ ਸਿਸੋਦੀਆ ਨੇ ਕਬੂਲ ਕਰ ਲਈ ਅਤੇ ਲਿਸਟ ਜਾਰੀ ਕਰ ਦਿੱਤੀ, ਪਰ ਪਰਗਟ ਸਿੰਘ ਇਸ ਤੋਂ ਪਿੱਛੇ ਹਟਦੇ ਨਜ਼ਰ ਆਏ। ਹੁਣ ਇਸ ਸਿਆਸੀ ਲੜਾਈ ਵਿੱਚ ਸਿੱਧੂ ਪਰਗਟ ਸਿੰਘ ਦੇ ਬਚਾਅ ਵਿੱਚ ਉਤਰੇ ਹਨ।
ਕੇਜਰੀਵਾਲ ਕਰ ਰਹੇ ਸਨ ਸਿੱਧੂ ਦੀ ਤਾਰੀਫ਼
ਦਿਲਚਸਪ ਹੈ ਕਿ ਆਮ ਆਦਮੀ ਪਾਰਟੀ ਦੇ ਕਨਵੀਨਰ ਅਰਵਿੰਦ ਕੇਜਰੀਵਾਲ ਹਰ ਵਾਰ ਪੰਜਾਬ ਆਉਣ ‘ਤੇ ਸਿੱਧੂ ਦੀ ਤਾਰੀਫ ਕਰ ਰਹੇ ਹਨ। ਹਾਲ ਹੀ ਵਿੱਚ ਕੇਜਰੀਵਾਲ ਨੇ ਕਿਹਾ ਸੀ ਕਿ ਸਿੱਧੂ ਆਪਣੀ ਸਰਕਾਰ ਨੂੰ ਮੂੰਹ ‘ਤੇ ਝੂਠਾ ਦੱਸ ਰਹੇ ਹਨ, ਜਿਸਦੇ ਲਈ ਹਿੰਮਤ ਚਾਹੀਦੀ ਹੈ। ਉਹਨਾਂ ਕਿਹਾ ਸੀ ਕਿ ਸਿੱਧੂ ਸਹੀ ਮੁੱਦੇ ਚੁੱਕ ਰਹੇ ਹਨ, ਪਰ ਕਾਂਗਰਸ ਉਹਨਾਂ ਨੂੰ ਦਬਾ ਰਹੀ ਹੈ।
