ਬਿਓਰੋ। ਪਟਿਆਲਾ ਤੋ ਕਾਂਗਰਸੀ ਸਾਂਸਦ ਪਰਨੀਤ ਕੌਰ ਨੇ ਹੁਣ ਬਾਗੀ ਤੇਵਰ ਵਿਖਾ ਦਿੱਤੇ ਹਨ। ਉਹਨਾਂ ਨੇ ਆਪਣੇ ਸੋਸ਼ਲ ਮੀਡੀਆ ‘ਤੇ ‘ਕੈਪਟਨ ਫੌਰ 2022’ ਦੀ ਪ੍ਰੋਫਾਈਲ ਫੋਟੋ ਲਗਾ ਲਈ ਹੈ। ਇਸ ਫੋਟੋ ਤੋਂ ਸਾਫ ਹੈ ਕਿ ਪੰਜਾਬ ਦੀਆਂ ਵਿਧਾਨ ਸਭਾ ਚੋਣਾਂ ਦੌਰਾਨ ਉਹ ਕਾਂਗਰਸ ਛੱਡ ਚੁੱਕੇ ਆਪਣੇ ਪਤੀ ਕੈਪਟਨ ਅਮਰਿੰਦਰ ਸਿੰਘ ਦੇ ਨਾਲ ਹੋਣਗੇ ਅਤੇ ਕੈਪਟਨ ਦੀ ਪੰਜਾਬ ਲੋਕ ਕਾਂਗਰਸ ਲਈ ਚੋਣ ਪ੍ਰਚਾਰ ਕਰਨਗੇ।
ਸਾਂਸਦ ਬਣੇ ਰਹਿਣ, ਇਸ ਲਈ ਨਹੀਂ ਛੱਡ ਰਹੇ ਪਾਰਟੀ
ਦਰਅਸਲ, ਪਰਨੀਤ ਕੌਰ ਪਟਿਆਲਾ ਤੋਂ ਕਾਂਗਰਸ ਦੀ ਟਿਕਟ ‘ਤੇ ਸਾਂਸਦ ਹਨ। ਜੇਕਰ ਉਹ ਖੁਦ ਕਾਂਗਰਸ ਛੱਡ ਦਿੰਦੇ ਹਨ, ਤਾਂ ਦਲਬਦਲ ਕਾਨੂੰਨ ਦੇ ਤਹਿਤ ਉਹ ਸਾਂਸਦ ਨਹੀਂ ਰਹਿਣਗੇ। ਜੇਕਰ ਕਾਂਗਰਸ ਉਹਨਾਂ ਨੂੰ ਖੁਦ ਕੱਢ ਦਏਗੀ, ਤਾਂ ਫਿਰ ਉਹ ਸਾਂਸਦ ਬਣੇ ਰਹਿਣਗੇ। ਸ਼ਾਇਦ ਇਹੀ ਕਾਰਨ ਹੈ ਕਿ ਉਹ ਕੈਪਟਨ ਦੇ ਨਾਲ ਹਨ, ਪਰ ਰਸਮੀ ਤੌਰ ‘ਤੇ ਕਾਂਗਰਸ ਨਹੀਂ ਛੱਡੀ ਹੈ।
ਕਾਂਗਰਸ ਜਾਰੀ ਕਰ ਚੁੱਕੀ ਹੈ ਨੋਟਿਸ
ਹਾਲ ਹੀ ਵਿੱਚ ਪੰਜਾਬ ਕਾਂਗਰਸ ਇੰਚਾਰਜ ਹਰੀਸ਼ ਚੌਧਰੀ ਨੇ ਪਰਨੀਤ ਕੌਰ ਨੂੰ ਕਾਰਨ ਦੱਸੋ ਨੋਟਿਸ ਜਾਰੀ ਕੀਤਾ ਸੀ। ਉਹਨਾਂ ਨੇ ਪੁੱਛਿਆ ਸੀ ਕਿ ਪਰਨੀਤ ਕੌਰ ਸਪੱਸ਼ਟ ਕਰਨ ਕਿ ਉਹ ਕੈਪਟਨ ਅਮਰਿੰਦਰ ਸਿੰਘ ਦੇ ਨਾਲ ਹਨ ਜਾਂ ਫਿਰ ਕਾਂਗਰਸ ਦੇ। ਇਸਦਾ ਜਵਾਬ ਦਿੱਤਾ ਗਿਆ ਜਾਂ ਨਹੀਂ, ਇਸ ਨੂੰ ਲੈ ਕੇ ਕਾਂਗਰਸ ਨੇ ਕੋਈ ਜਾਣਕਾਰੀ ਜਨਤੱਕ ਨਹੀਂ ਕੀਤੀ ਹੈ। ਇਹ ਨੋਟਿਸ ਉਸ ਵੇਲੇ ਦਿੱਤਾ ਗਿਆ, ਜਦੋਂ ਪਰਨੀਤ, ਕੈਪਟਨ ਅਤੇ ਪਟਿਆਲਾ ਦੇ ਸਮਰਥਕ ਕੌਂਸਲਰਾਂ ਨਾਲ ਨਜਰ ਆਏ ਸਨ।
ਆਪਣਾ ਮੇਅਰ ਨਹੀਂ ਬਚਾ ਸਕਿਆ ਕੈਪਟਨ ਪਰਿਵਾਰ
ਪਟਿਆਲਾ ਵਿੱਚ ਕਾਂਗਰਸ ਕੁਝ ਦਿਨ ਪਹਿਲਾਂ ਕੈਪਟਨ ਪਰਿਵਾਰ ਨੂੰ ਮਾਤ ਦੇ ਚੁੱਕੀ ਹੈ। ਇਥੇ ਕੈਪਟਨ ਦੇ ਕਰੀਬੀ ਮੇਅਰ ਸੰਜੀਵ ਸ਼ਰਮਾ ਬਿੱਟੂ ਨੂੰ ਸਰਕਾਰ ਨੇ ਸਸਪੈਂਡ ਕਰ ਦਿੱਤਾ। ਉਹ ਬਹੁਮਤ ਲਈ ਜ਼ਰੂਰੀ 31 ਦੀ ਥਾਂ ਸਿਰਫ਼ 25 ਵੋਟਾਂ ਹੀ ਜੁਟਾ ਸਕੇ। ਮੇਅਰ ਨੂੰ ਬਚਾਉਣ ਲਈ ਪਰਨੀਤ ਦੇ ਨਾਲ-ਨਾਲ ਕੈਪਟਨ ਦੀ ਧੀ ਜੈਇੰਦਰ ਕੌਰ ਨੇ ਵੀ ਜੋਰ ਲਾਇਆ ਹੋਇਆ ਸੀ।
