ਚੰਡੀਗੜ੍ਹ। ਮਸ਼ਹੂਰ ਪੰਜਾਬੀ ਗਾਇਕ ਸਿੱਧੂ ਮੂਸੇਵਾਲਾ ਦੀ ਹੁਣ ਸਿਆਸਤ ਵਿੱਚ ਐਂਟਰੀ ਹੋ ਗਈ ਹੈ। ਸ਼ੁੱਕਰਵਾਰ ਨੂੰ ਮੂਸੇਵਾਲਾ ਕਾਂਗਰਸ ਵਿੱਚ ਸ਼ਾਮਲ ਹੋ ਗਏ। ਚੰਡੀਗੜ੍ਹ ਸਥਿਤ ਪੰਜਾਬ ਭਵਨ ਵਿਖੇ ਸੀਐੱਮ ਚਰਨਜੀਤ ਚੰਨੀ, ਪਾਰਟੀ ਪ੍ਰਧਾਨ ਨਵਜੋਤ ਸਿੱਧੂ, ਇੰਚਾਰਜ ਹਰੀਸ਼ ਚੌਧਰੀ ਅਤੇ ਮੰਤਰੀ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਨੇ ਉਹਨਾਂ ਨੂੰ ਪਾਰਟੀ ਵਿੱਚ ਜੀ ਆਇਆਂ ਕਿਹਾ।
Welcome to the fold champ @iSidhuMooseWala SIDHU square ek aur ek Giaran opposition 9/2/11 pic.twitter.com/kbWMAKDCgk
— Navjot Singh Sidhu (@sherryontopp) December 3, 2021
ਹੁਣ ਕਾਂਗਰਸ ‘ਚ ਚੱਲੇਗਾ ਮੂਸੇਵਾਲਾ ਦਾ ਬੰਬੀਹਾ- ਚੰਨੀ
ਸੀਐੱਮ ਚੰਨੀ ਨੇ ਮੂਸੇਵਾਲਾ ਦਾ ਸਵਾਗਤ ਕਰਦੇ ਹੋਏ ਕਿਹਾ, “ਪੰਜਾਬ ਦੀ ਸਿਆਸਤ ਵਿੱਚ ਅੱਜ ਕ੍ਰਾਂਤੀਕਾਰੀ ਦਿਨ ਹੈ। ਇੱਕ ਆਮ ਪਰਿਵਾਰ ਤੋਂ ਉੱਠ ਕੇ ਕਾਮਯਾਬੀ ਦੇ ਸ਼ਿਖਰ ‘ਤੇ ਪਹੁੰਚਿਆ ਨੌਜਵਾਨ ਅੱਜ ਕਾਂਗਰਸ ਵਿੱਚ ਸ਼ਾਮਲ ਹੋ ਰਿਹਾ ਹੈ।” ਉਹਨਾਂ ਕਿਹਾ ਕਿ ਲੱਖਾਂ ਨੌਜਵਾਨਾਂ ਦੀ ਪਸੰਦ ਮੂਸੇਵਾਲਾ ਦਾ ਬੰਬੀਹਾ ਹੁਣ ਕਾਂਗਰਸ ਵਿੱਚ ਚੱਲੇਗਾ। ਨਵਜੋਤ ਸਿੱਧੂ ਨੇ ਵੀ ਮੂਸੇਵਾਲਾ ਦੀ ਤਾਰੀਫ਼ ਕਰਦੇ ਹੋਏ ਉਸ ਨੂੰ ਨੌਜਵਾਨਾਂ ਦਾ ਆਈਕੌਨ ਦੱਸਿਆ।
Welcoming young, passionate and talented, @iSidhuMooseWala, to Congress family. I am sure he will serve people to the best of his ability and will spread the message of Congress party at grass-root level pic.twitter.com/a7t8N00hqG
— Charanjit S Channi (@CHARANJITCHANNI) December 3, 2021
ਲੋਕਾਂ ਦੀ ਸੇਵਾ ਲਈ ਸਿਆਸਤ ‘ਚ ਆਇਆ- ਮੂਸੇਵਾਲਾ
ਮੂਸੇਵਾਲਾ ਨੇ ਕਿਹਾ, “ਮੇਰਾ ਸਿਆਸਤ ਨੂੰ ਲੈ ਕੇ ਕੋਈ ਵੱਡਾ ਰੁਝਾਨ ਨਹੀਂ ਰਿਹਾ, ਪਰ ਲੋਕਾਂ ਦੀ ਸੇਵਾ ਲਈ ਨਵਾਂ ਸਫਰ ਸ਼ੁਰੂ ਕਰ ਰਿਹਾ ਹਾਂ। ਮੈਂ ਕਿਸੇ ਰੁਤਬੇ ਜਾਂ ਵਾਹਵਾਹੀ ਲਈ ਸਿਆਸਤ ਵਿੱਚ ਨਹੀਂ ਆਇਆ। ਮੇਰੇ ਨਾਲ ਇੱਕ ਵਰਗ ਜੁੜਿਆ ਹੈ, ਜਿਸ ਤੋਂ ਮੈਨੂੰ ਉਮੀਦ ਹੈ।” ਉਹਨਾਂ ਕਿਹਾ ਕਿ ਸਿਸਟਮ ਨੂੰ ਠੀਕ ਕਰਨ ਲਈ ਉਸਦਾ ਹਿੱਸਾ ਬਣਨਾ ਬੇਹੱਦ ਜ਼ਰੂਰੀ ਹੈ।
ਮੂਸੇਵਾਲਾ ਨੇ ਕਿਹਾ ਕਿ ਕਾਂਗਰਸ ਵਿੱਚ ਆਮ ਘਰਾਂ ਤੋਂ ਉਠੇ ਲੋਕ ਹਨ। ਉਹਨਾਂ ਨੇ ਟਰਾਂਸਪੋਰਟ ਮੰਤਰੀ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਦੀ ਤਾਰੀਫ਼ ਵੀ ਕੀਤੀ। ਸੂਤਰਾਂ ਜੀ ਮੰਨੀਏ, ਤਾਂ ਰਾਜਾ ਵੜਿੰਗ ਨੇ ਹੀ ਮੂਸੇਵਾਲਾ ਨੂੰ ਪਾਰਟੀ ਵਿੱਚ ਸ਼ਾਮਲ ਕਰਾਉਣ ‘ਚ ਅਹਿਮ ਭੂਮਿਕਾ ਨਿਭਾਈ ਹੈ।
Punjabi Music star @iSidhuMooseWala joined the Congress Party at Punjab Bhawan, Chandigarh in the presence of CM @CHARANJITCHANNI, PPCC President @sherryontopp, AICC Punjab Incharge @Barmer_Harish, Cabinet Ministers @RajaBrar_INC, @ArunaC_Official, @raj_verka & other leaders. pic.twitter.com/Aqu4UKIlMc
— Punjab Congress (@INCPunjab) December 3, 2021
ਮਾਨਸਾ ਤੋਂ ਚੋਣ ਲੜਨਗੇ ਮੂਸੇਵਾਲਾ !
ਸਿੱਧੂ ਮੂਸੇਵਾਲਾ ਦੀ ਚੰਗੀ ਫੈਨ ਫੋਲੋਇੰਗ ਹੈ, ਜਿਸ ਨੂੰ ਭੁਨਾਉਣ ਲਈ ਉਹਨਾਂ ਨੂੰ ਕਾਂਗਰਸ ਵਿੱਚ ਲਿਆਂਦਾ ਗਿਆ ਹੈ। ਮੂਸੇਵਾਲਾ ਨੇ ਬਠਿੰਡਾ ਅਤੇ ਮਾਨਸਾ ਵਿੱਚ ਸਰਗਰਮ ਹੋਣ ਲਈ ਦਿਲਚਸਪੀ ਵਿਖਾਈ ਹੈ। ਉਹ ਮਾਨਸਾ ਤੋਂ ਕਾਂਗਰਸ ਲਈ ਚੋਣ ਲੜ ਸਕਦੇ ਹਨ। ਬਾਕੀ ਹਲਕਿਆਂ ਵਿੱਚ ਵੀ ਕਾਂਗਰਸ ਉਹਨਾਂ ਤੋਂ ਪ੍ਰਚਾਰ ਕਰਵਾਏਗੀ। ਉਹਨਾਂ ਦੀ ਮਾਂ ਚਰਨ ਕੌਰ ਵੀ ਪਿੰਡ ਦੇ ਸਰਪੰਚ ਹਨ। ਮੂਸੇਵਾਲਾ ਦੀ ਕਾਂਗਰਸ ਨਾਲ ਪਹਿਲਾਂ ਵੀ ਨਜ਼ਦੀਕੀਆਂ ਰਹੀਆਂ ਹਨ। ਹਾਲਾਂਕਿ ਉਹਨਾਂ ਨੂੰ ਕੋਈ ਸਿਆਸੀ ਤਜ਼ਰਬਾ ਨਹੀਂ ਹੈ, ਪਰ ਮੂਸੇਵਾਲਾ ਦੀ ਪੰਜਾਬ ਅਤੇ ਖਾਸ ਤੌਰ ‘ਤੇ ਮਾਲਵਾ ਵਿੱਚ ਚੰਗੀ ਪਕੜ ਹੈ।
ਵਿਵਾਦਾਂ ‘ਚ ਰਹੇ ਸਿੱਧੂ ਮੂਸੇਵਾਲਾ
ਮੂਸੇਵਾਲਾ ‘ਤੇ ਪੰਜਾਬ ਵਿੱਚ ਗਨ ਕਲਚਰ ਨੂੰ ਵਧਾਵਾ ਦੇਣ ਸਣੇ ਆਰਮਜ਼ ਐਕਟ ਤੋਂ ਇਲਾਵਾ ਵੀ ਕਈ ਕੇਸ ਚੱਲ ਰਹੇ ਹਨ। ਸੀਐੱਮ ਚੰਨੀ ਤੋਂ ਜਦੋਂ ਇਸ ਬਾਰੇ ਸਵਾਲ ਕੀਤਾ ਗਿਆ, ਤਾਂ ਉਹ ਬੱਚ ਕੇ ਨਿਕਲ ਗਏ। ਪਰ ਨਵਜੋਤ ਸਿੱਧੂ ਨੇ ਇਸਦਾ ਜਵਾਬ ਦਿੱਤਾ ਅਤੇ ਕਿਹਾ, “ਕੇਸ ਹੋਣ ਦਾ ਮਤਲਬ ਇਹ ਨਹੀਂ ਕਿ ਉਹ ਦੋਸ਼ੀ ਹੈ। ਮੇਰੇ ਉੱਪਰ ਵੀ ਕੇਸ ਹੋਇਆ, ਪਰ ਮੈਂ 6 ਵਾਰ ਚੋਣ ਜਿੱਤਿਆ। ਕੋਰਟ ਕੇਸ ‘ਤੇ ਟਿੱਪਣੀ ਕਰਨਾ ਠੀਕ ਨਹੀਂ। ਜਿਸ ਰੁੱਖ ’ਤੇ ਫਲ ਲੱਗਦੇ ਹਨ, ਉਸ ‘ਤੇ ਪੱਥਰ ਵੱਜਦੇ ਹਨ।”
ਮੂਸੇਵਾਲਾ ਨੇ ਗਾਏ ਭੜਕਾਊ ਗੀਤ
ਸਿੱਧੂ ਮੂਸੇਵਾਲਾ ਦੇ ਕਈ ਭੜਕਾਊ ਗੀਤ ਵਿਵਾਦਾਂ ਵਿੱਚ ਰਹੇ। ‘ਜਿੱਥੇ ਬੰਦਾ ਮਾਰ ਕੇ ਕਸੂਰ ਪੁੱਛਦੈ, ਜੱਟ ਉਸ ਪਿੰਡ ਤੋਂ ਬਿਲੌਂਗ ਕਰਦੈ’, ‘ਗੱਭਰੂ ਤੇ ਕੇਸ ਜੇਹੜਾ ਸੰਜੇ ਦੱਤ ‘ਤੇ’ ਵਰਗੇ ਕਈ ਗਾਣਿਆਂ ਦੇ ਜ਼ਰੀਏ ਮੂਸੇਵਾਲਾ ਵਿਵਾਦਾਂ ਵਿੱਚ ਘਿਰ ਚੁੱਕੇ ਹਨ। ਹਾਲਾਂਕਿ ਨੌਜਵਾਨਾਂ ਨੂੰ ਮੂਸੇਵਾਲਾ ਦੀ ਗਾਇਕੀ ਬੇਹੱਦ ਪਸੰਦ ਆਉਂਦੀ ਹੈ। ਇਸੇ ਕਾਰਨ ਉਹਨਾਂ ਦੇ ਖਿਲਾਫ਼ ਕਈ ਸ਼ਿਕਾਇਤਾਂ ਵੀ ਹੋਈਆਂ, ਪਰ ਰਸੂਖ ਦੇ ਚਲਦੇ ਮੂਸੇਵਾਲਾ ਹਰ ਵਾਰ ਕਾਨੂੰਨੀ ਰਸਤਿਆਂ ਦੇ ਜ਼ਰੀਏ ਚਕਮਾ ਦੇ ਕੇ ਬੱਚਦੇ ਰਹੇ।
ਕਲਾਕਾਰਾਂ-ਗਾਇਕਾਂ ਦਾ ਸਿਆਸਤ ਨਾਲ ਪੁਰਾਣਾ ਨਾਤਾ
ਪੰਜਾਬ ਵਿੱਚ ਕਲਾਕਾਰ ਅਤੇ ਗਾਇਕ ਚੋਣ ਮੈਦਾਨ ਵਿੱਚ ਨਿਤਰਦੇ ਰਹੇ ਹਨ। ਮਸ਼ਹੂਰ ਕਾਮੇਡੀਅਨ ਭਗਵੰਤ ਮਾਨ ਆਮ ਆਦਮੀ ਪਾਰਟੀ ਦੇ ਸਾਂਸਦ ਅਤੇ ਪੰਜਾਬ ਪ੍ਰਧਾਨ ਹਨ। ਅਦਾਕਾਰ ਸੰਨੀ ਦਿਓਲ ਗੁਰਦਾਸਪੁਰ ਤੋਂ ਬੀਜੇਪੀ ਦੇ ਸਾਂਸਦ ਹਨ। ਗਾਇਕ ਹੰਸਰਾਜ ਹੰਸ ਦਿੱਲੀ ਤੋਂ ਬੀਜੇਪੀ ਅਤੇ ਮੁਹੰਮਦ ਸਦੀਕ ਫਰੀਦਕੋਟ ਤੋਂ ਕਾਂਗਰਸ ਦੇ ਸਾਂਸਦ ਹਨ। ਪੰਜਾਬੀ ਗਾਇਕ ਅਨਮੋਲ ਗਗਨ ਮਾਨ ਵੀ ਸਿਆਸਤ ਵਿੱਚ ਐਂਟਰੀ ਕਰ ਚੁੱਕੇ ਹਨ। ਗੁਰਪ੍ਰੀਤ ਘੁੱਗੀ ਵੀ ਸਿਆਸਤ ‘ਚ ਆਏ ਸਨ, ਪਰ ਜਲਦ ਹੀ ਉਹਨਾਂ ਨੇ ਇਸ ਤੋਂ ਕਿਨਾਰਾ ਕਰ ਲਿਆ। ਜੱਸੀ ਜਸਰਾਜ, ਬਲਕਾਰ ਸਿੱਧੂ, ਸਤਵਿੰਦਰ ਬਿੱਟੀ ਵੀ ਸਿਆਸਤ ਵਿੱਚ ਸਰਗਰਮ ਹਨ।
ਹੁਣ ਬਾਲੀਵੁੱਡ ਸਟਾਰ ਸੋਨੂੰ ਸੂਦ ‘ਤੇ ਨਜ਼ਰ
ਹੁਣ ਸਭ ਦੀ ਨਜ਼ਰ ਬਾਲੀਵੁੱਡ ਸਟਾਰ ਸੋਨੂੰ ਸੂਦ ‘ਤੇ ਟਿਕੀ ਹੋਈ ਹੈ। ਸੋਨੂੰ ਸੂਦ ਨੇ ਭੈਣ ਮਾਲਵਿਕਾ ਸੂਦ ਦੇ ਮੋਗਾ ਤੋਂ ਚੋਣ ਲੜਨ ਦਾ ਐਲਾਨ ਕਰ ਦਿੱਤਾ ਹੈ। ਹਾਲਾਂਕਿ ਅਜੇ ਪਾਰਟੀ ਦੀ ਚੋਣ ਨਹੀਂ ਕੀਤੀ ਹੈ ਉਹਨਾਂ ਦੀ ਸੀਐੱਮ ਚੰਨੀ, ਅਰਵਿੰਦ ਕੇਜਰੀਵਾਲ, ਸੁਖਬੀਰ ਬਾਦਲ ਅਤੇ ਕੈਪਟਨ ਅਮਰਿੰਦਰ ਸਿੰਘ ਨਾਲ ਮੁਲਾਕਾਤ ਹੋ ਚੁੱਕੀ ਹੈ।
