SC ਭਾਈਚਾਰੇ ਲਈ ਕੇਜਰੀਵਾਲ ਨੇ ਦਿੱਤੀ ਸਿੱਖਿਆ ਤੋਂ ਲੈ ਕੇ ਮੁਫ਼ਤ ਇਲਾਜ ਤੱਕ ਦੀ ਗਾਰੰਟੀ

ਬਿਓਰੋ। ਪੰਜਾਬ ਦੀਆਂ ਵਿਧਾਨ ਸਭਾ ਨੂੰ ਲੈ ਕੇ ਸਿਆਸੀ ਪਾਰਟੀਆਂ ਦੀ ਨਜ਼ਰ ਸਮਾਜ ਦੇ ਹਰ ਵਰਗ ‘ਤੇ ਹੈ। ਖਾਸਕਰ SC ਭਾਈਚਾਰੇ ਨੂੰ ਕਾਨਫੀਡੈਂਸ ਵਿੱਚ ਲੈਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ। ਜਾਹਿਰ ਹੈ ਪੰਜਾਬ ਦੇ ਮੁੱਖ ਮੰਤਰੀ SC ਭਾਈਚਾਰੇ ਨਾਲ ਤਾਲੁੱਕ ਰੱਖਦੇ ਹਨ। ਲਿਹਾਜਾ ਹਰ ਪਾਰਟੀ ਦੀ ਕੋਸ਼ਿਸ਼ ਇਸ ਭਾਈਚਾਰੇ ਦੀ ਵੋਟ ਕਾਂਗਰਸ ਵੱਲ ਜਾਣ ਤੋਂ ਰੋਕਣ ਦੀ ਕੋਸ਼ਿਸ਼ ਵਿੱਚ ਹੋਵੇਗੀ। ਅਜਿਹੀ ਹੀ ਇੱਕ ਕੋਸ਼ਿਸ਼ ਦਿੱਲੀ ਦੇ ਮੁੱਖ ਮੰਤਰੀ ਅਤੇ ‘ਆਪ’ ਕਨਵੀਨਰ ਅਰਵਿੰਦ ਕੇਜਰੀਵਾਲ ਨੇ ਕੀਤੀ ਹੈ।

ਪੰਜਾਬ ਦੌਰੇ ‘ਤੇ ਪਹੁੰਚੇ ਅਰਵਿੰਦ ਕੇਜਰੀਵਾਲ ਨੇ ਹੁਸ਼ਿਆਰਪੁਰ ਦੇ ਸ਼ਾਮਚੁਰਾਸੀ ਵਿੱਚ SC ਭਾਈਚਾਰੇ ਨੂੰ ਸੰਬੋਧਿਤ ਕਰਦਿਆਂ 5 ਗਾਰੰਟੀਆਂ ਦਾ ਐਲਾਨ ਕੀਤਾ, ਜਿਸ ਤਹਿਤ ਸੂਬੇ ਵਿੱਚ ‘ਆਪ’ ਦੀ ਸਰਕਾਰ ਬਣਨ ਤੋਂ ਬਾਅਦ:-

1. SC ਭਾਈਚਾਰੇ ਦੇ ਹਰ ਬੱਚੇ ਨੂੰ ਸਰਕਾਰੀ ਸਕੂਲਾਂ ਵਿੱਚ ਬਿਹਤਰ ਅਤੇ ਮੁਫਤ ਸਿੱਖਿਆ ਮੁਹੱਈਆ ਕਰਵਾਈ ਜਾਵੇਗੀ।
2. ਜੇਕਰ ਕੋਈ ਬੱਚਾ ਇੰਜੀਨੀਅਰਿੰਗ ਜਾਂ ਕਿਸੇ ਵੀ ਹੋਰ ਫੀਲਡ ਵਿੱਚ ਕੋਚਿੰਗ ਹਾਸਲ ਕਰਨਾ ਚਾਹੁੰਦਾ ਹੈ, ਤਾਂ ਉਸਦਾ ਖਰਚ ਪੰਜਾਬ ਸਰਕਾਰ ਚੁੱਕੇਗੀ।
3. ਜੇਕਰ ਕੋਈ ਵਿਦਿਆਰਥੀ ਗ੍ਰੈਜੁਏਸ਼ਨ ਜਾਂ ਪੋਸਟ ਗ੍ਰੈਜੁਏਸ਼ਨ ਲਈ ਵਿਦੇਸ਼ ਜਾਣਾ ਚਾਹੁੰਦਾ ਹੈ, ਤਾਂ ਉਸਦਾ ਵੀ ਪੂਰਾ ਖਰਚ ਪੰਜਾਬ ਸਰਕਾਰ ਚੁੱਕੇਗੀ।
4. ਪਰਿਵਾਰ ਵਿੱਚ ਕੋਈ ਬਿਮਾਰ ਹੋ ਜਾਏ, ਚਾਹੇ ਉਸ ਨੂੰ ਕੋਈ ਗੰਭੀਰ ਬਿਮਾਰੀ ਹੋਵੇ ਜਾਂ ਆਮ ਬੁਖਾਰ…ਉਸਦੇ ਸਾਰੇ ਇਲਾਜ ਦਾ ਖਰਚ ਪੰਜਾਬ ਸਰਕਾਰ ਚੁੱਕੇਗੀ।
5. ਇਸ ਤੋਂ ਇਲਾਵਾ 18 ਸਾਲ ਤੋਂ ਉੱਪਰ ਦੀ ਹਰ ਮਹਿਲਾ ਨੂੰ ਹਰ ਮਹੀਨੇ 1000-1000 ਰੁਪਏ ਦਿੱਤੇ ਜਾਣਗੇ।

ਬਾਬਾ ਸਾਹਿਬ ਤੁਹਾਡਾ ਸੁਪਨਾ ਅਧੂਰਾ, ਕੇਜਰੀਵਾਲ ਕਰੇਗਾ ਪੂਰਾ । ਪੰਜਾਬ ਦੇ SC ਭਾਈਚਾਰੇ ਨਾਲ ਅਰਵਿੰਦ ਕੇਜਰੀਵਾਲ ਦੀ ਗੱਲਬਾਤ | LIVE https://t.co/Z9ZFw2A0qd

— AAP Punjab (@AAPPunjab) December 7, 2021

ਚੰਨੀ ਨਹੀਂ, ਮੈਂ ਕੰਮ ਆਵਾਂਗਾ- ਕੇਜਰੀਵਾਲ

ਇਸ ਦੌਰਾਨ ਕੇਜਰੀਵਾਲ ਨੇ ਸੀਐੱਮ ਚਰਨਜੀਤ ਚੰਨੀ ‘ਤੇ ਵੀ ਹਲਾ ਬੋਲਿਆ। ਕੇਜਰੀਵਾਲ ਨੇ ਕਿਹਾ ਕਿ ਚੰਨੀ SC ਭਾਈਚਾਰੇ ਕੋਲ ਆ ਕੇ ਅਕਸਰ ਕਹਿੰਦੇ ਹਨ ਕਿ ਉਹ ਇਸ ਭਾਈਚਾਰੇ ਨਾਲ ਤਾਲੁੱਕ ਰਖਦੇ ਹਨ, ਇਸ ਲਈ ਉਹਨਾਂ ਨੂੰ ਵੋਟ ਦਿੱਤੀ ਜਾਵੇ। ਕੇਜਰੀਵਾਲ ਨੇ ਕਿਹਾ, “ਮੈਂ ਬੇਸ਼ੱਕ ਤੁਹਾਡੇ ਭਾਈਚਾਰੇ ਦਾ ਨਹੀਂ, ਬਲਕਿ ਤੁਹਾਡੇ ਪਰਿਵਾਰ ਤੋਂ ਆਉਂਦਾ ਹਾਂ। ਜਦੋਂ ਤੁਹਾਡੇ ਘਰ ਕੋਈ ਬਿਮਾਰੀ ਆਏਗੀ, ਤਾਂ ਤੁਹਾਡਾ ਇਹ ਬੇਟਾ ਹੀ ਇਲਾਜ ਕਰਾਉਣ ਦੇ ਕੰਮ ਆਵੇਗਾ। ਜੇਕਰ ਤੁਹਾਡੇ ਪੁੱਤਰ ਨੇ IAS ਬਣਨਾ ਹੋਏਗਾ, ਤਾਂ ਅਸੀਂ ਮਿਲ ਕੇ ਉਸਨੂੰ IAS ਬਣਾਵਾਂਗੇ।” ਉਹਨਾਂ ਕਿਹਾ, “ਚੰਨੀ ਤੁਹਾਡੇ ਕੰਮ ਨਹੀਂ ਆਏਗਾ, ਮੈਂ ਆਵਾਂਗਾ। ਮੈਂ ਪੰਜਾਬ ਦਾ ਭਵਿੱਖ ਬਣਾਉਣਾ ਚਾਹੁੰਦਾ ਹਾਂ।“

‘ਇੱਕ ਮੌਕਾ ਦਿਓ, ਸਾਰੀਆਂ ਪਾਰਟੀਆਂ ਭੁੱਲ ਜਾਓਗੇ’

ਕੇਜਰੀਵਾਲ ਨੇ ਇਸ ਦੌਰਾਨ SC ਭਾਈਚਾਰੇ ਨੂੰ ਸੰਬੋਧਿਤ ਕਰਦੇ ਹੋਏ ਕਿਹਾ, “ਤੁਸੀਂ ਕਾਂਗਰਸ ਤੇ ਅਕਾਲੀ ਦਲ ਨੂੰ ਕਈ ਮੌਕੇ ਦਿੱਤੇ। ਇੱਕ ਮੌਕਾ ਆਮ ਆਦਮੀ ਪਾਰਟੀ ਨੂੰ ਵੀ ਦੇ ਕੇ ਵੇਖੋ। ਮੇਰਾ ਵਿਸ਼ਵਾਸ ਹੈ ਕਿ ਤੁਸੀਂ ਸਾਰੀਆਂ ਪਾਰਟੀਆਂ ਭੁੱਲ ਜਾਓਗੇ।”