ਬਿਓਰੋ। ਪੰਜਾਬ ਦੀ ਕਾਂਗਰਸ ਸਰਕਾਰ ‘ਚ ਹੁਣ ਇੱਕ ਨਵੀਂ ਤਕਰਾਰ ਸਾਹਮਣੇ ਆਈ ਹੈ। ਇਸ ਵਾਰ ਝਗੜਾ ਸਰਕਾਰ ਦੇ 2 ਵੱਡੇ ਚਿਹਰਿਆਂ ਡਿਪਟੀ ਸੀਐੱਮ ਸੁਖਜਿੰਦਰ ਰੰਧਾਵਾ ਅਤੇ ਮੰਤਰੀ ਰਾਣਾ ਗੁਰਜੀਤ ਸਿੰਘ ਵਿਚਕਾਰ ਹੋਇਆ। ਜਾਣਕਾਰੀ ਮੁਤਾਬਕ, ਵੀਰਵਾਰ ਨੂੰ ਹੋਈ ਕੈਬਨਿਟ ਦੀ ਬੈਠਕ ਵਿੱਚ ਦੋਵੇਂ ਮੰਤਰੀ ਸੀਐੱਮ ਦੀ ਮੌਜੂਦਗੀ ‘ਚ ਭਿੜ ਗਏ। ਦੋਵਾਂ ਵਿਚਕਾਰ ਨੌਬਤ ਤੂੰ-ਤੂੰ ਮੈਂ-ਮੈਂ ਤੱਕ ਪਹੁੰਚ ਗਈ। ਕਿਸੇ ਤਰ੍ਹਾਂ ਸੀਐੱਮ ਨੇ ਉਹਨਾਂ ਨੂੰ ਸ਼ਾਂਤ ਕਰਵਾਇਆ। ਹਾਲਾਂਕਿ ਮੰਤਰੀਆਂ ਦੀ ਲੜਾਈ ਦੀ ਅਵਾਜ਼ ਇੰਨੀ ਤੇਜ਼ ਸੀ ਕਿ ਪੰਜਾਬ ਭਵਨ ਦੇ ਅੰਦਰ ਗੂੰਜਣ ਲੱਗ ਗਈ, ਜਿਸ ਤੋਂ ਬਾਅਦ ਹਾਲ ਦਾ ਦਰਵਾਜਾ ਵੀ ਬੰਦ ਕਰਵਾਇਆ ਗਿਆ।
ਤਬਾਦਲਿਆਂ ‘ਚ ਭ੍ਰਿਸ਼ਟਾਚਾਰ ਦੇ ਇਲਜਾਮਾਂ ‘ਤੇ ਭੜਕੇ ਰੰਧਾਵਾ
ਦੋਵੇਂ ਮੰਤਰੀਆਂ ਵਿਚਕਾਰ ਝਗੜਾ ਪੈਸੇ ਲੈ ਕੇ ਪੁਲਿਸ ਅਫਸਰਾਂ ਦੀ ਤੈਨਾਤੀ ਕਰਨ ਦੇ ਕਥਿਤ ਇਲਜਾਮਾਂ ‘ਤੇ ਹੋਇਆ। ਡਿਪਟੀ ਸੀਐੱਮ ਸੁਖਜਿੰਦਰ ਰੰਧਾਵਾ ਨੇ ਕਿਹਾ ਕਿ ਉਹਨਾਂ ‘ਤੇ ਪੈਸੇ ਲੈ ਕੇ SSP ਅਤੇ DSP ਨੂੰ ਤੈਨਾਤ ਕਰਨ ਦੇ ਇਲਜਾਮ ਲੱਗ ਰਹੇ ਹਨ। ਇਸ ਬਾਰੇ ਉਹਨਾਂ ਨੇ ਮੰਤਰੀ ਤ੍ਰਿਪਤ ਰਜਿੰਦਰ ਸਿੰਘ ਬਾਜਵਾ ਤੋਂ ਪੁੱਛਿਆ, ਤਾਂ ਬਾਜਵਾ ਨੇ ਕਿਹਾ ਕਿ ਇਹ ਗੱਲ ਉਹਨਾਂ ਨੂੰ ਮੰਤਰੀ ਰਾਣਾ ਗੁਰਜੀਤ ਨੇ ਕਹੀ ਸੀ। ਇਸ ਤੋਂ ਬਾਅਦ ਰੰਧਾਵਾ ਅਤੇ ਰਾਣਾ ਆਹਮੋ-ਸਾਹਮਣੇ ਹੋ ਗਏ ਅਤੇ ਦੋਵਾਂ ਵਿਚਕਾਰ ਤੂੰ-ਤੂੰ ਮੈਂ-ਮੈਂ ਤੱਕ ਦੀ ਨੌਬਤ ਆ ਗਈ।
ਬੇਅਦਬੀ ਅਤੇ STF ਰਿਪੋਰਟ ‘ਤੇ ਵੀ ਬਹਿਸ
ਇਸ ਦੌਰਾਨ ਮੰਤਰੀ ਰਾਣਾ ਗੁਰਜੀਤ ਸਿੰਘ ਨੇ ਗ੍ਰਹਿ ਵਿਭਾਗ ਵੇਖ ਰਹੇ ਰੰਧਾਵਾ ਤੋਂ ਪੁੱਛਿਆ, “ਬਰਗਾੜੀ ਬੇਅਦਬੀ ਅਤੇ ਡਰੱਗਜ਼ ਕੇਸ ਵਿੱਚ ਅਜੇ ਤੱਕ ਕੋਈ ਕਾਰਵਾਈ ਕਿਉਂ ਨਹੀਂ ਕੀਤੀ ਗਈ? ਡਰੱਗਜ਼ ਨਾਲ ਜੁੜੀ ਸਪੈਸ਼ਲ ਟਾਸਕ ਫੋਰਸ (STF) ਦੀ ਰਿਪੋਰਟ ਜਨਤੱਕ ਕਿਉਂ ਨਹੀਂ ਕੀਤੀ ਗਈ?”
ਰੰਧਾਵਾ ਨੇ ਰਾਣਾ ਦੇ ‘ਕੈਪਟਨ ਪ੍ਰੇਮ’ ‘ਤੇ ਘੇਰਿਆ
ਰਾਣਾ ਗੁਰਜੀਤ ਨੇ ਰੰਧਾਵਾ ‘ਤੇ ਸਵਾਲ ਚੁੱਕੇ, ਤਾਂ ਉਹਨਾਂ ਨੇ ਰਾਣਾ ਗੁਰਜੀਤ ਨੂੰ ਕੈਪਟਨ ਦਾ ਸਮਰਥਕ ਦੱਸ ਦਿੱਤਾ। ਰੰਧਾਵਾ ਨੇ ਕਿਹਾ ਕਿ ਅਜਿਹੇ ਲੋਕ ਸਵਾਲ ਨਾ ਚੁੱਕਣ, ਜੋ ਕੈਪਟਨ ਦੇ ਖਿਲਾਫ਼ ਕੁਝ ਬੋਲਣ ਨੂੰ ਤਿਆਰ ਨਹੀਂ ਅਤੇ ਕੈਪਟਨ ਨੂੰ ਆਪਣਾ ਸਿਆਸੀ ਗੁਰੂ ਮੰਨਦੇ ਹਨ। ਦਰਅਸਲ, ਪਿਛਲੇ ਦਿਨੀਂ ਲੁਧਿਆਣਾ ਪਹੁੰਟੇ ਰਾਣਾ ਗੁਰਜੀਤ ਸਿੰਘ ਤੋਂ ਜਦੋਂ ਕੈਪਟਨ ਬਾਰੇ ਸਵਾਲ ਕੀਤਾ ਗਿਆ ਸੀ, ਤਾਂ ਉਹਨ ਨੇ ਕਿਹਾ ਸੀ ਕਿ ਕੈਪਟਨ ਉਹਨਾਂ ਦੇ ਸਿਆਸੀ ਗੁਰੂ ਹਨ। ਉਹ ਕੈਪਟਨ ਖਿਲਾਫ਼ ਕੁਝ ਨਹੀਂ ਬੋਲ ਸਕਦੇ।
ਸੁਲਤਾਨਪੁਰ ਲੋਧੀ ਨੂੰ ਲੈ ਕੇ ਸਿਆਸੀ ਜੰਗ
ਦੋਵੇਂ ਮੰਤਰੀਆਂ ਵਿਚਕਾਰ ਪੁਲਿਸ ਅਫਸਰਾਂ ਦੇ ਤਬਾਦਲਿਆਂ ਨੂੰ ਲੈ ਕੇ ਸ਼ੁਰੂ ਹੋਈ ਜੁਬਾਨੀ ਜੰਗ ਵਿੱਚ ਸੁਲਤਾਨਪੁਰ ਲੋਧੀ ਵੀ ਟਸਲ ਵੀ ਵਿਖੀ। ਰਾਣਾ ਗੁਰਜੀਤ ਨੇ ਕਿਹਾ ਕਿ ਸੁਲਤਨਪੁਰ ਲੋਧੀ ਦੇ ਕਾਂਗਰਸੀ ਵਿਧਾਇਕ ਨਵਤੇਜ ਚੀਮਾ ਉਹਨਾਂ ਨੂੰ ਉਥੇ ਰੈਲੀ ਨਹੀਂ ਕਰਨ ਦੇ ਰਹੇ। ਉਹਨਾਂ ਦੇ ਟੈਂਟ ਉਤਰਵਾਏ ਜਾ ਰਹੇ ਹਨ ਅਤੇ ਗ੍ਰਹਿ ਮੰਤਰੀ (ਰੰਧਾਵਾ) ਉਹਨਾਂ ‘ਤੇ ਕੋਈ ਕਾਰਵਾਈ ਨਹੀਂ ਕਰ ਰਹੇ। ਇਸ ‘ਤੇ ਰੰਧਾਵਾ ਨੇ ਕਿਹਾ ਕਿ ਕੇਸ ਦਰਜ ਕਰਨਾ ਪੁਲਿਸ ਦਾ ਕੰਮ ਹੈ, ਮੰਤਰੀ ਦਾ ਨਹੀਂ।
ਦਰਅਸਲ, ਰਾਣਾ ਗੁਰਜੀਤ ਸੁਲਤਾਨਪੁਰ ਲੋਧੀ ਤੋਂ ਆਪਣੇ ਪੁੱਤਰ ਨੂੰ ਚੋਣ ਦੰਗਲ ਵਿੱਚ ਉਤਾਰਨ ਦੀ ਤਿਆਰੀ ਵਿੱਚ ਹਨ, ਜਿਸ ਨੂੰ ਲੈ ਕੇ ਨਵਤੇਜ ਚੀਮਾ ਅਤੇ ਉਹਨਾਂ ਵਿਚਕਾਰ ਜ਼ਬਰਦਸਤ ਜੰਗ ਚੱਲ ਰਹੀ ਹੈ। ਪਿਛਲੇ ਦਿਨੀਂ ਰੰਧਾਵਾ ਵੀ ਸੁਲਤਾਨਪੁਰ ਲੋਧੀ ਪਹੁੰਚੇ ਸਨ ਅਤੇ ਚੀਮਾ ਨੂੰ ਆਪਣਾ ਸਮਰਥਨ ਦਿੱਤਾ ਸੀ।
ਸੀਐੱਮ ਨਹੀਂ ਸੁਲਝਾ ਸਕੇ ਮਸਲਾ
ਦੋਵੇਂ ਮੰਤਰੀਆਂ ਦੇ ਝਗੜੇ ਨੂੰ ਸੀਐੱਮ ਨੇ ਸ਼ਾਂਤ ਕਰਵਾਉਣ ਦੀ ਪੂਰੀ ਕੋਸ਼ਿਸ਼ ਕੀਤੀ, ਪਰ ਦੋਵੇਂ ਤਲਖੀ ਭਰੇ ਅੰਦਾਜ਼ ਵਿੱਚ ਨਿਕਲ ਗਏ। ਜਾਣਕਾਰੀ ਮੁਤਾਬਕ, ਬਾਅਦ ਵਿੱਚ ਰਾਤ ਨੂੰ ਸੀਐੱਮ ਨੇ ਆਪਣੇ ਘਰ ਵਿੱਚ ਵੀ ਦੋਵਾਂ ਦੀ ਸੁਲ੍ਹਾ ਕਰਵਾਉਣ ਦੀ ਕੋਸ਼ਿਸ਼ ਕੀਤੀ, ਪਰ ਕਾਮਯਾਬ ਨਹੀਂ ਹੋਏ।
