ਬਿਓਰੋ। ਦਰਬਾਰ ਸਾਹਿਬ ਵਿੱਚ ਬੇਅਦਬੀ ਦੀ ਕੋਸ਼ਿਸ਼ ਕਰਨ ਵਾਲੇ ਸ਼ਖਸ ਨੂੰ ਲੈ ਕੇ SGPC ਨੇ ਵੱਡਾ ਖੁਲਾਸਾ ਕੀਤਾ ਹੈ। SGPC ਮੁਤਾਬਕ, ਉਸਦੀ ਟਾਸਕ ਫੋਰਸ ਦੇ ਸੇਵਾਦਾਰਾਂ ਨੇ ਸ਼ਨੀਵਾਰ ਸਵੇਰੇ ਹੀ ਇਸ ਨੌਜਵਾਨ ਦੀਆਂ ਸ਼ੱਕੀ ਗਤੀਵਿਧੀਆਂ ਨੂੰ ਨੋਟਿਸ ਕਰ ਲਿਆ ਸੀ। ਸੇਵਾਦਾਰਾਂ ਨੇ ਬਕਾਇਦਾ 2 ਵਾਰ ਉਸ ਨੂੰ ਸੱਚਖੰਡ ਸਾਹਿਬ ਵਿੱਚ ਜਾਣ ਤੋਂ ਰੋਕਿਆ ਵੀ, ਪਰ ਸ਼ਾਮ 5 ਵਜੇ ਜਦੋਂ ਸੇਵਾਦਾਰਾਂ ਦੀ ਸ਼ਿਫਟ ਬਦਲੀ, ਤਾਂ ਨੌਜਵਾਨ ਉਸਦਾ ਫਾਇਦਾ ਚੁੱਕ ਕੇ ਦਰਸ਼ਨੀ ਦਿਉੜੀ ਪਾਰ ਕਰਕੇ ਸ਼ਰਧਾਲੂਆਂ ਦੀ ਕਤਾਰ ਵਿੱਚ ਸ਼ਾਮਲ ਹੋ ਗਿਆ।
ਦੱਸ ਦਈਏ ਕਿ ਸ਼ਾਮ ਦੇ ਕਰੀਬ ਸਾਢੇ 6 ਵਜੇ ਨੌਜਵਾਨ ਨੇ ਸੱਚਖੰਡ ਸਾਹਿਬ ਵਿੱਚ ਬੇਅਦਬੀ ਕੀਤੀ, ਜਿਸ ਤੋਂ ਬਾਅਦ ਸੰਗਤ ਨੇ ਉਸ ਨੂੰ ਕੁੱਟ-ਕੁੱਟ ਕੇ ਮੌਤ ਦੇ ਘਾਟ ਉਤਾਰ ਦਿੱਤਾ।
ਇਸ ਤਰ੍ਹਾਂ ਸੱਚਖੰਡ ਪਹੁੰਚਿਆ ਮੁਲਜ਼ਮ
SGPC ਪ੍ਰਧਾਨ ਮੁਤਾਬਕ, ਮੁਲਜ਼ਮ ਨੌਜਵਾਨ ਸਵੇਰੇ 8 ਵਜੇ ਦਰਬਾਰ ਸਾਹਿਬ ਵਿੱਚ ਦਾਖਲ ਹੋਇਆ ਅਤੇ ਮੁੱਖ ਐਂਟ੍ਰੇਂਸ ਤੋਂ ਅੰਦਰ ਵੜਨ ਦੀ ਕੋਸ਼ਿਸ਼ ਕੀਤੀ, ਪਰ ਸ਼ੱਕੀ ਲੱਗਣ ਦੇ ਚਲਦੇ ਟਾਸਕ ਫੋਰਸ ਨੇ ਉਸ ਨੂੰ ਰੋਕ ਦਿੱਤਾ। ਬਾਅਦ ਵਿੱਚ 9.40 ਵਜੇ ਉਹ ਲੰਗਰ ਹਾਲ ਵਾਲੇ ਗੇਟ ਤੋਂ ਅੰਦਰ ਦਾਖਲ ਹੋਇਆ। ਉਸ ਨੇ ਲੰਗਰ ਖਾਧਾ ਅਤੇ ਚਾਹ ਵੀ ਪੀਤੀ। ਸਵੇਰੇ 10:19 ‘ਤੇ ਉਹ ਲੰਗਰ ਹਾਲ ਵਾਲੀ ਸਾਈਡ ‘ਤੇ ਬਣੀਆਂ ਪੌੜੀਆਂ ਦੇ ਰਸਤੇ ਪਰੀਕਰਮਾ ਵਿੱਚ ਦਾਖਲ ਹੋਇਆ। ਸਵੇਰੇ 10.26 ਵਜੇ ਉਹ ਦਰਸ਼ਨੀ ਦਿਓੜੀ ਪਾਰ ਕਰਕੇ ਸੱਚਖੰਡ ਸਾਹਿਬ ਪਹੁੰਚ ਗਿਆ। ਹਾਲਾਂਕਿ ਅੰਦਰ ਮੱਥਾ ਟੇਕਣ ਨਹੀਂ ਗਿਆ। ਬਾਅਦ ਵਿੱਚ ਪੌਣੇ 12 ਵਜੇ ਦੇ ਕਰੀਬ ਉਹ ਅਕਾਲ ਤਖ਼ਤ ਵੱਲ ਚਲਾ ਗਿਆ।
ਦੁਪਹਿਰ 2.42 ਵਜੇ ਮੁਲਜ਼ਮ ਨੇ ਦਰਸ਼ਨੀ ਦਿਊੜੀ ਦੇ ਰਸਤੇ ਸੱਚਖੰਡ ਸਾਹਿਬ ਜਾਣ ਦੀ ਕੋਸ਼ਿਸ਼ ਕੀਤੀ। ਸ਼ੱਕ ਹੋਣ ‘ਤੇ ਸੇਵਾਦਾਰਾਂ ਨੇ ਉਸ ਨੂੰ ਰੋਕ ਦਿੱਤਾ ਅਤੇ ਲਾਈਨ ‘ਚੋਂ ਬਾਹਰ ਕੱਢ ਦਿੱਤਾ। ਸ਼ਾਮ 4.58 ‘ਤੇ ਉਹ ਮੁੜ ਦਰਸ਼ਨੀ ਦਿਊੜੀ ਪਹੁੰਚਿਆ, ਇਸ ਵਾਰ ਵੀ ਸੇਵਾਦਾਰਾਂ ਨੇ ਉਸ ਨੂੰ ਲਾਈਨ ‘ਚੋਂ ਕੱਢ ਦਿੱਤਾ। ਸ਼ਾਮ 5 ਵਜੇ ਸੇਵਾਦਾਰਾਂ ਦੀ ਡਿਊਟੀ ਬਦਲੀ ਅਤੇ 5.06 ਵਜੇ ਮੁਲਜ਼ਮ ਸੰਗਤ ਦੀ ਕਤਾਰ ਵਿੱਚ ਮੁੜ ਸ਼ਾਮਲ ਹੋ ਗਿਆ। ਸ਼ਾਮ 5.46 ‘ਤੇ ਉਹ ਸੱਚਖੰਡ ਸਾਹਿਬ ਵਿੱਚ ਦਾਖਲ ਹੋਇਆ ਅਤੇ ਜੰਗਲਾ ਟੱਪ ਕੇ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੇ ਸਾਹਮਣੇ ਰੱਖੀ ਸ੍ਰੀ ਸਾਹਿਬ (ਕਿਰਪਾਨ) ਨੂੰ ਚੱਕ ਲਿਆ।
ਪੰਥਕ ਇਕੱਠ ਉਪਰੰਤ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਪ੍ਰਧਾਨ ਸ. ਹਰਜਿੰਦਰ ਸਿੰਘ ਧਾਮੀ ਜੀ ਦੀ ਪ੍ਰੈੱਸ ਕਾਨਫ਼ਰੰਸ।
Press Conference of #SGPC President S. Harjinder Singh Dhami after Panthic Assembly.#SGPCPressConference #Amritsarhttps://t.co/ZHAWeOYo5D— Shiromani Gurdwara Parbandhak Committee (SGPC) (@SGPCAmritsar) December 20, 2021
ਪੂਰੀ ਤਰ੍ਹਾਂ Trained ਲੱਗਿਆ ਮੁਲਜ਼ਮ- SGPC
SGPC ਪ੍ਰਧਾਨ ਨੇ ਕਿਹਾ ਕਿ ਦਰਬਾਰ ਸਾਹਿਬ ਵਿੱਚ ਘਟਨਾ ਨੂੰ ਅੰਜਾਮ ਦੇਣ ਵਾਲੇ ਨੌਜਵਾਨ ਦੀਆਂ ਗਤੀਵਿਧੀਆਂ ਤੋਂ ਲੱਗਿਆ ਕਿ ਉਹ ਪੂਰੀ ਤਰ੍ਹਾਂ ਟ੍ਰੇਨਿੰਗ ਲੈ ਕੇ ਆਇਆ ਸੀ। ਉਨ੍ਹਾਂ ਕਿਹਾ ਕਿ ਪੰਜਾਬ ਵਿੱਚ ਚੋਣਾਂ ਨਜ਼ਦੀਕ ਹਨ, ਅਜਿਹੇ ਵਿੱਚ ਇਸ ਮਾਮਲੇ ਵਿੱਚ ਕਿਸੇ ਵੱਡੀ ਸਾਜ਼ਿਸ਼ ਤੋਂ ਇਨਕਾਰ ਨਹੀਂ ਕੀਤਾ ਜਾ ਸਕਦਾ।
ਵੱਖਰੀ SIT ਦਾ ਗਠਨ
ਧਾਮੀ ਨੇ ਕੇਂਦਰ ਅਤੇ ਸੂਬਿਆਂ ਦੀਆਂ ਏਜੰਸੀਆਂ ‘ਤੇ ਸ਼ੱਕ ਜ਼ਾਹਿਰ ਕਰਦੇ ਹੋਏ ਕਿਹਾ ਕਿ ਕਮੇਟੀ ਆਪਣੀ ਵੱਖਰੀ ਵਿਸ਼ੇਸ਼ ਜਾਂਚ ਟੀਮ (SIT) ਬਣਾਏਗੀ। ਉਹਨਾਂ ਕਿਹਾ, “ਬੇਸ਼ੱਕ ਪੁਲਿਸ ਆਪਣੇ ਪੱਧਰ ‘ਤੇ SIT ਬਣਾ ਕੇ ਜਾਂਚ ਕਰ ਰਹੀ ਹੈ, ਪਰ SGPC ਵੱਲੋਂ ਟੀਮ ਵਿੱਚ ਸ਼ਾਮਲ ਬੁੱਧੀਜੀਵੀਆਂ ਨੂੰ ਜਾਂਚ ਦੀ ਜ਼ਿਮੇਵਾਰੀ ਸੌਂਪੀ ਜਾਵੇਗੀ।
‘SIT ਦੀ ਰਿਪੋਰਟ ਆਉਣ ਤੋਂ ਬਾਅਦ ਜਾਰੀ ਕਰਾਂਗੇ ਫੁਟੇਜ’
ਧਾਮੀ ਨੇ ਕਿਹਾ ਕਿ ਨੌਜਵਾਨ ਦੀ ਮੂਵਮੈਂਟ ਦੀਆਂ ਸਾਰੀਆਂ ਫੁਟੇਜ ਉਪਲੱਬਧ ਹਨ। ਉਨ੍ਹਾਂ ਕਿਹਾ, “ਫਿਲਹਾਲ ਸਰਕਾਰੀ ਏਜੰਸੀ ਜਾਂਚ ਕਰ ਰਹੀ ਹੈ। ਉਨ੍ਹਾਂ ਨੇ ਫੁਟੇਜ ਜਾਰੀ ਕਰਨ ਤੋਂ ਰੋਕਿਆ ਹੋਇਆ ਹੈ। 2 ਦਿਨਾਂ ਵਿੱਚ ਉਹਨਾਂ ਦੀ ਰਿਪੋਰਟ ਆ ਜਾਵੇਗੀ। ਉਸ ਤੋਂ ਬਾਅਦ ਨੌਜਵਾਨ ਦੀ ਮੂਵਮੈਂਟ ਦੀ ਹਰ ਫੁਟੇਜ ਜਾਰੀ ਕੀਤੀ ਜਾਵੇਗੀ।”
