ਬਿਓਰੋ। ਡਰੱਗਜ਼ ਕੇਸ ਵਿੱਚ FIR ਦਰਜ ਹੋਣ ਤੋਂ ਬਾਅਦ ਅਕਾਲੀ ਆਗੂ ਬਿਕਰਮ ਮਜੀਠੀਆ ਦੀਆਂ ਮੁਸ਼ਕਿਲਾਂ ਵੱਧਦੀਆਂ ਨਜ਼ਰ ਆ ਰਹੀਆਂ ਹਨ। ਚੰਨੀ ਸਰਕਾਰ ਮਜੀਠੀਆ ‘ਤੇ ਗ੍ਰਿਫ਼ਤਾਰੀ ਦੀ ਤਿਆਰੀ ਵਿੱਚ ਹੈ, ਪਰ ਇਸ ਵਿਚਾਲੇ ਖ਼ਬਰਾਂ ਮਜੀਠੀਆ ਦੇ ਅੰਡਰਗਰਾਊਂਡ ਹੋਣ ਦੀਆਂ ਵੀ ਹਨ। ਸਰਕਾਰ ਨੂੰ ਮਜੀਠੀਆ ਦੇ ਵਿਦੇਸ਼ ਭੱਜਣ ਤੱਕ ਦਾ ਵੀ ਸ਼ੱਕ ਹੈ। ਅਜਿਹੇ ਵਿੱਚ ਪੰਜਾਬ ਸਰਕਾਰ ਨੇ ਕੇਂਦਰੀ ਗ੍ਰਹਿ ਮੰਤਰਾਲੇ ਦੇ ਜ਼ਰੀਏ ਲੁੱਕਆਊਟ ਨੋਟਿਸ ਜਾਰੀ ਕਰਵਾ ਦਿੱਤਾ ਹੈ।
ਮਜੀਠੀਆ ਦੀ ਗ੍ਰਿਫ਼ਤਾਰੀ ਲਈ ਤਮਾਮ ਏਅਰਪੋਰਟ ਅਤੇ ਹੋਰ ਥਾਵਾਂ ‘ਤੇ ਅਲਰਟ ਜਾਰੀ ਕਰ ਦਿੱਤਾ ਗਿਆ ਹੈ, ਤਾਂ ਜੋ ਜੇਕਰ ਮਜੀਠੀਆ ਉਥੋਂ ਭੱਜਣ ਦੀ ਕੋਸ਼ਿਸ਼ ਕਰਨ, ਤਾਂ ਉਨ੍ਹਾਂ ਨੂੰ ਫੜਿਆ ਜਾ ਸਕੇ।
ਜਿੱਥੇ ਵੀ ਹੋਵੇ, ਬਚੇਗਾ ਨਹੀਂ ਮਜੀਠੀਆ- ਚੰਨੀ
ਬੁੱਧਵਾਰ ਨੂੰ ਰਾਜਾ ਵੜਿੰਗ ਦੇ ਹਲਕੇ ਗਿੱਦੜਬਾਹਾ ਵਿੱਚ ਰੈਲੀ ‘ਚ ਪਹੁੰਚੇ ਸੀਐੱਮ ਚੰਨੀ ਮਜੀਠੀਆ ‘ਤੇ ਜੰਮ ਕੇ ਵਰ੍ਹੇ। ਮੁੱਖ ਮੰਤਰੀ ਨੇ ਕਿਹਾ ਕਿ ਕੇਸ ਦਰਜ ਕੀਤਾ, ਤਾਂ ਅਕਾਲੀ ਆਗੂ ਬਿਕਰਮ ਮਜੀਠੀਆ ਭੱਜਦਾ ਫਿਰ ਰਿਹਾ ਹੈ, ਪਰ ਉਸ ਨੂੰ ਭੱਜਣ ਨਹੀਂ ਦਿਆਂਗੇ। ਸੀਐੱਮ ਨੇ ਕਿਹਾ ਕਿ ਪੰਜਾਬ ਵਿੱਚ ਚਿੱਟਾ (ਸਿੰਥੈਟਿਕ ਡਰੱਗ) ਅਕਾਲੀ ਲੈ ਕੇ ਆਏ। ਹੁਣ ਨਸ਼ੇ ਦੇ ਸੌਦਾਗਰਾਂ ਦਾ ਮਸਲਾ ਹੱਲ ਕਰ ਕੇ ਰਹਾਂਗੇ। ਜਿਨ੍ਹਾਂ ਨੇ ਪੰਜਾਬ ਨੂੰ ਲੁੱਟਿਆ, ਉਨ੍ਹਾਂ ਨੂੰ ਛੱਡਾਂਗੇ ਨਹੀਂ। ਸਭ ਨੂੰ ਇਥੋਂ ਭਜਾਵਾਂਗੇ। ਪੰਜਾਬ ਸਰਕਾਰ ਦੀ ਕਾਰਵਾਈ ਵੇਖ ਕੇ ਉਨ੍ਹਾਂ ਨੂੰ ਰਾਤ ਨੂੰ ਨੀਂਦ ਨਹੀਂ ਆ ਰਹੀ।
ਸੀਐੱਮ ਚੰਨੀ ਨੇ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੂੰ ਵੀ ਨਹੀਂ ਬਖਸ਼ਿਆ। ਉਨ੍ਹਾਂ ਕਿਹਾ ਕਿ ਮਜੀਠੀਆ ‘ਤੇ ਪਰਚਾ ਦਰਜ ਹੋਇਆ, ਤਾਂ ਕੈਪਟਨ ਨੇ ਇਸ ਨੂੰ ਗਲਤ ਕਹਿ ਦਿੱਤਾ। ਕੈਪਟਨ ਅਕਾਲੀਆਂ ਦੇ ਨਾਲ ਚਾਚਾ-ਭਤੀਜਾ ਬਣੇ ਹੋਏ ਸਨ। ਇਸ ਲਈ ਉਨ੍ਹਾਂ ਨੂੰ ਸਿਰਫ ਕੁਰਸੀ ਤੋਂ ਹਟਾਇਆ ਗਿਆ। ਕੈਪਟਨ ਸੱਚ ਨੂੰ ਸੱਚ ਨਹੀਂ ਕਹਿੰਦੇ ਸਨ।
ਜਲਦ ਸਲਾਖਾਂ ਦੇ ਪਿੱਛੇ ਹੋਣਗੇ ਮਜੀਠੀਆ- ਰੰਧਾਵਾ
ਪੰਜਾਬ ਵਿੱਚ ਗ੍ਰਹਿ ਵਿਭਾਗ ਸੰਭਾਲ ਰਹੇ ਡਿਪਟੀ ਸੀਐੱਮ ਸੁਖਜਿੰਦਰ ਰੰਧਾਵਾ ਨੇ ਕਿਹਾ ਕਿ ਬਿਕਰਮ ਮਜੀਠੀਆ ਜਲਦ ਜੇਲ੍ਹ ਵਿੱਚ ਹੋਵੇਗਾ। ਉਹਨਾਂ ਨੇ #majithiainprisonsoon ਦੇ ਨਾਲ ਟਵੀਟ ਕਰਦੇ ਹੋਏ ਲਿਖਿਆ, “ਰੱਬ ਦੇ ਘਰ ਦੇਰ ਹੈ ਅੰਧੇਰ ਨਹੀ। ਕਿੰਨੇ ਹੀ ਲੰਬੇ ਸਮੇਂ ਤੋ ਅਸੀ ਆਪਣੇ ਪੰਜਾਬ ਦੀ ਜਵਾਨੀ ਅਤੇ ਉਜੜੀ ਕੁੱਖਾਂ ਨੂੰ ਇਨਸਾਫ ਦੁਆਉਣ ਲਈ ਸੰਘਰਸ਼ ਕੀਤਾ। ਆਖਿਰਕਾਰ ਵਾਹਿਗੁਰੂ ਜੀ ਨੇ ਪੰਜਾਬ ਦੀ ਪੁਕਾਰ ਸੁਣੀ। ਇਨਸਾਫ ਦੁਆਉਣ ਵਾਲਾ ਓਹ ਪਰਮੇਸ਼ਵਰ ਹੈ,ਅਸੀ ਬੱਸ ਇੱਕ ਜ਼ਰੀਆ ਬਣੇ ਹਾਂ।”
ਰੱਬ ਦੇ ਘਰ ਦੇਰ ਹੈ ਅੰਧੇਰ ਨਹੀ।
ਕਿੰਨੇ ਹੀ ਲੰਬੇ ਸਮੇਂ ਤੋ ਅਸੀ ਆਪਣੇ ਪੰਜਾਬ ਦੀ ਜਵਾਨੀ ਅਤੇ ਉਜੜੀ ਕੁੱਖਾਂ ਨੂੰ ਇਨਸਾਫ ਦੁਆਉਣ ਲਈ ਸੰਘਰਸ਼ ਕੀਤਾ। ਆਖਿਰਕਾਰ ਵਾਹਿਗੁਰੂ ਜੀ ਨੇ ਪੰਜਾਬ ਦੀ ਪੁਕਾਰ ਸੁਣੀ।
ਇਨਸਾਫ ਦੁਆਉਣ ਵਾਲਾ ਓਹ ਪਰਮੇਸ਼ਵਰ ਹੈ,ਅਸੀ ਬੱਸ ਇੱਕ ਜ਼ਰੀਆ ਬਣੇ ਹਨ।#majithiainprisonsoon— Sukhjinder Singh Randhawa (@Sukhjinder_INC) December 22, 2021
ਕਿਤੇ ਨਹੀਂ ਭੱਜੇ ਮਜੀਠੀਆ- ਅਕਾਲੀ ਦਲ
ਉਧਰ ਅਕਾਲੀ ਦਲ ਨੇ ਦਾਅਵਾ ਕੀਤਾ ਹੈ ਕਿ ਬਿਕਰਮ ਮਜੀਠੀਆ ਕਿਤੇ ਭੱਜੇ ਨਹੀਂ ਹਨ। ਉਹ ਆਪਣੇ ਹਲਕੇ ਮਜੀਠਾ ਵਿੱਚ ਹੀ ਹਨ। ਯੂਥ ਅਕਾਲੀ ਦਲ ਦੇ ਪ੍ਰਧਾਨ ਪਰਮਬੰਸ ਸਿੰਘ ਬੰਟੀ ਰੋਮਾਣਾ ਨੇ ਕਿਹਾ ਕਿ ਕਾਂਗਰਸ ਸਰਕਾਰ ਫਰਜ਼ੀ ਕੇਸ ਦਰਜ ਕਰਕੇ ਮਜੀਠੀਆ ਦੇ ਖਿਲਾਫ਼ ਸਾਜ਼ਿਸ਼ਾਂ ਰਚ ਰਹੀ ਹੈ।
ਯੂਥ ਅਕਾਲੀ ਦਲ ਦੇ ਪ੍ਰਧਾਨ ਬੰਟੀ ਰੋਮਾਣਾ ਨੇ ਕਿਹਾ ਕਿ ਜਿਸ IG ਗੌਤਮ ਚੀਮਾ ਨੇ ਕੇਸ ਦਰਜ ਕੀਤਾ, ਉਸਦੇ ਖਿਲਾਫ਼ ਗੰਭੀਰ ਧਾਰਾਵਾਂ ਤਹਿਤ ਕੇਸ ਦਰਜ ਹਨ। ਇਹਨਾਂ ਵਿੱਚ ਇੱਕ ਕੇਸ CBI ਅਤੇ ਦੂਜਾ ਪੰਜਾਬ ਪੁਲਿਸ ਦੇ ਕੋਲ ਚੱਲ ਰਿਹਾ ਹੈ।
ਕੇਸ ਦਰਜ ਹੁੰਦੇ ਹੀ ਗ੍ਰਿਫ਼ਤਾਰ ਕਰਨ ਦੀ ਸੀ ਯੋਜਨਾ
ਦਰਅਸਲ, ਪੰਜਾਬ ਸਰਕਾਰ ਦੀ ਯੋਜਨਾ ਸੀ ਕਿ ਕੇਸ ਦਰਜ ਕਰਦੇ ਹੀ ਮਜੀਠੀਆ ਨੂੰ ਰਾਤੋ-ਰਾਤ ਗ੍ਰਿਫ਼ਤਾਰ ਕਰ ਲਿਆ ਜਾਵੇਗਾ। ਇਸਦੇ ਲਈ ਉਹਨਾਂ ਨੇ ਮਜੀਠੀਆ ਦੇ ਮੋਬਾਈਲ ਦੀ ਲੋਕੇਸ਼ਨ ਨੂੰ ਟ੍ਰੇਸ ਕੀਤਾ ਹੋਇਆ ਸੀ। ਮੋਬਾਈਲ ਲਗਾਤਾਰ ਉਨ੍ਹਾਂ ਦੇ ਚੰਡੀਗੜ੍ਹ ਸਥਿਤ ਸਰਕਾਰੀ ਫਲੈਟ ਦੀ ਲੋਕੇਸ਼ਨ ਦੱਸ ਰਿਹਾ ਸੀ। ਇਸ ਤੋਂ ਸਰਕਾਰ ਨੂੰ ਲੱਗ ਰਿਹਾ ਸੀ ਕਿ ਮਜੀਠੀਆ ਕੇਸ ਤੋਂ ਬੇਖ਼ਬਰ ਹਨ ਅਤੇ ਚੰਡੀਗੜ੍ਹ ਵਿੱਚ ਰੁਕੇ ਹਨ। ਸੋਮਵਾਰ ਅੱਧੀ ਰਾਤ ਨੂੰ ਕੇਸ ਦਰਜ ਕਰਨ ਤੋਂ ਬਾਅਦ ਜਦੋਂ ਪੁਲਿਸ ਨੇ ਉਥੇ ਰੇਡ ਕੀਤੀ, ਤਾਂ ਮਜੀਠੀਆ ਦੀ ਥਾਂ ਸਿਰਫ਼ ਉਨ੍ਹਾਂ ਦਾ ਮੋਬਾਈਲ ਮਿਲਿਆ।
SIT ਵੱਲੋਂ ਹੁਣ ਤੱਕ 16 ਥਾਵਾਂ ‘ਤੇ ਰੇਡ
ਪੰਜਾਬ ਪੁਲਿਸ ਦੀ SIT ਦੀਆਂ ਟੀਮਾਂ ਹੁਣ ਤੱਕ 16 ਥਾਵਾਂ ‘ਤੇ ਰੇਡ ਕਰ ਚੁੱਕੀਆਂ ਹਨ, ਪਰ ਮਜੀਠੀਆ ਦਾ ਕੋਈ ਪਤਾ ਨਹੀਂ ਲੱਗਿਆ। ਹੁਣ ਮਜੀਠੀਆ ਦੇ ਕਰੀਬੀਆਂ ਦੀ ਲਿਸਟ ਤਿਆਰ ਕੀਤੀ ਜਾ ਰਹੀ ਹੈ, ਤਾਂ ਜੋ ਉਨ੍ਹਾਂ ਤੋਂ ਪੁੱਛਗਿੱਛ ਕੀਤੀ ਜਾ ਸਕੇ। ਇਸ ਤੋਂ ਇਲਾਵਾ ਸਪੈਸ਼ਲ ਟਾਸਕ ਫੋਰਸ (STF) ਰਿਪੋਰਟ ਵਿੱਚ ਦਰਜ ਆਗੂਆਂ ਤੋਂ ਵੀ ਪੁੱਛਗਿੱਛ ਕਰਨ ਦੀ ਤਿਆਰੀ ਕੀਤੀ ਜਾ ਰਹੀ ਹੈ।
