ਬਿਓਰੋ। ਲੰਮੇਂ ਸਮੇਂ ਤੱਕ ਪੰਜਾਬ ਕਾਂਗਰਸ ਦਾ ਕਲੇਸ਼ ਖਤਮ ਕਰਨ ਵਿੱਚ ਜੁਟੇ ਰਹੇ ਹਰੀਸ਼ ਰਾਵਤ ਨੇ ਹੁਣ ਉਤਰਾਖੰਡ ਵਿੱਚ ਵੀ ਪਾਰਟੀ ਦੇ ਖਿਲਾਫ਼ ਮੋਰਚਾ ਖੋਲ੍ਹ ਦਿੱਤਾ ਹੈ। ਚੋਣਾਂ ਤੋਂ ਠੀਕ ਪਹਿਲਾਂ ਹਰੀਸ਼ ਰਾਵਤ ਨੇ ਸਿੱਧੇ ਤੌਰ ‘ਤੇ ਪਾਰਟੀ ਲੀਡਰਸ਼ਿਪ ‘ਤੇ ਸਵਾਲ ਖੜ੍ਹੇ ਕਰ ਦਿੱਤੇ ਹਨ। ਰਾਵਤ ਨੇ ਇੱਕ ਤੋਂ ਬਾਅਦ ਇੱਕ ਕਈ ਟਵੀਟ ਕਰਕੇ ਆਪਣੀ ਭੜਾਸ ਕੱਢੀ ਹੈ।
ਰਾਵਤ ਨੇ ਲਿਖਿਆ, “ਹੈ ਨਾ ਅਜੀਬ ਜਿਹੀ ਗੱਲ। ਚੋਣ ਰੂਪੀ ਸਮੰਦਰ ਤੈਰਨਾ ਹੈ। ਸਹਿਯੋਗ ਲਈ ਪਾਰਟੀ ਦਾ ਢਾਂਚਾ ਵਧੇਰੇਤਰ ਥਾਵਾਂ ‘ਤੇ ਸਹਿਯੋਗ ਦਾ ਹੱਥ ਅੱਗੇ ਵਧਾਉਣ ਦੀ ਬਜਾਏ ਜਾਂ ਤਾਂ ਮੂੰਹ ਫੇਰ ਕੇ ਖੜ੍ਹਾ ਹੁੰਦਾ ਜਾ ਰਿਹਾ ਹੈ ਜਾਂ ਨਕਾਰਾਤਮਕ ਭੂਮਿਕਾ ਨਿਭਾ ਰਿਹਾ ਹੈ। ਮਨ ਵਿੱਚ ਬਹੁਤ ਵਾਰ ਵਿਚਾਰ ਆ ਰਿਹਾ ਹੈ ਕਿ ਹਰੀਸ਼ ਰਾਵਤ ਹੁਣ ਬਹੁਤ ਹੋ ਗਿਆ, ਬਹੁਤ ਤੈਰ ਲਏ, ਹੁਣ ਆਰਾਮ ਦਾ ਸਮਾਂ ਹੈ। ਪਰ ‘ਚੁਪਕੇ’ ਤੋਂ ਮਨ ਦੇ ਇੱਕ ਕੋਨੇ ਤੋਂ ਆਵਾਜ਼ ਉਠ ਰਹੀ ਹੈ …. ਬੜੀ ਜੱਦੋ-ਜਹਿਦ ਵਾਲੀ ਸਥਿਤੀ ਵਿੱਚ ਹਾਂ। ਨਵਾਂ ਸਾਲ ਸ਼ਾਇਦ ਕੋਈ ਰਸਤਾ ਵਿਖਾ ਦਵੇ।”
ਹਰੀਸ਼ ਰਾਵਤ ਵੱਲੋੰ ਟਵਿਟਰ ‘ਤੇ ਕੀਤੀਆਂ ਟਿੱਪਣੀਆਂ ਵਿੱਚ ਕਿਸੇ ਆਗੂ ਦਾ ਜ਼ਿਕਰ ਨਹੀਂ ਹੈ, ਪਰ ਉਨ੍ਹਾਂ ਨੇ ਇਸ਼ਾਰਿਆਂ ਵਿੱਚ ਪਾਰਟੀ ਲੀਡਰਸ਼ਿਪ ਅਤੇ ਸੂਬੇ ਦੇ ਆਗੂਆਂ ‘ਤੇ ਹਮਲਾ ਬੋਲਿਆ ਹੈ। ਉਨ੍ਹਾਂ ਲਿਖਿਆ, “ਜਿਨ੍ਹਾਂ ਦੇ ਆਦੇਸ਼ ‘ਤੇ ਮੈਂ ਤੈਰਨਾ ਹੈ। ਉਨ੍ਹਾਂ ਦੇ ਨੁਮਾਇੰਦਿਆਂ ਨੇ ਹੀ ਮੇਰੇ ਹੱਥ-ਪੈਰ ਬੰਨ੍ਹੇ ਹੋਏ ਹਨ। ਇਹ ਕਹਿ ਕੇ ਰਾਵਤ ਨੇ ਸਿੱਧੇ ਤੌਰ ‘ਤੇ ਗਾਂਧੀ ਪਰਿਵਾਰ ਅਤੇ ਉਨ੍ਹਾਂ ਦੇ ਕਰੀਬੀਆਂ ‘ਤੇ ਹਮਲਾ ਬੋਲਿਆ ਹੈ। ਦੱਸ ਦਈਏ ਕਿ ਪੰਜਾਬ ਦੇ ਨਾਲ-ਨਾਲ ਉਤਰਾਖੰਡ ਵਿੱਚ ਵੀ 2022 ਦੀ ਸ਼ੁਰੂਆਤ ‘ਚ ਚੋਣਾਂ ਹੋਣ ਜਾ ਰਹੀਆਂ ਹਨ।
ਰਾਵਤ ਦੇ ਤੇਵਰਾਂ ‘ਤੇ ਕੈਪਟਨ ਦਾ ਤੰਜ
ਹਰੀਸ਼ ਰਾਵਤ ਦੇ ਬਾਗੀ ਤੇਵਰਾਂ ‘ਤੇ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਵੀ ਤੰਜ ਕਸਿਆ ਹੈ। ਕੈਪਟਨ ਨੇ ਕਿਹਾ, “ਤੁਸੀਂ ਜੋ ਬੀਜੋਗੇ, ਉਹੀ ਕੱਟੋਗੇ। ਤੁਹਾਡੇ ਭਵਿੱਖ ਦੀਆਂ ਕੋਸ਼ਿਸ਼ਾਂ ਲਈ ਸ਼ੁਭਕਾਮਨਾਵਾਂ (ਜੇਕਰ ਕੋਈ ਹਨ ਤਾਂ)” ਕੈਪਟਨ ਅਮਰਿੰਦਰ ਸਿੰਘ ਨੇ ਇਸ ਟਵੀਟ ਵਿੱਚ ਹਰੀਸ਼ ਰਾਵਤ ਨੂੰ ਟੈਗ ਵੀ ਕੀਤਾ ਹੈ।
You reap what you sow! All the best for your future endeavours (if there are any) @harishrawatcmuk ji. https://t.co/6QfFkVt8ZO
— Capt.Amarinder Singh (@capt_amarinder) December 22, 2021
ਕੈਪਟਨ ਦੇ ਤਖਤਾਪਲਟ ‘ਚ ਰਾਵਤ ਦੀ ਵੱਡੀ ਭੂਮਿਕਾ
ਕਾਬਿਲੇਗੌਰ ਹੈ ਕਿ ਪੰਜਾਬ ਕਾਂਗਰਸ ਦਾ ਇੰਚਾਰਜ ਬਣਦੇ ਹੀ ਰਾਵਤ ਨੇ ਨਵਜੋਤ ਸਿੰਘ ਸਿੱਧੂ ਨੂੰ ਸਿਆਸਤ ਵਿੱਚ ਸਰਗਰਮ ਕੀਤਾ ਸੀ। ਨਾਲ ਹੀ ਹਰੀਸ਼ ਰਾਵਤ ਨੇ ਸਿੱਧੂ ਨੂੰ ਪੰਜਾਬ ਵਿੱਚ ਕਾਂਗਰਸ ਦਾ ਭਵਿੱਖ ਦੱਸ ਦਿੱਤਾ ਸੀ। ਰਾਵਤ ਦੀ ਵਕਾਲਤ ‘ਤੇ ਹੀ ਸਿੱਧੂ ਨੂੰ ਕਾਂਗਰਸ ਨੇ ਪੰਜਾਬ ਦਾ ਪ੍ਰਧਾਨ ਲਗਾਇਆ, ਜਿਸਦੇ ਚਲਦੇ ਕੈਪਟਨ ਦੀ ਨਰਾਜ਼ਗੀ ਵਧਦੀ ਚਲੀ ਗਈ। ਸਿੱਧੂ ਅਤੇ ਕੈਪਟਨ ਵਿਚਕਾਰ ਤਕਰਾਰ ਘੱਟ ਹੋਣ ਦੀ ਬਜਾਏ ਹੋਰ ਵਧਦੀ ਰਹੀ। ਅਖੀਰ ਵਿੱਚ ਕੈਪਟਨ ਨੂੰ ਮੁੱਖ ਮੰਤਰੀ ਅਹੁਦੇ ਤੋਂ ਹੀ ਹਟਾ ਦਿੱਤਾ ਗਿਆ। ਇਹ ਸਭ ਕੁੱਝ ਰਾਵਤ ਦੇ ਪੰਜਾਬ ਕਾਂਗਰਸ ਦਾ ਇੰਚਾਰਜ ਰਹਿੰਦੇ ਹੀ ਹੋਇਆ। ਕੈਪਟਨ ਤੋਂ ਮੁੱਖ ਮੰਤਰੀ ਦੀ ਕੁਰਸੀ ਖੁੰਝਦੇ ਹੀ ਇਹ ਦੋਵੇਂ ਆਗੂ ਇੱਕ-ਦੂਜੇ ‘ਤੇ ਤਿੱਖੇ ਹਮਲੇ ਕਰਦੇ ਰਹੇ ਤੇ ਹੁਣ ਹਰੀਸ਼ ਰਾਵਤ ਦੇ ਇਹਨਾਂ ਟਵੀਟਸ ਨੇ ਕੈਪਟਨ ਨੂੰ ਇੱਕ ਵਾਰ ਫੇਰ ਰਾਵਤ ‘ਤੇ ਹਮਲਾ ਬੋਲਣ ਦਾ ਮੌਕਾ ਦੇ ਦਿੱਤਾ ਹੈ।
