ਬਿਓਰੋ। ਪੰਜਾਬ ਦੀ ਸਿਆਸਤ ਵਿੱਚ ਇਨ੍ਹੀਂ ਦਿਨੀਂ ਨਵਜੋਤ ਸਿੰਘ ਸਿੱਧੂ ਦੇ ਵਿਵਾਦਿਤ ਬਿਆਨਾਂ ‘ਤੇ ਖ਼ੂਬ ਬਵਾਲ ਮਚਿਆ ਹੋਇਆ ਹੈ। ਸਿੱਧੂ ਵੱਲੋਂ ਇੱਕ ਚੋਣ ਰੈਲੀ ਵਿੱਚ ਪੁਲਿਸ ਬਾਰੇ ਦਿੱਤੇ ਗਏ ਇਤਰਾਜ਼ਯੋਗ ਬਿਆਨ ‘ਤੇ ਕਈ ਪੁਲਿਸ ਅਧਿਕਾਰੀ ਖੁੱਲ੍ਹ ਕੇ ਉਨ੍ਹਾਂ ਦੇ ਵਿਰੋਧ ਵਿੱਚ ਉਤਰ ਆਏ ਹਨ। ਸਿੱਧੂ ਦੇ ਬਿਆਨ ਤੋਂ ਨਾਰਾਜ਼ ਚੰਡੀਗੜ੍ਹ ਪੁਲਿਸ ਦੇ DSP ਦਿਲਸ਼ੇਰ ਸਿੰਘ ਚੰਦੇਲ ਨੇ ਤਾਂ ਉਨ੍ਹਾਂ ਨੂੰ ਮਾਣਹਾਨੀ ਦਾ ਨੋਟਿਸ ਤੱਕ ਭੇਜ ਦਿੱਤਾ ਹੈ।
ਨੋਟਿਸ ਵਿੱਚ DSP ਨੇ ਸਿੱਧੂ ਨੂੰ 21 ਦਿਨਾਂ ਦੇ ਅੰਦਰ ਜਨਤੱਕ ਤੌਰ ‘ਤੇ ਮੁਆਫੀ ਮੰਗਣ ਨੂੰ ਕਿਹਾ ਹੈ। ਜੇਕਰ ਮੁਆਫੀ ਨਹੀਂ ਮੰਗੀ, ਤਾਂ ਸਿੱਧੂ ਦੇ ਖਿਲਾਫ਼ ਕ੍ਰਿਮੀਨਲ ਕਾਰਵਾਈ ਕੀਤੀ ਜਾਵੇਗੀ। ਇਸ ਤੋਂ ਪਹਿਲਾਂ ਚੰਦੇਲ ਨੇ ਵੀਡੀਓ ਜਾਰੀ ਕਰਕੇ ਸਿੱਧੂ ਦੇ ਬਿਆਨ ਨੂੰ ਸ਼ਰਮਨਾਕ ਦੱਸਦੇ ਹੋਏ ਉਸਦੀ ਨਿੰਦਾ ਕੀਤੀ ਸੀ। ਚੰਦੇਲ ਨੇ ਕਿਹਾ ਸੀ ਕਿ ਜੇਕਰ ਪੁਲਿਸ ਨਾਲ ਨਾ ਹੋਵੇ, ਤਾਂ ਸਿੱਧੂ ਦੀ ਗੱਲ ਕੋਈ ਰਿਕਸ਼ਾਵਾਲਾ ਵੀ ਨਹੀਂ ਸੁਣਦਾ।
ਪੰਜਾਬ ਪੁਲਿਸ ਦੇ ਸਬ-ਇੰਸਪੈਕਟਰ ਵੀ ਵਿਰੋਧ ‘ਚ ਉਤਰੇ
ਜਲੰਧਰ ਵਿੱਚ ਤੈਨਾਤ ਸਬ-ਇੰਸਪੈਕਟਰ ਬਲਵੀਰ ਸਿੰਘ ਨੇ ਵੀ ਸਿੱਧੂ ਦੇ ਬਿਆਨ ਦੀ ਨਿੰਦਾ ਕੀਤੀ ਹੈ। ਉਹਨਾਂ ਕਿਹਾ, “ਬਹੁਤ ਬੁਰੀ ਗੱਲ ਹੈ ਕਿ ਸਾਡੇ ਖਿਲਾਫ਼ ਨਵਜੋਤ ਸਿੰਘ ਸਿੱਧੂ ਨੇ ਅਜਿਹੀ ਟਿੱਪਣੀ ਕੀਤੀ ਹੈ। ਮੈਂ DGP ਪੰਜਾਬ ਨੂੰ ਗੁਜ਼ਾਰਿਸ਼ ਕਰਦਾ ਹਾਂ ਕਿ ਪੰਜਾਬ ਪੁਲਿਸ ਦੇ ਅਕਸ ਨੂੰ ਖਰਾਬ ਨਾ ਹੋਣ ਦਿੱਤਾ ਜਾਵੇ। ਅਸੀਂ ਪਰਿਵਾਰ ਦੇ ਨਾਲ ਸਮਾਜ ਵਿੱਚ ਰਹਿੰਦੇ ਹਾਂ। ਸਾਡੇ ਬੱਚੇ ਪੁੱਛਦੇ ਹਨ ਕਿ ਸਾਡੇ ਖ਼ਿਲਾਫ਼ ਅਜਿਹੀ ਭਾਸ਼ਾ ਕਿਉਂ ਵਰਤੀ ਜਾ ਰਹੀ ਹੈ?”
ਸਬ-ਇੰਸਪੈਕਟਰ ਨੇ ਕਿਹਾ, “ਮੈਂ ਸਿੱਧੂ ਨੂੰ ਕਹਿਣਾ ਚਾਹਾਂਗਾ ਕਿ ਅਸੀਂ ਡਰਪੋਕ ਨਹੀਂ, ਦਲੇਰ ਹਾਂ। ਸਾਡੀ ਦਲੇਰੀ ਦੇ ਕਿੱਸੇ ਪੂਰਾ ਦੇਸ਼ ਜਾਣਦਾ ਹੈ। ਕਿਵੇਂ ਅਸੀਂ ਦੀਨਾਨਗਰ ਕਾਂਡ ਅਤੇ ਦਹਿਸ਼ਤਵਾਦ ਦੇ ਦੌਰਾਨ ਜਾਨ ਦੀ ਪਰਵਾਹ ਕੀਤੇ ਬਗੈਰ ਦੇਸ਼ ਅਤੇ ਪੰਜਾਬ ਨੂੰ ਮੁੜ ਹਰਾ-ਭਰਾ ਕੀਤਾ ਹੈ। ਕੋਰੋਨਾ ਕਾਲ ਵਿੱਚ ਵੀ ਵੱਡੇ ਲੋਕ ਘਰਾਂ ਵਿੱਚ ਵੜ ਗਏ ਸਨ, ਪਰ ਪੰਜਾਬ ਪੁਲਿਸ ਨੇ ਦਿਨ-ਰਾਤ ਕੰਮ ਕਰਕੇ ਲੋਕਾਂ ਦੀ ਮਦਦ ਕੀਤੀ। ਇਸ ਵੇਲੇ ਪੰਜਾਬ ਪੁਲਿਸ ਕੋਈ ਵਧੀਆ ਦੌਰ ‘ਚੋਂ ਨਹੀਂ ਲੰਘ ਰਿਹਾ।”
