ਚੰਡੀਗੜ੍ਹ। ਵਿਧਾਨ ਸਭਾ ਚੋਣਾਂ ਤੋਂ ਠੀਕ ਪਹਿਲਾਂ ਚੰਡੀਗੜ੍ਹ ਨਗਰ ਨਿਗਮ ਦੀਆਂ ਚੋਣਾਂ ਵਿੱਚ ਆਮ ਆਦਮੀ ਪਾਰਟੀ ਨੇ ਸਭ ਨੂੰ ਹੈਰਾਨ ਕਰਦੇ ਹੋਏ ਬੀਜੇਪੀ ਅਤੇ ਕਾਂਗਰਸ ਨੂੰ ਢੇਰ ਕਰ ਦਿੱਤਾ। ਪਹਿਲੀ ਵਾਰ ਸ਼ਹਿਰ ਦੀਆਂ ਨਿਗਮ ਚੋਣਾਂ ਵਿੱਚ ਉਤਰੀ ‘ਆਪ’ 35 ਵਿੱਚੋਂ 14 ਸੀਟਾਂ ਜਿੱਤ ਕੇ ਸਭ ਤੋਂ ਵੱਡੀ ਪਾਰਟੀ ਬਣੀ। ਹਾਲਾਂਕਿ ਉਹ ਬਹੁਮਤ ਦੇ ਅੰਕੜੇ ਤੋਂ ਪਿੱਛੇ ਰਹਿ ਗਈ।
ਪਿਛਲੇ 5 ਸਾਲਾਂ ਤੋਂ ਨਿਗਮ ਦੀ ਸੱਤਾ ‘ਤੇ ਕਾਬਜ਼ ਬੀਜੇਪੀ ਨੂੰ ਸਿਰਫ਼ 12 ਸੀਟਾਂ ਹੀ ਹਾਸਲ ਹੋਈਆਂ। ਓਧਰ ਕਾਂਗਰਸ ਸਿਰਫ਼ 8 ਸੀਟਾਂ ‘ਤੇ ਹੀ ਜਿੱਤ ਹਾਸਲ ਕਰ ਸਕੀ। ਇਸਦੇ ਨਾਲ ਹੀ ਅਕਾਲੀ ਦਲ ਨੂੰ ਮਹਿਜ਼ 1 ਸੀਟ ‘ਤੇ ਜਿੱਤ ਹਾਸਲ ਹੋਈ ਹੈ।
ਬੀਜੇਪੀ ਨੂੰ ਸਭ ਤੋਂ ਵੱਡਾ ਝਟਕਾ ਇਹ ਵੀ ਲੱਗਿਆ ਕਿ ਵਾਰਡ ਨੰਬਰ 17 ਤੋਂ ਉਸ ਦੇ ਮੇਅਰ ਰਹੇ ਰਵੀਕਾਂਤ ਸ਼ਰਮਾ ਆਮ ਆਦਮੀ ਪਾਰਟੀ ਦੇ ਹੱਥੋਂ ਚੋਣ ਹਾਰ ਗਏ। ਬੀਜੇਪੀ ਦੇ ਸੀਨੀਅਰ ਡਿਪਟੀ ਮੇਅਰ ਮਹੇਸ਼ਇੰਦਰ ਸਿੱਧੂ ਜਿੱਤ ਤਾਂ ਗਏ, ਪਰ ਜਿੱਤ ਦਾ ਫ਼ਰਕ ਮਹਿਜ਼ 11 ਵੋਟਾਂ ਦਾ ਰਿਹਾ।
ਚੰਡੀਗੜ੍ਹ ਤੋਂ ਬਾਅਦ ਹੁਣ ਪੰਜਾਬ ‘ਤੇ ਨਜ਼ਰ
ਚੰਡੀਗੜ੍ਹ ਦੇ ਚੋਣ ਨਤੀਜਿਆਂ ਦੇ ਜ਼ਰੀਏ ਹੀ ਆਮ ਆਦਮੀ ਪਾਰਟੀ ਹੁਣ ਪੰਜਾਬ ਦੇ ਵੋਟਰਾਂ ਤੱਕ ਪਹੁੰਚ ਬਣਾਉਣ ਦੀ ਕੋਸ਼ਿਸ਼ ਕਰੇਗੀ। ਚੰਡੀਗੜ੍ਹ ਵਿੱਚ ‘ਆਪ’ ਨੇ ਸ਼ਹਿਰ ਨੂੰ ਮੁੜ ਸਾਫ਼ ਬਣਾਉਣ ਅਤੇ 20 ਹਜਾਰ ਲੀਟਰ ਮੁਫ਼ਤ ਪਾਣੀ ਦਾ ਵਾਅਦਾ ਕੀਤਾ। ਪੰਜਾਬ ਵਿੱਚ ਵੀ ਕੇਜਰੀਵਾਲ ਮੁਫ਼ਤ ਬਿਜਲੀ ਪਾਣੀ ਦੇ ਮਾਡਲ ਦੇ ਨਾਲ ਲੋਕਾਂ ਨੂੰ ਲੁਭਾਉਣ ਵਿੱਚ ਲੱਗੇ ਹਨ। ਪੰਜਾਬ ਵਿੱਚ ‘ਆਪ’ 300 ਯੂਨਿਟ ਮੁਫ਼ਤ ਬਿਜਲੀ, ਹਰ ਮਹਿਲਾ ਨੂੰ ਪ੍ਰਤੀ ਮਹੀਨਾ ਇੱਕ ਹਜ਼ਾਰ ਰੁਪਏ ਸਮੇਤ ਕਈ ਤਰ੍ਹਾਂ ਦੇ ਵਾਅਦੇ ਕਰ ਰਹੀ ਹੈ। ਜੇਕਰ ਚੰਡੀਗੜ੍ਹ ਵਿੱਚ ਇਸੇ ਗਵਰਨੈਂਸ ਮਾਡਲ ‘ਤੇ ਮੁਹਰ ਲੱਗੀ ਹੈ, ਤਾਂ ਪੰਜਾਬ ਵਿੱਚ ਵੀ ਇਸਦਾ ਵੱਡਾ ਅਸਰ ਦਿਖੇਗਾ। ‘ਆਪ’ ਆਗੂ ਕਹਿਣ ਲੱਗੇ ਹਨ ਕਿ ਇਹ ਟ੍ਰੇਲਰ ਹੈ ਅਤੇ ਅਸਲੀ ਕਮਾਲ ਪੰਜਾਬ ਵਿੱਚ ਹੋਵੇਗਾ।
चंडीगढ़ नगर निगम में आम आदमी पार्टी की ये जीत पंजाब में आने वाले बदलाव का संकेत है।चंडीगढ़ के लोगों ने आज भ्रष्ट राजनीति को नकारते हुए AAP की ईमानदार राजनीति को चुना है।
AAP के सभी विजयी उम्मीदवारों एवं सभी कार्यकर्ताओं को बहुत-बहुत बधाई।
इस बार पंजाब बदलाव के लिए तैयार है।
— Arvind Kejriwal (@ArvindKejriwal) December 27, 2021
ਬੀਜੇਪੀ ਲਈ ਚੰਗੇ ਸੰਕੇਤ ਨਹੀਂ
ਹਾਲ ਹੀ ਵਿੱਚ ਹਿਮਾਚਲ ਸਣੇ ਕਈ ਸੂਬਿਆਂ ਦੀਆਂ ਜ਼ਿਮਨੀ ਚੋਣਾਂ ਵਿੱਚ ਬੀਜੇਪੀ ਨੂੰ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ ਅਤੇ ਹੁਣ ਚੰਡੀਗੜ੍ਹ ਵਿੱਚ ਪਾਰਟੀ ਨੂੰ ਮਿਲੀ ਇਹ ਹਾਰ ਬੀਜੇਪੀ ਲਈ ਚੰਗੇ ਸੰਕੇਤ ਨਹੀਂ ਹਨ। ਦੱਸ ਦਈਏ ਕਿ ਚੰਡੀਗੜ੍ਹ ਵਿੱਚ ਹੁਣ ਤੱਕ 26 ਵਾਰਡ ਸਨ, ਪਰ ਹੁਣ ਪੇਂਡੂ ਇਲਾਕਿਆਂ ਨੂੰ ਨਿਗਮ ਵਿੱਚ ਸ਼ਾਮਲ ਕੀਤੇ ਜਾਣ ਤੋਂ ਬਾਅਦ 35 ਵਾਰਡ ਹੋ ਗਏ ਹਨ। ਨਿਗਮ ਦੀਆਂ ਪੇਂਡੂ ਚੋਣਾਂ ਵਿੱਚ ਬੀਜੇਪੀ ਨੇ ਸਭ ਤੋਂ ਵੱਧ ਨੁਕਸਾਨ ਝੱਲਣਾ ਪਿਆ ਹੈ।
