ਚੰਡੀਗੜ੍ਹ। ਪੰਜਾਬ ਦੀਆਂ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਆਪਣਾ ਕੁਨਬਾ ਮਜਬੂਤ ਕਰਨ ‘ਚ ਲੱਗੀ ਭਾਰਤੀ ਜਨਤਾ ਪਾਰਟੀ ਨੇ ਕਾਂਗਰਸ ਵਿੱਚ ਵੱਡੀ ਸੰਨ੍ਹ ਲਗਾਈ ਹੈ। ਬੀਜੇਪੀ ਨੇ ਕਾਦੀਆਂ ਤੋਂ ਕਾਂਗਰਸ ਦੇ ਮੌਜੂਦਾ ਵਿਧਾਇਕ ਫਤਿਹਜੰਗ ਸਿੰਘ ਬਾਜਵਾ ਅਤੇ ਸ੍ਰੀ ਹਰਗੋਬਿੰਦਪੁਰ ਤੋਂ ਵਿਧਾਇਕ ਬਲਵਿੰਦਰ ਸਿੰਘ ਲਾਡੀ ਨੂੰ ਪਾਰਟੀ ਵਿੱਚ ਸ਼ਾਮਲ ਕੀਤਾ ਹੈ।
ਸੰਗਰੂਰ ਤੋਂ ਸਾਬਕਾ ਸਾਂਸਦ ਰਾਜਦੇਵ ਸਿੰਘ ਖਾਲਸਾ ਅਤੇ ਸਾਬਕਾ ਅਕਾਲੀ ਵਿਧਾਇਕ ਗੁਰਤੇਜ ਸਿੰਘ ਘੁੜਿਆਣਾ ਵੀ ਬੀਜੇਪੀ ਵਿੱਚ ਸ਼ਾਮਲ ਹੋਏ ਹਨ।
ਹਲਕੇ ਤੋਂ ਭਰਾ ਪ੍ਰਤਾਪ ਬਾਜਵਾ ਠੋਕ ਚੁੱਕੇ ਦਾਅਵਾ
ਦਰਅਸਲ, ਕਾਦੀਆਂ ਵਿਧਾਨ ਸਭਾ ਸੀਟ ਤੋਂ ਚੋਣ ਲੜਨ ਦਾ ਐਲਾਨ ਕਰਦੇ ਹੋਏ ਪ੍ਰਤਾਪ ਬਾਜਵਾ ਕਹਿ ਚੁੱਕੇ ਹਨ ਕਿ ਉਹਨਾਂ ਨੂੰ ਹਾਈਕਮਾਂਡ ਦਾ ਗ੍ਰੀਨ ਸਿਗਨਲ ਮਿਲ ਚੁੱਕਿਆ ਹੈ। ਉਹਨਾਂ ਕਿਹਾ ਕਿ ਹਾਈਕਮਾਂਡ ਦੀ ਵੀ ਇੱਛਾ ਹੈ ਕਿ ਮੈਂ ਪੰਜਾਬ ਵਿੱਚ ਕੰਮ ਕਰਾਂ। ਹਾਲਾਂਕਿ ਜਦੋਂ ਉਹਨਾਂ ਤੋਂ ਇਹ ਸਵਾਲ ਕੀਤਾ ਗਿਆ ਕਿ ਜੇਕਰ ਉਹ ਕਾਦੀਆਂ ਤੋਂ ਚੋਣ ਲੜਨਗੇ, ਤਾਂ ਫਤਿਹਜੰਗ ਕਿਥੇ ਜਾਣਗੇ, ਤਾਂ ਪ੍ਰਤਾਪ ਬਾਜਵਾ ਨੇ ਕਿਹਾ, “ਇਹ ਪਰਮਾਤਮਾ ਜਾਣੇ।”
ਪ੍ਰਤਾਪ ਬਾਜਵਾ ਨੇ ਕੁਝ ਦਿਨ ਪਹਿਲਾਂ ਦਿੱਲੀ ਤੋਂ ਰਵਾਨਾ ਹੋਣ ਵੇਲੇ ਗੱਡੀ ਵਿੱਚ ਬੈਠਿਆਂ ਦੀ ਆਪਣੀ ਤਸਵੀਰ ਸੋਸ਼ਲ ਮੀਡੀਆ ‘ਤੇ ਪੋਸਟ ਕੀਤੀ ਸੀ ਅਤੇ ਲਿਖਿਆ ਸੀ, “ਆਪਣੀ ਕਰਮਭੂਮੀ ਕਾਦੀਆਂ ਲਈ ਰਵਾਨਾ ਹੋ ਰਿਹਾ ਹਾਂ। ਪੰਜਾਬ ਦੀ ਸਿਆਸਤ ‘ਚ ਵਾਪਸੀ, ਜਿਥੇ ਮੇਰਾ ਦਿਲ ਵੱਸਦਾ ਹੈ।” ਕਾਦੀਆਂ ਪਹੁੰਚਣ ਦੇ ਬਾਅਦ ਤੋਂ ਉਹ ਲਗਾਤਾਰ ਪਾਰਟੀ ਵਰਕਰਾਂ ਅਤੇ ਆਮ ਲੋਕਾਂ ਨਾਲ ਚੋਣ ਮੀਟਿੰਗਾਂ ਵਿੱਚ ਰੁੱਝੇ ਹੋਏ ਹਨ।
ਸਿੱਧੂ ਨੇ ਕੀਤੀ ਸੀ ਬਾਜਵਾ ਦੇ ਹੱਕ ‘ਚ ਰੈਲੀ
ਦਿਲਚਸਪ ਹੈ ਕਿ ਕੁਝ ਹੀ ਦਿਨ ਪਹਿਲਾਂ ਪੰਜਾਬ ਕਾਂਗਰਸ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਨੇ ਫਤਿਹਜੰਗ ਬਾਜਵਾ ਦੇ ਹੱਕ ਵਿੱਚ ਵੱਡੀ ਚੋਣ ਰੈਲੀ ਨੂੰ ਸੰਬੋਧਿਤ ਕੀਤਾ ਸੀ। ਸਿੱਧੂ ਨੇ ਫਤਿਹ ਬਾਜਵਾ ਨੂੰ ਅਸਿੱਧੇ ਤੌਰ ‘ਤੇ ਕਾਂਗਰਸ ਦਾ ਉਮੀਦਵਾਰ ਦੱਸਦਿਆਂ ਉਹਨਾਂ ਨੂੰ ਚੋਣ ਜਿਤਾਉਣ ਦੀ ਹਲਕਾਵਾਸੀਆਂ ਨੂੰ ਅਪੀਲ ਕੀਤੀ ਸੀ। ਸਿੱਧੂ ਨੂੰ ਇਸ ਰੈਲੀ ਲਈ ਇੱਕ ਮੋਟਰਸਾਈਕਲਾਂ ਦੇ ਕਾਫਲੇ ‘ਚ ਲਿਆਂਦਾ ਗਿਆ, ਜਿਸ ਤੋਂ ਬਾਅਦ ਰੈਲੀ ਦੇ ਮੰਚ ਤੋਂ ਸਿੱਧੂ ਇਹ ਕਹਿੰਦੇ ਨਜ਼ਰ ਆਏ ਸਨ ਕਿ ਅਜਿਹੀ ਰੈਲੀ ਉਹਨਾਂ ਨੇ ਇੱਕ ਹਲਕੇ ਦੇ ਪੱਧਰ ‘ਤੇ ਕਦੇ ਨਹੀਂ ਵੇਖੀ।
ਭਰਾਵਾਂ ਦਾ ਕਲੇਸ਼, ਕਿੰਨਾ ਪੁਰਾਣਾ?
ਵਿਧਾਨ ਸਭਾ ਹਲਕਾ ਕਾਦੀਆਂ ਦੀ ਸਿਆਸਤ ਪੰਜਾਬ ਦੇ ਕਾਫੀ ਅਹਿਮ ਸਿਆਸੀ ਪਰਿਵਾਰ ਬਾਜਵਾ ਪਰਿਵਾਰ ਦੇ ਇਰਦ-ਗਿਰਦ ਘੁੰਮਦੀ ਹੈ। ਇੱਕ ਪਰਿਵਾਰ ਪ੍ਰਤਾਪ ਸਿੰਘ ਬਾਜਵਾ ਦਾ, ਜੋ ਮੌਜੂਦਾ ਸਮੇਂ ਵਿੱਚ ਕਾਂਗਰਸ ਦੇ ਰਾਜ ਸਭਾ ਸਾਂਸਦ ਹਨ ਅਤੇ ਦੂਜੇ ਫਤਿਹਜੰਗ ਸਿੰਘ ਬਾਜਵਾ, ਜੋ ਕਾਂਗਰਸ ਦੇ ਮੌਜੂਦਾ ਵਿਧਾਇਕ ਹਨ, ਪਰ ਹੁਣ ਬੀਜੇਪੀ ਵਿੱਚ ਸ਼ਾਮਲ ਹੋ ਚੁੱਕੇ ਹਨ।
ਕਾਦੀਆਂ ਸੀਟ ‘ਤੇ ਦੋਵੇਂ ਭਰਾਵਾਂ ਦੇ ਪਰਿਵਾਰਾਂ ਵੱਲੋਂ ਦਾਅਵੇਦਾਰੀ ਹੁੰਦੀ ਰਹੀ ਹੈ। ਸਾਲ 2012 ਵਿੱਚ ਹਾਲਾਤ ਅਜਿਹੇ ਸਨ ਕਿ ਪ੍ਰਤਾਪ ਬਾਜਵਾ 2009 ਦੀਆਂ ਲੋਕ ਸਭਾ ਚੋਣਾਂ ਵਿੱਚ ਗੁਰਦਾਸਪੁਰ ਤੋਂ ਸਾਂਸਦ ਚੁਣੇ ਜਾ ਚੁੱਕੇ ਸਨ। ਲਿਹਾਜਾ ਫਤਿਹਜੰਗ ਬਾਜਵਾ ਦਾ ਪਰਿਵਾਰ ਕਾਦੀਆਂ ਤੋਂ ਦਾਅਵੇਦਾਰੀ ਠੋਕਣ ਲੱਗਿਆ, ਪਰ ਇਸਦੇ ਉਲਟ ਟਿਕਟ ਪ੍ਰਤਾਪ ਬਾਜਵਾ ਦੀ ਪਤਨੀ ਚਰਨਜੀਤ ਕੌਰ ਬਾਜਵਾ ਨੂੰ ਦੇ ਦਿੱਤੀ ਗਈ। ਚਰਨਜੀਤ ਬਾਜਵਾ ਜੇਤੂ ਵੀ ਰਹੇ। ਹਾਲਾਂਕਿ ਉਸ ਦੌਰਾਨ ਕਾਂਗਰਸ ਦੀ ਸਰਕਾਰ ਸੱਤਾ ‘ਤੇ ਕਾਬਜ਼ ਨਹੀਂ ਹੋ ਸਕੀ। ਇਸ ਤੋਂ ਬਾਅਦ 2017 ਦੀਆਂ ਵਿਧਾਨ ਸਭਾ ਚੋਣਾਂ ਵਿੱਚ ਕਾਂਗਰਸ ਨੇ ਫਤਿਹਜੰਗ ਬਾਜਵਾ ‘ਤੇ ਦਾਅਵਾ ਖੇਡਿਆ ਅਤੇ ਬਾਜਵਾ ਨੇ ਸੀਟ ਜਿੱਤ ਕੇ ਕਾਂਗਰਸ ਦੀ ਝੋਲੀ ਪਾਈ।
ਹੁਣ 2022 ਦੀਆਂ ਚੋਣਾਂ ਵਿੱਚ ਇਹ ਸਿਆਸੀ ਖੇਡ ਪੂਰੀ ਤਰ੍ਹਾਂ ਨਾਲ ਬਦਲੀ ਨਜ਼ਰ ਆਏਗੀ। ਹੁਣ ਇਹ ਖੇਡ 2 ਕਾਂਗਰਸੀ ਭਰਾਵਾਂ ਦੇ ਪਰਿਵਾਰਾਂ ਦੀ ਨਾ ਰਹਿ ਕੇ 2 ਸਿਆਸੀ ਪਾਰਟੀਆਂ ਵਿਚਕਾਰ ਹੋਵੇਗੀ। ਜਾਹਿਰ ਹੈ ਕਿ ਫਤਿਹਜੰਗ ਬਾਜਵਾ ਕਾਦੀਆਂ ਤੋਂ ਬੀਜੇਪੀ ਦੇ ਉਮੀਦਵਾਰ ਹੋਣਗੇ, ਜਿਹਨਾਂ ਨੂੰ ਟੱਕਰ ਦੇਣ ਲਈ ਕਾਂਗਰਸ ਤੋਂ ਉਹਨਾਂ ਦੇ ਹੀ ਭਰਾ ਪ੍ਰਤਾਪ ਬਾਜਵਾ ਸਾਹਮਣੇ ਖੜ੍ਹੇ ਹੋਣਗੇ।