ਬਿਓਰੋ। ਪੰਜਾਬ ਵਿਧਾਨ ਸਭਾ ਚੋਣਾਂ ਲਈ ਆਮ ਆਦਮੀ ਪਾਰਟੀ ਨੇ 15 ਹੋਰ ਉਮੀਦਵਾਰਾਂ ਦਾ ਐਲਾਨ ਕਰ ਦਿੱਤਾ ਹੈ। ਉਮੀਦਵਾਰਾਂ ਦੀ ਇਸ 5ਵੀਂ ਸੂਚੀ ਵਿੱਚ ਪਾਰਟੀ ਨੇ ਮੁੱਖ ਮੰਤਰੀ ਦੇ ਹਲਕੇ ਚਮਕੌਰ ਸਾਹਿਬ ਤੋਂ ਵੀ ਉਮੀਦਵਾਰ ਦਾ ਨਾਂਅ ਐਲਾਨ ਦਿੱਤਾ ਹੈ। ਇਹ ਲਿਸਟ ਸਾਹਮਣੇ ਆਉਂਦੇ ਹੀ ਚਮਕੌਰ ਸਾਹਿਬ ਦੇ ਇਸ ਉਮੀਦਵਾਰ ਨੇ ਸਭ ਦਾ ਧਿਆਨ ਆਪਣੇ ਵੱਲ ਖਿੱਚ ਲਿਆ। ਜਾਹਿਰ ਹੈ ਕਿਉਂਕਿ ਇਹ ਨਾਂਅ ਮੁੱਖ ਮੰਤਰੀ ਦਾ ਆਪਣਾ ਨਾਂਅ ਵੀ ਹੈ।
ਦਰਅਸਲ, ਆਮ ਆਦਮੀ ਪਾਰਟੀ ਨੇ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਦੇ ਖਿਲਾਫ਼ ਉਹਨਾਂ ਦੇ ਹੀ ਨਾਂਅ ਵਾਲੇ ਉਮੀਦਵਾਰ ਨੂੰ ਚੋਣ ਮੈਦਾਨ ਵਿੱਚ ਉਤਾਰਿਆ ਹੈ। ਪਾਰਟੀ ਨੇ ਡਾ. ਚਰਨਜੀਤ ਸਿੰਘ ਨੂੰ ਇਥੋਂ ਟਿਕਟ ਦਿੱਤੀ ਹੈ। ਇਸ ਉਮੀਦਵਾਰ ਦਾ ਨਾਂਅ ਸਾਹਮਣੇ ਆਉਂਦੇ ਹੀ ਸਿਆਸੀ ਗਲਿਆਰਿਆਂ ਵਿੱਚ ਇਹ ਚਰਚਾ ਹੋ ਰਹੀ ਹੈ ਕਿ ‘ਆਪ’ ਨੇ ਗਫਲਤ ਪੈਦਾ ਕਰਨ ਲਈ ਇਹ ਪੈਂਤਰਾ ਅਜ਼ਮਾਇਆ ਹੈ, ਤਾਂ ਜੋ ਸੀਐੱਮ ਚੰਨੀ ਦੀ ਵੋਟ ਕੱਟੀ ਜਾ ਸਕੇ।
ਚਮਕੌਰ ਸਾਹਿਬ ਤੋਂ ਇਲਾਵਾ ਪਾਰਟੀ ਨੇ ਜਿਹਨਾਂ 14 ਸੀਟਾਂ ‘ਤੇ ਆਪਣੇ ਉਮੀਦਵਾਰਾਂ ਦਾ ਐਲਾਨ ਕੀਤਾ ਹੈ, ਉਹ ਇਸ ਤਰ੍ਹਾਂ ਹਨ:-
ਡੇਰਾ ਬਾਬਾ ਨਾਨਕ- ਗੁਰਦੀਪ ਸਿੰਘ ਰੰਧਾਵਾ
ਰਾਜਾਸਾਂਸੀ- ਬਲਦੇਵ ਸਿੰਘ ਮਿਆਦੀਆ
ਕਪੂਰਥਲਾ- ਮੰਜੂ ਰਾਣਾ
ਸ਼ਾਹਕੋਟ- ਰਤਨ ਸਿੰਘ ਕਾਕੜਕਲਾਂ
ਜਲੰਧਰ ਪੱਛਮੀ- ਸ਼ੀਤਲ ਅੰਗੁਰਾਲ
ਆਦਮਪੁਰ- ਜੀਤ ਲਾਲ ਭੱਟੀ
ਬੰਗਾ- ਕੁਲਜੀਤ ਸਿੰਘ ਸਰਹਾਲ
ਮੋਹਾਲੀ- ਕੁਲਵੰਤ ਸਿੰਘ
ਬੱਸੀ ਪਠਾਣਾ- ਰੁਪਿੰਦਰ ਕੌਰ ਹੈਪੀ
ਲੁਧਿਆਣਾ ਦੱਖਣੀ- ਰਜਿੰਦਰਪਾਲ ਕੌਰ ਛੀਨਾ
ਫਿਰੋਜ਼ਪੁਰ ਸ਼ਹਿਰੀ- ਰਣਵੀਰ ਸਿੰਘ ਭੁੱਲਰ
ਬਠਿੰਡਾ ਸ਼ਹਿਰੀ- ਜਗਰੂਪ ਸਿੰਘ ਗਿੱਲ
ਅਮਰਗੜ੍ਹ- ਜਸਵੰਤ ਸਿੰਘ ਗੱਜਣਮਾਜਰਾ
ਨਾਭਾ- ਗੁਰਦੇਵ ਸਿੰਘ ਦੇਵ ਮਾਨ
…ਤਾਂ ਕੀ ਇਕੱਲਿਆਂ ਲੜੇਗੀ ‘ਆਪ’ ?
5ਵੀਂ ਲਿਸਟ ਦੇ ਨਾਲ ਹੀ ਆਮ ਆਦਮੀ ਪਾਰਟੀ ਹੁਣ ਤੱਕ 88 ਸੀਟਾਂ ‘ਤੇ ਆਪਣੇ ਉਮੀਦਵਾਰ ਐਲਾਨ ਚੁੱਕੀ ਹੈ। ਪਾਰਟੀ ਵੱਲੋਂ ਤੇਜੀ ਨਾਲ ਟਿਕਟਾਂ ਦੇ ਐਲਾਨ ਕਰਨ ਦੇ ਚਲਦੇ ਕਈ ਤਰ੍ਹਾਂ ਦੀਆਂ ਚਰਚਾਵਾਂ ਹਨ। ਦਰਅਸਲ, ਖ਼ਬਰਾਂ ਹਨ ਕਿ ਕਿਸਾਨ ਜਥੇਬੰਦੀਆਂ ਵੱਲੋਂ ਬਣਾਏ ਗਏ ਸੰਯੁਕਤ ਸਮਾਜ ਮੋਰਚੇ ਦੇ ‘ਆਪ’ ਨਾਲ ਗਠਜੋੜ ਦੀ ਚਰਚਾ ਚੱਲ ਰਹੀ ਹੈ। ਪਕਰ ਜਿਸ ਤੇਜੀ ਨਾਲ ਪਾਰਟੀ ਵੱਲੋਂ ਟਿਕਟਾਂ ਦਾ ਐਲਾਨ ਕੀਤਾ ਜਾ ਰਿਹਾ ਹੈ, ਉਸ ਤੋਂ ਗਠਜੋੜ ਦੀ ਉਮੀਦ ਘੱਟ ਹੀ ਹੈ।
