ਬਿਓਰੋ। ਪੰਜਾਬ ਵਿੱਚ ਵਿਧਾਨ ਸਭਾ ਚੋਣਾਂ ਦਾ ਬਿਗੁਲ ਵੱਜਣ ਵਾਲਾ ਹੈ। ਸਿਆਸੀ ਅਖਾੜੇ ਵਿੱਚ ਤਮਾਮ ਦਿੱਗਜਾਂ ਨੇ ਆਪਣੀ ਪੂਰੀ ਵਾਹ ਲਗਾਈ ਹੋਈ ਹੈ। ਕਾਂਗਰਸ ਦੇ ਸਿਆਸੀ ਸੂਰਮੇ ਵੀ ਮੈਦਾਨ ਵਿੱਚ ਹਨ, ਪਰ ਪਾਰਟੀ ਦਾ ਝਗੜਾ ਕਾਂਗਰਸ ਦੀ ਚੋਣ ਮੁਹਿੰਮ ਨੂੰ ਸਿੱਧੇ ਤੌਰ ‘ਤੇ ਪ੍ਰਭਾਵਿਤ ਕਰਦਾ ਨਜ਼ਰ ਆ ਰਿਹਾ ਹੈ। ਝਗੜੇ ਦੇ ਕੇਂਦਰ ਵਿੱਚ ਕੋਈ ਹੋਰ ਨਹੀਂ, ਬਲਕਿ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਹਨ।
ਦਰਅਸਲ, ਸਿੱਧੂ CM ਚੰਨੀ ਤੋਂ ਵੱਧ ਆਪਣੀਆਂ ਚੋਣ ਮੀਟਿੰਗਾਂ ਕਰ ਰਹੇ ਹਨ। ਉਹ ਜਿਥੇ ਜਾਂਦੇ ਹਨ, ਪੰਜਾਬ ਲਈ ਆਪਣਾ ਮਾਡਲ ਪੇਸ਼ ਕਰਦੇ ਹੋਏ ਖੁਦ ਨੂੰ ਸੀਐੱਮ ਫੇਸ ਦੇ ਤੌਰ ‘ਤੇ ਪ੍ਰੋਜੈਕਟ ਕਰਦੇ ਹਨ। ਕਈ ਹਲਕਿਆਂ ਵਿੱਚ ਤਾਂ ਉਹ ਕਾਂਗਰਸੀ ਆਗੂਆਂ ਨੂੰ ਪਾਰਟੀ ਦਾ ਉਮੀਦਵਾਰ ਤੱਕ ਐਲਾਨ ਰਹੇ ਹਨ। ਇੰਨਾ ਹੀ ਨਹੀਂ, ਸਿੱਧੂ ਬੇਅਦਬੀ ਤੋਂ ਲੈ ਕੇ ਡਰੱਗਜ਼ ਕੇਸ ਵਿੱਚ ਆਪਣੀ ਹੀ ਸਰਕਾਰ ਨੂੰ ਘੇਰਨ ਤੋਂ ਪਿੱਛੇ ਨਹੀਂ ਹਟਦੇ। ਖਾਸ ਤੌਰ ‘ਤੇ ਬਿਕਰਮ ਮਜੀਠੀਆ ਦਾ ਮੁੱਦਾ ਉਹ ਲਗਭਗ ਆਪਣੀ ਹਰ ਰੈਲੀ ਵਿੱਚ ਚੁੱਕਦੇ ਹਨ ਤੇ ਮਜੀਠੀਆ ਖਿਲਾਫ਼ ਕੇਸ ਦਰਜ ਹੋਣ ਦਾ ਕ੍ਰੈਡਿਟ ਖੁਦ ਨੂੰ ਦਿੰਦੇ ਹਨ। ਹਾਲਾਂਕਿ ਗ੍ਰਿਫ਼ਤਾਰੀ ਨਾ ਹੋਣ ਦਾ ਠੀਕਰਾ ਸਰਕਾਰ ‘ਤੇ ਭੰਨਦੇ ਹੋਏ ਸੀਐੱਮ ਅਤੇ ਗ੍ਰਹਿ ਮੰਤਰੀ ਨੂੰ ਕਟਹਿਰੇ ਵਿੱਚ ਖੜ੍ਹਾ ਕਰਦੇ ਹਨ।
ਸਿੱਧੂ ਦੀ ਇਸ ਬਿਆਨਬਾਜੀ ਤੋਂ ਪਾਰਟੀ ਵਿੱਚ ਇੱਕ ਵੱਡਾ ਤਬਕਾ ਨਰਾਜ਼ ਹੈ। ਸੀਐੱਮ ਸਣੇ ਵਧੇਰੇਤਰ ਮੰਤਰੀ ਸਿੱਧੂ ਦੇ ਖਿਲਾਫ਼ ਦੱਸੇ ਜਾ ਰਹੇ ਹਨ। ਇਥੋਂ ਤੱਕ ਕਿ ਕਈ ਮੰਤਰੀ ਅਤੇ ਸੀਨੀਅਰ ਆਗੂਆਂ ਨੇ ਤਾਂ ਹੁਣ ਖੁੱਲ੍ਹ ਕੇ ਸਿੱਧੂ ਦੇ ਖਿਲਾਫ਼ ਬੋਲਣਾ ਸ਼ੁਰੂ ਕਰ ਦਿੱਤਾ ਹੈ।
ਹੁਣ ਤੁਹਾਨੂੰ ਸਿਲਸਿਲੇਵਾਰ ਦੱਸਦੇ ਹਾਂ ਕਿ ਹੁਣ ਤੱਕ ਕੌਣ-ਕੌਣ ਸਿੱਧੂ ‘ਤੇ ਸਿੱਧੇ ਵਾਰ ਕਰ ਚੁੱਕਿਆ ਹੈ:-
- ਸੁਖਜਿੰਦਰ ਸਿੰਘ ਰੰਧਾਵਾ, ਕੈਬਨਿਟ ਮੰਤਰੀ
ਮਜੀਠੀਆ ਕੇਸ ਦੇ ਬਹਾਨੇ ਸਿੱਧੂ ਦੇ ਨਿਸ਼ਾਨੇ ‘ਤੇ ਸਭ ਤੋਂ ਵੱਧ ਗ੍ਰਹਿ ਵਿਭਾਗ ਦਾ ਜਿੰਮਾ ਸੰਭਾਲ ਰਹੇ ਸੁਖਜਿੰਦਰ ਸਿੰਘ ਰੰਧਾਵਾ ਰਹਿੰਦੇ ਹਨ। ਸਿੱਧੂ ਇੱਥੋਂ ਤੱਕ ਕਹਿੰਦੇ ਹਨ ਕਿ ਜੇਕਰ ਗ੍ਰਹਿ ਮੰਤਰਾਲਾ ਉਨ੍ਹਾਂ ਦੇ ਕੋਲ ਹੁੰਦਾ, ਤਾਂ ਉਹ 24 ਘੰਟਿਆਂ ਵਿੱਚ ਮਜੀਠੀਆ ਨੂੰ ਅੰਦਰ ਕਰ ਦਿੰਦੇ। ਹੁਣ ਰੰਧਾਵਾ ਨੇ ਸਿੱਧੂ ਦੀ ਇਸ ਬਿਆਨਬਾਜ਼ੀ ‘ਤੇ ਕਰਾਰਾ ਜਵਾਬ ਦਿੱਤਾ ਹੈ।
ਰੰਧਾਵਾ ਨੇ ਕਿਹਾ, “ਮਜੀਠੀਆ ਖਿਲਾਫ਼ ਡਰੱਗ ਕੇਸ ਕਾਨੂੰਨ ਦੇ ਮੁਤਾਬਕ ਹੋਇਆ ਹੈ। ਸਿੱਧੂ ਇਸ ਦੇ ਬਾਰੇ ਜੋ ਬਿਆਨ ਦੇ ਰਹੇ ਹਨ ਕਿ ਮੈਂ ਕਰਵਾ ਦਿੱਤਾ, ਇਸ ਨਾਲ ਬਦਲਾਖੋਰੀ ਦਾ ਮੈਸੇਜ ਜਾ ਰਿਹਾ ਹੈ। ਮੈਂ ਸਿੱਧੂ ਨੂੰ ਗੁਜ਼ਾਰਿਸ਼ ਕਰਦਾ ਹਾਂ ਕਿ ਪੰਜਾਬ ਦੇ ਲੋਕਾਂ ਨੂੰ ਇਨਸਾਫ਼ ਲੈਣ ਦੇਣ।“ ਰੰਧਾਵਾ ਨੇ ਕਿਹਾ, “ਜਦੋਂ ਤੋਂ ਮੈਨੂੰ ਗ੍ਰਹਿ ਮੰਤਰਾਲਾ ਮਿਲਿਆ ਹੈ, ਸਿੱਧੂ ਨਰਾਜ਼ ਚੱਲ ਰਹੇ ਹਨ। ਇਸ ਲਈ ਮੈਂ ਉਸ ਨੂੰ ਛੱਡਣ ਤੱਕ ਲਈ ਤਿਆਰ ਹਾਂ।“
ਰੰਧਾਵਾ ਨੇ ਕਿਹਾ ਕਿ ਸਿੱਧੂ ਓਵਰ ਐਂਬੀਸ਼ੀਅਸ ਹਨ। ਪਤਾ ਨਹੀਂ ਉਨ੍ਹਾਂ ਦੇ ਦਿਲ ਵਿੱਚ ਕੀ ਹੈ। ਰੰਧਾਵਾ ਨੇ ਸਿੱਧੂ ਨੂੰ ਕਾਂਗਰਸ ਦਾ ਕਲਚਰ ਤੱਕ ਸਿੱਖਣ ਦੀ ਸਲਾਹ ਦੇ ਦਿੱਤੀ। - ਭਾਰਤ ਭੂਸ਼ਣ ਆਸ਼ੂ, ਕੈਬਨਿਟ ਮੰਤਰੀ
ਕੈਬਨਿਟ ਮੰਤਰੀ ਭਾਰਤ ਭੂਸ਼ਣ ਆਸ਼ੂ ਵੀ ਸਿੱਧੂ ‘ਤੇ ਡਾਇਰੈਕਟ ਅਟੈਕ ਕਰ ਚੁੱਕੇ ਹਨ। ਆਸ਼ੂ ਨੇ ਕਿਹਾ, “ਸੀਐੱਮ ਅਤੇ ਮੰਤਰੀ 18-18 ਘੰਟੇ ਕੰਮ ਕਰ ਰਹੇ ਹਨ। ਤਿੰਨ ਮਹੀਨਿਆਂ ਵਿੱਚ ਉਹ ਕੰਮ ਹੋਏ, ਜੋ ਪਿਛਲੇ ਸਾਢੇ 4 ਸਾਲਾਂ ਵਿੱਚ ਨਹੀਂ ਹੋ ਸਕੇ। ਇਸ ਦੇ ਬਾਵਜੂਦ ਸਿੱਧੂ ਵਿਪਰੀਤ ਬਿਆਨਬਾਜ਼ੀ ਕਰ ਰਹੇ ਹਨ, ਜਿਸ ਨਾਲ ਸਰਕਾਰ ਦੀ ਹਰ ਕੋਸ਼ਿਸ਼ ਬਰਬਾਦ ਹੋ ਰਹੀ ਹੈ।“ ਉਨ੍ਹਾਂ ਇਥੋਂ ਤੱਕ ਕਿਹਾ ਕਿ ਜੇਕਰ ਕਾਂਗਰਸ ਵਿੱਚ ਸਭ ਠੀਕ ਨਹੀਂ ਹੈ ਤਾਂ ਸਿੱਧੂ ਨੂੰ ਪਾਰਟੀ ਛੱਡ ਦੇਣੀ ਚਾਹੀਦੀ ਹੈ। ਆਸ਼ੂ ਨੇ ਕਾਂਗਰਸ ਹਾਈਕਮਾਂਡ ਤੋਂ ਵੀ ਮੰਗ ਕੀਤੀ ਕਿ ਉਹ ਸਿੱਧੂ ਨੂੰ ਅਨੁਸ਼ਾਸਤ ਕਰਨ। ਉਹਨਾਂ ਕਿਹਾ ਕਿ ਪੰਜਾਬ ਵਿੱਚ ਸਿੱਧੂ ਮਾਡਲ ਨਹੀਂ, ਕਾਂਗਰਸ ਮਾਡਲ ਚੱਲੇਗਾ। - ਰਾਣਾ ਗੁਰਜੀਤ ਸਿੰਘ, ਕੈਬਨਿਟ ਮੰਤਰੀ
ਨਵਜੋਤ ਸਿੰਘ ਸਿੱਧੂ ਨੂੰ ਲੈ ਕੇ ਕੈਬਨਿਟ ਮੰਤਰੀ ਰਾਣਾ ਗੁਰਜੀਤ ਸਿੰਘ ਵੀ ਬੇਹੱਦ ਤਲਖ ਹਨ। ਦਰਅਸਲ, ਇਸ ਵਾਰ ਰਾਣਾ ਗੁਰਜੀਤ ਸਿੰਘ ਸੁਲਤਾਨਪੁਰ ਲੋਧੀ ਤੋਂ ਚੋਣ ਲੜਨ ਦੀ ਤਿਆਰੀ ਕਰ ਰਹੇ ਹਨ, ਪਰ ਪਿਛਲੇ ਦਿਨੀਂ ਸਿੱਧੂ ਨੇ ਸੁਲਤਾਨਪੁਰ ਲੋਧੀ ਵਿੱਚ ਪਹਿਲੀ ਵਾਰ ਰਾਣਾ ਗੁਰਜੀਤ ਦੇ ਧੁਰ ਵਿਰੋਧੀ ਨਵਤੇਜ ਚੀਮਾ ਦਾ ਸਮਰਥਨ ਕੀਤਾ ਅਤੇ ਉਨ੍ਹਾਂ ਦੀ ਉਮੀਦਵਾਰੀ ਦਾ ਵੀ ਐਲਾਨ ਕਰ ਦਿੱਤਾ। ਨਾਲ ਹੀ ਰਾਣਾ ਗੁਰਜੀਤ ‘ਤੇ ਵੀ ਇਸ਼ਾਰਿਆਂ-ਇਸ਼ਾਰਿਆਂ ਵਿੱਚ ਹਮਲਾ ਕੀਤਾ। ਇਸ ‘ਤੇ ਰਾਣਾ ਗੁਰਜੀਤ ਭੜਕ ਗਏ ਅਤੇ ਉਨ੍ਹਾਂ ਨੇ ਸਿੱਧੂ ਨੂੰ ਭਾੜੇ ਦਾ ਲੀਡਰ ਤੱਕ ਕਹਿ ਦਿੱਤਾ। ਉਨ੍ਹਾਂ ਕਿਹਾ ਕਿ ਸਿੱਧੂ ਸਿਰਫ਼ ਸੀਐੱਮ ਬਣਨ ਲਈ ਕਾਂਗਰਸ ਵਿੱਚ ਹਨ। ਰਾਣਾ ਗੁਰਜੀਤ ਨੇ ਕਿਹਾ ਕਿ ਉਹ ਜਨਮ ਜਾਤ ਕਾਂਗਰਸੀ ਹਨ ਅਤੇ ਉਨ੍ਹਾਂ ਨੂੰ ਸਿੱਧੂ ਵਰਗੇ ਲੀਡਰਾਂ ਦੇ ਗਿਆਨ ਦੀ ਲੋੜ ਨਹੀਂ ਹੈ। ਰਾਣਾ ਗੁਰਜੀਤ ਨੇ ਇੱਥੋਂ ਤੱਕ ਕਿਹਾ ਕਿ ਸਿੱਧੂ ਜਿੰਨੀ ਜਲਦੀ ਪਾਰਟੀ ਛੱਡ ਦੇਣ, ਚੰਗਾ ਹੋਵੇਗਾ। - ਤ੍ਰਿਪਤ ਰਜਿੰਦਰ ਸਿੰਘ ਬਾਜਵਾ, ਕੈਬਨਿਟ ਮੰਤਰੀ
ਕੈਬਨਿਟ ਮੰਤਰੀ ਤ੍ਰਿਪਤ ਰਜਿੰਦਰ ਸਿੰਘ ਬਾਜਵਾ ਵੀ ਇਸ ਵਾਰ ਫ਼ਤਿਹਗੜ੍ਹ ਚੂੜੀਆਂ ਦੀ ਜਗ੍ਹਾ ਬਟਾਲਾ ਤੋਂ ਚੋਣ ਲੜਨਾ ਚਾਹੁੰਦੇ ਹਨ, ਪਰ ਸਿੱਧੂ ਨੇ ਬਟਾਲਾ ਵਿੱਚ ਰੈਲੀ ਕਰਕੇ ਨਾ ਸਿਰਫ ਬਾਜਵਾ ਦੇ ਧੁਰ ਵਿਰੋਧੀ ਅਸ਼ਵਨੀ ਸੇਖੜੀ ਨੂੰ ਥਾਪੜਾ ਦਿੱਤਾ ਬਲਕਿ ਇਹ ਵੀ ਕਹਿ ਦਿੱਤਾ ਕਿ ਉਹ ਬਟਾਲਾ ਵਿੱਚ ਕਿਸੇ ਪੈਰਾਸ਼ੂਟ ਉਮੀਦਵਾਰ ਨੂੰ ਨਹੀਂ ਉਤਰਨ ਦੇਣਗੇ। ਸਿੱਧੂ ਦੇ ਇਸ ਬਿਆਨ ਨਾਲ ਤ੍ਰਿਪਤ ਬਾਜਵਾ ਨਰਾਜ਼ ਹਨ। ਹਾਲਾਂਕਿ ਉਨ੍ਹਾਂ ਨੇ ਖੁੱਲ੍ਹ ਕੇ ਮੀਡੀਆ ਵਿੱਚ ਤਾਂ ਕੋਈ ਬਿਆਨ ਨਹੀਂ ਦਿੱਤਾ, ਪਰ ਸੂਤਰਾਂ ਦੀ ਮੰਨੀਏ ਤਾਂ ਬਾਜਵਾ ਇਸ ਨੂੰ ਲੈ ਕੇ ਕਾਂਗਰਸ ਇੰਚਾਰਜ ਹਰੀਸ਼ ਚੌਧਰੀ ਨੂੰ ਸਿੱਧੂ ਦੀ ਸ਼ਿਕਾਇਤ ਵੀ ਕਰ ਚੁੱਕੇ ਹਨ। - ਸੁਨੀਲ ਜਾਖੜ, ਸਾਬਕਾ ਪ੍ਰਧਾਨ, ਪੰਜਾਬ ਕਾਂਗਰਸ
ਸਿੱਧੂ ਦੇ ਖਿਲਾਫ਼ ਮੋਰਚਾ ਖੋਲ੍ਹਣ ਵਾਲੇ ਲੀਡਰਾਂ ਵਿੱਚ ਸੁਨੀਲ ਜਾਖੜ ਵੀ ਸ਼ੁਮਾਰ ਹਨ। ਸਿੱਧੂ ਦੇ ਤੌਰ-ਤਰੀਕਿਆਂ ਦਾ ਜਾਖੜ ਪਾਰਟੀ ਹਾਈਕਮਾਂਡ ਦੇ ਸਾਹਮਣੇ ਵਿਰੋਧ ਜਤਾ ਚੁੱਕੇ ਹਨ। ਪਿਛਲੇ ਦਿਨੀਂ ਸਿੱਧੂ ਨੇ ਸੀਐੱਮ ਫੇਸ ਐਲਾਨੇ ਜਾਣ ਦੀ ਵਕਾਲਤ ਕੀਤੀ, ਤਾਂ ਸਭ ਤੋਂ ਪਹਿਲਾਂ ਜਾਖੜ ਨੇ ਇਸ ਦਾ ਵਿਰੋਧ ਕੀਤਾ ਅਤੇ ਕਹਿ ਦਿੱਤਾ ਕਿ ਕਾਂਗਰਸ ਵਿਚ ਅਜਿਹੀ ਕੋਈ ਪ੍ਰਥਾ ਨਹੀਂ ਹੈ। ਚੋਣਾਂ ਤੋਂ ਬਾਅਦ ਵਿਧਾਇਕ ਸੀਐੱਮ ਦਾ ਫੈਸਲਾ ਕਰਨਗੇ। - ਰਵਨੀਤ ਬਿੱਟੂ, ਕਾਂਗਰਸੀ ਸਾਂਸਦ
ਲੁਧਿਆਣਾ ਤੋਂ ਕਾਂਗਰਸੀ ਸਾਂਸਦ ਰਵਨੀਤ ਬਿੱਟੂ ਵੀ ਸਿੱਧੂ ਤੋਂ ਨਾਰਾਜ਼ ਹਨ। ਪਿਛਲੇ ਦਿਨੀਂ ਬਿੱਟੂ ਨੇ ਸਿੱਧੂ ਦੇ ਪੰਜਾਬ ਮਾਡਲ ਦਾ ਸਵਾਲ ਚੁੱਕਦੇ ਹੋਏ ਕਿਹਾ ਸੀ ਕਿ ਉਹ ਕਿਹੜੇ ਮਾਡਲ ਦੀ ਗੱਲ ਕਰਦੇ ਹਨ। ਉਹ ਕਈ ਵਾਰ ਅੰਮ੍ਰਿਤਸਰ ਤੋਂ ਸਾਂਸਦ ਅਤੇ ਵਿਧਾਇਕ ਰਹੇ, ਪਰ ਕੀ ਉਹਨਾਂ ਨੇ ਕਦੇ ਇਸ ਮਾਡਲ ਦੀ ਝਲਕ ਉਥੋਂ ਦੇ ਲੋਕਾਂ ਨੂੰ ਵਿਖਾਈ? ਬਿੱਟੂ ਨੇ ਕਿਹਾ, “ਲਗਦਾ ਹੈ ਸਿਧੂ ਦਾ ਮਕਸਦ ਸਿਰਫ਼ ਸੀਐੱਮ ਬਣਨਾ ਹੈ।“ - ਕੁਲਬੀਰ ਜੀਰਾ, ਕਾਂਗਰਸੀ ਵਿਧਾਇਕ
ਸਿੱਧੂ ਖਿਲਾਫ਼ ਨਾ ਸਿਰਫ ਵੱਡੇ ਆਗੂ, ਬਲਕਿ ਕਾਂਗਰਸ ਦੇ ਕਈ ਵਿਧਾਇਕ ਵੀ ਹਮਲਾਵਰ ਹਨ। ਹਮੇਸ਼ਾ ਸਿੱਧੂ ਦੇ ਨਾਲ ਨਜ਼ਰ ਆਉਣ ਵਾਲੇ ਕਾਂਗਰਸੀ ਵਿਧਾਇਕ ਕੁਲਬੀਰ ਜ਼ੀਰਾ ਵੀ ਪਿਛਲੇ ਦਿਨੀਂ ਸਿੱਧੂ ‘ਤੇ ਭੜਕ ਗਏ। ਸਿੱਧੂ ਵੱਲੋਂ ਮਜੀਠੀਆ ‘ਤੇ ਦਰਜ ਕੇਸ ਦਾ ਕ੍ਰੈਡਿਟ ਦੇਣ ‘ਤੇ ਕੁਲਬੀਰ ਜ਼ੀਰਾ ਨੇ ਕਿਹਾ, “ਸਿੱਧੂ ਕੌਣ ਹਨ? ਕੀ ਉਹ ਸੀਐੱਮ ਹਨ? ਗ੍ਰਹਿ ਮੰਤਰੀ ਹਨ? ਜਾਂ DGP ਲੱਗੇ ਹਨ? ਮਜੀਠੀਆ ‘ਤੇ ਕਾਰਵਾਈ ਸਰਕਾਰ ਕਿਸੇ ਦੇ ਕਹਿਣ ‘ਤੇ ਨਹੀਂ, ਕਾਨੂੰਨ ਦੇ ਮੁਤਾਬਕ ਆ ਰਹੀ ਹੈ।“
ਚਾਰ ਮਹੀਨਿਆਂ ‘ਚ ਹੀ ਬਦਲ ਗਈ ਤਸਵੀਰ
4 ਮਹੀਨੇ ਪਹਿਲਾਂ ਤੱਕ ਜਦੋਂ ਕੈਪਟਨ ਪੰਜਾਬ ਦੇ ਸੀਐੱਮ ਸਨ ਤੇ ਸਿੱਧੂ ਪੰਜਾਬ ਕਾਂਗਰਸ ਦੇ ਪ੍ਰਧਾਨ, ਤਾਂ ਕਾਂਗਰਸ ਦਾ ਵੱਡਾ ਤਬਕਾ ਸਿੱਧੂ ਦੇ ਨਾਲ ਸੀ। ਪਰ ਸੀਐੱਮ ਬਦਲਣ ਦੇ ਨਾਲ ਹੀ ਸਮੀਕਰਨ ਵੀ ਬਦਲ ਗਏ। ਇੱਥੋਂ ਤੱਕ ਕਿ ਨਵੇਂ ਸੀਐੱਮ ਚਰਨਜੀਤ ਸਿੰਘ ਚੰਨੀ ਦੇ ਨਾਲ ਵੀ ਸਿੱਧੂ ਦੀ ਜਿਆਦਾ ਨਹੀਂ ਬਣੀ। 2 ਦਿਨ ਤੱਕ ਸਿੱਧੂ-ਚੰਨੀ ਨਾਲ-ਨਾਲ ਰਹੇ, ਪਰ ਫੇਰ ਰਾਹਾਂ ਵੱਖ-ਵੱਖ ਹੋ ਗਈਆਂ। ਇਸ ਤੋਂ ਬਾਅਦ ਦੋਵੇਂ ਇੱਕ ਟ੍ਰੈਕ ‘ਤੇ ਨਜ਼ਰ ਨਹੀਂ ਆਏ। ਸੀਐੱਮ ਤੋਂ ਇਲਾਵਾ ਸਿੱਧੂ ਦੀ ਤਮਾਮ ਵੱਡੇ ਆਗੂਆਂ ਦੇ ਨਾਲ ਵੀ ਵਿਗੜਦੀ ਚਲੀ ਗਈ ਅਤੇ ਹੁਣ ਹਾਲਾਤ ਇਹ ਹਨ ਕਿ ਜਿਨ੍ਹਾਂ ਨੇ ਸਿੱਧੂ ਦੀ ਅਗਵਾਈ ਵਿੱਚ ਕੈਪਟਨ ਦਾ ਤਖ਼ਤਾਪਲਟ ਕੀਤਾ, ਉਹ ਹੁਣ ਸਿੱਧੂ ਦੇ ਖ਼ਿਲਾਫ਼ ਮੋਰਚਾ ਖੋਲ੍ਹ ਚੁੱਕੇ ਹਨ।
