ਚੰਡੀਗੜ੍ਹ। ਪੰਜਾਬ ਵਿੱਚ ਚੋਣਾਂ ਲਈ ਮਹਿਜ਼ ਕੁਝ ਦਿਨ ਬਚੇ ਹਨ, ਪਰ ਕਾਂਗਰਸ ਦੇ ਦਿੱਗਜ ਅਜੇ ਵੀ ਵੱਖੋ-ਵੱਖਰੇ ਰਾਹ ‘ਤੇ ਹਨ। ਪੰਜਾਬ ਕਾਂਗਰਸ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਨੇ ਮੰਗਲਵਾਰ ਨੂੰ ਪਾਰਟੀ ਦੇ ਚੋਣ ਮੈਨੀਫੈਸਟੋ ਤੋਂ ਪਹਿਲਾਂ ਹੀ ਚੰਡੀਗੜ੍ਹ ਵਿੱਚ ਆਪਣਾ ਪੰਜਾਬ ਮਾਡਲ ਲਾਂਚ ਕਰ ਦਿੱਤਾ।
ਸਿੱਧੂ ਨੇ ਸਾਫ਼ ਕਿਹਾ ਕਿ ਇਸੇ ‘ਤੇ ਉਨ੍ਹਾਂ ਦਾ ਸਿਆਸੀ ਭਵਿੱਖ ਨਿਰਭਰ ਹੈ। ਇਸ ਨਾਲ ਉਹ ਕੋਈ ਸਮਝੌਤਾ ਨਹੀਂ ਕਰਨਗੇ। ਸਿੱਧੂ ਨੇ ਇਥੋਂ ਤੱਕ ਕਿਹਾ ਕਿ ਪੰਜਾਬ ਦਾ ਸੀਐੱਮ ਕਾਂਗਰਸ ਹਾਈਕਮਾਂਡ ਨਹੀਂ, ਬਲਕਿ ਲੋਕ ਤੈਅ ਕਰਨਗੇ।
ਖਾਸ ਗੱਲ ਇਹ ਵੀ ਹੈ ਕਿ ਸਿੱਧੂ ਦੇ ਪੰਜਾਬ ਮਾਡਲ ਵਾਲੇ ਪੋਸਟਰ ਤੋਂ ਸੀਐੱਮ ਚਰਨਜੀਤ ਸਿੰਘ ਚੰਨੀ ਦੀ ਫੋਟੋ ਗਾਇਬ ਰਹੀ। ਸਿੱਧੂ ਤੋਂ ਇਲਾਵਾ ਸਿਰਫ ਸੋਨੀਆ, ਰਾਹੁਲ ਅਤੇ ਪ੍ਰਿਅੰਕਾ ਗਾਂਧੀ ਹੀ ਇਸ ਵਿੱਚ ਨਜ਼ਰ ਆ ਰਹੇ ਹਨ।
ਸਿੱਧੂ ਦੇ ‘ਪੰਜਾਬ ਮਾਡਲ’ ‘ਚ ਕੀ?
ਪੰਜਾਬ ਸਟੇਟ ਲੀਕਰ ਕਾਰਪੋਰੇਸ਼ਨ- ਸਿੱਧੂ ਨੇ ਕਿਹਾ ਕਿ ਸ਼ਰਾਬ GST ਤੋਂ ਬਾਹਰ ਹੈ। ਉਸ ‘ਤੇ ਵੈਟ ਲਗਾਉਣ ਵਾਲੇ ਵੱਧ ਪੈਸੇ ਕਮਾ ਰਹੇ ਹਨ। ਇਸਦੀ ਮਿਸਾਲ 37 ਹਜ਼ਾਰ ਕਰੋੜ ਕਮਾਈ ਕਰ ਰਿਹਾ ਤਮਿਲਨਾਡੂ ਹੈ, ਜਦਕਿ ਉਸਦੀ ਖਪਤ ਪੰਜਾਬ ਤੋਂ ਵੀ ਅੱਧੀ ਹੈ। ਇਹ ਕਾਰਪੋਰੇਸ਼ਨ ਐਕਸਾਈਜ਼ ਲੀਕੇਜ ਰੋਕੇਗਾ ਅਤੇ ਗੈਰ ਕਨੂੰਨੀ ਵਿਕਰੀ ਬੰਦ ਹੋਵੇਗੀ। ਸ਼ਰਾਬ ਵੈਟ ਦੇ ਦਾਇਰੇ ਵਿੱਚ ਲਿਆਂਦੀ ਜਾਵੇਗੀ ਅਤੇ ਸ਼ਰਾਬ ਦੇ ਸਰਕਾਰੀ ਠੇਕੇ ਖੁੱਲ੍ਹਣਗੇ।
ਪੰਜਾਬ ਸਟੇਟ ਰੇਤ ਮਾਈਨਿੰਗ ਕਾਰਪੋਰੇਸ਼ਨ- ਸਿੱਧੂ ਨੇ ਕਿਹਾ ਕਿ 14 ਜ਼ਿਲ੍ਹਿਆਂ ਵਿੱਚ 102 ਮਾਈਨਿੰਗ ਸਾਈਟ ਹਨ। ਸਰਕਾਰ ਖੁਦ ਰੇਤ ਮਾਈਨਿੰਗ ਕਰਕੇ ਵੇਚੇਗੀ। ਤੇਲੰਗਾਨਾ ਮਾਡਲ ‘ਤੇ ਕੰਮ ਹੋਵੇਗਾ। ਇਸ ਨਾਲ ਤਿੰਨ ਹਜ਼ਾਰ ਕਰੋੜ ਦੀ ਇਨਕਮ ਹੋਵੇਗੀ। ਟਰੱਕਾਂ ‘ਤੇ ਚਿਪਸ ਲੱਗਣਗੇ। ਇਸਦਾ ਐਨੁਅਲ ਆਡਿਟ ਹੋਵੇਗਾ। ਤਿੰਨ ਹਜ਼ਾਰ ਕਰੋੜ ਦੀ ਇਨਕਮ ਹੋਵੇਗੀ। 5 ਹਜ਼ਾਰ ਲੋਕਾਂ ਨੂੰ ਡਾਇਰੈਕਟ ਅਤੇ 15 ਤੋਂ 20 ਹਜ਼ਾਰ ਨੂੰ ਇਨਡਾਇਰੈਕਟ ਜੌਬ ਮਿਲੇਗੀ।
ਪੰਜਾਬ ਸਟੇਟ ਕੇਬਲ ਰੈਗੂਲੇਟਰੀ ਕਮਿਸ਼ਨ- ਸਿੱਧੂ ਮੁਤਾਬਕ, ਪੰਜਾਬ ਵਿੱਚ ਕਰੀਬ 2 ਕਰੋੜ ਟੀਵੀ ਸੈੱਟ ਹਨ। ਕੇਬਲ ‘ਤੇ ਕਿਸੇ ਦੀ ਮੋਨੋਪਲੀ ਨਹੀਂ ਹੋਵੇਗੀ। ਕਮਿਸ਼ਨ ਕੰਪੀਟੀਸ਼ਨ ਕਰਵਾਏਗਾ। ਇਸ ਨਾਲ 400 ਦੀ ਕੇਬਲ 200 ਰੁਪਏ ਵਿੱਚ ਮਿਲੇਗੀ। ਇਸ ਨਾਲ 3 ਤੋਂ 5 ਹਜ਼ਾਰ ਕਰੋੜ ਰੈਵਿਨਿਊ ਮਿਲੇਗਾ।
ਟਰਾਂਸਪੋਰਟ ਕਾਰਪੋਰੇਸ਼ਨ- ਨਵਜੋਤ ਸਿੱਧੂ ਨੇ ਟਰਾਂਸਪੋਰਟ ਕਾਰਪੋਰੇਸ਼ਨ ਬਣਾਉਣ ਦੀ ਗੱਲ ਕਰਦੇ ਹੋਏ ਕਿਹਾ ਕਿ ਬੱਸਾਂ ਇੰਪਾਊਡ ਕਰਨ ਨਾਲ ਕੁਝ ਨਹੀਂ ਹੋਵੇਗਾ। ਪਾਲਿਸੀ ਤੋਂ ਬਗੈਰ ਮਾਫੀਆ ਬੰਦ ਨਹੀਂ ਹੋਵੇਗਾ। ਬਾਹਰੀ ਸੂਬਿਆਂ ਦੇ ਰੂਟ ‘ਤੇ ਸਰਕਾਰੀ ਬੱਸਾਂ ਚੱਲਣਗੀਆਂ। ਟਾਈਮ ਟੇਬਲ ਡਿਜੀਟਲ ਹੋਵੇਗਾ। ਇਸ ਨਾਲ ਡੇਢ ਹਜ਼ਾਰ ਕਰੋੜ ਦੀ ਕਮਾਈ ਹੋਵੇਗੀ।
