ਬਿਓਰੋ। ਵਿਧਾਨ ਸਭਾ ਚੋਣਾਂ ਤੋਂ ਠੀਕ ਪਹਿਲਾਂ ਪਟਿਆਲਾ ਵਿੱਚ ਵੱਡੀ ਵਾਰਦਾਤ ਹੋਈ ਹੈ। ਮੰਗਲਵਾਰ ਨੂੰ ਪਟਿਆਲਾ ਵਿੱਚ ਪਿੰਡ ਝਿੱਲ ਸਿਓਣਾ ਦੇ ਸਾਬਕਾ ਸਰਪੰਚ ਅਤੇ ਕਾਂਗਰਸੀ ਆਗੂ ਤਾਰਾ ਦੱਤ ਦਾ ਅਣਪਛਾਤੇ ਲੋਕਾਂ ਨੇ ਗੋਲੀਆਂ ਮਾਰ ਕੇ ਕਤਲ ਕਰ ਦਿੱਤਾ। ਵਾਰਦਾਤ ਦੇ ਵਕਤ ਤਾਰਾ ਦੱਤ ਨਾਲ ਹੀ ਲੱਗਦੇ ਤ੍ਰਿਪੜੀ ਵਿਕਾਸ ਨਗਰ ਵੱਲ ਜਾ ਰਹੇ ਸਨ।
ਸਾਬਕਾ ਸਰਪੰਚ ਦੇ ਆਉਣ ਬਾਰੇ ਹਥਿਆਰਾਂ ਨੂੰ ਪਹਿਲਾਂ ਤੋਂ ਹੀ ਸੂਚਨਾ ਸੀ ਅਤੇ ਉਹ ਘਾਤ ਲਗਾ ਕੇ ਬੈਠੇ ਸਨ। ਜਿਵੇਂ ਹੀ ਤਾਰਾ ਦੱਤ ਦੀ ਗੱਡੀ ਆਈ, ਤਾਂ ਕਾਤਲਾਂ ਨੇ ਉਹਨਾਂ ‘ਤੇ ਅੰਨ੍ਹੇਵਾਹ ਗੋਲੀਆਂ ਚਲਾਉਣੀਆਂ ਸ਼ੁਰੂ ਕਰ ਦਿੱਤੀਆਂ। ਕਈ ਗੋਲੀਆਂ ਗੱਡੀ ਦੇ ਬੋਨਟ ਅਤੇ ਸ਼ੀਸ਼ੇ ‘ਤੇ ਲੱਗੀਆਂ। ਦੱਸਿਆ ਜਾ ਰਿਹਾ ਹੈ ਕਿ ਸਾਬਕਾ ਸਰਪੰਚ ਨੂੰ 7 ਗੋਲੀਆਂ ਮਾਰੀਆਂ ਗਈਆਂ ਹਨ।
ਫਾਇਰਿੰਗ ਦੀ ਆਵਾਜ਼ ਸੁਣ ਕੇ ਲੋਕ ਘਟਨਾ ਵਾਲੀ ਥਾਂ ਵੱਲ ਭੱਜੇ ਅਤੇ ਬੁਰੀ ਤਰ੍ਹਾਂ ਨਾਲ ਜ਼ਖਮੀ ਸਾਬਕਾ ਸਰਪੰਚ ਨੂੰ ਪਟਿਆਲਾ ਦੇ ਇੱਕ ਨਿੱਜੀ ਹਸਪਤਾਲ ਵਿੱਚ ਪਹੁੰਚਾਇਆ ਗਿਆ। ਹਸਪਤਾਲ ਵਿੱਚ ਇਲਾਜ ਦੌਰਾਨ ਤਾਰਾ ਦੱਤ ਨੇ ਦਮ ਤੋੜ ਦਿੱਤਾ।
ਸਾਬਕਾ ਸਰਪੰਚ ‘ਤੇ ਵੀ ਕਈ ਕੇਸ ਦਰਜ ਸਨ
ਗੋਲੀਆਂ ਕਿਸਨੇ ਚਲਾਈਆਂ ਹਨ, ਇਸਦਾ ਫਿਲਹਾਲ ਪਤਾ ਨਹੀਂ ਲੱਗ ਸਕਿਆ ਹੈ। ਨਾ ਹੀ ਇਹ ਪਤਾ ਲੱਗ ਸਕਿਆ ਕਿ ਇਸ ਵਾਰਦਾਤ ਨੂੰ ਅੰਜਾਮ ਕਿਸ ਰੰਜਿਸ਼ ਵਿੱਚ ਦਿੱਤਾ ਗਿਆ ਜਾਂ ਫਿਰ ਕੋਈ ਹੋਰ ਵਜ੍ਹਾ ਸੀ। ਕਿਸੇ ਨੇ ਹਾਲੇ ਤੱਕ ਸਾਬਕਾ ਸਰਪੰਚ ਨੂੰ ਗੋਲੀ ਮਾਰਨ ਦੀ ਜ਼ਿੰਮੇਵਾਰੀ ਨਹੀਂ ਲਈ ਹੈ, ਪਰ ਪੁਲਿਸ ਰਿਕਾਰਡ ਮੁਤਾਬਕ ਮਾਰੇ ਗਏ ਸਰਪੰਚ ‘ਤੇ ਵੀ ਕੁੱਟਮਾਰ ਦੇ ਕਈ ਮਾਮਲੇ ਦਰਜ ਸਨ।
ਬ੍ਰਹਮ ਮਹਿੰਦਰਾ ਦੇ ਖਾਸ ਸਨ ਤਾਰਾ ਦੱਤ
ਪਟਿਆਲਾ ਤੋਂ ਮੰਤਰੀ ਬ੍ਰਹਮ ਮਹਿੰਦਰਾ ਦੇ ਖਾਸਮਖਾਸ ਰਹੇ ਤਾਰਾ ਦੱਤ ਨੂੰ ਇੱਕ ਨੌਜਵਾਨ ਦੇ ਕਤਲ ਮਾਮਲੇ ਵਿੱਚ ਨਾਮਜ਼ਦ ਕੀਤਾ ਗਿਆ ਸੀ, ਪਰ ਕੇਸ ਦੀ ਜਾਂਚ ਦੌਰਾਨ ਉਹਨਾਂ ਨੂੰ ਪੁਲਿਸ ਨੇ ਕਲੀਨ ਚਿੱਟ ਦੇ ਦਿੱਤੀ ਸੀ। ਇਸ ਮਾਮਲੇ ਵਿੱਚ ਸਾਬਕਾ ਸਰਪੰਚ ਨੇ ਆਪਣੇ ਅਗਾਊਂ ਜ਼ਮਾਨਤ ਵੀ ਕਰਵਾਈ ਸੀ।
