ਬਿਓਰੋ। ਪੰਜਾਬ ਵਿਧਾਨ ਸਭਾ ਚੋਣਾਂ ਤੋਂ ਠੀਕ ਇੱਕ ਮਹੀਨੇ ਪਹਿਲਾਂ ਆਮ ਆਦਮੀ ਪਾਰਟੀ ਨੇ ਆਖਰਕਾਰ ਸੀਐੱਮ ਫੇਸ ਦਾ ਐਲਾਨ ਕਰ ਦਿੱਤਾ ਹੈ। ਖੁਦ ‘ਆਪ’ ਕਨਵੀਨਰ ਅਰਵਿੰਦ ਕੇਜਰੀਵਾਲ ਨੇ ਇਸਦਾ ਐਲਾਨ ਕੀਤਾ। ਮੋਹਾਲੀ ਵਿੱਚ ਆਯੋਜਿਤ ਇੱਕ ਵੱਡੇ ਇਵੈਂਟ ਵਿੱਚ ਇਸਦਾ ਐਲਾਨ ਕੀਤਾ ਗਿਆ ਅਤੇ ਅਜਿਹਾ ਵਿਖਾਇਆ ਗਿਆ, ਜਿਵੇਂ ਭਗਵੰਤ ਹੀ ਸੀਐੱਮ ਫੇਸ ਲਈ ਪਾਰਟੀ ਦੀ ਪਹਿਲੀ ਪਸੰਦ ਸਨ। ਪਰ ਹਕੀਕਤ ਇਹ ਹੈ ਕਿ ਕੇਜਰੀਵਾਲ ਦੇ ਕੋਲ ਭਗਵੰਤ ਮਾਨ ਤੋਂ ਇਲਾਵਾ ਦੂਜਾ ਕੋਈ ਵਿਕਲਪ ਨਹੀਂ ਸੀ।
ਕੇਜਰੀਵਾਲ ਦੀ ਕੋਸ਼ਿਸ਼ ਭਗਵੰਤ ਮਾਨ ਦੀ ਬਜਾਏ ਕਿਸੇ ਦੂਜੇ ਚਿਹਰੇ ‘ਤੇ ਦਾਅ ਖੇਡਣ ਦੀ ਸੀ, ਪਰ ਅਜਿਹਾ ਨਹੀਂ ਹੋ ਸਕਿਆ। ਪਾਰਟੀ ਨੇ ਬਲਬੀਰ ਰਾਜੇਵਾਲ, ਸੋਨੂੰ ਸੂਦ ਅਤੇ ਐੱਸ.ਪੀ.ਐੱਸ. ਓਬਰਾਏ ਤੱਕ ਨੂੰ ਨਾਲ ਲਿਆਉਣ ਦੀ ਕੋਸ਼ਿਸ਼ ਸੀ, ਪਰ ਗੱਲ ਨਹੀਂ ਬਣੀ। ਇਥੋਂ ਤੱਕ ਕਿ ਨਵਜੋਤ ਸਿੰਘ ਸਿੱਧੂ ਨਾਲ ਵੀ ਗੱਲਬਾਤ ਚੱਲੀ, ਪਰ ਉਹ ਵੀ ਸਿਰੇ ਨਹੀਂ ਚੜ੍ਹੀ।
ਵੈਸੇ ਪਹਿਲਾਂ ਪਾਰਟੀ ਦੀ ਕੋਸ਼ਿਸ਼ ਕੇਜਰੀਵਾਲ ਦੇ ਚਿਹਰੇ ‘ਤੇ ਹੀ ਦਾਅ ਖੇਡਣ ਦੀ ਸੀ। ‘ਇੱਕ ਮੌਕਾ ਕੇਜਰੀਵਾਲ ਨੂੰ’ ਦੇ ਨਾਂਅ ਹੇਠ ਕੈਂਪੇਨ ਵੀ ਚਲਾਇਆ ਗਿਆ, ਪਰ ਪੰਜਾਬ ਵਿੱਚ ਬਾਹਰੀ ਚਿਹਰਾ ਸਵੀਕਾਰ ਨਾ ਹੋਣ ਦੇ ਚਲਦੇ ਪਾਰਟੀ ਨੇ ਇਸ ਦਾਅ ਤੋਂ ਵੀ ਕਦਮ ਪਿੱਛੇ ਖਿੱਚ ਲਏ ਅਤੇ ਅਖੀਰ ਵਿੱਚ ਨਾ ਚਾਹੁੰਦੇ ਹੋਏ ਵੀ ਭਗਵੰਤ ਮਾਨ ਦੇ ਨਾਂਅ ‘ਤੇ ਹੀ ਮੁਹਰ ਲਗਾਉਣੀ ਪਈ।
2017 ਦੀ ਗਲਤੀ ਦੁਹਰਾਉਣਾ ਨਹੀਂ ਚਾਹੁੰਦੀ ਸੀ ‘ਆਪ’ !
2017 ਦੀਆਂ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਪੰਜਾਬ ਵਿੱਚ ਆਮ ਆਦਮੀ ਪਾਰਟੀ ਦਾ ਪੂਰਾ ਜੋਰ ਵੇਖਣ ਨੂੰ ਮਿਲ ਰਿਹਾ ਸੀ। ਵੱਖ-ਵੱਖ ਕੰਪਨੀਆਂ ਵੱਲੋਂ ਕੀਤੇ ਜਾਂਦੇ ਸਰਵੇ ਵਿੱਚ ਵੀ ‘ਆਪ’ ਨੂੰ ਬਹੁਮਤ ਮਿਲਦਾ ਨਜ਼ਰ ਆ ਰਿਹਾ ਸੀ, ਪਰ ਬਾਵਜੂਦ ਇਸਦੇ ਜਦੋਂ ਵਿਧਾਨ ਸਭਾ ਚੋਣਾਂ ਦੇ ਨਤੀਜੇ ਆਏ ਤਾਂ ਤਸਵੀਰ ਬਿਲਕੁੱਲ ਵੱਖਰੀ ਸੀ। ‘ਆਪ’ ਬੇਸ਼ੱਕ 20 ਸੀਟਾਂ ਦੇ ਨਾਲ ਦੂਜੀ ਵੱਡੀ ਪਾਰਟੀ ਬਣੀ, ਪਰ ਸੱਤਾ ‘ਤੇ ਕਾਬਜ਼ ਨਹੀਂ ਹੋ ਸਕੀ। ਮੰਨਿਆ ਜਾਣ ਲੱਗਿਆ ਕਿ ‘ਆਪ’ ਵੱਲੋਂ ਸੀਐੱਮ ਫੇਸ ਦਾ ਐਲਾਨ ਨਾ ਕਰਨਾ ਉਸਦੀ ਸਭ ਤੋਂ ਵੱਡੀ ਗਲਤੀ ਰਹੀ। ਲਿਹਾਜਾ ਆਮ ਆਦਮੀ ਪਾਰਟੀ ਇਸ ਵਾਰ ਇਹ ਗਲਤੀ ਦੁਹਰਾਉਣਾ ਨਹੀਂ ਚਾਹੁੰਦੀ ਸੀ।
ਰਾਜੇਵਾਲ ਨਾਲ ਇਸ ਤਰ੍ਹਾਂ ਟੁੱਟੀ ਗੱਲ
ਦੇਸ਼ ਵਿੱਚ ਜਦੋਂ ਕਿਸਾਨ ਅੰਦੋਲਨ ਜੋਰਾਂ ‘ਤੇ ਸੀ, ਤਾਂ ‘ਆਪ’ ਨੇ ਕਿਸਾਨਾਂ ਦੇ ਨਾਲ ਸਿਆਸੀ ਜ਼ਮੀਨ ਤਲਾਸ਼ਣੀ ਸ਼ੁਰੂ ਕੀਤੀ। ਅਜੇ ਕਿਸਾਨ ਦਿੱਲੀ ਦੀਆਂ ਬਰੂਹਾਂ ‘ਤੇ ਹੀ ਬੈਠੇ ਸਨ ਕਿ ਸਿਆਸੀ ਹਲਕਿਆਂ ਵਿੱਚ ਚਰਚਾ ਹੋਣ ਲੱਗੀ ਕਿ ‘ਆਪ’ ਪੰਜਾਬ ਦੇ ਕਿਸੇ ਕਿਸਾਨ ਆਗੂ ਨੂੰ ਆਪਣਾ ਸੀਐੱਮ ਕੈਂਡੀਡੇਟ ਐਲਾਨ ਸਕਦੀ ਹੈ। ਬਕਾਇਦਾ ਖੰਨਾ ਵਿੱਚ ਬਲਬੀਰ ਰਾਜੇਵਾਲ ਦੇ ਪੋਸਟਰ ਵੀ ਲੱਗੇ। ਕਿਸਾਨ ਅੰਦੋਲਨ ਖਤਮ ਹੋਣ ਤੋਂ ਬਾਅਦ ਕਿਸਾਨਾਂ ਨੇ ਸਿਆਸਤ ‘ਚ ਐਂਟਰੀ ਦਾ ਐਲਾਨ ਕਰ ਦਿੱਤਾ ਅਤੇ 22 ਕਿਸਾਨ ਜਥੇਬੰਦੀਆਂ ਨੇ ਆਪਣੀ ਸਿਆਸੀ ਪਾਰਟੀ ਬਣਾ ਲਈ। ਇਸ ਤੋਂ ਬਾਅਦ ਵੀ ਕੇਜਰੀਵਾਲ ਦੀ ਕੋਸ਼ਿਸ਼ ਰਹੀ ਕਿ ਕਿਸਾਨ ਆਗੂਆਂ ਨਾਲ ਰਲ ਕੇ ਚੋਣ ਲੜੀ ਜਾਵੇ, ਤਾਂ ਜੋ ਬਲਬੀਰ ਰਾਜੇਵਾਲ ਨੂੰ ਸੀਐੱਮ ਫੇਸ ਐਲਾਨ ਦਿੱਤਾ ਜਾਵੇ। ਚਰਚਾ ਹੈ ਕਿ ਰਾਜੇਵਾਲ ਵੱਧ ਸੀਟਾਂ ਮੰਗ ਰਹੇ ਸਨ, ਜਿਸਦੇ ਹੱਕ ਵਿੱਚ ਕੇਜਰੀਵਾਲ ਨਹੀਂ ਸਨ। ਉਲਟਾ ਉਹ ਚਾਹੁੰਦੇ ਸਨ ਕਿ ਕਿਸਾਨ ਆਗੂ ‘ਆਪ’ ਜੁਆਇਨ ਕਰਕੇ ਹੀ ਚੋਣ ਲੜਨ, ਨਾ ਕਿ ਆਪਣੇ ਬੈਨਰ ਹੇਠ..ਲਿਹਾਜਾ ਦੋਵੇਂ ਪਾਰਟੀਆਂ ਵਿਚਕਾਰ ਗੱਲਬਾਤ ਵਿਗੜ ਗਈ।
ਸੋਨੂੰ ਸੂਦ ਦਾ ਨਾਂਅ ਵੀ ਚਰਚਾ ‘ਚ ਰਿਹਾ
ਕੋਰੋਨਾ ਕਾਲ ‘ਚ ਗਰੀਬਾਂ ਦੇ ਮਸੀਹਾ ਬਣੇ ਬਾਲੀਵੁੱਡ ਅਦਾਕਾਰ ਸੋਨੂੰ ਸੂਦ ਦਾ ਨਾਂਅ ਵੀ ‘ਆਪ’ ਦੇ ਸੀਐੱਮ ਫੇਸ ਵਜੋਂ ਚਰਚਾ ਵਿੱਚ ਰਿਹਾ। ਜਦੋਂ ਸੋਨੂੰ ਸੂਦ ਨੇ ਦਿੱਲੀ ਵਿੱਚ ਅਰਵਿੰਦ ਕੇਜਰੀਵਾਲ ਨਾਲ ਮੁਲਾਕਾਤ ਕੀਤੀ, ਤਾਂ ਇਸ ਚਰਚਾ ਨੇ ਜੋਰ ਫੜ ਲਿਆ। ਹਾਲਾਂਕਿ ਉਸ ਵਕਤ ਕੇਜਰੀਵਾਲ ਨੇ ਐਲਾਨ ਕੀਤਾ ਕਿ ਉਹਨਾਂ ਨੂੰ ਦਿੱਲੀ ਸਰਕਾਰ ਵੱਲੋਂ ਬ੍ਰਾਂਡ ਅੰਬੈਸਡਰ ਵਜੋਂ ਨਿਯੁਕਤ ਕੀਤਾ ਗਿਆ ਹੈ। ਇਸ ਤੋਂ ਬਾਅਦ ਜਦੋਂ ਸੋਨੂੰ ਦੇ ਪੰਜਾਬ ਦੀ ਸਿਆਸਤ ਵੱਲ ਰੁਖ ਕਰਨ ਦੀ ਗੱਲ ਛਿੜੀ, ਤਾਂ ਉਦੋਂ ਵੀ ਚਰਚਾ ਰਹੀ ਕਿ ਆਮ ਆਦਮੀ ਪਾਰਟੀ ਸੋਨੂੰ ਸੂਦ ਨੂੰ ਸੀਐੱਮ ਫੇਸ ਵਜੋਂ ਪ੍ਰੋਜੈਕਟ ਕਰਨ ਦੀ ਕੋਸ਼ਿਸ਼ ਵਿੱਚ ਹੈ। ਹਾਲਾਂਕਿ ਇਥੇ ਵੀ ਗੱਲ ਨਹੀਂ ਬਣੀ। ਫਿਲਹਾਲ ਸੋਨੂੰ ਦੀ ਭੈਣ ਮਾਲਵਿਕਾ ਸੂਦ ਕਾਂਗਰਸ ਦੀ ਟਿਕਟ ‘ਤੇ ਮੋਗਾ ਤੋਂ ਚੋਣ ਲੜ ਰਹੀ ਹੈ। ਸਾਫ਼ ਹੈ ਕਿ ਸੋਨੂੰ ਕਾਂਗਰਸ ਲਈ ਹੀ ਪ੍ਰਚਾਰ ਕਰਨਗੇ। ਹਾਲਾਂਕਿ ਫਿਲਹਾਲ ਸੋਨੂੰ ਦਾ ਖੁਦ ਦਾ ਸਿਆਸਤ ਵਿੱਚ ਆਉਣ ਦਾ ਕੋਈ ਇਰਾਦਾ ਨਹੀਂ ਹੈ।
SPS ਓਬਰਾਏ ਵੱਲ ਵੀ ਸੀ ‘ਆਪ’ ਦੀ ਨਜ਼ਰ
ਦੁਬਈ ਦੇ ਹੋਟਲ ਕਾਰੋਬਾਰੀ ਐੱਸ.ਪੀ.ਐੱਸ. ਓਬਰਾਏ ਦਾ ਨਾਂਅ ਵੀ ਆਮ ਆਦਮੀ ਪਾਰਟੀ ਦੇ ਸੀਐੱਮ ਫੇਸ ਵਜੋਂ ਚਰਚਾ ਵਿੱਚ ਰਿਹਾ। ਓਬਰਾਏ ਕਈ ਵਾਰ ਵਿਦੇਸ਼ ਵਿੱਚ ਫਸੇ ਪੰਜਾਬੀਆਂ ਲਈ ਮਸੀਹਾ ਬਣੇ ਹਨ। ਉਹ ਆਪਣੇ ਖਰਚੇ ‘ਤੇ ਪੰਜਾਬੀਆਂ ਦੀ ਵਿਦੇਸ਼ ਤੋਂ ਵਤਨ ਵਾਪਸੀ ਕਰਵਾਉਂਦੇ ਹਨ, ਜਿਸਨੂੰ ਲੈ ਕੇ ਉਹ ਪੰਜਾਬੀਆਂ ਵਿੱਚ ਹਰਮਨਪਿਆਰੇ ਹਨ।
ਮਾਨ ਨੇ ਵੀ ਖੂਬ ਕੀਤੀ ਲੌਬਿੰਗ
ਇਸ ਸਭ ਦੇ ਵਿਚਾਲੇ ਭਗਵੰਤ ਮਾਨ ਖੁਦ ਵੀ ਲੌਬਿੰਗ ਕਰਨ ਵਿੱਚ ਲੱਗੇ ਹੋਏ ਸਨ। ਭਗਵੰਤ ਮਾਨ ਨੂੰ ਸੀਐੱਮ ਫੇਸ ਬਣਾਏ ਜਾਣ ਦੀ ਚਰਚਾ ਪਾਰਟੀ ਤੋਂ ਬਾਹਰ ਤਾਂ ਦੂਰ, ਪਾਰਟੀ ਦੇ ਅੰਦਰ ਵੀ ਨਹੀਂ ਸੀ। ਇਸ ਨੂੰ ਲੈ ਕੇ ਭਗਵੰਤ ਮਾਨ ਕਾਫੀ ਸਮਾਂ ਪਾਰਟੀ ਤੋਂ ਨਰਾਜ਼ ਚੱਲਦੇ ਰਹੇ। ਉਹਨਾਂ ਨੇ ਆਪਣੇ ਸਮਰਥਕਾਂ ਜ਼ਰੀਏ ਖੁਦ ਨੂੰ ਸੀਐੱਮ ਫੇਸ ਐਲਾਨੇ ਜਾਣ ਲਈ ਖੂਬ ਲੌਬਿੰਗ ਕੀਤੀ ਅਤੇ ‘BM ਫਾਰ CM’ ਕੈਂਪੇਨ ਵੀ ਚਲਾਇਆ।
ਕਾਬਿਲੇਗੌਰ ਹੈ ਕਿ ਕੇਜਰੀਵਾਲ ਲਗਭਗ ਹਰ ਮੰਚ ਤੋਂ ਇਹ ਕਹਿੰਦੇ ਰਹੇ ਹਨ ਕਿ ਪੰਜਾਬ ਦਾ ਸੀਐੱਮ ਫੇਸ ਉਹ ਸ਼ਖਸ ਹੋਵੇਗਾ, ਜੋ ਸਿੱਖ ਸਮਾਜ ਤੋਂ ਹੋਵੇਗਾ। ਕਿਉਂਕਿ ਪੰਜਾਬ ਇੱਕ ਸਿੱਖ ਸਟੇਟ ਹੈ, ਤਾਂ ਇਥੇ ਸੀਐੱਮ ਵੀ ਸਿੱਖ ਹੀ ਹੋਣਾ ਚਾਹੀਦਾ ਹੈ। ਇਸਦੇ ਨਾਲ ਹੀ ਉਹਨਾਂ ਨੇ ਵਾਰ-ਵਾਰ ਕਿਹਾ ਕਿ ਸੀਐੱਮ ਫੇਸ ਉਹ ਹੋਵੇਗਾ, ਜਿਸ ‘ਤੇ ਪੂਰੇ ਪੰਜਾਬ ਨੂੰ ‘ਮਾਣ’ ਹੋਵੇਗਾ। ਪਰ ਪੰਜਾਬ ਦਾ ਉਹ ਮਾਣ ਭਗਵੰਤ ਮਾਨ ਹੋਵੇਗਾ, ਇਹ ਉਸ ਵਕਤ ਖੁਦ ਕੇਜਰੀਵਾਲ ਨੇ ਵੀ ਸੋਚਿਆ ਨਹੀਂ ਹੋਵੇਗਾ।
