ਚੰਡੀਗੜ੍ਹ। ਲੰਮੀ ਜੱਦੋ-ਜਹਿਦ ਤੋਂ ਬਾਅਦ ਆਖਰਕਾਰ ਪੰਜਾਬ ਵਿੱਚ ਆਮ ਆਦਮੀ ਪਾਰਟੀ ਨੇ ਮੁੱਖ ਮੰਤਰੀ ਚਿਹਰੇ ਦਾ ਰਸਮੀ ਐਲਾਨ ਕਰ ਦਿੱਤਾ ਹੈ। ਮੰਗਲਵਾਰ ਨੂੰ ਮੋਹਾਲੀ ਪਹੁੰਚੇ ‘ਆਪ’ ਕਨਵੀਨਰ ਅਰਵਿੰਦ ਕੇਜਰੀਵਾਲ ਨੇ ਭਗਵੰਤ ਮਾਨ ਨੂੰ ਅਗਾਮੀ ਚੋਣਾਂ ਲਈ ਪਾਰਟੀ ਦਾ ਸੀਐੱਮ ਫੇਸ ਐਲਾਨ ਦਿੱਤਾ। ‘ਆਪ’ ‘ਤੇ ਲਗਾਤਾਰ ਸੀਐੱਮ ਫੇਸ ਐਲਾਨੇ ਜਾਣ ਨੂੰ ਲੈ ਕੇ ਦਬਾਅ ਬਣਾਇਆ ਜਾ ਰਿਹਾ ਸੀ, ਜਿਸ ਤੋਂ ਬਾਅਦ ਪਾਰਟੀ ਨੇ ਮਾਨ ਦੇ ਨਾਂਅ ‘ਤੇ ਮੁਹਰ ਲਗਾ ਦਿੱਤੀ ਗਈ।
93.3% ਲੋਕਾਂ ਦੀ ਪਸੰਦ ਭਗਵੰਤ ਮਾਨ- ਕੇਜਰੀਵਾਲ
ਬੇਸ਼ੱਕ ਭਗਵੰਤ ਮਾਨ ਦਾ ਨਾਂਅ ਪਹਿਲਾਂ ਤੋਂ ਹੀ ਫਾਈਨਲ ਮੰਨਿਆ ਜਾ ਰਿਹਾ ਸੀ, ਪਰ ਬਾਵਜੂਦ ਇਸਦੇ ਕੇਜਰੀਵਾਲ ਵੱਲੋਂ ਸੀਐੱਮ ਕੈਂਡੀਡੇਟ ਚੁਣੇ ਜਾਣ ਲਈ ਪੰਜਾਬ ਦੇ ਲੋਕਾਂ ਤੋਂ ਰਾਏ ਮੰਗੀ ਗਈ ਸੀ। ਕੇਜਰੀਵਾਲ ਨੇ ਬਕਾਇਦਾ ਰਾਏਸ਼ੁਮਾਰੀ ਲਈ ਇੱਕ ਨੰਬਰ ਜਾਰੀ ਕੀਤਾ ਸੀ। ਉਹਨਾਂ ਮੁਤਾਬਕ, 3 ਦਿਨਾਂ ਵਿੱਚ 21.59 ਲੱਖ ਲੋਕਾਂ ਨੇ ਰਾਏ ਦਿੱਤੀ ਹੈ, ਜਿਹਨਾਂ ‘ਚੋਂ ਕਰੀਬ 15 ਲੱਖ ਲੋਕਾਂ ਨੇ ਭਗਵੰਤ ਮਾਨ ਦਾ ਨਾਂਅ ਲਿਆ ਹੈ। ਕੇਜਰੀਵਾਲ ਨੇ ਕਿਹਾ ਕਿ ਮਾਨ ਨੂੰ 93.9% ਵੋਟ ਮਿਲੇ ਹਨ, ਜਦਕਿ ਸਿੱਧੂ ਸਿਰਫ਼ 3.6% ਲੋਕਾਂ ਦੀ ਹੀ ਪਸੰਦ ਹਨ।
I congratulate Sardar Bhagwant Mann on being declared CM face of AAP in Punjab. Whole Punjab is looking upto AAP as a hope. Its a huge responsibility and I am sure Bhagwant will bring back smile on the face of every Punjabi.
— Arvind Kejriwal (@ArvindKejriwal) January 18, 2022
ਸਿੱਧੂ ਨੂੰ ਦੱਸਿਆ, “ਲਾੜਾ ਕੌਣ ਹੈ”
ਭਗਵੰਤ ਮਾਨ ਦੇ ਨਾਂਅ ਦਾ ਐਲਾਨ ਕਰਦੇ ਹੋਏ ਅਰਵਿੰਦ ਕੇਜਰੀਵਾਲ ਦੇ ਨਿਸ਼ਾਨੇ ‘ਤੇ ਪੰਜਾਬ ਕਾਂਗਰਸ ਪ੍ਰਧਾਨ ਭਗਵੰਤ ਮਾਨ ਵੀ ਰਹੇ। ਕੇਜਰੀਵਾਲ ਨੇ ਕਿਹਾ, “ਸਾਰੇ ਲੋਕ ਸਾਨੂੰ ਪੁੱਛਦੇ ਸਨ ਕਿ ਆਮ ਆਦਮੀ ਪਾਰਟੀ ਦਾ ਲਾੜਾ ਕੌਣ ਹੈ, ਤਾਂ ਅਸੀਂ ਇਸਦਾ ਐਲਾਨ ਕਰ ਦਿੱਤਾ।” ਜਿਕਰੇਖਾਸ ਹੈ ਕਿ ਨਵਜੋਤ ਸਿੱਧੂ ਲਗਭਗ ਹਰ ਮੰਚ ਤੋਂ ਵਾਰ-ਵਾਰ ਕੇਜਰੀਵਾਲ ਅਤੇ ਆਮ ਆਦਮੀ ਪਾਰਟੀ ‘ਤੇ ਹਮਲਾ ਬੋਲਦੇ ਸਨ ਅਤੇ ਕਹਿੰਦੇ ਸਨ ਕਿ ਉਹਨਾਂ ਦੀ ਬਰਾਤ ਪੂਰੇ ਪੰਜਾਬ ਵਿੱਚ ਘੁੰਮ ਰਹੀ ਹੈ, ਪਰ ਲਾੜਾ ਕੌਣ ਹੈ, ਇਹ ਕੋਈ ਨਹੀਂ ਜਾਣਦਾ।
ਪੰਜਾਬ ਨੂੰ ਆਪਣੇ ਪੈਰਾਂ ‘ਤੇ ਖੜ੍ਹਾ ਕਰਾਂਗੇ- ਮਾਨ
ਸੀਐੱਮ ਫੇਸ ਵਜੋਂ ਨਾਂਅ ਦੇ ਐਲਾਨ ਤੋਂ ਬਾਅਦ ਆਪਣੇ ਸੰਬੋਧਨ ਵਿੱਚ ਭਗਵੰਤ ਮਾਨ ਨੇ ਵਾਰ-ਵਾਰ ਪੰਜਾਬ ਨੂੰ ਆਪਣੇ ਪੈਰਾਂ ‘ਤੇ ਖੜ੍ਹਾ ਕਰਨ ਦਾ ਜਿਕਰ ਕੀਤਾ। ਵਿਰੋਧੀਆਂ ‘ਤੇ ਤੰਜ ਕਸਦਿਆਂ ਉਹਨਾਂ ਕਿਹਾ ਕਿ ਅਸੀਂ ਪੰਜਾਬ ਨੂੰ ਕੈਲੀਫੋਰਨੀਆ ਨਹੀਂ ਬਣਾਉਣਾ, ਅਸੀਂ ਇਸ ਨੂੰ ਮੁੜ ਗਿੱਧੇ-ਭੰਗੜੇ ਪਾਉਣ ਵਾਲਾ ਪੰਜਾਬ ਬਣਾਉਣਾ ਹੈ। ਨੌਜਵਾਨਾਂ ਨੂੰ ਵਿਦੇਸ਼ ਜਾਣ ਤੋਂ ਰੋਕਣਾ ਹੈ, ਉਹਨਾਂ ਨੂੰ ਪੰਜਾਬ ਵਿੱਚ ਹੀ ਡਿੱਗਰੀ ਮੁਤਾਬਕ ਨੌਕਰੀਆਂ ਦਵਾਂਗੇ।
ਮੈਂ ਆਮ ਆਦਮੀ ਪਾਰਟੀ ਅਤੇ ਸਮੂਹ ਪੰਜਾਬ ਦੇ ਵਾਸੀਆਂ ਦਾ ਧੰਨਵਾਦੀ ਹਾਂ ਜਿਨ੍ਹਾਂ ਨੇ ਮੈਨੂੰ ਇਹ ਜ਼ਿੰਮੇਵਾਰੀ ਸੌਂਪੀ…ਮੈਂ ਸੁਨਿਹਰਾ ਅਤੇ ਖੁਸ਼ਹਾਲ ਪੰਜਾਬ ਬਣਾਉਣ ਲਈ ਇਹ ਜ਼ਿੰਮੇਵਾਰੀ ਆਪਣੀ ਤਨਦੇਹੀ ਨਾਲ ਨਿਵਾਵਾਂਗਾ…ਇਨਕਲਾਬ ਜ਼ਿੰਦਾਬਾਦ pic.twitter.com/gAdeK7gsMc
— Bhagwant Mann (@BhagwantMann) January 18, 2022
‘ਹਰੇ ਰੰਗ ਦਾ ਪੈੱਨ ਗਰੀਬਾਂ ਦੇ ਹੱਕ ‘ਚ ਚੱਲੇਗਾ’
ਮਾਨ ਨੇ ਕਿਹਾ, “ਜੇਕਰ ਹਰੇ ਰੰਗ ਦਾ ਪੈੱਨ ਮੇਰੇ ਹੱਥ ਵਿੱਚ ਆਇਆ, ਤਾਂ ਉਹ ਹਮੇਸ਼ਾ ਲੋੜਵੰਦਾਂ ਅਤੇ ਗਰੀਬਾਂ ਦੇ ਹੱਕ ਵਿੱਚ ਚੱਲੇਗਾ। ਕਿਸੇ ਚੇਲੇ ਜਾਂ ਚਮਚੇ ਦੇ ਹੱਕ ਵਿੱਚ ਨਹੀਂ ਚੱਲੇਗਾ।” ਉਹਨਾਂ ਕਿਹਾ, “ਜਦੋਂ ਮੈਂ ਕਾਮੇਡੀਅਨ ਸੀ, ਤਾਂ ਲੋਕ ਮੈਨੂੰ ਵੇਖ ਕੇ ਹੱਸਦੇ ਸਨ। ਪਰ ਜਦੋਂ ਸਿਆਸਤ ‘ਚ ਆਇਆ, ਤਾਂ ਮੈਨੂੰ ਵੇਖ ਕੇ ਰੌਣ ਲੱਗੇ। ਕਹਿੰਦੇ ਕਿ ਸਾਨੂੰ ਬਚਾ ਲਓ।” ਮਾਨ ਨੇ ਕਿਹਾ ਕਿ ਪੰਜਾਬ ਨੂੰ ਸਿਰਫ਼ ਲੋਕ ਵੀ ਬਚਾ ਸਕਦੇ ਹਨ, ਮੈਂ ਸਿਰਫ਼ ਇਸਦਾ ਜ਼ਰੀਆ ਬਣ ਸਕਦਾ ਹਾਂ। ਉਹਨਾਂ ਕਿਹਾ ਕਿ ਪੰਜਾਬ ਦੇ ਨੌਜਵਾਨਾਂ ਦੇ ਹੱਥਾਂ ਤੋਂ ਟੀਕੇ ਖੋਹ ਕੇ ਉਹਨਾਂ ਦੇ ਹੱਥ ਵਿੱਚ ਟਿਫਿਨ ਫੜਾਉਣਾ ਹੈ।
