ਬਿਓਰੋ। ਪੰਜਾਬ ਵਿੱਚ ਚੋਣ ਕਮਿਸ਼ਨ ਨੇ ਵੱਡੀ ਕਾਰਵਾਈ ਕੀਤੀ ਹੈ। ਕਮਿਸ਼ਨ ਨੇ 2 ਜ਼ਿਲ੍ਹਿਆਂ ਦੇ ਡਿਪਟੀ ਕਮਿਸ਼ਨਰ, 8 ਜ਼ਿਲ੍ਹਿਆਂ ਦੇ SSP, ਚਾਰੇ ਰੇਂਜ ਦੇ IG ਅਤੇ 19 DSP ਬਦਲ ਦਿੱਤੇ । ਬਠਿੰਡਾ ਵਿੱਚ ਹੁਣ ਵਿਨੀਤ ਕੁਮਾਰ ਅਤੇ ਫਿਰੋਜ਼ਪੁਰ ਵਿੱਚ ਗਿਰੀਸ਼ ਦਿਆਲਨ ਨੂੰ DC ਬਣਾਇਆ ਗਿਆ। ਚੋਣਾਂ ਦੌਰਾਨ ਇਨ੍ਹਾਂ ਦੋਵੇਂ ਅਫ਼ਸਰਾਂ ‘ਤੇ ਜ਼ਿਲ੍ਹਾ ਚੋਣ ਅਫ਼ਸਰ ਦੀ ਜਿੰਮੇਵਾਰੀ ਵੀ ਰਹੇਗੀ। ਖਾਸ ਗੱਲ ਇਹ ਹੈ ਕਿ ਇਹ ਦੋਵੇਂ ਜ਼ਿਲ੍ਹੇ PM ਦੀ ਸੁਰੱਖਿਆ ‘ਚ ਕੁਤਾਹੀ ਨੂੰ ਲੈ ਕੇ ਵੀ ਚਰਚਾ ਵਿੱਚ ਰਹੇ ਸਨ।
ਮੰਤਰੀ ਦੇ ਰਿਸ਼ਤੇਦਾਰ ਸਣੇ ਇਹ 8 SSP ਹਟਾਏ
ਪੰਜਾਬ ਸਰਕਾਰ ਦੇ ਇੱਕ ਮੰਤਰੀ ਦੇ ਕਰੀਬੀ ਰਿਸ਼ਤੇਦਾਰ ਮੋਹਾਲੀ ਦੇ SSP ਨਵਜੋਤ ਸਿੰਘ ਮਾਹਲ ਨੂੰ ਹਟਾ ਦਿੱਤਾ ਗਿਆ ਹੈ। ਉਨ੍ਹਾਂ ਦੀ ਥਾਂ ਹਰਜੀਤ ਸਿੰਘ ਨਵੇਂ SSP ਹੋਣਗੇ। ਇਸੇ ਤਰ੍ਹਾਂ ਹੁਸ਼ਿਆਰਪੁਰ ਤੋਂ ਕੁਲਵੰਤ ਸਿੰਘ ਹੀਰ ਨੂੰ ਹਟਾ ਕੇ ਧਰੁਮਣ ਨਿੰਬਲੇ ਨੂੰ SSP ਬਣਾਇਆ ਗਿਆ ਹੈ। ਲੁਧਿਆਣਾ ਰੂਰਲ ਦੇ SSP ਰਾਜ ਬਚਨ ਸੰਧੂ ਦੀ ਥਾਂ ਪਾਟਿਲ ਕੇਤਨ ਬਲਰਾਮ, ਤਰਨਤਾਰਨ ਵਿੱਚ ਹਰਵਿੰਦਰ ਸਿੰਘ ਵਿਰਕ ਦੀ ਥਾਂ ਗੁਲਨੀਤ ਖੁਰਾਨਾ, ਮੁਕਤਸਰ ਵਿੱਚ ਸਰਬਜੀਤ ਸਿੰਘ ਦੀ ਥਾਂ ਸੰਦੀਪ ਕੁਮਾਰ ਮਲਿਕ, ਫਤਿਹਗੜ੍ਹ ਸਾਹਿਬ ਵਿੱਚ ਸੰਦੀਪ ਗੋਇਲ ਦੀ ਥਾਂ ਸਰਤਾਜ ਸਿੰਘ ਚਹਿਲ, ਅੰਮ੍ਰਿਤਸਰ ਰੂਰਲ ਵਿੱਚ ਰਾਕੇਸ਼ ਕੌਸ਼ਲ ਦੀ ਥਾਂ ਦੀਪਕ ਹਿਲੋਰੀ ਅਤੇ ਬਠਿੰਡਾ ਵਿੱਚ ਅਜੇ ਮਲੂਜਾ ਦੀ ਥਾਂ ਅਮਨੀਤ ਕੌਂਡਲ ਨੂੰ SSP ਬਣਾਇਆ ਗਿਆ ਹੈ।
