ਬਿਓਰੋ। ED ਦੀ ਛਾਪੇਮਾਰੀ ਨੂੰ ਲੈ ਕੇ ਪੰਜਾਬ ਦੀ ਕਾਂਗਰਸ ਸਰਕਾਰ ਅਤੇ ਕੇਂਦਰ ਦੀ ਮੋਦੀ ਸਰਕਾਰ ਇੱਕ ਵਾਰ ਫੇਰ ਆਹਮੋ-ਸਾਹਮਣੇ ਹੈ। ED ਦੀ ਕਾਰਵਾਈ ਤੋਂ ਭੜਕੇ ਸੀਐੱਮ ਚਰਨਜੀਤ ਸਿੰਘ ਚੰਨੀ ਖੁੱਲ੍ਹ ਕੇ ਮੈਦਾਨ ਵਿੱਚ ਉਤਰ ਆਏ ਹਨ। ਬੁੱਧਵਾਰ ਨੂੰ ਉਨ੍ਹਾਂ ਨੇ ਆਪਣੇ 4 ਮੰਤਰੀਆਂ ਦੇ ਨਾਲ ਪ੍ਰੈੱਸ ਕਾਨਫ਼ਰੰਸ ਕਰਕੇ ਕੇਂਦਰ ਦੀ ਬੀਜੇਪੀ ਸਰਕਾਰ ‘ਤੇ ਸਿੱਧਾ ਹਮਲਾ ਬੋਲਿਆ।
ਮੈਨੂੰ ਫਸਾਉਣਾ ਚਾਹੁੰਦੀ ਹੈ ਬੀਜੇਪੀ- CM
ਸੀਐੱਮ ਚੰਨੀ ਨੇ ਕੇਂਦਰ ਸਰਕਾਰ ‘ਤੇ ਵੱਡਾ ਇਲਜਾਮ ਲਗਾਉਂਦਿਆਂ ਕਿਹਾ, “ਕੇਂਦਰ ਸਰਕਾਰ ਦੀ ਕੋਸ਼ਿਸ਼ ED ਦੇ ਜ਼ਰੀਏ ਮੈਨੂੰ ਫਸਾਉਣ ਦੀ ਹੈ। ਇਸਦੇ ਲਈ ਮੇਰੇ ਕਰੀਬੀਆਂ ‘ਤੇ ਦਬਾਅ ਬਣਾਉਣ ਦੀ ਕੋਸ਼ਿਸ਼ ਕੀਤੀ ਗਈ। ਮੇਰੇ ਭਾਣਜੇ ਨੂੰ ਰਾਤ ਭਰ ਟਾਰਚਰ ਕੀਤਾ ਗਿਆ। ਉਸ ‘ਤੇ ਮੇਰਾ ਨਾਂਅ ਲੈਣ ਦਾ ਦਬਾਅ ਪਾਇਆ ਗਿਆ, ਪਰ ਉਸਨੇ ਅਜਿਹਾ ਨਹੀਂ ਕੀਤਾ।“ ਸੀਐੱਮ ਨੇ ਦਾਅਵਾ ਕੀਤਾ ਕਿ ED ਦੇ ਅਫ਼ਸਰਾਂ ਨੇ ਉਹਨਾਂ ਦਾ ਨਾਂਅ ਆਉਣ ਦੀ ਕੋਸ਼ਿਸ਼ ਵਿੱਚ ਪੂਰੀ ਰਾਤ ਕੋਰਟ ਤੱਕ ਖੁੱਲ੍ਹਵਾ ਕੇ ਰੱਖੀ।
ED ਅਫ਼ਸਰਾਂ ਨੇ ਧਮਕੀ ਦਿੱਤੀ- CM
ਸੀਐੱਮ ਨੇ ਇਲਜਾਮ ਲਗਾਇਆ ਕਿ ED ਦੇ ਅਫ਼ਸਰ ਜਾਂਦੇ ਹੋਏ ਕਹਿ ਗਏ ਕਿ ਪੀਐੱਮ ਦਾ ਦੌਰਾ ਯਾਦ ਰੱਖਿਓ। ਚੰਨੀ ਨੇ ਕਿਹਾ, “ਮੇਰੇ ਖ਼ਿਲਾਫ਼ ਬਦਲਾਖੋਰੀ ਦੀ ਕਾਰਵਾਈ ਕਿਉਂ ਕੀਤੀ ਜਾ ਰਹੀ ਹੈ, ਜਦਕਿ ਪੀਐੱਮ ਦੀ ਸੁਰੱਖਿਆ ਨੂੰ ਪੰਜਾਬ ਵਿੱਚ ਕੋਈ ਖ਼ਤਰਾ ਨਹੀਂ ਸੀ। ਮੇਰੇ ਵੱਡੇ-ਵਡੇਰਿਆਂ ਨੇ ਚਮਕੌਰ ਸਾਹਿਬ ਦੀ ਧਰਤੀ ‘ਤੇ ਮੁਗਲਾਂ ਦੇ ਜ਼ੁਲਮ ਸਹੇ, ਮੈਂ ਇਹਨਾਂ ਦੇ ਜ਼ੁਲਮ ਸਹਾਂਗਾ ਚਾਹੇ ਉਹ ਮੇਰੀ ਜਾਨ ਲੈ ਲੈਣ।“
ਪੰਜਾਬੀਆਂ ਦਾ ਸਾਥ ਦੇਣ ਦੀ ਸਜ਼ਾ ਦੇ ਰਹੇ- CM
ਸੀਐਮ ਚੰਨੀ ਨੇ ਕਿਹਾ, “ਪੀਐੱਮ ਦੇ ਦੌਰੇ ਨਾਲ ਜੁੜੇ ਵਿਵਾਦ ਦੌਰਾਨ ਮੈਂ ਪੰਜਾਬ ਦੇ ਨਾਲ ਖੜ੍ਹਾ ਰਿਹਾ। ਇਹੀ ਨਹੀਂ, ਸੂਬੇ ਦੀ ਜਨਤਾ ਵੀ ਮੇਰੇ ਨਾਲ ਖੜ੍ਹੀ ਰਹੀ, ਪਰ ਬੀਜੇਪੀ ਨੂੰ ਇਹ ਗੱਲ ਹਜ਼ਮ ਨਹੀਂ ਹੋ ਰਹੀ। ਇਹੀ ਵਜ੍ਹਾ ਹੈ ਕਿ ਮੈਨੂੰ ਫਸਾਉਣ ਲਈ ਦਬਾਅ ਬਣਾਉਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ।“
ਕੈਪਟਨ, ਅਕਾਲੀ, ‘ਆਪ’ ਕੇਂਦਰ ਨਾਲ ਮਿਲੇ ਹੋਏ ਹਨ- CM
ਸੀਐੱਮ ਚੰਨੀ ਨੇ ਇਲਜਾਮ ਲਗਾਇਆ ਕਿ ਬੀਜੇਪੀ ਦੀ ਇਸ ਸਾਜਿਸ਼ ਵਿੱਚ ਸਾਰੇ ਮਿਲੇ ਹੋਏ ਹਨ। ਆਮ ਆਦਮੀ ਪਾਰਟੀ ਅਤੇ ਅਕਾਲੀ ਦਲ ਦੇ ਨਾਲ-ਨਾਲ ਕੈਪਟਨ ਅਮਰਿੰਦਰ ਸਿੰਘ ਵੀ ਬੀਜੇਪੀ ਦੇ ਨਾਲ ਮਿਲੇ ਹੋਏ ਹਨ ਅਤੇ ਉਹਨਾਂ ਨੂੰ ਫਸਾਉਣਾ ਚਾਹੁੰਦੇ ਹਨ। ਸੀਐੱਮ ਨੇ ਕਿਹਾ ਕਿ ਇਨ੍ਹਾਂ ਸਾਰਿਆਂ ਨੇ ਬੀਜੇਪੀ ਨਾਲ ਗੁਪਤ ਸਮਝੌਤਾ ਕੀਤਾ ਹੋਇਆ ਹੈ, ਜਿਸ ਕਾਰਨ ਸਾਰੇ ਇਸ ਰੇਡ ਵਿੱਚ ਉਨ੍ਹਾਂ ਦੇ ਖਿਲਾਫ਼ ਬੋਲ ਰਹੇ ਹਨ।
ਬਾਂਹ ਮਰੋੜ ਕੇ ਜਿੱਤਣਾ ਚਾਹੁੰਦੀ ਹੈ ਬੀਜੇਪੀ- CM
ਸੀਐੱਮ ਨੇ ਕਿਹਾ ਕਿ ਬੀਜੇਪੀ ਚੋਣਾਂ ਦੇ ਵਕਤ ਅਜਿਹਾ ਹੀ ਕਰਦੀ ਹੈ। ਇਸ ਤੋਂ ਪਹਿਲਾਂ ਬੰਗਾਲ ਚੋਣਾਂ ਦੇ ਸਮੇਂ ਮਮਤਾ ਬੈਨਰਜੀ, ਤਮਿਲਨਾਡੂ ਵਿੱਚ DMK ਸਟਾਲਿਨ ਅਤੇ ਮਹਾਂਰਾਸ਼ਟਰ ਵਿੱਚ ਸ਼ਰਦ ਪਵਾਰ ‘ਤੇ ਅਜਿਹੀ ਹੀ ਕਾਰਵਾਈ ਕੀਤੀ ਗਈ। ਚੰਨੀ ਨੇ ਕਿਹਾ ਕਿ ਬੀਜੇਪੀ ਬਾਂਹ ਮਰੋੜ ਕੇ ਚੋਣ ਜਿੱਤਣਾ ਚਾਹੁੰਦੀ ਹੈ, ਪਰ ਇਹ ਨਾ ਬੰਗਾਲ ਵਿੱਚ ਹੋਇਆ ਅਤੇ ਨਾ ਹੀ ਪੰਜਾਬ ਵਿੱਚ ਹੋਵੇਗਾ।
ਕਾਬਿਲੇਗੌਰ ਹੈ ਕਿ ਗੈਰ-ਕਾਨੂੰਨੀ ਮਾਈਨਿੰਗ ਦੇ ਮਾਮਲੇ ਵਿੱਚ ED ਨੇ ਮੰਗਲਵਾਰ ਨੂੰ ਪੰਜਾਬ ਵਿੱਚ ਕਈ ਥਾਵਾਂ ‘ਤੇ ਸੀਐੱਮ ਦੇ ਭਾਣਜੇ ਦੇ ਟਿਕਾਣਿਆਂ ‘ਤੇ ਰੇਡ ਕੀਤੀ, ਜਿਸ ਦੌਰਾਨ 10 ਕਰੋੜ ਤੋਂ ਵੱਧ ਦੀ ਨਗਦੀ ਬਰਾਮਦ ਹੋਈ ਹੈ।
