ਬਿਓਰੋ। 2022 ਦੇ ਚੋਣ ਦੰਗਲ ਵਿੱਚ ਕਾਂਗਰਸ ਨੇ ਸੀਐੱਮ ਚਿਹਰੇ ਦੇ ਨਾਲ ਮੈਦਾਨ ਵਿੱਚ ਉਤਰਨ ਦੀ ਪੂਰੀ ਤਿਆਰੀ ਕਰ ਲਈ ਹੈ। 6 ਫਰਵਰੀ ਨੂੰ ਰਾਹੁਲ ਗਾਂਧੀ ਮੁੜ ਪੰਜਾਬ ਆ ਰਹੇ ਹਨ। ਲੁਧਿਆਣਾ ਵਿੱਚ ਰਾਹੁਲ ਦੀ ਵੱਡੀ ਵਰਚੁਅਲ ਰੈਲੀ ਹੋਵੇਗੀ, ਜਿਸ ਵਿੱਚ ਉਹ ਸੀਐੱਮ ਫੇਸ ਦਾ ਐਲਾਨ ਕਰਨਗੇ।
ਸੀਐੱਮ ਚਿਹਰੇ ਦੀ ਰੇਸ ਵਿੱਚ ਮੌਜੂਦਾ ਸੀਐੱਮ ਚਰਨਜੀਤ ਸਿੰਘ ਚੰਨੀ ਸਭ ਤੋਂ ਅੱਗੇ ਹਨ। ਉਹਨਾਂ ਦੇ ਨਾਲ ਨਵਜੋਤ ਸਿੱਧੂ ਵੀ ਸੀਐੱਮ ਚਿਹਰੇ ਦੇ ਦਾਅਵੇਦਾਰ ਹਨ। ਹਾਲਾਂਕਿ ਪਾਰਟੀ ਤੋਂ ਮਿਲੇ ਸੰਕੇਤ ਚੰਨੀ ਦੇ ਹੱਕ ਵਿੱਚ ਨਜ਼ਰ ਆ ਰਹੇ ਹਨ। ਕਾਂਗਰਸ ਵਿੱਚ ਚੰਨੀ ਦਾ ਦਬਦਬਾ ਵੀ ਲਗਾਤਾਰ ਵੱਧ ਰਿਹਾ ਹੈ। ਕਾਂਗਰਸ ਨੇ ਉੱਤਰਾਖੰਡ ਵਿੱਚ ਸਟਾਰ ਪ੍ਰਚਾਰਕਾਂ ਦੀ ਲਿਸਟ ਵਿੱਚ ਨਵਜੋਤ ਸਿੱਧੂ ਨੂੰ ਜਗ੍ਹਾ ਨਹੀਂ ਦਿੱਤੀ, ਪਰ ਚੰਨੀ ਨੂੰ ਸਟਾਰ ਕੈਂਪੇਨਰ ਬਣਾਇਆ ਹੈ।
3 ਤਰੀਕਿਆਂ ਨਾਲ ਫੀਡਬੈਕ ਲੈ ਰਹੀ ਕਾਂਗਰਸ
ਪੰਜਾਬ ਵਿੱਚ ਸੀਐੱਮ ਚਿਹਰੇ ਦੇ ਨਾਲ ਕਾਂਗਰਸ 3 ਤਰੀਕਿਆਂ ਨਾਲ ਫੀਡਬੈਕ ਲੈ ਰਹੀ ਹੈ। ਪਹਿਲਾਂ ਇਸਦੀ ਸ਼ੁਰੂਆਤ ਕਾਂਗਰਸ ਦੇ ਇੰਟਰਨਲ ਐਪ ‘ਸ਼ਕਤੀ’ ਦੇ ਜ਼ਰੀਏ ਕੀਤੀ ਗਈ। ਇਸ ਵਿੱਚ ਪੰਜਾਬ ਦੇ ਕਾਂਗਰਸੀ ਵਰਕਰਾਂ ਤੋਂ ਰਾਏ ਮੰਗੀ ਗਈ। ਹੁਣ ਕਾਂਗਰਸ ਪੰਜਾਬ ਦੇ ਲੋਕਾਂ ਨੂੰ Interactive Voice Response System ਦੇ ਜ਼ਰੀਏ ਕਾਲ ਕਰ ਰਹੀ ਹੈ। ਨਾਲ ਹੀ ਹਾਈਕਮਾਂਡ ਦੇ ਨੁਮਾਇੰਦੇ ਨਿੱਜੀ ਪੱਧਰ ‘ਤੇ ਵੀ ਕਾਲ ਕਰਕੇ ਪੰਜਾਬ ਦੇ ਲੀਡਰਾਂ ਤੋਂ ਫੀਡਬੈਕ ਲੈ ਰਹੇ ਹਨ।
ਸਿੱਧੂ ‘ਤੇ ਚੰਨੀ ਦਾ ਪਲੜਾ ਭਾਰੀ
ਪੰਜਾਬ ਵਿੱਚ ਸੀਐੱਮ ਦੀ ਕੁਰਸੀ ਲਈ ਚਰਨਜੀਤ ਸਿੰਘ ਚੰਨੀ ਅਤੇ ਪੰਜਾਬ ਕਾਂਗਰਸ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਵਿਚਕਾਰ ਮੁਕਾਬਲਾ ਹੈ। ਸੂਤਰਾਂ ਦੀ ਮੰਨੀਏ, ਤਾਂ ਸਿੱਧੂ ਦੇ ਮੁਕਾਬਲੇ ਚੰਨੀ ਇਸ ਰੇਸ ਵਿੱਚ ਕਾਫੀ ਅੱਗੇ ਹਨ। ਇਸਦੇ ਪਿੱਛੇ ਕਈ ਕਾਰਨ ਹਨ। ਸਭ ਤੋਂ ਵੱਡਾ ਕਾਰਨ ਦਲਿਤ ਵੋਟ ਬੈਂਕ ਹੈ। ਚੰਨੀ ਦੇ ਜ਼ਰੀਏ ਕਾਂਗਰਸ ਇਸ ਵੋਟ ਬੈਂਕ ਤੱਕ ਪਹੁੰਚ ਕਰਨ ਦੀ ਕੋਸ਼ਿਸ਼ ਕਰ ਰਹੀ ਹੈ। ਜੇਕਰ ਚੰਨੀ ਨੂੰ ਸੀਐੱਮ ਨਹੀਂ ਬਣਾਇਆ ਗਿਆ, ਤਾਂ ਕਾਂਗਰਸ ਨੂੰ ਦਲਿਤਾਂ ਦੀ ਨਰਾਜ਼ਗੀ ਦਾ ਡਰ ਹੈ।
ਇਸ ਤੋਂ ਇਲਾਵਾ ਕਾਂਗਰਸ ਦੇ ਅੰਦਰ ਵੀ ਚੰਨੀ ਹੀ ਸਾਰਿਆਂ ਦੀ ਪਸੰਦ ਹਨ। ਪਾਰਟੀ ਦੇ ਕਈ ਵੱਡੇ ਲੀਡਰ ਖੁੱਲ੍ਹ ਕੇ ਚੰਨੀ ਦੀ ਵਕਾਲਤ ਕਰ ਚੁੱਕੇ ਹਨ, ਜਦਕਿ ਸਿੱਧੂ ਦੇ ਹੱਕ ਵਿੱਚ ਕੋਈ ਵੀ ਲੀਡਰ ਖੜ੍ਹਾ ਨਜ਼ਰ ਨਹੀਂ ਆ ਰਿਹਾ। ਹਾਲਾਂਕਿ ਸਿੱਧੂ ਦੀ ਹਾਈਕਮਾਂਡ ਨਾਲ ਨਜ਼ਦੀਕੀ ਹੈ, ਪਰ ਮੌਜੂਦਾ ਹਾਲਾਤ ਵਿੱਚ ਲਗਦਾ ਨਹੀਂ ਕਿ ਹਾਈਕਮਾਂਡ ਕੋਈ ਰਿਸਕ ਲੈਣ ਦੇ ਮੂਡ ਵਿੱਚ ਹੈ।
