ਚੰਡੀਗੜ੍ਹ। ਪੰਜਾਬ ਕਾਂਗਰਸ ਵਿੱਚ ਪਿਛਲੇ 4 ਮਹੀਨਿਆਂ ਤੋਂ ਜਾਰੀ ਉਥਲ-ਪੁਥਲ ਦੀ ਸਭ ਤੋਂ ਦਿਲਚਸਪ ਇਨਿੰਗ ਸੂਬੇ ਦੇ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਦੇ ਨਾਂਅ ਰਹੀ। ਚੰਨੀ ਨੂੰ ਕਾਂਗਰਸ ਨੇ ਆਪਣਾ ਮੁੱਖ ਮੰਤਰੀ ਅਹੁਦੇ ਦਾ ਉਮੀਦਵਾਰ ਐਲਾਨ ਦਿੱਤਾ ਹੈ। ਐਤਵਾਰ ਨੂੰ ਲੁਧਿਆਣਾ ਪਹੁੰਚੇ ਰਾਹੁਲ ਗਾਂਧੀ ਨੇ ਚੰਨੀ ਦੇ ਨਾਂਅ ਦਾ ਐਲਾਨ ਕੀਤਾ। ਹਾਲਾਂਕਿ ਰਾਹੁਲ ਨੇ ਇਸ ਫੈਸਲੇ ਨੂੰ ਕਾਂਗਰਸ ਹਾਈਕਮਾਂਡ ਦਾ ਨਹੀਂ, ਬਲਕਿ ਸੂਬੇ ਦੇ ਲੋਕਾਂ ਦਾ ਫੈਸਲਾ ਦੱਸਿਆ। ਰਾਹੁਲ ਨੇ ਇਹ ਜ਼ਰੂਰ ਕਿਹਾ ਕਿ ਉਹ ਖੁਦ ਇਸ ਫੈਸਲੇ ਨਾਲ ਸਹਿਮਤ ਹਨ।
ਕਾਂਗਰਸ ਹਾਈਕਮਾਂਡ ਤੇ ਪੰਜਾਬ ਦੇ ਲੋਕਾਂ ਦਾ ਧੰਨਵਾਦ- ਚੰਨੀ
ਸੀਐੱਮ ਚਿਹਰੇ ਦੇ ਐਲਾਨ ਮਗਰੋਂ ਚਰਨਜੀਤ ਸਿੰਘ ਚੰਨੀ ਨੇ ਕਾਂਗਰਸ ਹਾਈਕਮਾਂਡ ਅਤੇ ਪੰਜਾਬ ਦੇ ਲੋਕਾਂ ਨੂੰ ਉਹਨਾਂ ਵਿੱਚ ਭਰੋਸਾ ਵਿਖਾਉਣ ਲਈ ਧੰਨਵਾਦ ਕੀਤਾ। ਉਹਨਾਂ ਕਿਹਾ, “ਜਿਵੇਂ ਕਿ ਤੁਸੀਂ ਸਾਨੂੰ ਪਿਛਲੇ 111 ਦਿਨਾਂ ਵਿੱਚ ਪੰਜਾਬ ਨੂੰ ਅੱਗੇ ਲਿਜਾਉਣ ਲਈ ਮਿਹਨਤ ਕਰਦਿਆਂ ਵੇਖਿਆ ਹੈ, ਮੈਂ ਭਰੋਸਾ ਦਵਾਉਂਦਾ ਹਾਂ ਕਿ ਪੰਜਾਬ ਅਤੇ ਪੰਜਾਬੀਆਂ ਨੂੰ ਨਵੇਂ ਜਜ਼ਬੇ ਨਾਲ ਤਰੱਕੀ ਦੇ ਰਾਹ ‘ਤੇ ਲਿਜਾਵਾਂਗਾ।”
I sincerely thank the Congress High Command and people of Punjab for bestowing their trust in me. As you have seen us work so hard in the last 111 days to take Punjab forward, I assure you to take Punjab and Punjabis on the path of progress with new zeal and dedication. pic.twitter.com/7jW1rBhEkj
— Charanjit S Channi (@CHARANJITCHANNI) February 6, 2022
ਫੈਸਲਾ ਮੁਸ਼ਕਿਲ ਸੀ, ਤੁਸੀਂ ਆਸਾਨ ਬਣਾ ਦਿੱਤਾ- ਰਾਹੁਲ
ਰਾਹੁਲ ਗਾਂਧੀ ਨੇ ਕਿਹਾ ਕਿ ਜਦੋਂ ਉਹਨਾਂ ਨੂੰ ਸੀਐੱਮ ਕੈਂਡੀਡੇਟ ਐਲਾਨੇ ਜਾਣ ਦਾ ਕੰਮ ਦਿੱਤਾ ਗਿਆ ਸੀ, ਤਾਂ ਇਹ ਫੈਸਲਾ ਉਹਨਾਂ ਲਈ ਬੇਹੱਦ ਮੁਸ਼ਕਿਲ ਸੀ। ਉਹਨਾਂ ਕਿਹਾ ਕਿ ਬੇਸ਼ੱਕ ਫੈਸਲਾ ਮੁਸ਼ਕਿਲ ਸੀ, ਪਰ ਇਸ ਨੂੰ ਪੰਜਾਬ ਦੇ ਲੋਕਾਂ ਨੇ ਆਸਾਨ ਬਣਾ ਦਿੱਤਾ। ਉਹਨਾਂ ਕਿਹਾ, “ਅਸੀਂ ਪੰਜਾਬ ਦੇ ਲੋਕਾਂ ਨੂੰ ਪੁੱਛਿਆ, ਉਮੀਦਵਾਰਾਂ ਨੂੰ ਪੁੱਛਿਆ, ਵਰਕਰਾਂ ਨੂੰ ਪੁੱਛਿਆ, ਨੌਜਵਾਨਾਂ ਨੂੰ ਪੁੱਛਿਆ, ਵਰਕਿੰਗ ਕਮੇਟੀ ਦੇ ਮੈਂਬਰਾਂ ਨੂੰ ਪੁੱਛਿਆ। ਜੋ ਜਵਾਬ ਇਹਨਾਂ ਸਾਰਿਆਂ ਨੇ ਦਿੱਤਾ, ਉਹ ਤੁਹਾਨੂੰ ਦੱਸਣ ਜਾ ਰਿਹਾ ਹਾਂ। ਸਾਰਿਆਂ ਨੇ ਕਿਹਾ ਕਿ ਪੰਜਾਬ ਨੂੰ ਗਰੀਬ ਘਰ ਦਾ ਮੁੱਖ ਮੰਤਰੀ ਚਾਹੀਦਾ ਹੈ। ਪੰਜਾਬ ਨੂੰ ਉਸ ਸ਼ਖਸ ਦੀ ਜ਼ਰੂਰਤ ਹੈ, ਜੋ ਗਰੀਬ ਨੂੰ ਸਮਝੇ ਅਤੇ ਉਸਦੇ ਦਿਲ ਦੀ ਘਬਰਾਹਟ ਨੂੰ ਸਮਝੇ।”
ਚੰਨੀ ਦੇ ਬਹਾਨੇ ਮੋਦੀ-ਯੋਗੀ ‘ਤੇ ਨਿਸ਼ਾਨੇ
ਚੰਨੀ ਗਰੀਬ ਘਰ ਦੇ ਬੇਟੇ ਹਨ ਅਤੇ ਗਰੀਬੀ ਨੂੰ ਡੂੰਘਾਈ ਨਾਲ ਸਮਝਦੇ ਹਨ। ਚੰਨੀ ਦੇ ਦਿਲ ਅਤੇ ਖੂਨ ‘ਚ ਪੰਜਾਬ ਵੱਸਦਾ ਹੈ। ਚੰਨੀ ਮੁੱਖ ਮੰਤਰੀ ਬਣੇ, ਤਾਂ ਉਹਨਾਂ ‘ਚ ਬਿਲਕੁੱਲ ਵੀ ਹੰਕਾਰ ਨਜ਼ਰ ਨਹੀਂ ਆਇਆ। ਉਹਨਾਂ ਕਿਹਾ, “ਚੰਨੀ ਜਨਤਾ ਦੇ ਵਿਚਕਾਰ ਜਾਂਦੇ ਹਨ। ਕੀ ਤੁਸੀਂ ਕਦੇ ਪੀਐੱਮ ਮੋਦੀ ਜਾਂ ਯੂਪੀ ਦੇ ਸੀਐੱਮ ਯੋਗੀ ਆਦਿਤਿਆਨਾਥ ਨੂੰ ਲੋਕਾਂ ਦੇ ਵਿਚਕਾਰ ਜਾਂਦੇ ਵੇਖਿਆ? ਉਹ ਨਹੀਂ ਜਾਣਗੇ, ਕਿਉਂਕਿ ਉਹ ਰਾਜੇ ਹਨ।“
ਪੰਜਾਬ ‘ਚ ਪਹਿਲੀ ਵਾਰ ਬਣੇ ਅਜਿਹੇ ਹਾਲਾਤ
ਕਾਂਗਰਸ ਪਾਰਟੀ ਵਿੱਚ ਮੁੱਖ ਮੰਤਰੀ ਦੀ ਕੁਰਸੀ ਦੀ ਜੰਗ ਲਗਭਗ ਹਰ ਵਾਰ ਵੇਖਣ ਨੂੰ ਮਿਲੀ ਹੈ, ਪਰ ਅਜਿਹੇ ਹਾਲਾਤ ਪਹਿਲੀ ਵਾਰ ਬਣੇ ਹਨ ਕਿ ਪਾਰਟੀ ਨੂੰ ਇੱਕ ਲੀਡਰ ਦਾ ਨਾਂਅ ਐਲਾਨਣ ਸਮੇਂ ਦੂਜੇ ਨੂੰ ਮਨਾਉਣਾ ਮੁਸ਼ਕਿਲ ਹੋ ਗਿਆ।
2002: ਇਹਨਾਂ ਚੋਣਾਂ ਵਿੱਚ ਕੈਪਟਨ ਅਮਰਿੰਦਰ ਸਿੰਘ ਸੀਐੱਮ ਦੀ ਕੁਰਸੀ ਦੇ ਸਭ ਤੋਂ ਮਜ਼ਬੂਤ ਦਾਅਵੇਦਾਰ ਸਨ। ਉਸ ਵਕਤ ਕੈਪਟਨ ਕਾਂਗਰਸ ਦੇ ਪ੍ਰਧਾਨ ਵੀ ਸਨ। ਹਾਲਾਂਕਿ ਉਹਨਾਂ ਤੋਂ ਇਲਾਵਾ ਰਜਿੰਦਰ ਕੌਰ ਭੱਠਲ, ਪ੍ਰਤਾਪ ਸਿੰਘ ਬਾਜਵਾ ਅਤੇ ਸ਼ਮਸ਼ੇਰ ਦੂਲੋਂ ਕੁਰਸੀ ਦਾ ਦਾਅਵਾ ਠੋਕ ਰਹੇ ਸਨ। ਖੈਰ, ਅਖੀਰ ਵਿੱਚ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੂੰ ਹੀ ਬਣਾਇਆ ਗਿਆ।
2007: ਕੈਪਟਨ ਦੀ ਅਗਵਾਈ ਵਿੱਚ 5 ਸਾਲ ਸੱਤਾ ‘ਚ ਰਹਿਣ ਵਾਲੀ ਕਾਂਗਰਸ ਵਿੱਚ ਜਾਹਿਰ ਤੌਰ ‘ਤੇ ਅਮਰਿੰਦਰ ਸਿੰਘ ਇਸ ਵਾਰ ਵੀ ਮੁੱਖ ਮੰਤਰੀ ਅਹੁਦੇ ਦੇ ਦਾਅਵੇਦਾਰ ਸਨ, ਪਰ ਰਜਿੰਦਰ ਕੌਰ ਭੱਠਲ ਅਤੇ ਪ੍ਰਤਾਪ ਬਾਜਵਾ ਮੁੱਖ ਸੀਐੱਮ ਅਹੁਦੇ ਲਈ ਦਾਅਵਾ ਠੋਕਦੇ ਨਜ਼ਰ ਆਏ। ਹਾਲਾਂਕਿ ਇਹ ਚੋਣਾਂ ਅਕਾਲੀ ਦਲ-ਬੀਜਪੀ ਗਠਜੋੜ ਦੇ ਨਾਂਅ ਰਹੀਆਂ ਅਤੇ ਕਾਂਗਰਸ ਨੂੰ ਹਾਰ ਦਾ ਮੂੰਹ ਵੇਖਣਾ ਪਿਆ।
2012: ਇਹਨਾਂ ਚੋਣਾਂ ਵਿੱਚ ਇੱਕ ਵਾਰ ਫਿਰ ਕੈਪਟਨ ਅਮਰਿੰਦਰ ਸਿੰਘ, ਪ੍ਰਤਾਪ ਬਾਜਵਾ ਅਤੇ ਰਜਿੰਦਰ ਕੌਰ ਭੱਠਲ ਸੀਐੱਮ ਬਣਨ ਦੀ ਰੇਸ ਵਿੱਚ ਸਨ। ਪਰ ਚੋਣਾਂ ਤੋਂ ਕੁਝ ਹੀ ਦੇਰ ਪਹਿਲਾਂ ਮਨਪ੍ਰੀਤ ਬਾਦਲ ਨੇ ਅਕਾਲੀ ਦਲ ਛੱਡ ਕੇ ਪੀਪਲਜ਼ ਪਾਰਟੀ ਆਫ ਪੰਜਾਬ ਦਾ ਗਠਨ ਕਰ ਦਿੱਤਾ, ਜਿਸਦੇ ਚਲਦੇ ਸਮੀਕਰਨ ਇਸ ਕਦਰ ਵਿਗੜੇ ਕਿ ਕਾਂਗਰਸ ਇੱਕ ਵਾਰ ਫਿਰ ਸੱਤਾ ਵਿੱਚ ਆਉਣ ਤੋਂ ਖੁੰਝ ਗਈ ਅਤੇ ਅਕਾਲੀ ਦਲ-ਬੀਜੇਪੀ ਗਠਜੋੜ ਨੇ ਮੁੜ ਸੱਤਾ ਵਿੱਚ ਵਾਪਸੀ ਕਰ ਲਈ।
2017: ਇਹਨਾਂ ਚੋਣਾਂ ਤੋਂ 2 ਮਹੀਨੇ ਪਹਿਲਾਂ ਹੀ ਜਦੋਂ ਨਵਜੋਤ ਸਿੰਘ ਸਿੱਧੂ ਨੇ ਕਾਂਗਰਸ ਜੁਆਇਨ ਕੀਤੀ, ਤਾਂ ਉਹਨਾਂ ਨੂੰ ਸੀਐੱਮ ਦੀ ਰੇਸ ਵਿੱਚ ਵੇਖਿਆ ਜਾਣਾ ਲੱਗਿਆ। ਹਾਲਾਂਕਿ ਇਹ ਪੂਰੀ ਚੋਣ ਕੈਪਟਨ ਅਮਰਿੰਦਰ ਸਿੰਘ ਦੇ ਚਿਹਰੇ ‘ਤੇ ਲੜੀ ਜਾ ਰਹੀ ਸੀ। ਇਸ ਲਈ ਅਜਿਹਾ ਮੰਨਿਆ ਜਾਣ ਲੱਗਿਆ ਕਿ ਸਿੱਧੂ, ਕੈਪਟਨ ਤੋਂ ਬਾਅਦ ਸੂਬੇ ਵਿੱਚ ਦੂਜੇ ਨੰਬਰ ਦੇ ਲੀਡਰ ਹੋਣਗੇ।
ਦਿਲਚਸਪ ਹੈ ਕਿ ਇਹਨਾਂ ਸਾਰੀਆਂ ਚੋਣਾਂ ਦੌਰਾਨ ਸੀਐੱਮ ਦੀ ਰੇਸ ਵਿੱਚ ਦਾਅਵੇਦਾਰ ਕਈ ਸਨ, ਪਰ ਕਿਸੇ ਨੇ ਵੀ ਹਾਈਕਮਾਂਡ ਦੇ ਫੈਸਲੇ ਉੱਪਰ ਉਂਗਲ ਚੁੱਕਣ ਦੀ ਹਿਮਾਕਤ ਨਹੀਂ ਕੀਤੀ ਸੀ। ਇਸ ਵਾਰ ਹਾਈਕਮਾਂਡ ਦਾ ਪਾਲਾ ਨਵਜੋਤ ਸਿੱਧੂ ਨਾਲ ਪਿਆ ਹੈ, ਜੋ ਜਨਤੱਕ ਤੌਰ ‘ਤੇ ਹਾਈਕਮਾਂਡ ਨੂੰ ਅੱਖ ਵੀ ਵਿਖਾਉਂਦੇ ਹਨ ਅਤੇ ਆਪਣੀ ਹੀ ਸਰਕਾਰ ਦੇ ਕੰਮਕਾਜ ‘ਤੇ ਵੀ ਆਏ ਦਿਨ ਸਵਾਲ ਖੜ੍ਹੇ ਕਰਦੇ ਰਹਿੰਦੇ ਹਨ।
