ਬਿਓਰੋ। ਚੋਣ ਪ੍ਰਚਾਰ ਦੇ ਆਖਰੀ ਦਿਨ ਪੰਜਾਬ ਦੀ ਸੱਤਾ ਧਿਰ ਪਾਰਟੀ ਕਾਂਗਰਸ ਨੇ ਆਪਣਾ ਮੈਨੀਫੈਸਟੋ ਜਾਰੀ ਕਰ ਦਿੱਤਾ ਹੈ। 13 ਸੂਤਰੀ ਮੈਨੀਫੈਸਟੋ ਵਿੱਚ ਪੰਜਾਬ ਕਾਂਗਰਸ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਦੇ ਪੰਜਾਬ ਮਾਡਲ ਦੀ ਝਲਕ ਸਾਫ ਵੇਖੀ ਜਾ ਸਕਦੀ ਹੈ। ਦਿਲਚਸਪ ਇਹ ਵੀ ਰਿਹਾ ਕਿ ਮੈਨੀਫੈਸਟੋ ਨੂੰ ਜਾਰੀ ਕਰਨ ਸਮੇਂ ਕਾਂਗਰਸ ਦੀ ਮੈਨੀਫੈਸਟੋ ਕਮੇਟੀ ਦੇ ਪ੍ਰਧਾਨ ਪ੍ਰਤਾਪ ਸਿੰਘ ਬਾਜਵਾ ਹੀ ਨਜ਼ਰ ਨਹੀਂ ਆਏ।
ਜਦੋਂ ਸਿੱਧੂ ਨੂੰ ਕਹਿਣਾ ਪਿਆ, “ਚੰਨੀ ਸਰਕਾਰ, ਤੁਹਾਡੇ ਦੁਆਰ”
ਕਾਂਗਰਸ ਦੇ ਮੈਨੀਫੈਸਟੋ ਵਿੱਚ ਨੌਜਵਾਨਾਂ ਨੂੰ ਸਰਕਾਰੀ ਨੌਕਰੀ ਅਤੇ ਮਾਫੀਆ ਖਤਮ ਕਰਨ ਸਮੇਂ ਉਹਨਾਂ 170 ਸੇਵਾਵਾਂ ਨੂੰ ਵੀ ਆਨਲਾਈਨ ਕਰਨ ਦਾ ਜਿਕਰ ਹੈ, ਜਿਸਦਾ ਜਿਕਰ ਸਿੱਧੂ ਦੇ ਪੰਜਾਬ ਮਾਡਲ ਵਿੱਚ ਉਚੇਚੇ ਤੌਰ ‘ਤੇ ਹੈ। ਕਾਂਗਰਸ ਦੇ ਇਸ ਚੋਣ ਵਾਅਦੇ ਦਾ ਜਿਕਰ ਕਰਦਿਆਂ ਨਵਜੋਤ ਸਿੱਧੂ ਨੇ ਕਿਹਾ, “ਚੰਨੀ ਸਰਕਾਰ, ਤੁਹਾਡੇ ਦੁਆਰ” ਯਾਨੀ ਚੰਨੀ ਸਰਕਾਰ ਦੇ ਰਾਜ ਵਿੱਚ ਪੰਜਾਬ ਦੇ ਲੋਕਾਂ ਨੂੰ ਆਪਣੇ ਦਰਵਾਜੇ ‘ਤੇ ਹੀ ਇਹਨਾਂ ਸੇਵਾਵਾਂ ਦਾ ਫਾਇਦਾ ਮਿਲੇਗਾ।
ਪਾਰਟੀ ਦੇ ਹਿਸਾਬ ਨਾਲ ਚੱਲੇਗੀ ਸਰਕਾਰ- ਚੰਨੀ
ਨਵਜੋਤ ਸਿੱਧੂ ਦੀ ਨਰਾਜ਼ਗੀ ਦੇ ਪਿਛਲੇ 2-3 ਮਹੀਨਿਆਂ ਦੇ ਵਕਫੇ ਦੌਰਾਨ ਪੰਜਾਬ ਦੀ ਜਨਤਾ ਨੇ ਅਕਸਰ ਉਹਨਾਂ ਨੂੰ ਇਹ ਕਹਿੰਦੇ ਹੋਏ ਸੁਣਿਆ ਕਿ ਸਰਕਾਰ ਸੀਐੱਮ ਦੇ ਹਿਸਾਬ ਨਾਲ ਚੱਲਦੀ ਹੈ ਅਤੇ ਬਤੌਰ ਪਾਰਟੀ ਪ੍ਰਧਾਨ ਉਹ ਸਿਰਫ਼ ਪਾਰਟੀ ਨਾਲ ਜੁੜੇ ਕੰਮਕਾਜ ਦਾ ਭਰੋਸਾ ਦੇ ਸਕਦੇ ਹਨ। ਮੈਨੀਫੈਸਟੋ ਜਾਰੀ ਕਰਨ ਸਮੇਂ ਸਿੱਧੂ ਨੇ ਤਾਂ ਅਜਿਹਾ ਕੁਝ ਨਹੀਂ ਕਿਹਾ, ਪਰ ਚੰਨੀ ਨੂੰ ਇਹ ਜ਼ਰੂਰ ਕਹਿੰਦੇ ਹੋਏ ਸੁਣਿਆ ਗਿਆ ਕਿ ਜੇਕਰ ਕਾਂਗਰਸ ਦੀ ਸਰਕਾਰ ਸੱਤਾ ਵਿੱਚ ਆਈ, ਤਾਂ ਸਰਕਾਰ ਪਾਰਟੀ ਦੇ ਹਿਸਾਬ ਨਾਲ ਚੱਲੇਗੀ।
ਚੰਨੀ ਨੇ ਕਿਹਾ ਕਿ ਉਹਨਾਂ ਦੀ ਸਰਕਾਰ ਵਿੱਚ ਸਾਰਿਆਂ ਦੀ ਅਹਿਮ ਭੂਮਿਕਾ ਹੋਵੇਗੀ, ਖਾਸਕਰ ਨਵਜੋਤ ਸਿੰਘ ਸਿੱਧੂ ਦੀ। ਉਹਨਾਂ ਕਿਹਾ ਕਿ ਸਿੱਧੂ ਸਰਕਾਰ ਵਿੱਚ ਅਹਿਮ ਰੋਲ ‘ਚ ਹੋਣਗੇ।
ਕਾਂਗਰਸ ਮੈਨੀਫੈਸਟੋ ਦੇ 13 ਪੁਆਇੰਟਸ ਇਥੇ ਪੜ੍ਹੋ:-
- ਸਿੱਖਿਆ: ਜ਼ਰੂਰਤਮੰਦ ਵਿਦਿਆਰਥੀਆਂ ਲਈ ਸਰਕਾਰੀ ਸਕੂਲ, ਕਾਲਜ ਅਤੇ ਯੂਨੀਵਰਸਿਟੀ ‘ਚ ਪੜ੍ਹਾਈ ਮੁਫਤ ਹੋਵੇਗੀ। SC ਸਕਾਲਰਸ਼ਿਪ ਜਾਰੀ ਰਹੇਗੀ। ਸਕਾਲਰਸ਼ਿਪ ਨੂੰ BC ਅਤੇ ਜਨਰਲ ਕੈਟੇਗਰੀ ਦੇ ਗਰੀਬ ਅਤੇ ਮੱਧਵਰਗੀ ਵਿਦਿਆਰਥੀਆਂ ਨੂੰ ਵੀ ਇਸਦਾ ਲਾਭ ਮਿਲੇਗਾ।
- ਸਿਹਤ: ਸਾਰੇ ਸਰਕਾਰੀ ਹਸਪਤਾਲਾਂ ‘ਚ ਇਲਾਜ ਮੁਫਤ ਹੋਵੇਗਾ। ਹਸਪਤਾਲਾਂ ਵਿੱਚ ਇੰਫਰਾਸਟ੍ਰਕਚਰ ਵੀ ਵਧਾਇਆ ਜਾਵੇਗਾ।
- ਰੁਜ਼ਗਾਰ: ਇੱਕ ਲੱਖ ਸਰਕਾਰੀ ਨੌਕਰੀਆਂ ਦਿੱਤੀਆਂ ਜਾਣਗੀਆਂ। 5 ਸਾਲਾਂ ਵਿੱਚ 5 ਲੱਖ ਸਰਕਾਰੀ ਨੌਕਰੀਆਂ ਮਿਲਣਗੀਆਂ।
- ਮਹਿਲਾਵਾਂ: ਮਹਿਲਾਵਾਂ ਨੂੰ ਹਰ ਮਹੀਨੇ 1100 ਰੁਪਏ ਅਤੇ 8 ਗੈਸ ਸਲੰਡਰ ਮੁਫ਼ਤ ਦਿੱਤੇ ਜਾਣਗੇ।
- ਗਰਲ ਸਟੂਡੈਂਟਸ: 5ਵੀਂ ਪਾਸ ਕਰਨ ਵਾਲੀਆਂ ਵਿਦਿਆਰਥਣਾਂ ਨੂੰ 5 ਹਜਾਰ, 10ਵੀਂ ਪਾਸ ਕਰਨ ਵਾਲੀਆਂ ਨੂੰ 10 ਹਜਾਰ ਅਤੇ 12ਵੀਂ ਪਾਸ ਕਰਨ ‘ਤੇ 20 ਹਜਾਰ ਅਤੇ ਇੱਕ ਕੰਪਿਊਟਰ ਦਿੱਤਾ ਜਾਵੇਗਾ।
- ਵਪਾਰ: ਇੰਸਪੈਕਟਰ ਰਾਜ ਖਤਮ ਕਰਨ ਲਈ ਜਨਮ-ਮੌਤ ਪ੍ਰਮਾਣ ਪ੍ਰਤਰ ਸਮੇਤ 170 ਸੇਵਾਵਾਂ ਆਨਲਾਈਨ ਹੋਣਗੀਆਂ।
- ਇਨਵੈਸਟਮੈਂਟ: ਸਟਾਰਟ-ਅਪਸ ਲਈ 1000 ਕਰੋੜ ਦਾ ਇਨਵੈਸਟਮੈਂਟ ਫੰਡ ਰੱਖਿਆ ਜਾਵੇਗਾ। ਫੂਡ ਪ੍ਰੋਸੈਸਿੰਗ ਪਾਰਕ ਬਣਾਏ ਜਾਣਗੇ।
- ਮਨਰੇਗਾ: ਮਨਰੇਗਾ ਦੀ ਮਜ਼ਦੂਰੀ ਵਧਾ ਕੇ 350 ਰੁਪਏ ਕੀਤੀ ਜਾਵੇਗੀ। ਇਸ ਤੋਂ ਇਲਾਵਾ ਸਾਲ ਵਿੱਚ 100 ਦੀ ਬਜਾਏ 150 ਦਿਨਾਂ ਲਈ ਕੰਮਕਾਜ ਮਿਲੇਗਾ।
- ਪੈਨਸ਼ਨ: ਬੁਢਾਪਾ ਪੈਨਸ਼ਨ 1500 ਰੁਪਏ ਤੋਂ ਵਧਾ ਕੇ 3100 ਰੁਪਏ ਕੀਤੀ ਜਾਵੇਗੀ।
- ਮਕਾਨ: 6 ਮਹੀਨਿਆਂ ਅੰਦਰ ਹਰ ਕੱਚੇ ਮਕਾਨ ਨੂੰ ਪੱਕਾ ਕਰਵਾਇਆ ਜਾਵੇਗਾ।
- ਖੇਤੀ: ਦਾਲ, ਤੇਲ, ਬੀਜ ਅਤੇ ਮੱਕੀ ਦੀ MSP ‘ਤੇ ਖਰੀਦ ਹੋਵੇਗੀ।
- ਸਵੈ-ਰੁਜ਼ਗਾਰ: ਹੋਮ ਬੇਸਡ ਇੰਡਸਟਰੀ ਲਈ 2 ਤੋਂ 12 ਲੱਖ ਰੁਪਏ ਤੱਕ ਵਿਆਜ ਮੁਕਤ ਲੋਨ ਮਿਲੇਗਾ।
- ਮਾਫੀਆ: ਸ਼ਰਾਬ ਅਤੇ ਰੇਤ ਦਾ ਕਾਰਪੋਰੇਸ਼ਨ ਬਣੇਗਾ। ਕੇਬਲ ਦਾ ਰੇਟ 400 ਤੋਂ ਘਟਾ ਕੇ 200 ਰੁਪਏ ਕੀਤਾ ਜਾਵੇਗਾ।
