ਬਿਓਰੋ। ਪੰਜਾਬ ਵਿੱਚ ਇਹਨੀਂ ਦਿਨੀਂ ਖਾਲਿਸਤਾਨ ਅਤੇ ਅੱਤਵਾਦ ਬਾਰੇ ਕਾਫੀ ਚਰਚਾ ਹੋ ਰਹੀ ਹੈ, ਜਿਸਦਾ ਕਾਰਨ ਹੈ ‘ਆਪ’ ਦੇ ਫਾਊਂਡਰ ਮੈਂਬਰ ਕੁਮਾਰ ਵਿਸ਼ਵਾਸ ਦਾ ਉਹ ਬਿਆਨ, ਜਿਸ ਵਿੱਚ ਉਹਨਾਂ ਨੇ ਦਾਅਵਾ ਕੀਤਾ ਸੀ ਕਿ ਕੇਜਰੀਵਾਲ ਪੰਜਾਬ ਦੀਆਂ ਚੋਣਾਂ ਜਿੱਤਣ ਲਈ ਕਿਸੇ ਵੀ ਹੱਦ ਤੱਕ ਜਾ ਸਕਦੇ ਹਨ ਅਤੇ ਉਹਨਾਂ ਨੂੰ ਵੱਖਵਾਦੀਆਂ ਦੇ ਸਮਰਥਨ ਤੋਂ ਵੀ ਕੋਈ ਗੁਰੇਜ਼ ਨਹੀਂ ਹੈ। ਅਜਿਹੇ ‘ਚ ਕੇਜਰੀਵਾਲ ਨੇ ਪੰਜਾਬ ‘ਚ ਪ੍ਰਚਾਰ ਦੌਰਾਨ ਖੁਦ ਨੂੰ ‘ਸਵੀਟ ਅੱਤਵਾਦੀ’ ਅਤੇ ਭਗਤ ਸਿੰਘ ਦਾ ਚੇਲਾ ਦੱਸ ਕੇ ਸੁਰਖੀਆਂ ਬਟੋਰਨ ਦੀ ਕੋਸ਼ਿਸ਼ ਕੀਤੀ।
ਕੇਜਰੀਵਾਲ ਨੇ ਕਿਹਾ, “ਮੈਂ ਦੁਨੀਆ ਦਾ ਸਭ ਤੋਂ ਸਵੀਟ ਅੱਤਵਾਦੀ ਹਾਂ, ਜੋ ਲੋਕਾਂ ਲਈ ਹਸਪਤਾਲ ਤੇ ਸਕੂਲ ਬਣਵਾ ਕੇ ਦਿੰਦਾ ਹੈ। ਬਜੁਰਗਾਂ ਨੂੰ ਤੀਰਥ ਯਾਤਰਾ ‘ਤੇ ਭੇਜਦਾ ਹੈ।”
ਸ਼ਹੀਦ-ਏ-ਆਜ਼ਮ ਭਗਤ ਸਿੰਘ ਨਾਲ ਆਪਣੀ ਤੁਲਨਾ ਕਰਦਿਆਂ ਕੇਜਰੀਵਾਲ ਨੇ ਕਿਹਾ, “100 ਸਾਲ ਪਹਿਲਾਂ ਅੰਗ੍ਰੇਜਾਂ ਨੇ ਭਗਤ ਸਿੰਘ ਨੂੰ ਅੱਤਵਾਦੀ ਕਿਹਾ ਸੀ। 100 ਸਾਲ ਬਾਅਦ ਇਤਿਹਾਸ ਖੁਦ ਨੂੰ ਦੋਹਰਾ ਰਿਹਾ ਹੈ। ਅੱਜ ਉਹਨਾਂ ਦੇ ਸਭ ਤੋਂ ਵੱਡੇ ਚੇਲੇ ਨੂੰ ਅੱਤਵਾਦੀ ਕਿਹਾ ਜਾ ਰਿਹਾ ਹੈ।”
ਇਸ ਦੌਰਾਨ ਕੇਜਰੀਵਾਲ ਦੇ ਨਿਸ਼ਾਨੇ ‘ਤੇ ਸੱਤਾ ਧਿਰ ਕਾਂਗਰਸ ਵੀ ਰਹੀ। ਉਹਨਾਂ ਕਿਹਾ, “ਕਾਂਗਰਸ ਨੇ 5 ਸਾਲ ਪੰਜਾਬ ‘ਚ ਸਰਕਾਰ ਚਲਾਈ। ਹੁਣ ਉਹ ਕੇਜਰੀਵਾਲ ਨੂੰ ਅੱਤਵਾਦੀ ਕਹਿ ਕੇ ਵੋਟ ਮੰਗ ਰਹੇ ਹਨ। ਇਸਦਾ ਮਤਲਬ ਕੋਈ ਕੰਮ ਨਹੀਂ ਕੀਤਾ। ਕੰਮ ਕੀਤਾ ਹੁੰਦਾ, ਤਾਂ ਕੰਮ ਗਿਣਵਾਉਂਦੇ।“
1-2 ਦਿਨਾਂ ‘ਚ NIA ਦਰਜ ਕਰੇਗੀ ਕੇਸ- ਕੇਜਰੀਵਾਲ
ਇਸ ਦੌਰਾਨ ‘ਆਪ’ ਕਨਵੀਨਰ ਨੇ ਇਹ ਵੀ ਦਾਅਵਾ ਕਰ ਦਿੱਤਾ ਕਿ 1-2 ਦਿਨਾਂ ਅੰਦਰ NIA ਉਹਨਾਂ ‘ਤੇ ਕੇਸ ਦਰਜ ਕਰੇਗੀ। ਉਹਨਾਂ ਕਿਹਾ, “ਕੇਂਦਰ ਸਰਕਾਰ ਨੇ ਸੀਐੱਮ ਚਰਨਜੀਤ ਸਿੰਘ ਚੰਨੀ ਨੂੰ ਫੋਨ ਕਰਕੇ ਸ਼ਿਕਾਇਤ ਮੰਗਵਾਈ। ਅੱਜ ਮੈਨੂੰ ਇੱਕ ਅਫ਼ਸਰ ਤੋਂ ਖ਼ਬਰ ਮਿਲੀ ਹੈ ਕਿ ਮੇਰੇ ਖਿਲਾਫ਼ 1-2 ਦਿਨ ਵਿੱਚ ਕੌਮੀ ਜਾਂਚ ਏਜੰਸੀ(NIA) FIR ਦਰਜ ਕਰੇਗੀ। ਜੇਕਰ ਇਸ ਤਰ੍ਹਾਂ ਕੇਂਦਰ ਸਰਕਾਰ ਸੁਰੱਖਿਆ ਨੂੰ ਡੀਲ ਕਰੇਗੀ, ਤਾਂ ਇਹ ਚਿੰਤਾ ਦਾ ਵਿਸ਼ਾ ਹੈ।” ਦੱਸ ਦਈਏ ਕਿ ਸੀਐੱਮ ਚੰਨੀ ਨੇ ਪ੍ਰਧਾਨ ਮੰਤਰੀ ਨੂੰ ਪੱਤਰ ਲਿਖ ਕੇ ਕੁਮਾਰ ਵਿਸ਼ਵਾਸ ਦੇ ਇਲਜਾਮਾਂ ਦੀ ਜਾਂਚ ਕਰਨ ਦੀ ਮੰਗ ਕੀਤੀ ਸੀ।
‘ਮੈਂ ਭ੍ਰਿਸ਼ਟਾਚਾਰੀਆਂ ‘ਚ ਖੌਫ ਪੈਦਾ ਕਰਨ ਵਾਲਾ ਅੱਤਵਾਦੀ’
ਕੇਜਰੀਵਾਲ ਨੇ ਕਿਹਾ, “ਅੱਤਵਾਦੀ 2 ਤਰ੍ਹਾਂ ਦੇ ਹੁੰਦੇ ਹਨ। ਇੱਕ ਉਹ, ਜੋ ਜਨਤਾ ਵਿੱਚ ਖੌਫ ਫੈਲਾਉਂਦੇ ਹਨ। ਦੂਜੇ ਭ੍ਰਿਸ਼ਟਾਚਾਰੀਆਂ ‘ਚ ਖੌਫ ਪੈਦਾ ਕਰਦੇ ਹਨ। ਅੱਜ ਸਾਰੇ ਭ੍ਰਿਸ਼ਟਾਚਾਰੀ, ਚੋਰ ਤੇ ਲੁਟੇਰੇ ਇਕੱਠੇ ਹੋ ਗਏ ਹਨ। ਇਹਨਾਂ ਨੂੰ ਮੇਰੇ ਤੋਂ ਡਰ ਲੱਗ ਰਿਹਾ ਹੈ।” ਉਹਨਾਂ ਕਿਹਾ, “ਮੇਰੇ ਖਿਲਾਫ਼ ਸਾਰੇ ਵਿਰੋਧੀ ਇਕੱਠੇ ਹੋ ਗਏ ਹਨ। ਦੇਸ਼ ‘ਚ ਕਾਮੇਡੀ ਚੱਲ ਰਹੀ ਹੈ ਕਿ 10 ਸਾਲਾਂ ਤੋਂ ਕੇਜਰੀਵਾਲ ਦੇਸ਼ ਦੇ 2 ਟੁੱਕੜੇ ਕਰਨ ਦਾ ਪਲਾਨ ਬਣਾ ਰਿਹਾ ਹੈ। ਇਹਨਾਂ ਵਿੱਚੋਂ ਇੱਕ ਟੁੱਕੜੇ ਦਾ ਮੈਂ PM ਬਣ ਜਾਵਾਂਗਾ। ਇਸਦਾ ਮਤਲਬ ਮੈਂ ਬਹੁਤ ਵੱਡਾ ਅੱਤਵਾਦੀ ਹਾਂ।”
‘ਵਿਰੋਧੀਆਂ ਨੇ ਕੁਮਾਰ ਦੀ ਕਵਿਤਾ ਨੂੰ ਸੀਰੀਅਸਲੀ ਲੈ ਲਿਆ’
ਕੇਜਰੀਵਾਲ ਨੇ ਕਿਹਾ, ਕੁਮਾਰ ਵਿਸ਼ਵਾਸ ‘ਤੇ ਤੰਜ ਕਸਦਿਆਂ ਕੇਜਰੀਵਾਲ ਨੇ ਕਿਹਾ, “ਹੋ ਸਕਦਾ ਹੈ ਕਿ ਕੁਮਾਰ ਵਿਸ਼ਵਾਸ ਨੇ ਹਾਸ ਕਵਿਤਾ ਕੀਤੀ ਹੋਵੇ, ਜਿਸ ਨੂੰ ਵਿਰੋਧੀਆਂ ਨੇ ਸੀਰੀਅਸਲੀ ਲੈ ਲਿਆ। ਉਹ ਤਾਂ ਕਵੀ ਹੈ, ਕੁਝ ਵੀ ਕਹਿ ਦਿੰਦਾ ਹੈ।”
