ਬਿਓਰੋ। ਪੰਜਾਬ ਵਿੱਚ ਪਿਛਲੀਆਂ ਚੋਣਾਂ ਦੇ ਮੁਕਾਬਲੇ ਇਸ ਵਾਰ ਵੋਟਿੰਗ ਵਿੱਚ 5 ਫੀਸਦ ਦੀ ਗਿਰਾਵਟ ਦੇ ਚਲਦੇ ਸਿਆਸੀ ਪਾਰਟੀਆਂ ਸ਼ਸ਼ੋਪੰਜ ਵਿੱਚ ਹਨ। ਵੋਟਿੰਗ ਵਿੱਚ ਇਸ ਗਿਰਾਵਟ ਨਾਲ ਕਿਸ ਨੂੰ ਫਾਇਦਾ ਹੋਵੇਗਾ ਅਤੇ ਕਿਸਦੇ ਸੁਫਨੇ ਚਕਨਾਚੂਰ ਹੋਣਗੇ, ਇਸ ‘ਤੇ ਸਿਆਸੀ ਮਾਹਰਾਂ ਦੀ ਵੱਖੋ-ਵੱਖਰੀ ਰਾਏ ਸਾਹਮਣੇ ਆ ਰਹੀ ਹੈ। ਕੋਈ ਇਸ ਨੂੰ ਸੱਤਾ ਧਿਰ ਕਾਂਗਰਸ ਲਈ ਫਾਇਦੇਮੰਦ ਦੱਸ ਰਿਹਾ ਹੈ, ਤਾਂ ਕੋਈ ਆਮ ਆਦਮੀ ਪਾਰਟੀ ਅਤੇ ਅਕਾਲੀ ਦਲ ਦੀ ਮਜਬੂਤੀ ਦੇ ਸੰਕੇਤ ਦੇ ਰਿਹਾ ਹੈ।
ਕੁੱਲ ਮਿਲਾ ਕੇ ਵੋਟਿੰਗ ਟ੍ਰੈਂਡ ਤੋਂ ਬਾਅਦ ਪੰਜਾਬ ਵਿੱਚ ਹੰਗ ਅਸੈਂਬਲੀ ਦੇ ਸੰਕੇਤ ਮਿਲ ਰਹੇ ਹਨ ਅਤੇ ਜੇਕਰ ਅਜਿਹਾ ਹੋਇਆ, ਤਾਂ ਸਭ ਤੋਂ ਵੱਧ ਸੰਭਾਵਨਾ ਅਕਾਲੀ ਦਲ ਅਤੇ ਬੀਜੇਪੀ ਦੇ ਨਾਲ ਆਉਣ ਦੀ ਹੈ, ਜਿਸ ਵਿੱਚ ਕੈਪਟਨ ਅਮਰਿੰਦਰ ਸਿੰਘ ਵੀ ਨਾਲ ਹੋਣਗੇ। ਹਾਲਾਂਕਿ ਇਹ ਸਭ ਵੋਟਾਂ ਦੀ ਗਿਣਤੀ ਪਾਰਟੀਆਂ ਨੂੰ ਮਿਲੀ ਸੀਟਾਂ ‘ਤੇ ਨਿਰਭਰ ਕਰੇਗਾ।
ਅਮਿਤ ਸ਼ਾਹ ਨੇ ਦਿੱਤੇ ਸੰਕੇਤ
ਹੰਗ ਅਸੈਂਬਲੀ ਦੀਆਂ ਸੰਭਾਵਨਾਵਾਂ ਵਿਚਾਲੇ ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨੇ ਵੱਡਾ ਬਿਆਨ ਦਿੱਤਾ ਹੈ। ਸ਼ਾਹ ਨੇ ਕਿਹਾ ਕਿ ਜੇਕਰ ਹੰਗ ਅਸੈਂਬਲੀ ਦੀ ਨੌਬਤ ਆਈ, ਤਾਂ 2-3 ਪਾਰਟੀਆਂ ਗਠਜੋੜ ਕਰਕੇ ਸਰਕਾਰ ਬਣਾ ਸਕਦੀਆਂ ਹਨ। ਸ਼ਾਹ ਨੇ ਪੰਜਾਬ ਵਿੱਚ ਰਾਸ਼ਟਰਪਤੀ ਸ਼ਾਸਨ ਦੀਆਂ ਸੰਭਾਵਨਾਵਾਂ ਤੋਂ ਇਨਕਾਰ ਕੀਤਾ ਹੈ। ਇਸ ਤੋਂ ਪਹਿਲਾਂ ਅਕਾਲੀ ਆਗੂ ਬਿਕਰਮ ਸਿੰਘ ਮਜੀਠੀਆ ਵੀ ਕਹਿ ਚੁੱਕੇ ਹਨ ਕਿ ਚੋਣਾਂ ਦੇ ਨਤੀਜਿਆਂ ਤੋਂ ਬਾਅਦ ਬੀਜੇਪੀ ਨਾਲ ਗਠਜੋੜ ਮੁਮਕਿਨ ਹੈ।
ਕਾਂਗਰਸ-AAP ‘ਚ ਵੀ ਗਠਜੋੜ ਦੀ ਚਰਚਾ
ਕਾਂਗਰਸ ਅਤੇ ਆਮ ਆਦਮੀ ਪਾਰਟੀ ਦੇ ਨਾਲ ਆਉਣ ਦੀ ਵੀ ਚਰਚਾ ਹੈ। ਅਜਿਹਾ ਪਹਿਲਾਂ ਉਹ ਦਿੱਲੀ ਵਿੱਚ ਵੀ ਕਰ ਚੁੱਕੇ ਹਨ। ਹਾਲਾਂਕਿ ਦਿੱਲੀ ਵਿੱਚ ਨਿਗਮ ਚੋਣਾਂ ਹੋਣੀਆਂ ਹਨ, ਅਜਿਹੇ ਵਿੱਚ ਉਥੇ ਉਹਨਾਂ ਨੂੰ ਨੁਕਸਾਨ ਹੋ ਸਕਦਾ ਹੈ। ਕਾਂਗਰਸ ਦੇ ਨਾਲ ਦੂਜੀ ਕਿਸੇ ਪਾਰਟੀ ਦਾ ਗਠਜੋੜ ਸੰਭਵ ਨਹੀਂ ਲੱਗਦਾ।
ਇੱਕ ਸੰਭਾਵਨਾ ਇਹ ਵੀ, ਪਰ ਮੁਸ਼ਕਿਲ
ਅਕਾਲੀ ਦਲ ਅਤੇ ਆਮ ਆਦਮੀ ਪਾਰਟੀ ਦੇ ਗਠਜੋੜ ਦੀ ਵੀ ਸੰਭਾਵਨਾ ਬਣ ਸਕਦੀ ਹੈ। ਹਾਲਾਂਕਿ ਅਜਿਹਾ ਹੋਣਾ ਮੁਸ਼ਕਿਲ ਨਜ਼ਰ ਆਉਂਦਾ ਹੈ। ਇਸ ਵਾਰ ‘ਆਪ’ ਦੇ ਨਿਸ਼ਾਨੇ ‘ਤੇ ਜਿਆਦਾਤਰ ਸੀਐੱਮ ਚਰਨਜੀਤ ਸਿੰਘ ਚੰਨੀ ਰਹੇ। ਹਾਲਾਂਕਿ ਅਕਾਲੀ ਦਲ ਨੇ ਬਾਹਰੀ ਪਾਰਟੀ ਦੱਸ ਕੇ ‘ਆਪ’ ‘ਤੇ ਹਮਲੇ ਬੋਲੇ। ‘ਆਪ’ ਨਾਲ ਗਠਜੋੜ ਕੀਤਾ, ਤਾਂ ਇਹ ਅਕਾਲੀ ਦਲ ਦੇ ਖੇਤਰੀ ਅਧਾਰ ਲਈ ਹੀ ਮੁਸੀਬਤ ਬਣੇਗਾ।
