ਪੰਜਾਬ ਪੁਲਿਸ ਦੇ ਨਵੇਂ ਬਣੇ ਡੀਜੀਪੀ ਗੌਰਵ ਯਾਦਵ ਵਲੋਂ ਪੁਲਿਸ ਮਹਿਕਮੇ ਦੀ ਕਮਾਨ ਸਾਂਭਣ ਤੋਂ ਬਾਅਦ ਅੱਜ ਪੂਰੇ ਪੰਜਾਬ ਵਿਚ ਵਿਆਪਕ ਪੱਧਰ ਉਤੇ Cordon and Search Operation CASO ਮੁਹਿੰਮ ਦੇ ਤਹਿਤ ਛਾਪੇਮਾਰੀ ਕੀਤੀ ਗਈ। ਹਰ ਜ਼ਿਲ੍ਹੇ ਵਿੱਚ ਆਈ ਜੀ, ਅਤੇ ਏਡੀਜੀਪੀ ਪੱਧਰ ਦੇ ਅਧਿਕਾਰੀਆਂ ਨੇ ਖੁਦ ਸੜਕਾਂ ਤੇ ਉਤਰ ਕੇ ਇਸ ਮੁਹਿੰਮ ਦੀ ਅਗਵਾਈ ਕੀਤੀ। ਪੰਜਾਬ ਪੁਲਸ ਦੇ ਇਸ ਅਪ੍ਰੇਸ਼ਨ ਨੂੰ CASO ਨਾਂਅ ਦਿੱਤਾ ਗਿਆ ਜਿਸ ਦੀ ਅਗਵਾਈ ਖੁਦ ਪੰਜਾਬ ਦੇ ਡੀਜੀਪੀ ਗੌਰਵ ਯਾਦਵ ਨੇ ਕੀਤੀ।
ਡੀਜੀਪੀ ਗੌਰਵ ਯਾਦਵ ਰੋਪੜ ਰੇਂਜ ਦੇ ਡੀਆਈਜੀ ਗੁਰਪ੍ਰੀਤ ਭੁੱਲਰ ਅਤੇ ਮੋਹਾਲੀ ਦੇ ਐਸ ਐਸ ਪੀ ਜ਼ਿਲ੍ਹੇ ਦੀਆਂ ਅਲੱਗ-ਅਲੱਗ ਰਿਹਾਇਸ਼ੀ ਕਲੌਨੀਆਂ ਵਿਚ ਛਾਪੇਮਾਰੀ ਕਰਦੇ ਹੋਏ ਖੁਦ ਵੇਖੇ ਗਏ। ਇਹ ਆਪ੍ਰੇਸ਼ਨ ਪੰਜਾਬ ਦੇ ਸਮੂਹ ਜ਼ਿਲ੍ਹਿਆਂ ਵਿੱਚ ਏਡੀਜੀਪੀ ਤੋਂ ਲੈ ਕੇ SSP ਪੱਧਰ ਦੇ ਅਧਿਕਾਰੀਆਂ ਦੀ ਵਿਅਕਤੀਗਤ ਸ਼ਮੂਲੀਅਤ ਨਾਲ ਹੀ ਅੰਜਾਮ ਦਿੱਤੇ ਗਏ।
ਹਰ ਜ਼ਿਲੇ ਦੇ SSP ਯਾ ਤਾਂ ਜ਼ੋਨਲ ਆਈ ਜੀਆਂ ਯਾ ਫੇਰ ਵਧੀਕ ਪੁਲਿਸ ਅਫਸਰਾ ਦੇ ਨਾਲ ਛਾਪੇਮਾਰੀ ਕਰਦੇ ਹੋਏ ਵੇਖੇ ਗਏ। ਲੁਧਿਆਣਾ, ਪਟਿਆਲਾ, ਜਲੰਧਰ, ਅੰਮ੍ਰਿਤਸਰ, ਗੁਰਦਾਸਪੁਰ, ਮੋਗਾ, ਰੋਪੜ, ਫਰੀਦਕੋਟ ਅਤੇ ਹੁਸ਼ਿਆਰਪੁਰ ਸਮੇਤ ਸਾਰੇ ਜ਼ਿਲਿਆਂ ਦੀ ਪੁਲਿਸ ਫੋਰਸ ਨੂੰ ਇਸ ਆਪ੍ਰੇਸ਼ਨ ਵਿਚ ਪੂਰੀ ਤਰ੍ਹਾਂ ਲਾਮਬੰਦ ਕੀਤਾ ਗਿਆ ਜਿਸ ਤਹਿਤ ਘਰ-ਘਰ ਤਲਾਸ਼ੀਆਂ ਲਈਆਂ ਗਈਆਂ।
ਪੰਜਾਬ ਵਿੱਚ ਆਪਣੇ ਪੱਧਰ ਉੱਤੇ ਸੀਨੀਅਰ ਅਫਸਰਾਂ ਦੀ ਹਾਜ਼ਰੀ ਵਿੱਚ ਐਡੇ ਵੱਡੇ ਪੱਧਰ ਦਾ ਵਿਆਪਕ ਓਪਰੇਸ਼ਨ ਪਹਿਲੀ ਵਾਰ ਕੀਤਾ ਗਿਆ। ਜ਼ਿਕਰਯੋਗ ਹੈ ਪੁਲਿਸ ਫੋਰਸ ਦੇ ਡਿੱਗੇ ਹੋਏ ਮਨੋਬਲ ਨੂੰ ਚੁੱਕਣ ਦੇ ਪੱਖੋਂ ਅਤੇ ਅਪਰਾਧਿਕ ਅਨਸਰਾਂ ਦੀ ਧੜ ਪਕੜ ਦੇ ਨਜ਼ਰੀਏ ਨਾਲ ਨਵੇਂ ਡੀਜੀਪੀ ਦੀ ਇਸ ਪਹਿਲ ਕਦਮੀ ਨੂੰ ਕਾਫੀ ਮਹੱਤਵਪੂਰਨ ਮੰਨਿਆ ਜਾ ਰਿਹਾ ਹੈ। ਕਈ ਮਹੀਨਿਆਂ ਤੋਂ ਸੂਬੇ ਵਿੱਚ ਲਗਾਤਾਰ ਵਧ ਰਹੇ ਕ੍ਰਾਇਮ ਦੇ ਗ੍ਰਾਫ ਨੂੰ ਠੱਲ੍ਹ ਪਾਉਣ ਲਈ ਪੁਲਿਸ ਰੈਂਕ ਐਂਡ ਫਾਈਲ ਦਾ ਹਰਕਤ ਵਿਚ ਆਉਣਾ ਕਾਫੀ ਜ਼ਰੂਰੀ ਮੰਨਿਆ ਜਾ ਰਿਹਾ ਹੈ।
