September 18, 2022
(Bureau Report)
ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਦੇ ਜਰਮਨੀ ਦੌਰੇ ਤੋਂ ਵਾਪਸੀ ਨੂੰ ਲੈ ਕੇ ਵਿਵਾਦ ਛਿੜ ਗਿਆ ਹੈ। ਖ਼ਬਰ ਹੈ ਕਿ ਮੁੱਖ ਮੰਤਰੀ ਆਮ ਆਦਮੀ ਪਾਰਟੀ ਦੇ ਪ੍ਰਤੀਨਿਧੀ ਸੰਮੇਲਨ ‘ਚ ਇਸ ਲਈ ਨਹੀੰ ਪਹੁੰਚ ਸਕੇ, ਕਿਉੰਕਿ ਫਰੈਂਕਫਰਟ ਤੋਂ ਦਿੱਲੀ ਜਾਣ ਵਾਲੀ Lufthansa Airlines ਦੀ ਫਲਾਈਟ ‘ਚ ਉਹਨਾਂ ਨੂੰ ਯਾਤਰਾ ਦੀ ਇਜਾਜ਼ਤ ਨਹੀੰ ਦਿੱਤੀ ਗਈ। ਵੈੱਬਸਾਈਟ India Narrative ਦੀ ਰਿਪੋਰਟ ਵਿੱਚ ਇਹ ਦਾਅਵਾ ਕੀਤਾ ਗਿਆ ਹੈ।
ਸ਼ਰਾਬ ਪੀਣ ਕਰਕੇ ਨਹੀੰ ਉਡਾਣ ਦੀ ਇਜਾਜ਼ਤ !
ਵੈੱਬਸਾਈਟ ਦੀ ਰਿਪੋਰਟ ਮੁਤਾਬਕ, ਸੀਐੱਮ ਭਗਵੰਤ ਮਾਨ ਨੇ 17 ਸਤੰਬਰ ਦੀ ਰਾਤ ਨੂੰ ਫਰੈੰਕਫਰਟ ਤੋੰ ਉਡਾਣ ਭਰਨੀ ਸੀ। ਇਸੇ ਫਲਾਈਟ ਵਿੱਚ ਸਫ਼ਰ ਕਰਨ ਵਾਲੇ ਇੱਕ ਭਾਰਤੀ ਨਾਗਰਿਕ ਨੇ ਇਹ ਦਾਅਵਾ ਕੀਤਾ ਹੈ ਕਿ ਜਦੋੰ ਸੀਐੱਮ ਉਥੇ ਪਹੁੰਚੇ, ਤਾਂ ਸ਼ਰਾਬ ਦੇ ਵੱਧ ਸੇਵਨ ਕਰਕੇ ਉਹ ਆਪਣੇ ਪੈਰਾਂ ‘ਤੇ ਵੀ ਖੜ੍ਹੇ ਨਹੀੰ ਹੋ ਪਾ ਰਹੇ ਸਨ। ਉਹਨਾਂ ਨੂੰ ਆਪਣੀ ਪਤਨੀ ਅਤੇ ਸੁਰੱਖਿਆ ਕਰਮੀਆੰ ਦਾ ਸਹਾਰਾ ਲੈਣਾ ਪੈ ਰਿਹਾ ਸੀ।
ਸਾਮਾਨ ਉਤਾਰਨ ਦੇ ਚਲਦੇ 4 ਘੰਟੇ ਦੀ ਦੇਰੀ !
ਯਾਤਰੀ ਨੇ ਦੱਸਿਆ ਕਿ ਫਲਾਈਟ ਦੀ ਰਵਾਨਗੀ ਵਿੱਚ 4 ਘੰਟੇ ਤੋਂ ਵੱਧ ਦੀ ਦੇਰੀ ਵੀ ਇਸ ਲਈ ਹੋਈ, ਕਿਉਂਕਿ ਮੁੱਖ ਮੰਤਰੀ ਅਤੇ ਉਹਨਾਂ ਦੀ ਟੀਮ ਦਾ ਸਾਮਾਨ ਜਹਾਜ਼ ਵਿੱਚ ਪਹਿਲਾਂ ਲੱਦਿਆ ਜਾ ਚੁੱਕਿਆ ਸੀ, ਜੋ ਬਾਅਦ ਵਿੱਚ ਉਤਾਰਨਾ ਪਿਆ। ਉਨ੍ਹਾਂ ਇਹ ਵੀ ਕਿਹਾ ਕਿ ਪੰਜਾਬ ਸਰਕਾਰ ਦੇ ਅਧਿਕਾਰੀਆਂ ਨੇ ਲੁਫਥਾਂਸਾ ਫਲਾਈਟ ਦੇ ਅਮਲੇ ਨੂੰ ਮਾਨ ਨੂੰ ਨਾ ਉਤਾਰਨ ਦੀ ਅਪੀਲ ਕੀਤੀ, ਜਿਸਦੇ ਲਈ ਅਗਲੇ ਦਿਨ ਤੈਅ ਅਹਿਮ ਪ੍ਰੋਗਰਾਮਾਂ ਦਾ ਤਰਕ ਦਿੱਤਾ ਗਿਆ, ਪਰ ਫਲਾਈਟ ਅਮਲੇ ਨੇ ਆਪਣੇ ਸੁਰੱਖਿਆ ਨਿਯਮਾਂ ਨਾਲ ਸਮਝੌਤਾ ਕਰਨ ਤੋਂ ਇਨਕਾਰ ਕਰ ਦਿੱਤਾ।
‘ਆਪ’ ਅਤੇ ਸਰਕਾਰੀ ਬੁਲਾਰਿਆਂ ਦੇ ਬਿਆਨਾਂ ‘ਚ ਮਤਭੇਦ
ਵੈੱਬਸਾਈਟ ਵਿੱਚ ‘ਆਪ’ ਦੇ ਮੀਡੀਆ ਕਮਿਊਨੀਕੇਸ਼ਨ ਦੇ ਡਾਇਰੈਕਟਰ ਚੰਦਰ ਸੁਤਾ ਡੋਗਰਾ ਦੇ ਛਪੇ ਬਿਆਨ ਮੁਤਾਬਕ, “ਮੁੱਖ ਮੰਤਰੀ ਥੋੜ੍ਹਾ ਬੀਮਾਰ ਸਨ ਅਤੇ ਘਰ ਵਾਪਸੀ ਲਈ ਐਤਵਾਰ ਰਾਤ ਨੂੰ ਫਰੈਂਕਫਰਟ ਤੋਂ ਉਡਾਣ ਭਰਨਗੇ।” ਪ੍ਰਤੀਨਿਧੀ ਸੰਮੇਲਨ ਵਿੱਚ ਸ਼ਾਮਲ ਨਾ ਹੋਣ ਬਾਰੇ ਪੁੱਛੇ ਸਵਾਲ ‘ਤੇ ਉਹਨਾਂ ਕਿਹਾ ਕਿ ਮਾਨ ਨੇ ‘ਆਪ’ ਦੇ ਸਾਰੇ ਸੰਮੇਲਨ ਨੂੰ ਸੰਬੋਧਨ ਕੀਤਾ। ਪਾਰਟੀ ਦੇ ਚੁਣੇ ਹੋਏ ਨੁਮਾਇੰਦਿਆਂ ਨਾਲ ਵੀਡੀਓ ਕਾਨਫਰੰਸਿੰਗ ਰਾਹੀਂ ਦਿੱਲੀ ਵਿੱਚ ਮੀਟਿੰਗ ਕੀਤੀ ਗਈ। ਉਹਨਾਂ ਕਿਹਾ ਕਿ ਸਾਰੇ ਰਾਸ਼ਟਰੀ ਟੀਵੀ ਚੈਨਲ ਉਸਨੂੰ ਸੰਮੇਲਨ ਵਿੱਚ ਹਿੱਸਾ ਲੈਂਦੇ ਦਿਖਾ ਰਹੇ ਸਨ।
ਚੰਡੀਗੜ੍ਹ ਵਿੱਚ ‘ਆਪ’ ਦੇ ਬੁਲਾਰੇ ਮਲਵਿੰਦਰ ਸਿੰਘ ਕੰਗ ਨੇ ਵੀ ਭਗਵੰਤ ਮਾਨ ਨੂੰ ਫਲਾਈਟ ਤੋੰ ਉਤਾਰੇ ਜਾਣ ਦੀ ਖ਼ਬਰ ਨੂੰ ‘ਬਕਵਾਸ’ ਕਹਿ ਕੇ ਖਾਰਜ ਕੀਤਾ। ਉਹਨਾਂ ਕਿਹਾ ਕਿ ਲੋਕ ਬਹੁਤ ਸਾਰੀਆਂ ਬਕਵਾਸ ਗੱਲਾਂ ਕਹਿੰਦੇ ਰਹਿੰਦੇ ਹਨ। ਉਹਨਾੰ ਜ਼ੋਰ ਦੇ ਕੇ ਕਿਹਾ ਕਿ ਮੁੱਖ ਮੰਤਰੀ ਅਗਲੇ ਦੋ ਜਾਂ ਤਿੰਨ ਦਿਨਾਂ ਵਿੱਚ ਵਾਪਸ ਆ ਜਾਣਗੇ।
ਓਧਰ CMO ਦੇ ਮੀਡੀਆ ਇੰਚਾਰਜ ਨਵਨੀਤ ਵਧਵਾ ਇਹਨਾਂ ਬਿਆਨਾਂ ਦੇ ਉਲਟ ਹੀ ਦਾਅਵਾ ਕਰ ਰਹੇ ਹਨ। ਵਾਧਵਾ ਦਾ ਕਹਿਣਾ ਹੈ ਕਿ ਉਹਨਾਂ ਕੋਲ ਉਪਲਬੱਧ ਪ੍ਰੋਗਰਾਮ ਮੁਤਾਬਕ, ਸੀਐੱਮ ਨੇ 18 ਸਤੰਬਰ ਤੱਕ ਜਰਮਨੀ ਵਿੱਚ ਹੀ ਰਹਿਣਾ ਸੀ ਅਤੇ 18 ਸਤੰਬਰ ਦੀ ਰਾਤ ਉਡਾਣ ਭਰਨੀ ਸੀ। ਸ਼ਡਿਊਲ ਬਾਰੇ ਪੁੱਛੇ ਜਾਣ ‘ਤੇ ਉਹਨਾਂ ਨੇ ਸ਼ਡਿਊਲ ਭੇਜੇ ਜਾਣ ਦੀ ਵੀ ਗੱਲ ਕਹੀ, ਪਰ ਭੇਜਿਆ ਨਹੀੰ।
18 ਸਤੰਬਰ ਦਾ ਸੰਮੇਲਨ ਤੈਅ ਨਹੀੰ ਸੀ..?
ਅਜਿਹੇ ਵਿੱਚ ਸਵਾਲ ਇਹ ਉਠਦਾ ਹੈ ਕਿ ਆਮ ਆਦਮੀ ਪਾਰਟੀ ਦਾ ਇੰਨਾ ਅਹਿਮ ਸੰਮੇਲਨ ਸੀਐੱਮ ਭਗਵੰਤ ਮਾਨ ਦੇ ਤੈਅ ਸ਼ਡਿਊਲ ਵਿੱਚ ਨਹੀੰ ਸੀ, ਜੋ ਮੁੱਖ ਮੰਤਰੀ ਦੀ ਫਲਾਈਟ ਹੀ ਸ਼ਡਿਊਲ ਨਹੀੰ ਹੋ ਸਕੀ? ਕਿਉੰਕਿ ਆਪਰੇਸ਼ਨ ਲੋਟਸ ਦੇ ਇਲਜ਼ਾਮਾਂ ਦੀ ਰੋਸ਼ਨੀ ਵਿੱਚ ਭਗਵੰਤ ਮਾਨ ਦੀ ਸ਼ਮੂਲੀਅਤ ਇਸ ਸੰਮੇਲਨ ਲਈ ਕਿੰਨੀ ਜ਼ਰੂਰੀ ਹੈ, ਇਹ ਸਮਝਣਾ ਮੁਸ਼ਕਿਲ ਨਹੀੰ ਹੈ।
ਇੱਕ ਹਫ਼ਤੇ ਦੇ ਜਰਮਨੀ ਦੌਰੇ ‘ਤੇ ਗਏ ਸਨ ਮੁੱਖ ਮੰਤਰੀ
ਦੱਸ ਦਈਏ ਕਿ ਮੁੱਖ ਮੰਤਰੀ ਭਗਵੰਤ ਮਾਨ 11 ਸਤੰਬਰ ਨੂੰ ਜਰਮਨੀ ਗਏ ਸਨ ਅਤੇ 18 ਸਤੰਬਰ ਨੂੰ ਵਾਪਸ ਆਉਣਾ ਸੀ। ਉਨ੍ਹਾਂ ਨੇ ਮਿਊਨਿਖ, ਫਰੈਂਕਫਰਟ ਅਤੇ ਬਰਲਿਨ ਦਾ ਦੌਰਾ ਕੀਤਾ ਅਤੇ ਪੰਜਾਬ ਲਈ ਨਿਵੇਸ਼ ਦੀ ਮੰਗ ਕੀਤੀ। ਸੀਐੱਮ ਨੇ ਵਿਸ਼ਵ ਦੇ ਪ੍ਰਮੁੱਖ ਵਪਾਰ ਮੇਲੇ, DRINKTEC 2022 ਵਿੱਚ ਵੀ ਸ਼ਿਰਕਤ ਕੀਤੀ। ਉਹਨਾੰ ਦੇ ਨਾਲ ਪਤਨੀ ਅਤੇ ਸੁਰੱਖਿਆ ਕਰਮੀਆਂ ਤੋਂ ਇਲਾਵਾ ਹੋਰ ਸੀਨੀਅਰ ਅਧਿਕਾਰੀ ਵੀ ਮੌਜੂਦ ਰਹੇ।
