September 28, 2022
(Chandigarh)
ਪੰਜਾਬ ਵਿੱਚ ਮੁੱਖ ਮੰਤਰੀ ਦੀ ਸੁਰੱਖਿਆ ਵਿੱਚ ਸ਼ਾਮਲ ਗੱਡੀਆਂ ਦੇ ਕਾਫਲੇ ਨੂੰ ਲੈ ਕੇ RTI ਵਿੱਚ ਵੱਡਾ ਖੁਲਾਸਾ ਹੋਇਆ ਹੈ। ਵਿਰੋਧੀ ਧਿਰ ਦੇ ਲੀਡਰ ਪ੍ਰਤਾਪ ਬਾਜਵਾ ਵੱਲੋਂ ਸ਼ੇਅਰ ਕੀਤੇ RTI ਦੇ ਅੰਕੜੇ ਦੱਸਦੇ ਹਨ ਕਿ ਮੁੱਖ ਮੰਤਰੀ ਭਗਵੰਤ ਮਾਨ ਦੇ ਕਾਫਲੇ ਵਿੱਚ 42 ਗੱਡੀਆਂ ਹਨ, ਜਦਕਿ ਪ੍ਰਕਾਸ਼ ਸਿੰਘ ਬਾਦਲ ਅਤੇ ਕੈਪਟਨ ਅਮਰਿੰਦਰ ਸਿੰਘ ਦੇ ਸਮੇਂ ਇਹ ਗਿਣਤੀ 33 ਹੁੰਦੀ ਸੀ।
RTI ਦੇ ਅੰਕੜੇ ਟਵਿਟਰ ‘ਤੇ ਸ਼ੇਅਰ ਕਰਦਿਆੰ ਪ੍ਰਤਾਪ ਬਾਜਵਾ ਨੇ ਲਿਖਿਆ, “ਜਦੋਂ 2007 ਤੋਂ 17 ਤੱਕ ਪ੍ਰਕਾਸ਼ ਸਿੰਘ ਬਾਦਲ ਮੁੱਖ ਮੰਤਰੀ ਸਨ ਤਾਂ ਉਨ੍ਹਾਂ ਦੇ ਕਾਫ਼ਲੇ ਵਿੱਚ 33 ਗੱਡੀਆਂ ਸਨ। ਜਦੋਂ ਕੈਪਟਨ ਅਮਰਿੰਦਰ ਸਿੰਘ ਮੁੱਖ ਮੰਤਰੀ ਬਣੇ, ਤਾਂ ਗੱਡੀਆਂ ਦੀ ਗਿਣਤੀ ਵਿੱਚ ਕੋਈ ਬਦਲਾਅ ਨਹੀਂ ਕੀਤਾ ਗਿਆ। ਪਰ RTI ਰਾਹੀਂ ਇਹ ਖੁਲਾਸਾ ਹੋਇਆ ਹੈ ਕਿ ਮੁੱਖ ਮੰਤਰੀ ਮਾਨ “ਅਖੌਤੀ ਆਮ ਆਦਮੀ” ਦੇ ਕਾਫ਼ਲੇ ਵਿੱਚ 42 ਕਾਰਾਂ ਹਨ।”
CM ਮਾਨ ਨੂੰ ਸਵਾਲ ਕਰਦਿਆਂ ਬਾਜਵਾ ਨੇ ਕਿਹਾ, “ਪਹਿਲਾਂ ਸੀਐੱਮ ਮਾਨ ਪੁੱਛਦੇ ਹੁੰਦੇ ਸਨ ਕਿ ਇੰਨੀਆਂ ਸਾਰੀਆਂ ਗੱਡੀਆਂ ਦੇ ਕਾਫਲੇ ਨਾਲ ਰਾਜੇ ਅਤੇ ਮਹਾਰਾਜੇ ਕੀ ਕਰਦੇ ਹਨ? ਕੀ ਹੁਣ ਖੁਦ ਸੀਐੱਮ ਮਾਨ ਇਹ ਸਪੱਸ਼ਟ ਕਰਨਗੇ ਕਿ ਉਹ 42 ਵਾਹਨਾਂ ਦੇ ਕਾਫਲੇ ਨਾਲ ਕੀ ਕਰ ਰਹੇ ਹਨ? ਕੀ ਇਸ ਬਦਲਾਅ ਦਾ ਵਾਅਦਾ ਹੋਇਆ ਸੀ?”
In the past Mr Mann used to question what “kings & maharajas” do with convoy of so many vehicles? Will CM Mann himself clarify now what he is doing with the convoy of 42 vehicles? Is this the Badlav AAP promised?
— Partap Singh Bajwa (@Partap_Sbajwa) September 28, 2022
ਚਰਨਜੀਤ ਸਿੰਘ ਚੰਨੀ ਵੀ ਪਿੱਛੇ ਨਹੀਂ !!
ਬੇਸ਼ੱਕ ਵਿਰੋਧੀ ਧਿਰ ਹੋਣ ਦੇ ਨਾਤੇ ਪ੍ਰਤਾਪ ਸਿੰਘ ਬਾਜਵਾ ਇਸ RTI ਵਿੱਚ ਮਹਿਜ਼ ਭਗਵੰਤ ਮਾਨ ਦਾ ਕਾਫਲਾ ਹੀ ਵੇਖ ਸਕੇ, ਪਰ ਇਸੇ RTI ਦੇ ਅੰਕੜੇ ਇਹ ਵੀ ਦੱਸਦੇ ਹਨ ਕਿ 20 ਸਤੰਬਰ, 2021 ਤੋਂ 16 ਮਾਰਚ, 2022 ਤੱਕ ਦੇ ਸਮੇਂ ਦੌਰਾਨ ਸੀਐੱਮ ਦੇ ਕਾਫਲੇ ਵਿੱਚ ਗੱਡੀਆਂ ਦੀ ਗਿਣਤੀ 33 ਤੋਂ ਵੱਧ ਕੇ 39 ਕਰ ਦਿੱਤੀਆਂ ਗਈਆਂ ਸਨ। ਯਾਦ ਰਹੇ ਕਿ ਇਹ ਕਾਰਜਕਾਲ ਕਾਂਗਰਸ ਦਾ ਹੀ ਸੀ, ਜਿਸ ਦੌਰਾਨ ਚਰਨਜੀਤ ਸਿੰਘ ਚੰਨੀ ਨੂੰ ਮੁੱਖ ਮੰਤਰੀ ਬਣਾਇਆ ਗਿਆ ਸੀ।
ਸਾਫ਼ ਹੈ ਕਿ ਕਾਫਲੇ ‘ਚ ਗੱਡੀਆਂ ਦੀ ਗਿਣਤੀ ਵਧਾਉਣ ਦੀ ਸ਼ੁਰੂਆਤ ਪਹਿਲਾਂ ਚਰਨਜੀਤ ਚੰਨੀ ਨੇ ਕੀਤੀ। ਕਾਫਲੇ ਵਿੱਚ 6 ਗੱਡੀਆਂ ਉਹਨਾਂ ਦੇ ਸੀਐੱਮ ਰਹਿੰਦੇ ਜੁੜੀਆਂ ਤੇ ਬਾਅਦ ਵਿੱਚ 3 ਗੱਡੀਆਂ ਭਗਵੰਤ ਮਾਨ ਦੇ ਸਮੇਂ ਵਿੱਚ ਜੋੜੀਆਂ ਗਈਆਂ।
ਚੰਨੀ ਨੇ ਸੁਰੱਖਿਆ ਘਟਾਉਣ ਦਾ ਕੀਤਾ ਸੀ ਐਲਾਨ
ਦਿਲਚਸਪ ਹੈ ਕਿ ਚਰਨਜੀਤ ਸਿੰਘ ਚੰਨੀ ਜਦੋਂ ਪੰਜਾਬ ਦੇ ਮੁੱਖ ਮੰਤਰੀ ਬਣੇ ਸਨ, ਤਾਂ ਉਹਨਾਂ ਨੇ ਸਭ ਤੋਂ ਪਹਿਲਾਂ ਆਪਣੀ ਸੁਰੱਖਿਆ ਵਿੱਚ ਕਟੌਤੀ ਦਾ ਐਲਾਨ ਕੀਤਾ ਸੀ। ਚੰਨੀ ਨੇ ਕਿਹਾ ਸੀ ਕਿ ਉਹ ਆਮ ਆਦਮੀ ਹਨ ਅਤੇ ਉਹਨਾਂ ਨੂੰ ਕਿਸੇ ਤਰ੍ਹਾਂ ਦਾ ਖਤਰਾ ਨਹੀਂ ਹੈ। ਇਸ ਲਈ ਲਾਮ-ਲਸ਼ਕਰ ਦੀ ਉਹਨਾਂ ਨੂੰ ਕੋਈ ਲੋੜ ਨਹੀਂ। ਪਰ ਅੰਕੜੇ ਤਾਂ ਕੁਝ ਹੋਰ ਹੀ ਤਸਵੀਰ ਪੇਸ਼ ਕਰ ਰਹੇ ਹਨ। ਤੇ ਹੁਣ ਸੀਐੱਮ ਭਗਵੰਤ ਮਾਨ ਵੀ ਉਹਨਾਂ ਦੇ ਨਕਸ਼ੇ-ਕਦਮ ‘ਤੇ ਚਲਦੇ ਹੋਏ ਖੁਦ ਨੂੰ ਬੇਸ਼ੱਕ ਆਮ ਆਦਮੀ ਦੱਸਦੇ ਹਨ, ਪਰ ਲਾਮ-ਲਸ਼ਕਰ ਦੀ ਲੋੜ ਉਹਨਾਂ ਨੂੰ ਸਾਰਿਆਂ ਨਾਲੋਂ ਵੱਧ ਜਾਪਦੀ ਹੈ।
