December 15, 2022
(Hoshiarpur)
ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਵੀਰਵਾਰ ਸਵੇਰੇ ਅਚਾਨਕ ਹੁਸ਼ਿਆਰਪੁਰ ਦੇ ਟਾਂਡਾ ਰੋਡ ਸਥਿਤ ਲਾਚੋਵਾਲ ਟੋਲ ਪਲਾਜ਼ਾ ‘ਤੇ ਪਹੁੰਚ ਗਏ ਅਤੇ ਉਸ ਨੂੰ ਟੋਲ ਫ੍ਰੀ ਕਰਵਾ ਦਿੱਤਾ। ਹਾਲਾਂਕਿ ਸੀਐੱਮ ਦੇ ਆਉਣ ਤੋਂ ਪਹਿਲਾਂ ਹੀ ਇਸ ਟੋਲ ਪਲਾਜ਼ਾ ਨੂੰ ਕੰਪਨੀ ਵੱਲੋਂ ਰਾਤ 12 ਵਜੇ ਤੋਂ ਬੰਦ ਕਰ ਦਿੱਤਾ ਗਿਆ ਸੀ। ਵੀਰਵਾਰ ਸਵੇਰੇ ਸੀਐੱਮ ਮਾਨ ਨੇ ਇਸ ਨੂੰ ਅਧਿਕਾਰਤ ਤੌਰ ‘ਤੇ ਲੋਕਾਂ ਲਈ ਖੋਲ੍ਹਿਆ। ਦੱਸ ਦਈਏ ਕਿ ਇਸ ਟੋਲ ਦੀ ਮਿਆਦ ਪੂਰੀ ਹੋ ਗਈ ਸੀ ਅਤੇ ਸਰਕਾਰ ਵੱਲੋਂ ਇਸਦੀ ਮਿਆਦ ਨੂੰ ਅੱਗੇ ਨਹੀਂ ਵਧਾਇਆ ਗਿਆ।
ਟੋਲ ਕੰਪਨੀ ਨੇ ਲੁੱਟਣ ਦਾ ਕੰਮ ਕੀਤਾ- CM
CM ਨੇ ਦੱਿਸਆ ਕਿ ਲਾਚੋਵਾਲ ਟੋਲ ਪਲਾਜ਼ਾ ਦੇ ਅਧੀਨ 27.90 ਕਿੱਲੋਮੀਟਰ ਦੀ ਸੜਕ ਸੀ। ਪੰਜਾਬ ਸਰਕਾਰ ਨੇ ਲੋਕਾਂ ਦੇ ਟੈਕਸ ਨਾਲ ਇਸ ਸੜਕ ਨੂੰ 7.76 ਕਰੋੜ ਰੁਪਏ ‘ਚ ਬਣਾਇਆ, ਪਰ 6 ਮਾਰਚ, 2007 ਤੋਂ 14 ਦਸੰਬਰ, 2022 ਤੱਕ ਕਰੀਬ 15 ਸਾਲਾਂ ਦੀ ਮੈਂਟਨੇਂਸ ਦਾ ਠੇਕਾ ਪੀਡੀ ਅੱਗਰਵਾਲ ਇੰਫ੍ਰਾਸਟ੍ਰਕਚਰ ਲਿਮਟਿਡ ਨਾਮੀ ਕੰਪਨੀ ਨੂੰ ਦੇ ਦਿੱਤਾ।
ਉਹਨਾਂ ਕਿਹਾ ਕਿ ਇਸ ਟੋਲ ਦੀ ਰੋਜ਼ਾਨਾ ਦੀ ਕੁਲੈਕਸ਼ਨ ਕਰੀਬ 1.94 ਲੱਖ ਰੁਪਏ ਹੈ, ਜੋ ਸਲਾਨਾ 7 ਕਰੋੜ ਰੁਪਏ ਬਣਦੀ ਹੈ। ਹੁਣ ਲੋਕਾਂ ਦਾ ਇਹ ਪੈਸਾ ਅੱਜ ਤੋਂ ਹੀ ਬਚਣ ਲੱਗ ਜਾਵੇਗਾ। ਉਹਨਾਂ ਕਿਹਾ ਕਿ ਸਰਕਾਰ ਵੱਲੋਂ ਪੌਣੇ 8 ਕਰੋੜ ਵਿੱਚ ਸੜਕ ਬਣਾ ਕੇ ਨਿੱਜੀ ਕੰਪਨੀ ਨੂੰ 7 ਕਰੋੜ ਪ੍ਰਤੀ ਸਾਲ ਦੇ ਹਿਸਾਬ ਨਾਲ 15 ਸਾਲ ਦਾ ਠੇਕਾ ਦੇਣ ‘ਤੇ ਇਹ ਰਾਸ਼ੀ 105 ਕਰੋੜ ਰੁਪਏ ਬਣਦੀ ਹੈ, ਪਰ ਕੰਪਨੀ ਵੱਲੋਂ ਐਗ੍ਰੀਮੈਂਟ ਦੀ ਕੋਈ ਸ਼ਰਤ ਪੂਰੀ ਨਹੀਂ ਕੀਤੀ ਗਈ। ਸੜਕ ਦੀ ਮੈਂਟਨੇਂਸ ਤੱਕ ਨਹੀਂ ਕੀਤੀ ਗਈ।
ਮਾਨ ਨੇ ਕਿਹਾ ਕਿ ਸਾਲ 2007 ਤੋਂ 2017 ਤੱਕ 10 ਸਾਲ ਸ਼੍ਰੋਮਣੀ ਅਕਾਲੀ ਦਲ ਦੀ ਸਰਕਾਰ ਰਹੀ। ਸਾਲ 2017 ਤੋਂ ਬਾਅਦ ਕਾਂਗਰਸ ਦੀ ਕੈਪਟਨ ਸਰਕਾਰ ਰਹੀ, ਪਰ ਕਿਸੇ ਸਰਕਾਰ ਨੇ ਇਸ ਕੰਪਨੀ ਨਾਲ ਐਗ੍ਰੀਮੈਂਟ ਦੀਆਂ ਸ਼ਰਤਾਂ ਪੂਰੀਆਂ ਨਾ ਕਰਨ ‘ਤੇ ਸਮਝੌਤਾ ਕੈਂਸਿਲ ਕਰਨ ਬਾਰੇ ਨਹੀਂ ਸੋਚਿਆ।
ਕਾਨੂੰਨੀ ਸਲਾਹ ‘ਤੇ ਕੇਸ ਦਰਜ ਕਰਵਾਇਆ- CM
CM ਨੇ ਕਿਹਾ ਕਿ ਪੰਜਾਬ ਸਰਕਾਰ ਨੇ AG ਨਾਲ ਸਲਾਹ ਕਰਕੇ ਕੰਪਨੀ ਨਾਲ ਧੋਖਾਧੜੀ ਦੇ ਤਹਿਤ ਕੇਸ ਦਰਜ ਕੀਤਾ ਹੈ। ਉਹਨਾਂ ਨੇ ਕਿਹਾ ਕਿ ਲੋੜ ਪੈਣ ‘ਤੇ ਇਸ ਕੰਪਨੀ ਨੂੰ ਬਲੈਕ ਲਿਸਟ ਵੀ ਕੀਤਾ ਜਾਵੇਗਾ ਅਤੇ ਪੈਸੇ ਵੀ ਰਿਕਵਰ ਕੀਤੇ ਜਾਣਗੇ।
