January 2, 2023
(Chandigarh)
ਚੰਡੀਗੜ੍ਹ ਵਿੱਚ ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਦੀ ਸੈਕਟਰ-2 ਸਥਿਤ ਕੋਠੀ ਤੋਂ ਕੁਝ ਦੂਰੀ ‘ਤੇ ਰਜਿੰਦਰਾ ਪਾਰਕ ਵਿੱਚ ਇੱਕ ਬੰਬ ਸ਼ੈੱਲ ਮਿਲਿਆ ਹੈ। ਬੰਬ ਸ਼ੈੱਲ ਮਿਲਣ ਵਾਲੀ ਥਾਂ ਤੋਂ ਕੁਝ ਹੀ ਦੂਰੀ ‘ਤੇ ਹੈਲੀਪੈਡ ਹੈ, ਜਿਥੇ ਪੰਜਾਬ ਦੇ CM ਦਾ ਹੈਲੀਕਾਪਟਰ ਲੈਂਡ ਕਰਦਾ ਹੈ। ਬੰਬ ਮਿਲਣ ਦੀ ਸੂਚਨਾ ਦੇ ਚਲਦੇ ਚਾਰੇ ਪਾਸੇ ਖਲਬਲੀ ਪੈਦਾ ਹੋ ਗਈ।
ਜਾਣਕਾਰੀ ਮੁਤਾਬਕ, ਰਜਿੰਦਰਾ ਪਾਰਕ ਵਿੱਚ ਅੰਬਾਂ ਦੇ ਬਗੀਚੇ ਵਿੱਚ ਇਹ ਬੰਬ ਸ਼ੈੱਲ ਪਿਆ ਹੋਇਆ ਸੀ। ਇਹ ਇਲਾਕਾ UT ਦੇ ਅਧਿਕਾਰ ਖੇਤਰ ਵਿੱਚ ਆਉਂਦਾ ਹੈ। ਦੁਪਹਿਰ ਦੇ ਸਮੇਂ ਇਥੇ ਕੋਈ ਰਾਹਗੀਰ ਆਇਆ ਸੀ। ਉਸੇ ਨੇ ਇਹ ਬੰਬਨੁਮਾ ਚੀਜ਼ ਵੇਖੀ, ਜਿਸਦੀ ਸੂਚਨਾ ਤੁਰੰਤ 100 ਨੰਬਰ ‘ਤੇ ਪੁਲਿਸ ਨੂੰ ਦਿੱਤੀ। ਪੁਲਿਸ ਦੀ ਟੀਮ ਮੌਕੇ ‘ਤੇ ਪਹੁੰਚੀ ਅਤੇ ਏਰੀਆ DSP ਵੀ ਮੌਕੇ ‘ਤੇ ਪਹੁੰਚ ਗਏ।
ਚੰਡੀਗੜ੍ਬ ਪੁਲਿਸ ਦੀਆਂ ਟੀਮਾਂ, ਬੰਬ ਸਕੁਐਡ ਅਤੇ ਡੌਗ ਸਕੁਐਡ ਨੂੰ ਮੌਕੇ ‘ਤੇ ਬੁਲਾਇਆ ਗਿਆ। ਬੰਬ ਨੂੰ ਚਾਰੇ ਪਾਸਿਓਂ ਕਵਰ ਕੀਤਾ ਗਿਆ। ਜਾਣਕਾਰੀ ਮੁਤਾਬਕ, ਬੰਬ ਸ਼ੈੱਲ ਐਕਟਿਵ ਸੀ। ਬੰਬ ਨੂੰ ਪੂਰੀ ਸਾਵਧਾਨੀ ਨਾਲ ਫਾਈਬਰ ਦੇ ਡਰੰਮ ਵਿੱਚ ਰੱਖਿਆ ਗਿਆ ਹੈ। ਇਸ ਤੋਂ ਇਲਾਵਾ ਚਾਰੇ ਪਾਸੇ ਸੈਂਡ ਬੈਗ ਰੱਖ ਦਿੱਤੇ ਗਏ ਹਨ ਅਤੇ ਪੂਰੇ ਇਲਾਕੇ ਨੂੰ ਸੀਲ ਕਰ ਦਿੱਤਾ ਗਿਆ ਹੈ।
ਹਰ ਪਹਿਲੂ ਤੋਂ ਜਾਂਚ ਦੀ ਲੋੜ- ਕਾਂਗਰਸ
ਸੀਐੱਮ ਰਿਹਾਇਸ਼ ਨੇੜੇ ਬੰਬ ਮਿਲਣ ਦੀ ਘਟਨਾ ਨੂੰ ਕਾਂਗਰਸ ਨੇ ਇੱਕ ਗੰਭੀਰ ਮਸਲਾ ਦੱਸਿਆ ਹੈ। ਸੂਬਾ ਕਾਂਗਰਸ ਪ੍ਰਧਾਨ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਨੇ ਟਵੀਟ ਕੀਤਾ, “CM ਭਗਵੰਤ ਮਾਨ ਦੀ ਰਿਹਾਇਸ਼ ਨੇੜੇ ਲਾਈਵ ਬੰਬ ਮਿਲਣਾ ਇੱਕ ਗੰਭੀਰ ਮਾਮਲਾ ਹੈ। ਹਰ ਪਹਿਲੂ ਤੋਂ ਜਾਂਚ ਕਰਨ ਅਤੇ ਸਖ਼ਤੀ ਨਾਲ ਨਜਿੱਠਣ ਦੀ ਲੋੜ ਹੈ। ਪੰਜਾਬ ਦੇ ਮੁੱਖ ਮੰਤਰੀ ਦੀ ਰਿਹਾਇਸ਼ ਦੇ ਐਨ ਨੇੜੇ ਜਿੰਦਾ ਬੰਬ ਰੱਖਣ ਦੀ ਹਿੰਮਤ ਰੱਖਣ ਵਾਲੇ ਲੋਕ ਕੁਝ ਵੀ ਕਰ ਸਕਦੇ ਹਨ। ਕਾਂਗਰਸ ਪਾਰਟੀ ਹਮੇਸ਼ਾ ਦਹਿਸ਼ਤ ਦੀ ਜ਼ੀਰੋ ਟੌਲਰੈਂਸ ਵਿੱਚ ਵਿਸ਼ਵਾਸ਼ ਰੱਖਦੀ ਹੈ।
Live bomb near CM @BhagwantMann's residence is a serious matter.
Needs to be probed from all aspects and dealt with firmly.
Those having audacity to keep live bomb so close to Punjab CM's residence can resort to anything. @INCIndia always believes in Zero Tolerance to terror.— Amarinder Singh Raja Warring (@RajaBrar_INC) January 2, 2023
ਮਾਮਲੇ ਦੀ ਜਾਣਕਾਰੀ ਮਿਲਣ ਤੋਂ ਬਾਅਦ ਪੰਜਾਬ ਪੁਲਿਸ ਦੇ ADGP ਸਕਿਓਰਿਟੀ ਮੌਕੇ ‘ਤੇ ਪਹੁੰਚੇ। ਉਹਨਾਂ ਕਿਹਾ ਕਿ ਘਬਰਾਉਣ ਦੀ ਕੋਈ ਲੋੜ ਨਹੀਂ ਹੈ। ਇਹ ਮਹਿਜ਼ ਬੰਬ ਸ਼ੈੱਲ ਹੈ, ਜੋ ਪਹਿਲਾਂ ਵੀ ਇਥੇ ਮਿਲਦੇ ਰਹੇ ਹਨ। ਸੀਐੱਮ ਰਿਹਾਇਸ਼ ਇਥੋਂ 2 ਕਿੱਲੋਮੀਟਰ ਦੂਰ ਹੈ। ਮਾਮਲਾ ਚੰਡੀਗੜ੍ਹ ਪੁਲਿਸ ਦੇ ਅਧੀਨ ਹੈ ਅਤੇ ਇਸਦੀ ਜਾਂਚ ਕੀਤੀ ਜਾ ਰਹੀ ਹੈ।
