January 11, 2023
(Fatehgarh Sahib)
ਪੰਜਾਬ ਵਿੱਚ ਰਾਹੁਲ ਗਾਂਧੀ ਦੀ ‘ਭਾਰਤ ਜੋੜੋ ਯਾਤਰਾ’ ਫਤਿਹਗੜ੍ਹ ਸਾਹਿਬ ਤੋਂ ਸ਼ੁਰੂ ਹੋ ਗਈ ਹੈ। ਰਾਹੁਲ ਗਾਂਧੀ ਨੇ ਫਤਿਹਗੜ੍ਹ ਸਾਹਿਬ ਦੇ ਇਤਿਹਾਸਕ ਗੁਰਦੁਆਰਾ ਸਾਹਿਬ ਵਿਖੇ ਮੱਥਾ ਟੇਕ ਕੇ ਯਾਤਰਾ ਦੀ ਸ਼ੁਰੂਆਤ ਕੀਤੀ।
ਰਾਹੁਲ ਗਾਂਧੀ ਦੇ ਨਾਲ ਪੰਜਾਬ ਕਾਂਗਰਸ ਦੇ ਤਮਾਮ ਵੱਡੇ ਲੀਡਰ ਗੁਰਦੁਆਰਾ ਸਾਹਿਬ ਵਿਖੇ ਨਤਮਸਤਕ ਹੋਏ ਅਤੇ ਛੋਟੇ ਸਾਹਿਬਜ਼ਾਦਿਆਂ ਦੀ ਸ਼ਹਾਦਤ ਨੂੰ ਯਾਦ ਕੀਤਾ।
ਰਾਹੁਲ ਲਗਾਤਾਰ ਦੂਜੇ ਦਿਨ ਦਸਤਾਰ ਬੰਨ੍ਹੇ ਨਜ਼ਰ ਆਏ। ਰਾਹੁਲ ਲਾਲ ਰੰਗ ਦੀ ਦਸਤਾਰ ਸਜਾ ਕੇ ਸਰਹਿੰਦ ਪਹੁੰਚੇ।
ਇਸ ਤੋਂ ਪਹਿਲਾਂ ਦਰਬਾਰ ਸਾਹਿਬ ਵਿੱਚ ਰਾਹੁਲ ਗਾਂਧੀ ਕੇਸਰੀ ਰੰਗ ਦੀ ਦਸਤਾਰ ਸਜਾ ਕੇ ਪਹੁੰਚੇ ਸਨ।
ਇਸ ਤੋਂ ਬਾਅਦ ਰਾਹੁਲ ਸਰਹਿੰਦ ਵਿੱਚ ਇਤਿਹਾਸਕ ਦਰਗਾਹ ਰੋਜ਼ਾ ਸ਼ਰੀਫ ਗਏ ਅਤੇ ਨਤਮਸਤਕ ਹੋਏ। ਰਾਹੁਲ ਨੇ ਦਰਗਾਹ ‘ਤੇ ਚਾਦਰ ਵੀ ਚੜ੍ਹਾਈ।
ਯਾਤਰਾ ਦੀ ਸ਼ੁਰੂਆਤ ਦੇ ਮੌਕੇ ਸਰਹਿੰਦ ਵਿੱਚ ਹੀ ਫਲੈਗ ਹੈਂਡਓਵਰ(ਝੰਡਾ ਸੌਂਪਣ) ਦੀ ਰਸਮ ਹੋਈ। ਹਰਿਆਣਾ ਦੇ ਆਗੂਆਂ ਨੇ ਪੰਜਾਬ ਦੇ ਆਗੂਆਂ ਨੂੰ ਝੰਡਾ ਸੌਂਪਿਆ।
ਇਸ ਦੌਰਾਨ ਰਾਹੁਲ ਨੇ ਕਿਹਾ ਕਿ ਭਾਰਤ ਜੋੜੋ ਯਾਤਰਾ 3 ਹਜ਼ਾਰ ਕਿੱਲੋਮੀਟਰ ਚੱਲ ਚੁੱਕੀ ਹੈ। ਕਸ਼ਮੀਰ ਵਿੱਚ ਇਸ ਯਾਤਰਾ ਦਾ ਸਮਾਪਨ ਹੋਵੇਗਾ। ਹਾਲਾਂਕਿ ਉਹਨਾਂ ਕਿਹਾ ਕਿ ਇਹ ਕੋਈ ਵੱਡੀ ਗੱਲ ਨਹੀਂ। ਪੰਜਾਬ ਦਾ ਹਰ ਇੱਕ ਕਿਸਾਨ ਸਾਡੇ ਨਾਲੋਂ ਵੱਧ ਚੱਲਦਾ ਹੈ। ਉਹ ਕੰਨਿਆਕੁਮਾਰੀ ਤੋਂ ਨਹੀਂ ਚੱਲਦਾ, ਪਰ ਉਹ ਆਪਣੇ ਖੇਤ ਅਤੇ ਮੰਡੀ ਤੱਕ ਜਾਂਦਾ ਹੈ।
ਰਾਹੁਲ ਨੇ ਕਿਹਾ ਕਿ ਇਸ ਯਾਤਰਾ ਦੇ ਦੌਰਾਨ ਕਿਸਾਨਾਂ, ਮਜ਼ਦੂਰਾਂ, ਬੇਰੁਜ਼ਗਾਰਾਂ ਅਤੇ ਬੱਚਿਆਂ-ਬਜ਼ੁਰਗਾਂ ਨਾਲ ਗੱਲ ਹੋਈ। ਕਾਫੀ ਕੁਝ ਸਿੱਖਣ ਨੂੰ ਮਿਲਿਆ। ਇਹ ਬੋਲਣ ਦੀ ਯਾਤਰਾ ਹੈ, ਰੋਜ਼ 25 ਕਿੱਲੋਮੀਟਰ ਚਲਦੇ ਹਾਂ, ਲੋਕਾਂ ਨੂੰ ਸੁਣਦੇ ਹਾਂ ਅਤੇ ਅੰਤ ਵਿੱਚ ਸਿਰਫ 10-15 ਮਿੰਟ ਬੋਲਦੇ ਹਾਂ। ਨਫਰਤ, ਅਹਿੰਸਾ ਅਤੇ ਬੇਰਿਜ਼ਗਾਰੀ ਅਜਿਹੇ ਮੁੱਦੇ ਹਨ, ਜਿਹਨਾਂ ਨੂੰ ਚੁੱਕਣਾ ਹੈ।
ਰਾਹੁਲ ਗਾਂਧੀ ਨੇ ਮੀਡੀਆ ਨੂੰ ਕੋਸਦੇ ਹੋਏ ਕਿਹਾ ਕਿ ਮੀਡੀਆ ਉਹਨਾਂ ਦੀ ਗੱਲ ਨਹੀਂ ਰੱਖ ਰਿਹਾ। ਹਮੇਸ਼ਾ ਪ੍ਰਧਾਨ ਮੰਤਰੀ ਦਾ ਚਿਹਰਾ ਵਿਖਾਉਂਦਾ ਹੈ। ਬੇਰੁਜ਼ਗਾਰੀ ਅਤੇ ਮਹਿੰਗਾਈ ਦੀ ਗੱਲ ਨਹੀਂ ਚੁੱਕਦੇ।
ਰਾਹੁਲ ਨੇ ਕਿਹਾ ਕਿ ਬੀਜੇਪੀ ਦੇ ਲੋਕ ਜੋ ਡਰ-ਨਫਰਤ ਫੈਲਾ ਰਹੇ ਹਨ, ਉਹ ਦੇਸ਼ ਦੀ ਹਿਸਟਰੀ ਨਹੀਂ ਹੈ। ਇਹ ਦੇਸ਼ ਪਿਆਰ ਅਤੇ ਭਾਈਚਾਰੇ ਦਾ ਦੇਸ਼ ਹੈ। ਇਹੀ ਕਾਰਨ ਹੈ ਕਿ ਯਾਤਰਾ ਸਫਲ ਹੋ ਰਹੀ ਹੈ।
ਪੰਜਾਬ ਵਿੱਚ ਯਾਤਰਾ ਦੇ ਪਹਿਲੇ ਦਿਨ ਰਾਹੁਲ ਨੇ ਮੰਡੀ ਗੋਬਿੰਦਗੜ੍ਹ ਤੋਂ ਲੈ ਕੇ ਖੰਨਾ ਤੱਕ ਦੀ ਯਾਤਰਾ ਕੀਤੀ। ਇਸ ਦੌਰਾਨ ਕਾਂਗਰਸੀ ਵਰਕਰਾਂ ਵਿੱਚ ਜ਼ਬਰਦਸਤ ਉਤਸ਼ਾਹ ਨਜ਼ਰ ਆਇਆ।
ਰਾਹੁਲ ਦੇ ਨਾਲ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਰਾਜਾ ਵੜਿੰਗ ਵੀ ਪੂਰੇ ਜੋਸ਼ ਨਾਲ ਕਦਮਤਾਲ ਕਰਦੇ ਨਜ਼ਰ ਆਏ।
ਪਹਿਲੇ ਦਿਨ ਰਾਹੁਲ ਦੀ ਯਾਤਰਾ ‘ਚ ਸਾਬਕਾ ਸੀਐੱਮ ਚਰਨਜੀਤ ਸਿੰਘ ਚੰਨੀ ਵੀ ਸ਼ਾਮਲ ਹੋਏ ਅਤੇ ਚੰਨੀ ਵੀ ਰਾਹੁਲ ਦੇ ਨਾਲ ਕਰੀਬ 25 ਕਿੱਲੋਮੀਟਰ ਤੱਕ ਪੈਦਲ ਚੱਲੇ।
ਰਾਜਸਥਾਨ ਕਾਂਗਰਸ ਦੇ ਵੱਡੇ ਲੀਡਰ ਸਚਿਨ ਪਾਇਲਟ ਵੀ ਯਾਤਰਾ ਦੇ ਦੌਰਾਨ ਰਾਹੁਲ ਗਾਂਧੀ ਦੇ ਨਾਲ ਨਜ਼ਰ ਆਏ।
ਆਮ ਆਦਮੀ ਪਾਰਟੀ ਦੇ ਸਾਬਕਾ ਲੀਡਰ ਅਤੇ ਪਟਿਆਲਾ ਤੋਂ ਸਾਂਸਦ ਰਹੇ ਡਾ. ਧਰਮਵੀਰ ਗਾਂਧੀ ਵੀ ਰਾਹੁਲ ਦੀ ਯਾਤਰਾ ਵਿੱਚ ਸ਼ਾਮਲ ਹੋਏ।
ਰਾਹੁਲ ਗਾਂਧੀ ਯਾਤਰਾ ਦੌਰਾਨ ਪੂਰੀ ਗਰਮਜੋਸ਼ੀ ਦੇ ਨਾਲ ਲੋਕਾਂ ਨੂੰ ਮਿਲੇ ਅਤੇ ਉਹਨਾਂ ਨਾਲ ਵਿਚਾਰ-ਚਰਚਾ ਕੀਤੀ।
ਰਾਹੁਲ ਨੇ ਸਫਾਈ ਕਰਮਚਾਰੀਆਂ ਨਾਲ ਵੀ ਮੁਲਾਕਾਤ ਕੀਤੀ ਅਤੇ ਉਹਨਾਂ ਦੀਆਂ ਮੁਸ਼ਕਿਲਾਂ ਸੁਣੀਆਂ।
ਉਹਨਾਂ ਨੇ ਆਟੋ ਮੈਕੇਨਿਕਾਂ ਨਾਲ ਵੀ ਪੂਰੀ ਗਰਮਜੋਸ਼ੀ ਨਾਲ ਮੁਲਾਕਾਤ ਕੀਤੀ।
ਯਾਤਰਾ ਦੇ ਬਰੇਕ ਦੌਰਾਨ ਰਾਹੁਲ ਨੇ ਮੰਡੀ ਗੋਬਿੰਦਗੜ੍ਹ ਵਿੱਚ ਐਕਸ ਆਰਮੀ ਸਰਵਿਸਮੈਨ ਨਾਲ ਮੁਲਾਕਾਤ ਕੀਤੀ। ਰਾਹੁਲ ਨੇ ਸਾਬਕਾ ਫੌਜੀਆਂ ਨਾਲ ਦੇਸ਼ ਦੀ ਸੁਰੱਖਿਆ ਨਾਲ ਜੁੜੇ ਮੁੱਦਿਆਂ ‘ਤੇ ਗੱਲ ਕੀਤੀ।
ਖਾਸ ਗੱਲ ਇਹ ਹੈ ਕਿ ਭਾਰਤ ਜੋੜੋ ਯਾਤਰਾ ਵਿੱਚ ਹੁਣ ਤੱਕ ਪੰਜਾਬ ‘ਚ ਰਾਹੁਲ ਨੂੰ ਸਭ ਤੋਂ ਵੱਧ ਸਕਿਓਰਿਟੀ ਦਿੱਤੀ ਗਈ ਹੈ। ਰਾਹੁਲ ਦੇ ਅੱਗੇ-ਪਿੱਛੇ ਅਤੇ ਦੋਵੇਂ ਕਿਨਾਰਿਆਂ ‘ਤੇ ਪੰਜਾਬ ਪੁਲਿਸ ਨੇ ਸੁਰੱਖਿਆ ਘੇਰਾ ਬਣਾਇਆ ਹੋਇਆ ਹੈ।
ਦੱਸ ਦਈਏ ਕਿ ਰਾਹੁਲ ਗਾਂਧੀ ਨੂੰ ਖਾਲਿਸਤਾਨੀ ਜਥੇਬੰਦੀ ਸਿੱਖਸ ਫਾਸ ਜਸਟਿਸ ਦੇ ਮੁਖੀ ਗੁਰਪਤਵੰਤ ਸਿੰਘ ਪੰਨੂੰ ਨੇ ਪੰਜਾਬ ਨਾ ਆਉਣ ਦੀ ਧਮਕੀ ਦਿੱਤੀ ਸੀ।
