ਬਿਓਰੋ। ਪੰਜਾਬ ਕਾਂਗਰਸ ਦੇ ਨਵੇਂ ਥਾਪੇ ਗਏ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਕੱਲ੍ਹ ਰਸਮੀ ਤੌਰ ‘ਤੇ ਅਹੁਦਾ ਸੰਭਾਲਣ ਜਾ ਰਹੇ ਹਨ। ਇਸ ਸਮਾਗਮ ‘ਚ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਦੇ ਸ਼ਾਮਲ ਹੋਣ ਨੂੰ ਲੈ ਕੇ ਸਸਪੈਂਸ ਹੈ, ਪਰ ਇਸ ਵਿਚਾਲੇ ਨਿਊਜ਼ ਏਜੰਸੀ ANI ਦੀ ਖ਼ਬਰ ਕਹਿੰਦੀ ਹੈ ਕਿ ਸਿੱਧੂ ਨੇ ਕੈਪਟਨ ਨੂੰ ਇਸ ਸਮਾਗਮ ਲਈ ਸੱਦਾ ਭੇਜ ਦਿੱਤਾ ਹੈ। ਦਿਲਚਸਪ ਇਹ ਹੈ ਕਿ ਸਿੱਧੂ ਵੱਲੋਂ ਭੇਜੇ ਗਏ ਇਸ ਸੱਦੇ ‘ਚ ਸੂਬੇ ਦੇ 65 ਕਾਂਗਰਸੀ ਵਿਧਾਇਕਾਂ ਦੇ ਦਸਤਖਤ ਹੋਣ ਦਾ ਦਾਅਵਾ ਕੀਤਾ ਜਾ ਰਿਹਾ ਹੈ। ਪੰਜਾਬ ਕਾਂਗਰਸ ਇੰਚਾਰਜ ਹਰੀਸ਼ ਰਾਵਤ ਨੂੰ ਵੀ ਇਸ ਸਮਾਗਮ ਲਈ ਸੱਦਾ ਭੇਜਿਆ ਗਿਆ ਹੈ।
Newly-appointed Punjab Congress chief Navjot Singh Sidhu will take charge on July 23. He has sent an invitation signed by around 65 MLAs to CM Amrinder Singh. Sidhu has also invited AICC in charge of Punjab, Harish Rawat to the programme: Sources pic.twitter.com/eOzm6WXt9B
— ANI (@ANI) July 21, 2021
ਕੁਲਜੀਤ ਨਾਗਰਾ ਦੀ ਲਾਈ ਗਈ ਡਿਊਟੀ
ਖ਼ਬਰਾਂ ਇਹ ਵੀ ਹਨ ਕਿ ਕੈਪਟਨ ਨੂੰ ਨਿੱਜੀ ਤੌਰ ‘ਤੇ ਸੱਦਾ ਦੇਣ ਲਈ ਸਿੱਧੂ ਵੱਲੋਂ ਕਾਰਜਕਾਰੀ ਪ੍ਰਧਾਨ ਥਾਪੇ ਗਏ ਕੁਲਜੀਤ ਸਿੰਘ ਨਾਗਰਾ ਦੀ ਡਿਊਟੀ ਲਾਈ ਗਈ ਹੈ। ਜਾਣਕਾਰੀ ਮੁਤਾਬਕ, ਨਾਗਰਾ ਵੱਲੋਂ ਕੈਪਟਨ ਤੋਂ ਮੁਲਾਕਾਤ ਲਈ ਸਮਾਂ ਮੰਗਿਆ ਗਿਆ ਹੈ। ਇੱਕ ਇੰਟਰਵਿਊ ਦੌਰਾਨ ਨਾਗਰਾ ਨੇ ਕਿਹਾ ਕਿ ਉਹ ਕਾਰਜਕਾਰੀ ਪ੍ਰਧਾਨ ਲਾਏ ਜਾਣ ਦੇ ਬਾਅਦ ਤੋਂ ਹੀ ਕੈਪਟਨ ਨਾਲ ਮੁਲਾਕਾਤ ਕਰਨਾ ਚਾਹੁੰਦੇ ਹਨ, ਪਰ ਕੁਝ ਰੁਝੇਵਿਆਂ ਕਰਕੇ ਮੁਲਾਕਾਤ ਹੋ ਨਹੀਂ ਪਾਈ। ਉਹਨਾਂ ਕਿਹਾ ਕਿ ਕੈਪਟਨ ਵੱਲੋਂ ਸਮਾਂ ਦਿੱਤੇ ਜਾਣ ‘ਤੇ ਉਹ ਤੁਰੰਤ ਸੀਐੱਮ ਨਾਲ ਮੁਲਾਕਾਤ ਕਰਨਗੇ। ਹਾਲਾਂਕਿ ਇਸ ਦੌਰਾਨ ਕੁਲਜੀਤ ਨਾਗਰਾ ਨੇ ਕੈਪਟਨ ਨੂੰ ਦਿੱਤੇ ਜਾਣ ਵਾਲੇ ਸੱਦੇ ਬਾਰੇ ਕੋਈ ਜਾਣਕਾਰੀ ਨਗੀਂ ਕੀਤੀ॥
ਸ਼ਿਸ਼ਟਾਚਾਰ ਜਾਂ ਸ਼ਕਤੀ ਪ੍ਰਦਰਸ਼ਨ?
ਸਿੱਧੂ ਵੱਲੋਂ ਕੈਪਟਨ ਨੂੰ ਭੇਜੇ ਗਏ ਇਸ ਸੱਦੇ ਨੂੰ ਸ਼ਿਸ਼ਟਾਚਾਰ ਘੱਟ, ਸ਼ਕਤੀ ਪ੍ਰਦਰਸ਼ਨ ਵੱਧ ਮੰਨਿਆ ਜਾ ਰਿਹਾ ਹੈ। ਸਿਆਸੀ ਮਾਹਿਰਾਂ ਦਾ ਕਹਿਣਾ ਹੈ ਕਿ ਸਿੱਧੂ ਵੱਲੋਂ ਕੈਪਟਨ ਨੂੰ ਭੇਜੇ ਸੱਦੇ ਉੱਪਰ 65 ਵਿਧਾਇਕਾਂ ਦੇ ਹਸਤਾਖਰ ਇਹ ਵਿਖਾਉਣ ਲਈ ਕਾਫੀ ਹਨ ਕਿ ਉਹਨਾਂ ਨੇ ਕੈਪਟਨ ਧੜੇ ‘ਚ ਸੰਨ੍ਹ ਲਾ ਲਈ ਹੈ। ਮਾਹਿਰਾਂ ਦੀ ਮੰਨੀਏ, ਤਾਂ ਜ਼ਿਆਦਾਤਰ ਵਿਧਾਇਕ ਸਿੱਧੂ ਉੱਪਰ ਹਾਈਕਮਾਂਡ ਦਾ ਹੱਥ ਵੇਖ ਕੇ ਸਿੱਧੂ ਨਾਲ ਖੜ੍ਹੇ ਨਜ਼ਰ ਆ ਰਹੇ ਹਨ, ਜਿਸ ਤੋਂ ਬਾਅਦ ਕੈਪਟਨ ਲਈ ਬੈਕਫੁੱਟ ਵਾਲੀ ਸਥਿਤੀ ਪੈਦਾ ਹੋ ਗਈ ਹੈ।
ਪ੍ਰਿਅੰਕਾ ਗਾਂਧੀ ਨੂੰ ਵੀ ਸੱਦਾ ਭੇਜਣ ਦੀ ਤਿਆਰੀ!
ਸੂਤਰਾਂ ਦੇ ਹਵਾਲੇ ਤੋਂ ਖ਼ਬਰ ਇਹ ਵੀ ਹੈ ਕਿ ਸਿੱਧੂ ਆਪਣੀ ਤਾਜਪੋਸ਼ੀ ‘ਚ ਕਾਂਗਰਸ ਦੀ ਜਨਰਲ ਸਕੱਤਰ ਪ੍ਰਿਅੰਕਾ ਗਾਂਧੀ ਵਾਡਰਾ ਨੂੰ ਵੀ ਸ਼ਾਮਲ ਕਰਵਾਉਣਾ ਚਾਹੁੰਦੇ ਹਨ, ਜਿਸਦੇ ਕਹਿਣ ‘ਤੇ ਸਿੱਧੂ ਨੂੰ ਪੰਜਾਬ ਕਾਂਗਰਸ ਦੀ ਕਮਾਨ ਸੌਂਪੀ ਗਈ ਹੈ।
ਮਾਹਿਰ ਕਹਿੰਦੇ ਹਨ ਕਿ ਸਿੱਧੂ ਆਪਣੇ ਤਾਜਪੋਸ਼ੀ ਸਮਾਗਮ ‘ਚ ਪ੍ਰਿਅੰਕਾ ਨੂੰ ਬੁਲਾ ਕੇ ਇੱਕ ਤੀਰ ਨਾਲ 2 ਨਿਸ਼ਾਨੇ ਕਰਨਾ ਚਾਹੁੰਦੇ ਹਨ। ਇੱਕ ਤਾਂ ਪ੍ਰਿਅੰਕਾ ਦੇ ਇਸ ਸਮਾਗਮ ‘ਚ ਆਉਣ ਨਾਲ ਕੈਪਟਨ ਦਾ ਸਮਾਗਮ ਤੋਂ ਦੂਰ ਰਹਿਣਾ ਨਾਮੁਮਕਿਨ ਹੋ ਜਾਵੇਗਾ ਅਤੇ ਸਮਾਗਮ ‘ਚ ਆਉਣਾ ਉਹਨਾਂ ਦੀ ਮਜਬੂਰੀ ਬਣ ਜਾਵੇਗਾ। ਦੂਜਾ, ਪ੍ਰਿਅੰਕਾ ਦੇ ਆਉਣ ਨਾਲ ਤਮਾਮ ਪਾਰਟੀ ਆਗੂਆਂ ‘ਚ ਇਹ ਸੁਨੇਹਾ ਜਾਵੇਗਾ ਕਿ ਹਾਈਕਮਾਂਡ ਸਿੱਧੂ ਦੀ ਗੱਲ ਨਹੀਂ ਟਾਲਦਾ। ਇਸ ਲਈ ਸਾਰਿਆਂ ਨੂੰ ਉਹਨਾਂ ਦੇ ਨਾਲ ਚੱਲਣਾ ਹੀ ਪਏਗਾ।
ਕੈਪਟਨ ਨੇ ਰੱਖੀ ਹੈ ਮੁਆਫ਼ੀ ਦੀ ਸ਼ਰਤ
ਕਾਬਿਲੇਗੌਰ ਹੈ ਕਿ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਨੇ ਹਾਲੇ ਤੱਕ ਨਵਜੋਤ ਸਿੰਘ ਸਿੱਧੂ ਨਾਲ ਮੁਲਾਕਾਤ ਨਹੀਂ ਕੀਤੀ ਹੈ। ਕੈਪਟਨ ਨੇ ਸਿੱਧੂ ਨਾਲ ਮੁਲਾਕਾਤ ਲਈ ਸ਼ਰਤ ਰੱਖੀ ਹੈ ਕਿ ਜਦੋਂ ਤੱਕ ਉਹ ਆਪਣੇ ਇਤਰਾਜ਼ੋਗ ਟਵੀਟਸ ਲਈ ਮੁਆਫ਼ੀ ਨਹੀਂ ਮੰਗ ਲੈਂਦੇ, ਕੈਪਟਨ ਉਹਨਾਂ ਨਾਲ ਮੁਲਾਕਾਤ ਨਹੀਂ ਕਰਨਗੇ। ਜ਼ਿਕਰੇਖਾਸ ਇਹ ਵੀ ਹੈ ਕਿ ਕੈਪਟਨ ਵਲੋਂ ਸਿੱਧੂ ਨੂੰ ਹਾਲੇ ਤੱਕ ਉਹਨਾਂ ਦੀ ਨਿਯੁਕਤੀ ਲਈ ਵਧਾਈ ਤੱਕ ਨਹੀਂ ਦਿੱਤੀ ਗਈ।
