ਚੰਡੀਗੜ੍ਹ। ਪੰਜਾਬ ‘ਚ 2022 ਦੀਆਂ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਸਿਆਸੀ ਪਾਰਟੀਆਂ ਜੋੜ-ਤੋੜ ‘ਚ ਲੱਗੀਆਂ ਹਨ। ਬੀਜੇਪੀ ਨਾਲ ਗਠਜੋੜ ਤੋੜਨ ਤੋਂ ਬਾਅਦ ਅਕਾਲੀ ਦਲ BSP ਨਾਲ ਗਠਜੋੜ ਕਰ ਚੁੱਕਿਆ ਹੈ। ਓਧਰ, ਅਕਾਲੀ ਦਲ ਦੇ ਟਕਸਾਲੀ ਆਗੂਆਂ ਵੱਲੋਂ ਬਣਾਈ ਗਈ ਪਾਰਟੀ ਸ਼੍ਰੋਮਣੀ ਅਕਾਲੀ ਦਲ(ਸੰਯੁਕਤ) ਨੇ ਹੁਣ ਭੀਮ ਸੈਨਾ ਨਾਲ ਗਠਜੋੜ ਕਰ ਲਿਆ ਹੈ।
ਅਕਾਲੀ ਦਲ (ਸੰਯੁਕਤ) ਦੇ ਪ੍ਰਧਾਨ ਸੁਖਦੇਵ ਸਿੰਘ ਢੀਂਡਸਾ ਅਤੇ ਭੀਮ ਸੈਨਾ ਦੇ ਪ੍ਰਧਾਨ ਚੰਦਰਸ਼ੇਖਰ ਨੇ ਪ੍ਰੈੱਸ ਕਾਨਫ਼ਰੰਸ ਕਰਕੇ ਇਸਦਾ ਐਲਾਨ ਕੀਤਾ। ਢੀਂਡਸਾ ਨੇ ਕਿਹਾ ਕਿ ਲੋਕਾਂ ਦੀ ਇੱਛਾ ਸੀ ਕਿ ਇੱਕ ਸਾਂਝਾ ਫਰੰਟ ਬਣੇ, ਜਿਸਦੀ ਨੀਂਹ ਰੱਖ ਦਿੱਤੀ ਗਈ ਹੈ।
ਜਨਤਾ ਦੀ ਸਰਕਾਰ ਬਣਾਵਾਂਗੇ- ਢੀਂਡਸਾ
ਢੀਂਡਸਾ ਨੇ ਕਿਹਾ ਕਿ ਉਹ ਲੋਕਾਂ ਦੀ ਇੱਛਾ ਦੇ ਮੁਤਾਬਕ ਸਰਕਾਰ ਬਣਾਉਣਾ ਚਾਹੁੰਦੇ ਹਨ। ਲੋਕ ਅਕਾਲੀ ਦਲ, ਕਾਂਗਰਸ ਅਤੇ ਬੀਜੇਪੀ ਤੋਂ ਦੁਖੀ ਹਨ। ਸੁਖਦੇਵ ਸਿੰਘ ਢੀਂਡਸਾ ਨੇ ਕਿਹਾ ਕਿ ਦੂਜੀ ਪਾਰਟੀਆਂ ਬੀਜੇਪੀ, ਅਕਾਲੀ ਦਲ ਅਤੇ ਕਾਂਗਰਸ ਕੋਲ ਪੈਸਿਆਂ ਦੀ ਕਮੀ ਨਹੀਂ ਹੈ। ਇਹ ਪਾਰਟੀਆਂ ਟੀਵੀ ‘ਤੇ ਸਮਾਂ ਖਰੀਦ ਕੇ ਲੋਕਾਂ ਨੂੰ ਗੁੰਮਰਾਹ ਕਰ ਰਹੀਆਂ ਹਨ।
ਦੋਆਬਾ ‘ਚ ਮਿਲ ਸਕਦਾ ਹੈ ਫਾਇਦਾ
ਭੀਮ ਸੈਨਾ ਦਾ ਦੋਆਬਾ ਖੇਤਰ ‘ਚ ਚੰਗਾ ਅਧਾਰ ਮੰਨਿਆ ਜਾਂਦਾ ਹੈ। BSP ਦੇ ਨਰਾਜ਼ ਆਗੂਆਂ ਦਾ ਵੀ ਭੀਮ ਸੈਨਾ ਪ੍ਰਤੀ ਝੁਕਾਅ ਹੈ। ਵੈਸੇ ਭੀਮ ਸੈਨਾ ਤੋਂ ਇਲਾਵਾ BSP ਦੇ ਸੰਸਥਾਪਕ ਮਰਹੂਮ ਕਾਸ਼ੀ ਰਾਮ ਦੀ ਭੈਣ ਸਰਵਣ ਕੌਰ ਵੀ ਢੀਂਡਸਾ ਦੇ ਨਾਲ ਆ ਗਏ ਹਨ ਅਤੇ ਉਹਨਾਂ ਨੂੰ ਸਮਰਥਨ ਦੇਣ ਦਾ ਐਲਾਨ ਕੀਤਾ ਹੈ।
ਪਹਿਲਾਂ ‘ਆਪ’ ਨਾਲ ਗਠਜੋੜ ਦੀ ਤਿਆਰੀ ਸੀ
ਦੱਸਣਯੋਗ ਹੈ ਕਿ ਅਕਾਲੀ ਦਲ(ਸੰਯੁਕਤ) ਦੇ ਪਹਿਲਾਂ ਆਮ ਆਦਮੀ ਪਾਰਟੀ ਨਾਲ ਗਠਜੋੜ ਦੀ ਚਰਚਾ ਸੀ, ਪਰ ‘ਆਪ’ ਇਸ ਲਈ ਰਾਜੀ ਨਹੀਂ ਸੀ। ‘ਆਪ’ ਚਾਹੁੰਦੀ ਸੀ ਕਿ ਢੀਂਡਸਾ ਪਾਰਟੀ ‘ਚ ਸ਼ਾਮਲ ਹੋਣ, ਜਿਸ ਤੋਂ ਬਾਅਦ ਦੋਵੇਂ ਪਾਰਟੀਆਂ ਵਿਚਕਾਰ ਗੱਲ ਅੱਗੇ ਨਹੀਂ ਵੱਧ ਸਕੀ।
