ਚੰਡੀਗੜ੍ਹ। ਪੰਜਾਬ ਦੇ ਸਾਬਕਾ DGP ਮੁਹੰਮਦ ਮੁਸਤਫਾ ਨੇ ਪੰਜਾਬ ਪ੍ਰਦੇਸ਼ ਕਾਂਗਰਸ ਕਮੇਟੀ ਦੇ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਦੇ ਸਲਾਹਕਾਰ ਦੇ ਰੂਪ ‘ਚ ਕੰਮ ਕਰਨ ਤੋਂ ਇਨਕਾਰ ਕਰ ਦਿੱਤਾ ਹੈ। ਸਿੱਧੂ ਨੇ ਬੁੱਧਵਾਰ ਨੂੰ ਆਪਣੇ ਲਈ 4 ਸਲਾਹਕਾਰਾਂ ਦੀ ਨਿਯੁਕਤੀ ਦਾ ਐਲਾਨ ਕੀਤਾ ਸੀ। ਇਹਨਾਂ 4 ਸਲਾਹਕਾਰਾਂ ‘ਚ ਸਾਬਕਾ DGP ਮੁਸਤਫਾ ਦਾ ਵੀ ਨਾਂਅ ਸ਼ਾਮਲ ਸੀ।
ਸਿਆਸੀ ਅਹੁਦੇ ‘ਤੇ ਕੰਮ ਨਹੀਂ ਕਰ ਸਕਦਾ- ਮੁਸਤਫਾ
ਵੀਰਵਾਰ ਨੂੰ ਮੁਸਤਫਾ ਨੇ ਸਲਾਹਕਾਰ ਦਾ ਅਹੁਦਾ ਲੈਣ ਤੋਂ ਇਨਕਾਰ ਕਰਦੇ ਹੋਏ ਕਿਹਾ ਕਿ ਉਹ ਕਿਸੇ ਵੀ ਸਿਆਸੀ ਅਹੁਦੇ ‘ਤੇ ਕੰਮ ਨਹੀਂ ਕਰ ਸਕਦੇ। ਉਹਨਾਂ ਨੇ ਇਹ ਵੀ ਕਿਹਾ ਕਿ ਉਹ ਨਵਜੋਤ ਸਿੱਧੂ ਦੇ ਧੰਨਵਾਦੀ ਹਨ, ਜਿਹਨਾਂ ਨੇ ਇਸ ਅਹੁਦੇ ਦੀ ਪੇਸ਼ਕਸ਼ ਕੀਤੀ। ਪਰ ਉਹ ਇਸ ਅਹੁਦੇ ਨੂੰ ਸਵੀਕਾਰ ਨਹੀਂ ਕਰ ਸਕਦੇ। ਹਾਲਾਂਕਿ ਉਹਨਾਂ ਨੇ ਕਿਹਾ ਕਿ ਸਿੱਧੂ ਇੱਕ ਇਮਾਨਦਾਰ ਆਗੂ ਹਨ ਅਤੇ ਜਦੋਂ ਉਹ ਮੁੱਖ ਮੰਤਰੀ ਬਣਨਗੇ, ਤਾਂ ਉਹ ਮੁੱਖ ਮੰਤਰੀ ਬਣਨਗੇ, ਤਾਂ ਉਹ ਆਪਣੀਆਂ ਸੇਵਾਵਾਂ ਜ਼ਰੂਰ ਦੇਣਗੇ।
ਸਿੱਧੂ ਦੀ ਸਲਾਹਕਾਰੀ ਮੰਡਲੀ ‘ਤੇ ਵਿਵਾਦ
ਨਵਜੋਤ ਸਿੰਘ ਸਿੱਧੂ ਵੱਲੋਂ 4 ਸਲਾਹਕਾਰਾਂ ਦੀ ਨਿਯੁਕਤੀ ਤੋਂ ਪੰਜਾਬ ਕਾਂਗਰਸ ਦੇ ਵੀ ਕਈ ਆਗੂ ਹੈਰਾਨ ਹਨ। ਪਾਰਟੀ ‘ਚ ਚਰਚਾ ਹੈ ਕਿ ਜਦੋਂ 4 ਕਾਰਜਕਾਰੀ ਪ੍ਰਧਾਨ ਹਨ, ਤਾਂ ਸਿੱਧੂ ਨੂੰ ਸਲਾਹਕਾਰਾਂ ਦੀ ਕੀ ਲੋੜ ਪੈ ਗਈ। ਮੁਸਤਫਾ ਨੇ ਤਾਂ ਇਹ ਅਹੁਦਾ ਲੈਣ ਤੋਂ ਇਨਕਾਰ ਕਰ ਦਿੱਤਾ ਹੈ, ਪਰ ਹਾਲੇ ਵੀ ਇੱਕ ਨਾਂਅ ਅਜਿਹਾ ਹੈ, ਜਿਸ ‘ਤੇ ਵਿਵਾਦ ਹੋਣਾ ਤੈਅ ਮੰਨਿਆ ਜਾ ਰਿਹਾ ਹੈ।
ਮਾਲਵਿੰਦਰ ਮਾਲੀ ‘ਤੇ ਵਿਵਾਦ ਤੈਅ
ਦਰਅਸਲ, ਸਿੱਧੂ ਵੱਲੋਂ ਸਲਾਹਕਾਰ ਲਾਏ ਗਏ ਰਿਟਾਇਰਡ ਅਧਿਆਪਕ ਮਾਲਵਿੰਦਰ ਸਿੰਘ ਮਾਲੀ ਸ਼੍ਰੋਮਣੀ ਅਕਾਲੀ ਦਲ ਦੇ ਕੱਟੜ ਸਮਰਥਕ ਰਹੇ ਹਨ। ਪ੍ਰਕਾਸ਼ ਸਿੰਘ ਬਾਦਲ ਦੀ ਸਰਕਾਰ ਵੇਲੇ ਮਾਲੀ ਦਾ ਵਧੇਰੇਤਰ ਸਮਾਂ ਬਾਦਲ ਦੇ ਮੀਡੀਆ ਸਲਾਹਕਾਰ ਹਰਚਰਨ ਸਿੰਘ ਬੈਂਸ ਦੇ ਨਾਲ ਗੁਜ਼ਰਿਆ ਹੈ। ਇਸ ਤੋਂ ਪਹਿਲਾਂ ਉਹ ਗੁਰਚਰਨ ਸਿੰਘ ਟੋਹੜਾ ਦੇ ਨਾਲ ਹੀ ਅਕਾਲੀ ਮੁਹਿੰਮ ‘ਚ ਸ਼ਾਮਲ ਰਹੇ ਹਨ। ਮਾਲੀ ਸੋਸ਼ਲ ਮੀਡੀਆ ‘ਤੇ ਕੈਪਟਨ ਦੇ ਵੱਡੇ ਅਲੋਚਕ ਵੀ ਰਹੇ ਹਨ। ਦਿਲਚਸਪ ਹੈ ਕਿ ਸਿੱਧੂ ਦਾ ਸਲਾਹਕਾਰ ਬਣਨ ਤੋਂ ਬਾਅਦ ਵੀ ਉਹਨਾਂ ਦੇ ਅਕਾਊਂਟ ਤੋਂ ਕੈਪਟਨ ‘ਤੇ ਹਮਲੇ ਜਾਰੀ ਹਨ।
ਪਿਆਰੇ ਲਾਲ ਗਰਗ ਵੀ ਗੈਰ-ਕਾਂਗਰਸੀ
ਓਧਰ ਸਿੱਧੂ ਦੇ ਸਲਾਹਕਾਰ ਡਾ. ਪਿਆਰੇ ਲਾਲ ਗਰਗ ਵੀ ਗੈਰ-ਕਾਂਗਰਸੀ ਹਨ। ਗਰਗ ਦੇ ਕੋਲ ਕਾਂਗਰਸ ਦੀ ਮੁੱਢਲੀ ਮੈਂਬਰਸ਼ਿਪ ਵੀ ਨਹੀਂ ਹਨ। ਹਾਲਾਂਕਿ ਗਰਗ ਕਿਸੇ ਹੋਰ ਸਿਆਸੀ ਪਾਰਟੀ ਨਾਲ ਵੀ ਨਹੀਂ ਜੁੜੇ ਹੋਏ। ਉਹ ਫ਼ਰੀਦਕੋਟ ਯੂਨੀਵਰਸਿਟੀ ਦੇ ਰਜਿਸਟਰਾਰ ਰਹੇ ਹਨ ਅਤੇ ਹੁਣ ਸਿੱਖਿਆ ਮਾਹਰ ਅਤੇ ਸਮਾਜਸੇਵੀ ਦੇ ਰੂਪ ‘ਚ ਜਾਣੇ ਜਾਂਦੇ ਹਨ।
