ਬਠਿੰਡਾ। ਚੋਣਾਂ ਤੋਂ ਪਹਿਲਾਂ ਸਿਆਸਤਦਾਨ ਇੱਕ ਵਾਰ ਫਿਰ ਜਨਤਾ ਦੇ ਦੁਆਰੇ ਪਹੁੰਚਣ ਲੱਗੇ ਹਨ। ਪੰਜਾਬ ਦੇ ਖਜ਼ਾਨਾ ਮੰਤਰੀ ਅਤੇ ਬਠਿੰਡਾ ਸ਼ਹਿਰੀ ਹਲਕੇ ਤੋਂ ਵਿਧਾਇਕ ਮਨਪ੍ਰੀਤ ਬਾਦਲ ਵੀ ਹੁਣ ਆਪਣੇ ਹਲਕੇ ਵਿੱਚ ਸਰਗਰਮ ਹੋਣ ਲੱਗੇ ਹਨ।
ਸ਼ੁੱਕਰਵਾਰ ਸਵੇਰੇ ਮਨਪ੍ਰੀਤ ਬਾਦਲ ਆਪਣੇ ਕੁਝ ਸਮਰਥਕਾਂ ਦੇ ਨਾਲ ਅਚਾਨਕ ਸ਼ਹਿਰ ਦੇ Joggers park ਪਹੁੰਚ ਗਏ।
ਮਨਪ੍ਰੀਤ ਬਾਦਲ ਨੇ ਪਾਰਕ ਵਿੱਚ ਕਈ ਲੋਕਾਂ ਨਾਲ ਮੁਲਾਕਾਤ ਕੀਤੀ। ਇਸ ਦੌਰਾਨ ਕਈਆਂ ਨੇ ਮੰਤਰੀ ਜੀ ਦੇ ਸਾਹਮਣੇ ਆਪਣੀਆਂ ਸ਼ਿਕਾਇਤਾਂ ਰੱਖੀਆਂ ਜਿਨ੍ਹਾਂ ਨੂੰ ਮੰਤਰੀ ਜੀ ਨੇ ਲੱਗੇ ਹੱਥ ਹੱਲ ਕੀਤੇ ਜਾਣ ਦਾ ਭਰੋਸਾ ਵੀ ਦੇ ਦਿੱਤਾ।
ਮਨਪ੍ਰੀਤ ਬਾਦਲ ਲੰਮੇ ਸਮੇਂ ਤੱਕ ਗਿੱਦੜਬਾਹਾ ਤੋਂ ਵਿਧਾਇਕ ਚੁਣ ਕੇ ਵਿਧਾਨ ਸਭਾ ਪਹੁੰਚਦੇ ਰਹੇ ਹਨ, ਪਰ ਕਾਂਗਰਸ ਵਿੱਚ ਆਉਣ ਤੋਂ ਬਾਅਦ 2017 ਵਿੱਚ ਉਹਨਾਂ ਨੇ ਬਠਿੰਡਾ ਤੋਂ ਚੋਣ ਲੜੀ ਅਤੇ ਵਿਧਾਨ ਸਭਾ ਪਹੁੰਚੇ।
ਸਿਆਸੀ ਹਲਕਿਆਂ ਵਿੱਚ ਮਨਪ੍ਰੀਤ ਦੇ ਇਸ ਵਾਰ ਸੀਟ ਬਦਲਣ ਦੀ ਚਰਚਾ ਕਾਫ਼ੀ ਸਮੇਂ ਤੋਂ ਗਰਮ ਹੈ, ਪਰ ਹੁਣ ਬਠਿੰਡਾ ਵਿੱਚ ਲਗਾਤਾਰ ਵੱਧ ਰਹੀ ਸਰਗਰਮੀ ਤੋਂ ਉਨ੍ਹਾਂ ਦੇ ਮੁੜ ਬਠਿੰਡਾ ਤੋਂ ਹੀ ਚੋਣ ਦੰਗਲ ਵਿੱਚ ਉਤਰਣ ਦੇ ਸੰਕੇਤ ਮਿਲ ਰਹੇ ਹਨ।
ਬਠਿੰਡਾ ਨੂੰ ਮਨਪ੍ਰੀਤ ਦੀ ਪੁਰਾਣੀ ਪਾਰਟੀ ਅਕਾਲੀ ਦਲ ਦਾ ਗੜ੍ਹ ਮੰਨਿਆ ਜਾਂਦਾ ਹੈ। ਅਕਾਲੀ ਦਲ ਨੇ ਇਸ ਸੀਟ ‘ਤੇ ਆਪਣੇ ਪੁਰਾਣੇ ਯੋਧਾ ਸਰੂਪ ਚੰਦ ਸਿੰਗਲਾ ਨੂੰ ਮੈਦਾਨ ਵਿੱਚ ਵੀ ਉਤਾਰ ਦਿੱਤਾ ਹੈ।
2019 ਵਿੱਚ ਲੋਕ ਸਭਾ ਚੋਣਾਂ ਵਿੱਚ ਕਾਂਗਰਸ ਨੂੰ ਮਨਪ੍ਰੀਤ ਬਾਦਲ ਦੇ ਹਲਕੇ ਤੋਂ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ ਤੇ ਹਰਸਿਮਰਤ ਬਾਦਲ ਫਿਰ ਸੰਸਦ ਪਹੁੰਚਣ ‘ਚ ਕਾਮਯਾਬ ਰਹੀ ਸੀ।
ਲੋਕ ਸਭਾ ਚੋਣਾਂ ਦੌਰਾਨ ਰਾਜਾ ਵੜਿੰਗ ਕਾਂਗਰਸ ਦੇ ਉਮੀਦਵਾਰ ਸਨ। ਮਨਪ੍ਰੀਤ ਬਾਦਲ ਨੇ ਉਨ੍ਹਾਂ ਦੇ ਲਈ ਪ੍ਰਚਾਰ ਵੀ ਕੀਤਾ ਸੀ, ਪਰ ਵੜਿੰਗ ਚੋਣ ਹਾਰ ਗਏ। ਉਸਦੇ ਬਾਅਦ ਤੋਂ ਹੀ ਦੋਵਾਂ ਦੇ ਰਿਸ਼ਤੇ ਖਰਾਬ ਹੁੰਦੇ ਚਲੇ ਗਏ।
ਮਨਪ੍ਰੀਤ ਬਾਦਲ ਨੇ ਤਾਂ ਰਾਜਾ ਵੜਿੰਗ ਬਾਰੇ ਕਦੇ ਕੁਝ ਨਹੀਂ ਬੋਲਿਆ, ਪਰ ਹਾਲ ਹੀ ਵਿਚ ਰਾਜਾ ਵੜਿੰਗ ਮਨਪ੍ਰੀਤ ‘ਤੇ ਬਾਦਲਾਂ ਨਾਲ ਮਿਲੀਭੁਗਤ ਦਾ ਇਲਜ਼ਾਮ ਲਗਾ ਕੇ ਵੱਡਾ ਹਮਲਾ ਕਰ ਚੁੱਕੇ ਹਨ। ਲਿਹਾਜ਼ਾ ਮਨਪ੍ਰੀਤ ਬਾਦਲ ਨੂੰ ਅਕਾਲੀ ਦਲ ਦੇ ਨਾਲ-ਨਾਲ ਪਾਰਟੀ ਦੇ ਅੰਦਰੋਂ ਵੀ ਕੜੀ ਚੁਣੌਤੀ ਮਿਲ ਸਕਦੀ ਹੈ।
ਮਨਪ੍ਰੀਤ ਬਾਦਲ ਅਕਾਲੀ ਸਰਕਾਰ ਵੇਲੇ ਵੀ ਸੂਬੇ ਦੇ ਖਜ਼ਾਨਾ ਮੰਤਰੀ ਸਨ ਅਤੇ ਕੈਪਟਨ ਸਰਕਾਰ ਵਿੱਚ ਵੀ ਖਜ਼ਾਨੇ ਦੀ ਚਾਬੀ ਉਨ੍ਹਾਂ ਦੇ ਹੱਥ ਵਿੱਚ ਹੀ ਹੈ। ਇਸ ਸਾਲ ਸਰਕਾਰ ਦਾ ਆਖਰੀ ਪੂਰਨ ਬਜਟ ਪੇਸ਼ ਕਰਦੇ ਹੋਏ ਮਨਪ੍ਰੀਤ ਨੇ ਕਿਹਾ ਸੀ ਕਿ ਜੇਕਰ ਉਹ 2022 ਵਿੱਚ ਵੀ ਸੱਤਾ ਵਿਚ ਆਏ ਤਾਂ ਅਗਲੀ ਵਾਰ ਉਹ ਖਜ਼ਾਨਾ ਮੰਤਰੀ ਨਹੀਂ ਬਣਨਾ ਚਾਹੁੰਦੇ।
ਮਨਪ੍ਰੀਤ ਬਾਦਲ ਦੇ ਨਾਲ ਉਨ੍ਹਾਂ ਦੇ ਸਾਲੇ ਜੋਜੋ ਵੀ ਬਠਿੰਡਾ ਵਿੱਚ ਖਾਸ ਸਰਗਰਮ ਹਨ। ਮਨਪ੍ਰੀਤ ਦਾ ਪੂਰਾ ਕੰਮਕਾਜ ਉਹ ਹੀ ਸੰਭਾਲਦੇ ਹਨ ਪਿਛਲੇ ਦਿਨੀਂ ਗੈਰ ਕਾਨੂੰਨੀ ਮਾਈਨਿੰਗ ਨੂੰ ਲੈ ਕੇ ਜੋਜੋ ‘ਤੇ ਕਈ ਇਲਜ਼ਾਮ ਵੀ ਲੱਗੇ ਸਨ।
