ਚੰਡੀਗੜ੍ਹ। ਪੰਜਾਬ ਕਾਂਗਰਸ ਦੇ ਨਵੇਂ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਦਾ ਬਿਸਤਰਾ ਚੰਡੀਗੜ੍ਹ ਸਥਿਤ ਕਾਂਗਰਸ ਭਵਨ ਵਿਖੇ ਲੱਗ ਚੁੱਕਿਆ ਹੈ। ਸਿੱਧੂ ਲਈ ਬਕਾਇਦਾ ਨਵਾਂ ਬੈੱਡ ਖਰੀਦਿਆ ਗਿਆ ਹੈ। ਹਾਲਾਂਕਿ ਹਾਲੇ ਇਹ ਸਾਫ਼ ਨਹੀਂ ਹੈ ਕਿ ਸਿੱਧੂ ਹੁਣ ਨਿਯਮਿਤ ਤੌਰ ‘ਤੇ ਕਾਂਗਰਸ ਦਫ਼ਤਰ ‘ਚ ਹੀ ਰੁਕਣਗੇ ਜਾਂ ਕਦੇ-ਕਦਾਰ ਹੀ ਜਾਣਗੇ।
ਦਰਅਸਲ, 23 ਜੁਲਾਈ ਨੂੰ ਸਿੱਧੂ ਨੇ ਐਲਾਨ ਕੀਤਾ ਸੀ ਕਿ 15 ਅਗਸਤ ਤੋਂ ਉਹਨਾਂ ਦਾ ਬਿਸਤਰਾ ਕਾਂਗਰਸ ਦਫ਼ਤਰ ‘ਚ ਹੀ ਲੱਗੇਗਾ ਅਤੇ ਉਹ ਪਾਰਟੀ ਨੂੰ ਮਜਬੂਤ ਕਰਨ ਲਈ ਹਮੇਸ਼ਾ ਇਥੇ ਮੌਜੂਦ ਰਹਿਣਗੇ।
ਨਵੇਂ ਪ੍ਰਧਾਨ ਨਿਯੁਕਤ ਹੋਣ ਤੋਂ ਬਾਅਦ ਸਿੱਧੂ ਨੇ ਪਹਿਲੀ ਵਾਰ ਕਾਂਗਰਸ ਭਵਨ ਵਿਖੇ ਤਿਰੰਗਾ ਫਹਿਰਾਉਣ ਦੀ ਰਸਮ ਵੀ ਅਦਾ ਕੀਤੀ। ਇਸ ਤੋਂ ਬਾਅਦ ਸਿੱਧੂ ਯੂਥ ਕਾਂਗਰਸ ਦੀ ਤਿਰੰਗਾ ਯਾਤਰਾ ‘ਚ ਵੀ ਸ਼ਾਮਲ ਹੋਏ ਅਤੇ ਇੱਕ ਵਾਰ ਫਿਰ ਆਪਣੀ ਸਰਕਾਰ ਸਣੇ ਵਿਰੋਧੀਆਂ ‘ਤੇ ਜੰਮ ਕੇ ਵਰ੍ਹੇ।
ਨੌਜਵਾਨਾਂ ਨੂੰ ਟਿਕਟ ਦੁਆਵਾਂਗੇ- ਸਿੱਧੂ
ਸਿੱਧੂ ਨੇ ਕਿਹਾ ਕਿ ਉਹ ਪਾਰਟੀ ‘ਚ ਨੌਜਵਾਨਾਂ ਨੂੰ ਅੱਗੇ ਵਧਾਉਣਗੇ, ਜਿਸਦੇ ਚਲਦੇ ਵਿਧਾਨ ਸਭਾ ਚੋਣਾਂ ‘ਚ ਵੱਧ ਤੋਂ ਵੱਧ ਨੌਜਵਾਨਾਂ ਨੂੰ ਟਿਕਟ ਦਵਾਈ ਜਾਵੇਗੀ। ਉਹਨਾਂ ਦਾਅਵਾ ਕੀਤਾ ਕਿ ਟਿਕਟ ਮੈਰਿਟ ਦੇ ਅਧਾਰ ‘ਤੇ ਮਿਲੇਗੀ ਅਤੇ ਨੌਜਵਾਨਾਂ ਦੇ ਬਲਬੂਤੇ ਇੱਕ ਇਮਾਨਦਾਰ ਸਰਕਾਰ ਸੱਤਾ ‘ਚ ਆਵੇਗੀ।
ਜਨਤਾ ਨੇ ਵਿਧਾਇਕ ਚੁਣੇ, ਅਫਸਰ ਨਹੀਂ- ਸਿੱਧੂ
ਸਿੱਧੂ ਨੇ ਆਪਣੇ ਭਾਸ਼ਣ ‘ਚ ਅਫਸਰਸ਼ਾਹੀ ਦਾ ਮੁੱਦਾ ਵੀ ਚੁੱਕਿਆ। ਉਹਨਾਂ ਕਿਹਾ, “ਜਨਤਾ ਨੇ ਵਿਧਾਇਕਾਂ ਨੂੰ ਚੁਣਿਆ ਹੈ, ਅਧਿਕਾਰੀਆਂ ਨੂੰ ਨਹੀਂ। ਹੁਣ ਅਫਸਰਾਂ ਨੂੰ ਵਿਧਾਇਕਾਂ ਦੀ ਸੁਣਵਾਈ ਕਰਨੀ ਪਵੇਗੀ।”
ਮੈਂ ਖੁਦ ਸਿਸਟਮ ਦਾ ਸ਼ਿਕਾਰ ਹੋਇਆ- ਸਿੱਧੂ
ਸਿੱਧੂ ਨੇ ਕਿਹਾ ਕਿ ਅੱਜ ਦੀ ਸਿਆਸਤ ‘ਚ ਧੰਦਾ ਅਤੇ ਪਾਵਰ ਗੇਮ ਹੈ। ਉਹ ਸਿਆਸਤ ਨੂੰ ਬਦਲਣ ਆਏ ਹਨ। ਸਿੱਧੂ ਨੇ ਕਿਹਾ, “ਮੈਂ ਖੁਦ ਸਿਸਟਮ ਦਾ ਸ਼ਿਕਾਰ ਹੋਇਆ ਹਾਂ। ਸਿਸਟਮ ਇਮਾਨਦਾਰ ਲੋਕਾਂ ਦਾ ਇਸਤੇਮਾਲ ਕਰਦਾ ਹੈ। ਕੰਮ ਨਿਕਲਣ ‘ਤੇ ਦਰਕਿਨਾਰ ਕਰ ਦਿੱਤਾ ਜਾਂਦਾ ਹੈ, ਸ਼ੋਅ ਪੀਸ ਬਣਾ ਦਿੱਤਾ ਜਾਂਦਾ ਹੈ।”
ਸੁਖਬੀਰ-ਮਜੀਠੀਆ ‘ਤੇ ਤਿੱਖੇ ਵਾਰ
ਸਿੱਧੂ ਨੇ ਬਾਦਲਾਂ ‘ਤੇ ਵੀ ਜੋਰਦਾਰ ਹਮਲਾ ਬੋਲਿਆ। ਉਹਨਾਂ ਕਿਹਾ, “ਸੁਖਬੀਰ ਬਾਦਲ ਨੇ ਪੰਜਾਬ ਨੂੰ ਲੁੱਟ ਕੇ ਆਪਣਾ ਖਜਾਨਾ ਭਰਨ ਦਾ ਕੰਮ ਕੀਤਾ ਹੈ। 2 ਬੱਸਾਂ ਵਾਲੇ ਬਾਦਲ ਅੱਜ 4 ਹਜਾਰ ਬੱਸਾਂ ਦੇ ਮਾਲਕ ਬਣ ਗਏ ਹਨ।” ਉਹਨਾਂ ਕਿਹਾ ਕਿ ਉਹ ਬਾਦਲਾਂ ਦੀ ਮਾਲਕੀਅਤ ਵਾਲੀਆਂ ਥਾਵਾਂ ‘ਤੇ ਸਕੂਲ-ਹਸਪਤਾਲ ਖੋਲ੍ਹਣਗੇ।
ਸਿੱਧੂ ਨੇ ਮਜੀਠੀਆ ‘ਤੇ ਵੀ ਤਿੱਖੇ ਹਮਲੇ ਕੀਤੇ। ਸਿੱਧੂ ਨੇ ਕਿਹਾ ਕਿ ਉਹ ਮਜੀਠੀਆ ਖਿਲਾਫ਼ STF ਦੀ ਰਿਪੋਰਟ ਖੁੱਲ੍ਹਵਾਉਣਗੇ ਅਤੇ ਜਦੋਂ ਉਹਨਾਂ ਦੀ ਸੱਚਾਈ ਸਾਹਮਣੇ ਆਵੇਗੀ, ਮਜੀਠੀਆ ਨੂੰ ਲੁਕਣ ਦੀ ਥਾਂ ਨਹੀਂ ਮਿਲੇਗੀ। ਸਿੱਧੂ ਨੇ ਆਪਣੇ ਅੰਦਾਜ਼ ‘ਚ ਕਿਹਾ ਕਿ ਜਾਂ ਤਾਂ ਉਹਨਾਂ ਨੂੰ ਪਟੇ ਪੈਣਗੇ ਜਂ ਫਿਰ ਉਹ ਵਿਦੇਸ਼ ਭੱਜ ਜਾਣਗੇ।
‘ਆਪ’ ਨੇ ਦਿੱਤਾ ਡਿਪਟੀ ਸੀਐੱਮ ਦਾ ਆਫਰ- ਸਿੱਧੂ
ਆਮ ਆਦਮੀ ਪਾਰਟੀ ‘ਤੇ ਵੀ ਸਿੱਧੂ ਖਾਸੇ ਹਮਲਾਵਰ ਨਜ਼ਰ ਆਏ। ਸਿੱਧੂ ਨੇ ਕਿਹਾ ਕਿ ਆਮ ਆਦਮੀ ਪਾਰਟੀ ਉਹਨਾਂ ਨੂੰ ਡਿਪਟੀ ਸੀਐੱਮ ਬਣਾਉਣ ਦਾ ਆਫਰ ਦੇ ਰਹੀ ਸੀ, ਪਰ ਜਦੋਂ ਉਹਨਾਂ ਨੇ ਪੁੱਛਿਆ ਕਿ ਬਰਾਤ ਦਾ ਲਾੜਾ ਕੌਣ ਹੋਵੇਗਾ, ਤਾਂ ਉਹਨਾਂ ਕੋਲ ਜਵਾਬ ਨਹੀਂ ਸੀ।
