ਬਿਓਰੋ। ਅਫਗਾਨਿਸਤਾਨ ‘ਚ ਓਹੀ ਹੋਇਆ, ਜਿਸਦਾ ਡਰ ਸੀ। ਤਾਲਿਬਾਨ ਨੇ ਰਾਜਧਾਨੀ ਕਾਬੁਲ ‘ਤੇ ਵੀ ਕਬਜਾ ਕਰ ਲਿਆ ਹੈ। ਐਤਵਾਰ ਨੂੰ ਤਾਲਿਬਾਨ ਨੇ ਰਾਸ਼ਚਰਪਤੀ ਭਵਨ ਨੂੰ ਆਪਣੇ ਕਬਜੇ ਵਿੱਚ ਲੈ ਲਿਆ। ਰਾਸ਼ਟਰਪਤੀ ਭਵਨ ‘ਤੇ ਤਾਲਿਬਾਨ ਦੇ ਕਬਜੇ ਤੋਂ ਕੁਝ ਘੰਟੇ ਪਹਿਲਾਂ ਹੀ ਰਾਸ਼ਟਰਪਤੀ ਅਸ਼ਰਫ ਗਨੀ ਅਤੇ ਉਪ ਰਾਸ਼ਟਰਪਤੀ ਅਮੀਰੁੱਲਾਹ ਸਾਲੇਹ ਨੇ ਆਪਣੇ ਕੁਝ ਕਰੀਬੀਆਂ ਦੇ ਨਾਲ ਦੇਸ਼ ਛੱਡ ਦਿੱਤਾ।
ਇਸ ਵਿਚਾਲੇ ਦੇਸ਼ ‘ਚ ਅਮਨ ਬਹਾਲੀ ਲਈ ਇੱਕ ਤਾਲਮੇਲ ਪਰੀਸ਼ਦ ਬਣਾਈ ਗਈ ਹੈ। ਸਾਬਕਾ ਰਾਸ਼ਟਰਪਤੀ ਹਾਮਿਦ ਕਰਜ਼ਈ ਇਸਦੀ ਅਗਵਾਈ ਕਰਨਗੇ। ਇਸ ‘ਚ ਅਫਗਾਨਿਸਤਾਨ ਦੇ ਮੌਜੂਦਾ CEO ਅਬਦੁੱਲਾ ਅਬਦੁੱਲਾ ਅਤੇ ਜਿਹਾਦੀ ਨੇਤਾ ਗੁਲਬੁੱਦੀਨ ਹਿਕਮਤਯਾਰ ਵੀ ਹੋਣਗੇ।
ਅਮਰੀਕਾ ਜਾ ਰਹੇ ਹਨ ਗਨੀ?
ਗਨੀ ਦੇ ਕਰੀਬੀ ਸੂਤਰਾਂ ਮੁਤਾਬਕ, ਉਹ ਸ਼ਾਇਦ ਕਿਸੇ ਗੁਆਂਢੀ ਮੁਲਕ ਦੇ ਰਸਤੇ ਅਮਰੀਕਾ ਜਾ ਰਹੇ ਹਨ। ਉਹਨਾਂ ਦੇ ਨਾਲ ਉਪਰਾਸ਼ਟਰਪਤੀ ਸਾਲੇਹ ਅਤੇ ਉਹਨਾਂ ਦੇ ਕੁਝ ਬੇਹੱਦ ਕਰੀਬੀ ਲੋਕ ਹਨ। ਅਫਗਾਨ ਰੱਖਿਆ ਮੰਤਰੀ ਨੇ ਬਿਨ੍ਹਾਂ ਨਾਂਅ ਲਏ ਗਨੀ ਅਤੇ ਸਾਲੇਹ ‘ਤੇ ਤੰਜ ਕਸਿਆ।
ਕਾਬੁਲ ‘ਚ ਤਾਲਿਬਾਨੀ ਰਾਜ
ਕਾਬੁਲ ‘ਚ ਪੁਲਿਸਕਰਮੀ ਸਰੇਂਡਰ ਕਰ ਰਹੇ ਹਨ। ਉਹਨਾਂ ਨੇ ਆਪਣੇ ਹਥਿਆਰ ਵੀ ਤਾਲਿਬਾਨ ਨੂੰ ਸੌਂਪ ਦਿੱਤੇ ਹਨ। ਕਾਬੁਲ ਦੇ ਲੋਕਾਂ ਨੇ ਸਵੇਰੇ ਜਦੋਂ ਅੱਖਾਂ ਖੋਲ੍ਹੀਆਂ, ਤਾਂ ਤਾਲਿਬਾਨੀ ਦਰਵਾਜੇ ‘ਤੇ ਦਸਤਕ ਦੇ ਰਹੇ ਸਨ। ਦੁਪਹਿਰ ਹੁੰਦੇ-ਹੁੰਦੇ ਰਾਜਧਾਨੀ ‘ਤੇ ਉਹਨਾਂ ਦਾ ਕਬਜਾ ਹੋ ਗਿਆ ਅਤੇ ਕੁਝ ਦੇਰ ਬਾਅਦ ਰਾਸ਼ਟਰਪਤੀ ਅਤੇ ਉਪ ਰਾਸ਼ਟਰਪਤੀ ਦੇ ਦੇਸ਼ ਛੱਡਣ ਦੀ ਖ਼ਬਰ ਆ ਗਈ।
ਕੌਣ ਹਨ ਮੁੱਲਾ ਬਰਾਦਰ?
ਤਾਲਿਬਾਨ ਨਾਲ ਜੁੜੇ ਸੂਤਰਾਂ ਮੁਤਾਬਕ, ਮੁੱਲਾ ਬਰਾਦਰ ਅਖੰਦ ਅੰਤਰਿਮ ਸਰਕਾਰ ਦੇ ਮੁਖੀ ਹੋ ਸਕਦੇ ਹਨ। ਮੁੱਲਾ ਬਰਾਦਰ ਇਸ ਵੇਲੇ ਕਤਰ ਵਿੱਚ ਹਨ। ਫਿਲਹਾਲ ਉਹ ਤਾਲਿਬਾਨ ਦੇ ਕਤਰ ਵਿੱਚ ਦੋਹਾ ਸਥਿਤ ਦਫ਼ਤਰ ਦੇ ਸਿਆਸੀ ਪ੍ਰਮੁੱਖ ਹਨ। ਰਾਸ਼ਟਰਪਤੀ ਬਣਨ ਲਈ ਕਈ ਲੋਕਾਂ ਦੇ ਨਾਵਾਂ ‘ਤੇ ਵਿਚਾਰ ਕੀਤਾ ਜਾ ਰਿਹਾ ਹੈ, ਪਰ ਉਹਨਾਂ ਦਾ ਨਾਂਅ ਸਭ ਤੋਂ ਉੱਪਰ ਹੈ। ਉਹ ਅਫਗਾਨਿਸਤਾਨ ‘ਚ ਤਾਲਿਬਾਨ ਦੇ ਕੋ-ਫਾਊਂਡਰ ਹਨ।
ਅਫਗਾਨਿਸਤਾਨ ਦੇ ਹਾਲਾਤ ‘ਤੇ ਭਾਰਤ ਦੀ ਨਜ਼ਰ
ਭਾਰਤ ਨੇ ਲਗਾਤਾਰ ਅਫਗਾਨਿਸਤਾਨ ਦੇ ਹਾਲਾਤ ‘ਤੇ ਨਜ਼ਰ ਬਣਾਈ ਹੋਈ ਹੈ। ਅਫਗਾਨਿਸਤਾਨ ‘ਚ ਭਾਰਤੀ ਦੂਤਾਵਾਸ ਨਾਲ ਸੰਪਰਕ ਕਰਕੇ ਹਾਲਾਤ ਦੀ ਜਾਣਕਾਰੀ ਲਈ ਜਾ ਰਹੀ ਹੈ। ਭਾਰਤ ਸਰਕਾਰ ਲਗਾਤਾਰ ਅਫਗਾਨਿਸਤਾਨ ‘ਚ ਫਸੇ ਭਾਰਤੀਆਂ ਨੂੰ ਉਥੋਂ ਸੁਰੱਖਿਅਤ ਵਾਪਸ ਲਿਆਉਣ ਦੀਆਂ ਕੋਸ਼ਿਸ਼ਾਂ ‘ਚ ਲੱਗੀ ਹੈ। ਐਤਵਾਰ ਨੂੰ ਵੀ ਇੱਕ ਵਿਸ਼ੇਸ਼ ਫਲਾਈਟ ਦੇ ਜ਼ਰੀਏ ਕਈ ਭਾਰਤੀ ਮੂਲ ਦੇ ਨਾਗਰਿਕ ਅਫਗਾਨਿਸਤਾਨ ਤੋਂ ਵਾਪਸ ਲਿਆਂਦੇ ਗਏ।
ਤਾਲਿਬਾਨੀ ਰਾਜ ਭਾਰਤ ਲਈ ਖ਼ਤਰਾ- ਕੈਪਟਨ
ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਅਫਗਾਨਿਸਤਾਨ ‘ਚ ਤਾਲਿਬਾਨੀ ਰਾਜ ਨੂੰ ਭਾਰਤ ਲਈ ਖ਼ਤਰਾ ਦੱਸਿਆ ਹੈ। ਕੈਪਟਨ ਨੇ ਟਵੀਟ ਕਰਕੇ ਕਿਹਾ, “ਅਫਗਾਨਿਸਤਾਨ ‘ਚ ਤਾਲਿਬਾਨ ਦਾ ਰਾਜ ਸਾਡੇ ਦੇਸ਼ ਲਈ ਚੰਗਾ ਨਹੀਂ ਹੈ। ਇਹ ਭਾਰਤ ਖਿਲਾਫ਼ ਚੀਨ-ਪਾਕਿ ਗਠਜੋੜ ਨੂੰ ਮਜਬੂਤ ਕਰੇਗਾ(ਚੀਨ ਪਹਿਲਾਂ ਹੀ ਮਿਲਿਸ਼ੀਆ ਦੀ ਮਦਦ ਮੰਗ ਚੁੱਕਿਆ ਹੈ)। ਸੰਕੇਤ ਬਿਲਕੁੱਲ ਵੀ ਚੰਗੇ ਨਹੀਂ ਹਨ। ਸਾਨੂੰ ਸਾਡੀਆਂ ਸਾਰੀਆਂ ਸਰਹੱਦਾਂ ‘ਤੇ ਹੋਰ ਵੀ ਸਤਰਕ ਰਹਿਣ ਦੀ ਲੋੜ ਹੈ।”
Afghanistan’s fall to #Taliban doesn’t augur well for our country. It’ll strengthen the Sino-Pak nexus against India (China has already sought militia’s help on Uyghur). The signs are not at all good, we need to be extra vigilant now at all our borders.
— Capt.Amarinder Singh (@capt_amarinder) August 15, 2021
