ਚੰਡੀਗੜ੍ਹ। ਸਵਾ ਮਹੀਨੇ ਪਹਿਲਾਂ ਬੀਜੇਪੀ ਤੋਂ ਬਾਹਰ ਕੀਤੇ ਗਏ ਪੰਜਾਬ ਦੇ ਸਾਬਕਾ ਕੈਬਨਿਟ ਮੰਤਰੀ ਅਨਿਲ ਜੋਸ਼ੀ ਹੁਣ ‘ਤੱਕੜੀ’ ਵਿੱਚ ਸਵਾਰ ਹੋ ਗਏ ਹਨ। ਚੰਡੀਗੜ੍ਹ ‘ਚ ਸ਼੍ਰੋਮਣੀ ਅਕਾਲੀ ਦਲ ਦੇ ਇੱਕ ਸਮਾਗਮ ਦੌਰਾਨ ਪਾਰਟੀ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਨੇ ਜੋਸ਼ੀ ਨੂੰ ਪਾਰਟੀ ਵਿੱਚ ‘ਜੀ ਆਇਆਂ’ ਕਿਹਾ। ਦਿਲਚਸਪ ਇਹ ਵੀ ਹੈ ਕਿ ਜੋਸ਼ੀ ਇਕੱਲੇ ਨਹੀਂ ਆਏ, ਬਲਕਿ ਪੂਰੇ ਪੰਜਾਬ ਤੋਂ 13 ਹੋਰ ਚਿਹਰੇ ਵੀ ਲਿਆਏ ਹਨ, ਜੋ ਅਗਾਮੀ ਚੋਣਾਂ ‘ਚ ਅਕਾਲੀ ਦਲ ਨੂੰ ਮਜਬੂਤੀ ਦਵਾਉਣ ‘ਚ ਮਦਦ ਕਰਨਗੇ।
ਜੋਸ਼ੀ ਸਣੇ 2 ਉਮੀਦਵਾਰਾਂ ਦੇ ਨਾਵਾਂ ਦਾ ਐਲਾਨ
ਜਿਵੇਂ ਕਿ ਪਹਿਲਾਂ ਤੋਂ ਹੀ ਕਿਆਸ ਲਾਏ ਜਾ ਰਹੇ ਸਨ, ਸ਼੍ਰੋਮਣੀ ਅਕਾਲੀ ਦਲ ‘ਚ ਸ਼ਾਮਲ ਹੁੰਦੇ ਹੀ ਅਨਿਲ ਜੋਸ਼ੀ ਨੂੰ ਅੰਮ੍ਰਿਤਸਰ ਉੱਤਰੀ ਹਲਕੇ ਤੋਂ ਪਾਰਟੀ ਦਾ ਉਮੀਦਵਾਰ ਵੀ ਐਲਾਨ ਦਿੱਤਾ ਗਿਆ। ਇਸਦੇ ਨਾਲ ਹੀ ਜੋਸ਼ੀ ਦੇ ਕਰੀਬੀ ਦੱਸੇ ਜਾਣ ਵਾਲੇ ਰਾਜ ਕੁਮਾਰ ਗੁਪਤਾ ਨੂੰ ਵੀ ਸੁਖਬੀਰ ਬਾਦਲ ਨੇ ਪਠਾਨਕੋਟ ਦੀ ਸੁਜਾਨਪੁਰ ਸੀਟ ਤੋਂ ਉਮੀਦਵਾਰ ਐਲਾਨ ਦਿੱਤਾ ਹੈ। ਗੁਪਤਾ ਵੀ ਅਨਿਲ ਜੋਸ਼ੀ ਦੇ ਨਾਲ ਹੀ ਅਕਾਲੀ ਦਲ ਵਿੱਚ ਸ਼ਾਮਲ ਹੋਏ ਹਨ। ਇਸਦੇ ਨਾਲ ਹੀ ਜੋਸ਼ੀ ਨੂੰ ਸੀਨੀਅਤ ਮੀਤ ਪ੍ਰਧਾਨ ਅਤੇ ਗੁਪਤਾ ਨੂੰ ਮੀਤ ਪ੍ਰਧਾਨ ਵੀ ਨਿਯੁਕਤ ਕੀਤਾ ਗਿਆ ਹੈ।
ਆਪਣੇ ਨਾਲ ਲੀਡਰਾਂ ਦੀ ‘ਟੀਮ’ ਲਿਆਏ ਜੋਸ਼ੀ
ਅਨਿਲ ਜੋਸ਼ੀ ਦੇ ਨਾਲ ਜਿਹਨਾਂ ਹੋਰ ਬੀਜੇਪੀ ਆਗੂਆਂ ਨੇ ਅਕਾਲੀ ਦਲ ਜੁਆਇਨ ਕੀਤੀ ਹੈ, ਉਹਨਾਂ ‘ਚ ਬੀਜੇਪੀ ਯੂਥ ਪ੍ਰਧਾਨ ਰਹਿ ਚੁੱਕੇ ਮੋਹਿਤ ਗੁਪਤਾ, ਬੀਜੇਪੀ ਦੇ ਵੱਡੇ ਚਿਹਰੇ ਮਰਹੂਮ ਅਮਰਜੀਤ ਸਿੰਘ ਸ਼ਾਹੀ ਦੀ ਪਤਨੀ ਸੁਰਜੀਤ ਕੌਰ ਸ਼ਾਹੀ, ਲੁਧਿਆਣਾ ਤੋਂ ਉਮੀਦਵਾਰ ਰਹਿ ਚੁੱਕੇ ਕਮਲ ਜੇਟਲੀ, ਲੁਧਿਆਣਾ ਦੇ ਸਾਬਕਾ ਡਿਪਟੀ ਮੇਅਰ ਆਰ.ਡੀ. ਸ਼ਰਮਾ, ਪਠਾਨਕੋਟ ਦੇ ਸੁਜਾਨਪੁਰ ਤੋਂ ਰਾਜ ਕੁਮਾਰ ਗੁਪਤਾ(ਜਿਹਨਾਂ ਨੂੰ ਉਮੀਦਵਾਰ ਐਲਾਨਿਆ ਗਿਆ ਹੈ), ਫਤਿਹਗੜ੍ਹ ਚੂੜੀਆਂ ਤੋਂ ਸੁਰਿੰਦਰ ਸ਼ਿੰਦੀ, ਹਰਜੀਤ ਸਿੰਘ ਭੁੱਲਰ, ਮਿੰਟੂ ਸ਼ਰਮਾ, ਅਮਨ ਐਰੀ, ਸੁਮਿਤ ਸ਼ਾਸਤਰੀ, ਬਠਿੰਡਾ ਤੋਂ ਵਿਕਰਮ ਲੱਕੀ, ਵਿਕਰਮ ਐਰੀ ਅਤੇ ਪ੍ਰਭ ਰਟੌਲ ਦੇ ਨਾਂਅ ਸ਼ਾਮਲ ਹਨ।
ਬੀਜੇਪੀ ਦਾ ਵਿਗੜੇਗਾ ਗਣਿਤ, ਅਕਾਲੀਆਂ ਦੀਆਂ ਮੌਜਾਂ !
ਜਿਕਰਯੋਗ ਹੈ ਕਿ ਸ਼੍ਰੋਮਣੀ ਅਕਾਲੀ ਦਲ ਹਮੇਸ਼ਾ ਇੱਕ ਸਿੱਖ ਪਾਰਟੀ ਮੰਨੀ ਜਾਂਦੀ ਹੈ, ਜਿਸਦੇ ਜਿਆਦਾਤਰ ਚਿਹਰੇ ਜੱਟ ਸਿੱਖ ਭਾਈਚਾਰੇ ਨਾਲ ਤਾਲੁੱਕ ਰਖਦੇ ਹਨ। ਇਸਦੇ ਉਲਟ ਬੀਜੇਪੀ ਇੱਕ ਹਿੰਦੂ ਪਾਰਟੀ ਹੈ। ਅਕਾਲੀ ਦਲ ਅਤੇ ਬੀਜੇਪੀ ਦਾ ਗਠਜੋੜ ਵੀ ਅਸਲ ਮਾਇਨੇ ‘ਚ ਜੱਟ ਸਿੱਖ ਅਤੇ ਹਿੰਦੂ ਭਾਈਚਾਰੇ ਦਾ ਗਠਜੋੜ ਸੀ। ਪਰ ਬੀਜੇਪੀ ਨਾਲ ਗਠਜੋੜ ਤੋੜਨ ਤੋਂ ਬਾਅਦ ਅਕਾਲੀ ਦਲ ਲਗਾਤਾਰ ਹਿੰਦੂ ਚਿਹਰਿਆਂ ਦੀ ਤਲਾਸ਼ ‘ਚ ਸੀ, ਜੋ ਹੁਣ ਜੋਸ਼ੀ ਅਤੇ ਉਹਨਾਂ ਦੇ ਤਮਾਮ ਸਮਰਥਕਾਂ ਦੇ ਅਕਾਲੀ ਦਲ ਵਿੱਚ ਆਉਣ ਨਾਲ ਪੂਰੀ ਹੋ ਗਈ।
ਅਨਿਲ ਜੋਸ਼ੀ ਅਤੇ ਉਹਨਾਂ ਦੇ ਨਾਲ ਅਕਾਲੀ ਦਲ ਜੁਆਇਨ ਕਰਨ ਵਾਲੇ ਸਾਰੇ ਹੀ ਆਗੂ ਹਿੰਦੂ ਚਿਹਰੇ ਹਨ। ਲਿਹਾਜਾ ਸਿਆਸੀ ਮਾਹਰ ਇਸ ਨੂੰ ਬੀਜੇਪੀ ਲਈ ਵੱਡਾ ਝਟਕਾ ਅਤੇ ਅਕਾਲੀ ਦਲ ਲਈ ਵੱਡੀ ਮਜਬੂਤੀ ਵਜੋਂ ਵੇਖ ਰਹੇ ਹਨ। ਇਹਨਾਂ ਹਿੰਦੂ ਚਿਹਰਿਆਂ ਦੇ ਨਾਲ ਅਕਾਲੀ ਦਲ ਹੁਣ ਇੱਕ ਸੈਕੂਲਰ ਪਾਰਟੀ ਦੇ ਤੌਰ ‘ਤੇ ਆਪਣੀ ਸਾਖ ਕਾਇਮ ਕਰਨ ਦੀ ਕੋਸ਼ਿਸ਼ ਕਰੇਗੀ।
ਸੋਮਵਾਰ ਨੂੰ ਪਰਤਣਗੇ ਅੰਮ੍ਰਿਤਸਰ
ਅਕਾਲੀ ਦਲ ਜੁਆਇਨ ਕਰਨ ਦੇ 2 ਦਿਨਾਂ ਤੱਕ ਅਨਿਲ ਜੋਸ਼ੀ ਚੰਡੀਗੜ੍ਹ ਹੀ ਰਹਿਣਗੇ। ਸੋਮਵਾਰ ਯਾਨੀ 23 ਅਗਸਤ ਨੂੰ ਉਹ ਗੁਰੂ ਨਗਰੀ ਪਹੁੰਚਣਗੇ, ਜਿਸ ਤੋਂ ਬਾਅਦ ਉਹ ਸਭ ਤੋਂ ਪਹਿਲਾਂ ਦਰਬਾਰ ਸਾਹਿਬ ਜਾ ਕੇ ਨਤਮਸਤਕ ਹੋਣਗੇ। ਇਸ ਤੋਂ ਬਾਅਦ ਅੰਮ੍ਰਿਤਸਰ ਉੱਤਰੀ ਹਲਕੇ ‘ਚ ਆਪਣੇ ਸਮਰਥਕਾਂ ਨੂੰ ਇਕੱਠਾ ਕਰਕੇ ਚੋਣਾਂ ਦੀਆਂ ਤਿਆਰੀਆਂ ਵਿੱਚ ਜੁਟ ਜਾਣਗੇ।
ਕੌਣ ਹਨ ਅਨਿਲ ਜੋਸ਼ੀ?
ਅਨਿਲ ਜੋਸ਼ੀ ਨੇ ਸਾਲ 2000 ਵਿੱਚ ਬੀਜੇਪੀ ਜੁਆਇਨ ਕੀਤੀ ਸੀ। ਸਾਲ 2007 ਅਤੇ 2012 ਵਿੱਚ ਉਹ ਅੰਮ੍ਰਿਤਸਰ ਉੱਤਰੀ ਹਲਕੇ ਤੋਂ ਵਿਧਾਇਕ ਚੁਣੇ ਗਏ ਸਨ। ਉਹ ਬਾਦਲ ਸਰਕਾਰ ਵਿੱਚ ਮੰਤਰੀ ਵੀ ਰਹੇ। ਹਾਲਾਂਕਿ 2017 ਦੀਆਂ ਚੋਣਾਂ ਦੌਰਾਨ ਉਹਨਾਂ ਨੂੰ ਹਾਰ ਦਾ ਸਾਹਮਣਾ ਕਰਨਾ ਪਿਆ।
ਕਿਸਾਨਾਂ ਦੇ ਹੱਕ ਬਾਰੇ ਬੋਲਣ ਦੀ ਮਿਲੀ ਸਜਾ !
ਕਾਬਿਲੇਗੌਰ ਹੈ ਕਿ ਅਨਿਲ ਜੋਸ਼ੀ ਬੀਜੇਪੀ ਦੇ ਉਹਨਾਂ ਲੀਡਰਾਂ ਵਿੱਚੋਂ ਇੱਕ ਸਨ, ਜਿਹਨਾਂ ਨੇ ਖੁੱਲ੍ਹ ਕੇ ਕਿਸਾਨਾਂ ਦੇ ਹੱਕ ‘ਚ ਅਵਾਜ਼ ਬੁਲੰਦ ਕੀਤੀ। ਕਿਸਾਨ ਅੰਦੋਲਨ ਬਾਰੇ ਬੋਲਦਿਆਂ ਜੋਸ਼ੀ ਨੇ ਕਿਹਾ ਸੀ ਕਿ ਉੱਚੇ ਅਹੁਦਿਆਂ ‘ਤੇ ਬੈਠੇ ਲੋਕਾਂ ਨੂੰ ਕਿਸਾਨਾਂ ਦਾ ਦਰਦ ਨਹੀਂ ਪਤਾ। ਉਹਨਾਂ ਕਿਹਾ ਸੀ ਕਿ ਗਰਮੀ, ਧੁੱਪ ਅਤੇ ਮੀਂਹ ਵਿੱਚ ਕਿਸਾਨ ਅੰਦੋਲਨ ਜਾਰੀ ਹੈ, ਇਸ ਦੌਰਾਨ ਕਈ ਕਿਸਾਨਾਂ ਦੀ ਮੌਤ ਹੋ ਗਈ, ਪਰ ਉਹਨਾਂ ਦੇ ਦੁੱਖ-ਦਰਦ ਨੂੰ ਕਿਸੇ ਨੇ ਨਹੀਂ ਸਮਝਿਆ।
ਜੋਸ਼ੀ ਦੇ ਇਸ ਬਿਆਨ ਤੋਂ ਬਾਅਦ ਬੀਜੇਪੀ ਵੱਲੋਂ ਉਹਨਾਂ ਨੂੰ ਕਾਰਨ ਦੱਸੋ ਨੋਟਿਸ ਭੇਜਿਆ ਗਿਆ ਸੀ, ਜਿਸਦੇ ਜਵਾਬ ਵਿੱਚ ਉਹਨਾਂ ਨੇ ਸੂਬਾ ਬੀਜੇਪੀ ਪ੍ਰਧਾਨ ਤੋਂ ਹੀ ਕਿਸਾਨਾਂ ਨਾਲ ਜੁੜੇ ਕੁਝ ਸਵਾਲ ਪੁੱਛ ਲਏ। ਬੱਸ ਅਗਲੇ ਹੀ ਦਿਨ ਜੋਸ਼ੀ ਨੂੰ ਪਾਰਟੀ ਤੋਂ ਬਾਹਰ ਦਾ ਰਾਹ ਵਿਖਾ ਦਿੱਤਾ ਗਿਆ। ਬਾਅਦ ਵਿੱਚ ਜੋਸ਼ੀ ਨੇ ਕਿਹਾ ਕਿ ਉਹਨਾਂ ਨੂੰ ਕਿਸਾਨਾਂ ਦੀ ਅਵਾਜ਼ ਚੁੱਕਣ ਦੀ ਸਜਾ ਮਿਲੀ ਹੈ।
