ਬਿਓਰੋ। ਸੀਐੱਮ ਫੇਸ ‘ਤੇ ਸਸਪੈਂਸ ਵਿਚਾਲੇ ਆਮ ਆਦਮੀ ਪਾਰਟੀ ਨੇ 30 ਹੋਰ ਉਮੀਦਵਾਰਾਂ ਦੀ ਦੂਜੀ ਲਿਸਟ ਜਾਰੀ ਕਰ ਦਿੱਤੀ ਹੈ। ਇਸ ਲਿਸਟ ਵਿੱਚ ਸਾਬਕਾ IG ਕੁੰਵਰ ਵਿਜੇ ਪ੍ਰਤਾਪ ਸਿੰਘ ਅਤੇ ਸੇਵਾਮੁਕਤ DSP ਬਲਕਾਰ ਸਿੰਘ ਦਾ ਨਾਂਅ ਵੀ ਸ਼ਾਮਲ ਹੈ। ਇਸ ਤੋਂ ਇਲਾਵਾ ਗਾਇਕ ਅਨਮੋਲ ਗਗਨ ਮਾਨ ਅਤੇ ਬਲਕਾਰ ਸਿੱਧੂ ਨੂੰ ਵੀ ਟਿਕਟ ਦਿੱਤੀ ਗਈ ਹੈ।
ਹੋਰਨਾਂ ਪਾਰਟੀਆਂ ਤੋਂ ਆਏ ਦਲਜੀਤ ਗ੍ਰੇਵਾਲ ਭੋਲਾ, ਮਦਨ ਲਾਲ ਬੱਗਾ, ਮਨਵਿੰਦਰ ਗਿਆਸਪੁਰਾ ਅਤੇ ਕੁਲਵੰਤ ਸਿੱਧੂ ਨੂੰ ਵੀ ਟਿਕਟ ਦੇ ਦਿੱਤੀ ਗਈ ਹੈ। ਇਸ ਤੋਂ ਪਹਿਲਾਂ ਆਮ ਆਦਮੀ ਪਾਰਟੀ 10 ਮੌਜੂਦਾ ਵਿਧਾਇਕਾਂ ਨੂੰ ਮੈਦਾਨ ਵਿੱਚ ਉਤਾਰ ਚੁੱਕੀ ਹੈ। ਹੁਣ ਤੱਕ ‘ਆਪ’ ਨੇ ਕੁੱਲ 40 ਉਮੀਦਵਾਰਾਂ ਦੇ ਨਾਵਾਂ ਦਾ ਐਲਾਨ ਕਰ ਦਿੱਤਾ ਹੈ।
ਆਮ ਆਦਮੀ ਪਾਰਟੀ ਨੇ ਆਗਾਮੀ 2022 ਦੀਆਂ ਪੰਜਾਬ ਵਿਧਾਨ ਸਭਾ ਚੋਣਾਂ ਲਈ ਉਮੀਦਵਾਰਾਂ ਦੀ ਦੂਜੀ ਸੂਚੀ ਦਾ ਐਲਾਨ ਕੀਤਾ pic.twitter.com/wguIwucjrx
— AAP Punjab (@AAPPunjab) December 10, 2021
ਕਿਸ ਨੂੰ ਕਿਥੋਂ ਮਿਲੀ ਟਿਕਟ?
ਵਿਭੂਤੀ ਸ਼ਰਮਾ- ਪਠਾਨਕੋਟ
ਰਮਨ ਬਹਿਲ- ਗੁਰਦਾਸਪੁਰ
ਸ਼ਮਸ਼ੇਰ ਸਿੰਘ- ਦੀਨਾਨਗਰ
ਜਗਰੂਪ ਸਿੰਘ ਸੇਖਵਾਂ- ਕਾਦੀਆਂ
ਸ਼ੈਰੀ ਕਲਸੀ- ਬਟਾਲਾ
ਬਲਬੀਰ ਪੰਨੂ- ਫਤਿਹਗੜ੍ਹ ਚੂੜੀਆਂ
ਕੁੰਵਰ ਵਿਜੇ ਪ੍ਰਤਾਪ- ਅੰਮ੍ਰਿਤਸਰ ਉੱਤਰੀ
ਡਾ. ਇੰਦਰਬੀਰ ਨਿੱਝਰ- ਅੰਮ੍ਰਿਤਸਰ ਦੱਖਣੀ
ਲਾਲਜੀਤ ਭੁੱਲਰ- ਪੱਟੀ
ਬਲਕਾਰ ਸਿੰਘ-ਕਰਤਾਰਪੁਰ
ਡਾ. ਰਵਜੋਤ- ਸ਼ਾਮ ਚੁਰਾਸੀ
ਲਲਿਤ ਮੋਹਨ ਬੱਲੂ ਪਾਠਕ- ਨਵਾਂਸ਼ਹਿਰ
ਅਨਮੋਲ ਗਗਨ ਮਾਨ- ਖਰੜ
ਦਲਜੀਤ ਭੋਲਾ ਗ੍ਰੇਵਾਲ- ਲੁਧਿਆਣਾ ਪੂਰਬੀ
ਕੁਲਵੰਤ ਸਿੱਧੂ- ਆਤਮ ਨਗਰ
ਮਨਵਿੰਦਰ ਗਿਆਸਪੁਰਾ- ਪਾਇਲ
ਨਰੇਸ਼ ਕਟਾਰੀਆ- ਜੀਰਾ
ਜਗਦੀਪ ਕਾਕਾ ਬਰਾੜ- ਮੁਕਤਸਰ ਸਾਹਿਬ
ਗੁਰਦਿੱਤ ਸੇਖੋਂ- ਫ਼ਰੀਦਕੋਟ
ਬਲਕਾਰ ਸਿੱਧੂ- ਰਾਮਪੁਰਾ ਫੂਲ
ਨੀਨਾ ਮਿੱਤਲ- ਰਾਜਪੁਰਾ
ਹਰਮੀਤ ਪਠਾਨਮਾਜਰਾ- ਸਨੌਰ
ਚੇਤਨ ਸਿੰਘ- ਸਮਾਣਾ
ਮਦਨ ਲਾਲ ਬੱਗਾ- ਲੁਧਿਆਣਾ ਉੱਤਰੀ
ਜੀਵਨ ਲਾਲ ਸੰਗੋਵਾਲ- ਗਿੱਲ
ਗੁਰਮੀਤ ਸਿੰਘ ਖੁੱਡੀਆਂ- ਲੰਬੀ
ਘਨੌਰ- ਗੁਰਲਾਲ ਘਨੌਰ
ਭਦੌੜ- ਲਾਭ ਸਿੰਘ ਉਗੋਕੇ
ਭੋਆ- ਲਾਲ ਸਿੰਘ ਕਟਾਰੁਚਕ
ਜੰਡਿਆਲਾ- ਹਰਭਜਨ ਸਿੰਘ ਈਟੀਓ
10 ਮੌਜੂਦਾ ਵਿਧਾਇਕਾਂ ਨੂੰ ਦਿੱਤੀ ਟਿਕਟ
ਆਮ ਆਦਮੀ ਪਾਰਟੀ ਨੇ ਇੱਕ ਮਹੀਨੇ ਪਹਿਲਾਂ 10 ਉਮੀਦਵਾਰਾਂ ਦੀ ਪਹਿਲੀ ਲਿਸਟ ਜਾਰੀ ਕੀਤੀ ਸੀ, ਜਿਸ ਵਿੱਚ ਪਾਰਟੀ ਦੇ ਮੌਜੂਦਾ ਵਿਧਾਇਕਾਂ ਨੂੰ ਟਿਕਟ ਦਿੱਤੀ ਗਈ ਸੀ। ਉਸ ਲਿਸਟ ‘ਚ ਜੈ ਕਿਸ਼ਨ ਰੋੜੀ ਨੂੰ ਗੜ੍ਹਸ਼ੰਕਰ, ਸਰਵਜੀਤ ਕੌਰ ਮਾਣੂਕੇ ਨੂੰ ਜਗਰਾਓਂ, ਮਨਜੀਤ ਬਿਲਾਸਪੁਰ ਨੂੰ ਨਿਹਾਲ ਸਿੰਘ ਵਾਲਾ, ਕੁਲਤਾਰ ਸਿੰਘ ਸੰਧਵਾਂ ਨੂੰ ਕੋਟਕਪੂਰਾ, ਬਲਜਿੰਦਰ ਕੌਰ ਨੂੰ ਤਲਵੰਡੀ ਸਾਬੋ, ਪ੍ਰਿੰਸੀਪਲ ਬੁੱਧਰਾਮ ਨੂੰ ਬੁਢਲਾਡਾ, ਹਰਪਾਲ ਚੀਮਾ ਨੂੰ ਦਿੜ੍ਹਬਾ, ਅਮਨ ਅਰੋੜਾ ਨੂੰ ਸੁਨਾਮ, ਗੁਰਮੀਤ ਸਿੰਘ ‘ਮੀਤ’ ਹੇਅਰ ਨੂੰ ਬਰਨਾਲਾ ਅਤੇ ਕੁਲਵੰਤ ਪੰਡੋਰੀ ਨੂੰ ਮਹਿਲ ਕਲਾਂ ਤੋਂ ਉਮੀਦਵਾਰ ਐਲਾਨਿਆ ਗਿਆ ਹੈ।
9 ਵਿਧਾਇਕਾਂ ਨੇ ਛੱਡਿਆ ਸਾਥ
ਪਿਛਲੀ ਵਾਰ ਆਮ ਆਦਮੀ ਪਾਰਟੀ ਦੀ ਟਿਕਟ ‘ਤੇ 20 ਵਿਧਾਇਕ ਬਣੇ ਸਨ, ਪਰ 5 ਸਾਲਾਂ ਵਿੱਚ ਇਹਨਾਂ ਵਿੱਚੋਂ 9 ਵਿਧਾਇਕ ‘ਆਪ’ ਤੋਂ ਕਿਨਾਰਾ ਕਰ ਚੁੱਕੇ ਹਨ। ਇਹਨਾਂ ਵਿੱਚ ਸੀਨੀਅਰ ਵਕੀਲ ਐੱਚ.ਐੱਸ. ਫੂਲਕਾ, ਸੁਖਪਾਲ ਖਹਿਰਾ, ਪਿਰਮਲ ਸਿੰਘ ਖਾਲਸਾ, ਜਗਦੇਵ ਕਮਾਲੂ, ਨਾਜਰ ਸਿੰਘ ਮਾਨਸ਼ਾਹੀਆ, ਜਗਤਾਰ ਸਿੰਘ ਜੱਗਾ, ਰੁਪਿੰਦਰ ਕੌਰ ਰੂਬੀ, ਮਾਸਟਰ ਬਲਦੇਵ ਸਿੰਘ ਸ਼ਾਮਲ ਹਨ। ਖਰੜ ਤੋਂ ਮੌਜੂਦਾ ਵਿਧਾਇਕ ਕੰਵਰ ਸੰਧੂ ਕਾਫੀ ਪਹਿਲਾਂ ‘ਆਪ’ ਤੋਂ ਕਿਨਾਰਾ ਕਰ ਚੁੱਕੇ ਸਨ। ਹਾਲ ਹੀ ਵਿੱਚ ਕੰਵਰ ਸੰਧੂ ਨੇ ਸਿਆਸਤ ਤੋਂ ਸੰਨਿਆਸ ਲੈਣ ਦਾ ਐਲਾਨ ਵੀ ਕਰ ਦਿੱਤਾ। ਪਾਰਟੀ ਨੇ ਸੰਧੂ ਦੀ ਵਿਧਾਨ ਸਭਾ ਸੀਟ ਖਰੜ ਤੋਂ ਹੁਣ ਗਾਇਕਾ ਅਨਮੋਲ ਗਗਨ ਮਾਨ ਨੂੰ ਟਿਕਟ ਦਿੱਤੀ ਹੈ। ਇਸ ਤੋਂ ਇਲਾਵਾ ਰੋਪੜ ਤੋਂ ਵਿਧਾਇਕ ਅਮਰਜੀਤ ਸੰਦੋਆ ‘ਆਪ’ ਦਾ ਸਾਥ ਛੱਡ ਕੇ ਕਾਂਗਰਸ ਵਿੱਚ ਚਲੇ ਗਏ ਸਨ, ਪਰ ਕੁਝ ਵਕਤ ਬਾਅਦ ਹੀ ਉਹਨਾਂ ਨੇ ਘਰ ਵਾਪਸੀ ਕਰ ਲਈ ਸੀ। ਹਾਲਾਂਕਿ ਅਜੇ ਤੱਕ ਪਾਰਟੀ ਨੇ ਉਹਨਾਂ ਨੂੰ ਟਿਕਟ ਨਹੀਂ ਦਿੱਤੀ ਹੈ।
ਅਜੇ ਤੱਕ ਸੀਐੱਮ ਫੇਸ ਦਾ ਐਲਾਨ ਨਹੀਂ
‘ਆਪ’ ਕਨਵੀਨਰ ਅਰਵਿੰਦ ਕੇਜਰੀਵਾਲ ਲਗਾਤਾਰ ਪੰਜਾਬ ਦਾ ਦੌਰਾ ਕਰ ਰਹੇ ਹਨ, ਪਰ ਪਾਰਟੀ ਨੇ ਅਜੇ ਤੱਕ ਸੀਐੱਮ ਫੇਸ ਦਾ ਐਲਾਨ ਨਹੀਂ ਕੀਤਾ ਹੈ। ਮੰਨਿਆ ਜਾ ਰਿਹਾ ਹੈ ਕਿ ਪਾਰਟੀ ਭਗਵੰਤ ਮਾਨ ਨੂੰ ਸੀਐੱਮ ਉਮੀਦਵਾਰ ਐਲਾਨੇ ਜਾਣ ਲਈ ਤਿਆਰ ਨਹੀਂ ਹੈ, ਪਰ ਮਾਨ ਤੋਂ ਇਲਾਵਾ ਪਾਰਟੀ ਕੋਲ ਇਸ ਕੱਦ ਦਾ ਦੂਜਾ ਕੋਈ ਲੀਡਰ ਵੀ ਨਹੀਂ ਹੈ। ਪਹਿਲਾਂ ਨਵਜੋਤ ਸਿੰਘ ਸਿੱਧੂ ਦੇ ਪਾਰਟੀ ਵਿੱਚ ਆਉਣ ਦੀ ਚਰਚਾ ਸੀ, ਪਰ ਹੁਣ ਉਹ ਕਿਆਸ ਵੀ ਲਗਭਗ ਖਤਮ ਹੋ ਚੁੱਕੇ ਹਨ।
ਭਗਵੰਤ ਮਾਨ ਵਿਧਾਨ ਸਭਾ ਚੋਣ ਲੜਨਗੇ ਜਾਂ ਨਹੀਂ?
ਇੱਕ ਸਵਾਲ ਇਹ ਵੀ ਹੈ ਕਿ…ਕੀ ਭਗਵੰਤ ਮਾਨ ਇਸ ਵਾਰ ਵਿਧਾਨ ਸਭਾ ਚੋਣ ਲੜਨਗੇ ਜਾਂ ਨਹੀਂ। ਮਾਨ ਇਸ ਵੇਲੇ ਪੰਜਾਬ ਇਕਾਈ ਦੇ ਪ੍ਰਧਾਨ ਹਨ ਅਤੇ ਸੰਗਰੂਰ ਤੋਂ ਲੋਕ ਸਭਾ ਸਾਂਸਦ ਹਨ। ਪਿਛਲੀ ਵਾਰ ਉਹਨਾਂ ਨੇ ਜਲਾਲਾਬਾਦ ਤੋਂ ਸੁਖਬੀਰ ਬਾਦਲ ਦੇ ਖਿਲਾਫ਼ ਚੋਣ ਲੜੀ ਸੀ, ਪਰ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ।
